Tural İsmayılov: "Rusiya, ümumiyyətlə, Ermənistana müstəqil qərarlar verən bir ölkə kimi yanaşmır, ona qeyri-ciddi bir ölkə kimi baxır"
Rusiya Federasiya Şurasının sədri Valentina Matviyenko İrəvana səfər edəcək. Bu barədə Federasiya Şurasının mətbuat xidməti məlumat yayıb.
Bildirilib ki, Matviyenko Rusiya-Ermənistan dövlətlərarası münasibətlərinə yeni təkan vermək üçün İrəvana səfər edəcək.
Eyni zamanda, bu günlərdə Ermənistan parlamenti Avropa Birliyinə üzvlük barədə qanunun müzakirəsini təxirə salıb. Bu məqamda Matviyenkonun səfərini Rusiya-Ermənistan münasibətlərinin yenidən dizayn olunması kimi qəbul etmək olarmı? Nələr baş verə bilər?
Baki-xeber.com-a açıqlamasında politoloq Tural İsmayılov bildirdi ki, faktiki olaraq bu gün Rusiya-Ermənistan münasibətlərində yaranan gərginlik öz pik həddinə çatıb: "Bu kontekstdə də Rusiya ilə Ermənistan arasında siyasi və iqtisadi iplər hələ qopmayıb. Nəzərə almaq lazımdır ki, Rusiya, ümumiyyətlə, Ermənistana müstəqil qərarlar verən bir ölkə kimi yanaşmır, ona qeyri-ciddi bir ölkə kimi baxır. Əsasən bu ondan qaynaqlanır ki, Ermənistan dövlətini Rusiya özü yaradıb və bilir ki, bu qurama bir dövlətdir.
Bu gün Qərb Ermənistan hakimiyyətinin ikiüzlülüyündən istifadə edərək nə qədər antirus təbliğatı aparsa da, Rusiya yaxşı başa düşür ki, Ermənistan ondan kifayət qədər ciddi iqtisadi və siyasi asılılığa malikdir. Eyni zamanda, Ermənistan Avrasiya İqtisadi İttifaqından (Aİİ) çox ciddi şəkildə asılıdır. Bu gün Qərbdən və Bayden administrasiyasından Ermənistana nə qədər vədlər verilsə də, o, Rusiyanın patronajlığı altında olan bir iqtisadi birlikdən - Aİİ-dən
asılılığını azalda bilməyib, əksinə, bu asılılıq ilbəil artmaqdadır.
Paşinyan və komandası KTMT ilə əlaqələri korlasalar da, lakin bu qurumdan çıxmağa cəsarət göstərə bilmir. Son günlər KTMT rəhbərliyi vurğulayıb ki, Ermənistan hələ uzun müddət bu hərbi birlikdə qalacaq.
Ermənistənda Rusiyanın hərbi bazası, üfüqarxası radar sistemi var və bundan əlavə Metsamor AES də Rusiyanın nəzarətindədir. Ona görə də Ermənistanı Rusiyanın caynağından heç kim qopara bilməz. Bu səbəbdən də düsünürəm ki, Matviyenkoun səfəri zamanı özəlliklə Paşinyana Avropa İttifaqı və Amerika ilə münasibətlərə görə xəbərdarlıq ediləcək. Fikrimcə, Rusiya Təhlükəsizlik Federasiya Şurası rəhbərinin Ermənistana səfəri Paşinyana Rusiyanın xəbərdarlıqlarını çatdırmaq üçün nəzərdə tutulub. Ermənistan bunu gözləyirdi. Xatırlayırsınızsa, Ermənistan parlamentində Avropaya inteqrasiya qanununun müzəkirəsinin təxirə salındığı gün sipiker Alen Simonyan bu addımı jurnalistlərə şərh edərkən dedi ki, yaxın günlarda çox ciddi hadisələr baş verə bilər. Fikrimizcə, Matviyenkonun Ermənistana səfəri məhz Simonyanın eyham vurduğu "çox ciddi hadisələr"in başlanğıcı ola bilər".
Ekspertin də qeyd etdiyi kimi, Valentina Matviyenkonun bu səfəri Rusiyadan Ermənistana doğru baş verə biləcək "selin" ilkin əlamətləri də ola bilər. Artıq Putin Trampla anlaşdığına əmindir. Ona görə də özünün postmüharibə siyasətini qurmaqla məşğuldur. Rusiyanin hazırda Ermənistanda 15 mindən çox hərbi kontingenti var. Üstəgəl, ölkənin faktiki olaraq bütün strateji obyektləri Rusiyanın nəzarəti altında fəaliyyət göstərir. Ölkənin bir nömrəli strateji obyekti Metsamor AES-dir, o da Rusiyanın yarımhərbi kontingentinin nəzarəti altında çalışır. Rusiya yenidən Ermənistanda hakimiyyəti öz tərəfdarlarına həvalə etməyin yolları barədə düşünür. Lakin bu, bölgədə ümumi təhlükəsizlik arxitekturası üçün kifayət qədər təhlükəli tendensiya kimi qiymətləndirilməlidir".
Dəniz NƏSİRLİ
