YYSİB sədri, Kitabxana.net portalının rəhbəri, Prezident təqaüdçüsü, yazıçı-kulturoloq Aydın Xan Əbilov “Bakı-Xəbər” qəzetini 20 illik yubileyi münasibəti ilə təbrik edib.
Təbrikdə deyilir:
“Çox hörmətli Aydın müəllim və dəyərli dostlar!
Çağdaş Azərbaycan mətbuatı tarixində özünəməxsus qəzetçilik ənənələri, azad, fərqli media siyasəti və intellektual-analitik informasiya mədəniyyəti ilə xüsusi yol açmağı bacarmış sevimli “Bakı-Xəbər” qəzetinin ilk sayının işıq üzü görməsinin 20 illiyi münasibəti ilə özümün, eləcə də Yeni Yazarlar və Sənətçilər İctimai Birliyinin çoxsaylı üzvləri adından Sizi təbrik edirəm.
Azərbaycan oxucusu gördü ki, yarandığı ilk gündən etibarən “Bakı-Xəbər” qəzeti dünya qəzetçilik standartlarını, eləcə də əsası “Əkinçi” ilə başlanan milli mətbuatımızın sivil-estetik dəyərlərini əsas götürən ciddi media-informasiya təsisatıdır. Özünüzün səviyyəli materialları, müstəqil mövqeyi, azad redaksiya siyasəti, jurnalist peşəkarlığı, yaradıcı əməkdaşların kreativ yanaşmaları ilə çoxsaylı mətbuat oqranları arasında fərqlənə bildi. 20 il bundan əvvəl qəzet kimi yola çıxan, daha sonralar sayt və İnternet TV kimi zəmanəmizin ən modern texnoloji dəyişikliklərə cavab verən onlayn yeni media orqanı kimi ölkəmizdə, qonşu dövlətlərdə, eləcə də beynəlxalq aləmdə nüfuz qazana bilmisiniz. Məhz bu cəhətlərinə görədir ki, azad sözün əsasını təşkil edən qərəzsiz informasiya yayımı, ciddi təhlillər, səviyyəli tənqid və intellektual analizlər, publisistik yazılar, ekspert rəyləri, şərhlər və orijinal xəbərçilik siyasətinizlə media tariximizdə özünüzəməxsus yerinizi qoruya bilirsiniz.
“Bakı-Xəbər” qəzeti/saytı ölkəmizin ictimai-siyasi, sosial-mədəni düşüncəsinə təsir edən ciddi bir mətbu orqanı olmaqla yanaşı, müstəqil qəzetçilik məktəbi, azad media təsisati kimi də tanınıb və Azərbaycan oxucusuna, cəmiyyətimizə onlarla dəyərli imza sahiblərinin düşüncə məhsullarını təqdim etməklə çağdaş mətbuat aləmimizi zənginləşdirməkdədir.
İnanırıq ki, sizlər milli mənafeyimizin inkişafına xidmət edəcək, Azərbaycan həqiqətlərinin dünyaya çatdırılmasına, azad sözün inkişafına yönəlik bu müqəddəs ziyalı missiyanızı bundan sonra da uzun müddət uğurla davam etdirəcəksiniz.
Möhtərəm Aydın müəllim və dəyərli dostlar!
Sədri olduğum Yeni Yazarlar və Sənətçilər İctimai Birliyinin çoxsaylı üzvləri adından sizləri səmimi-qəlbdən təbrik edir, məsul, davamlı fəaliyyətinzdə yeni-yeni uğurlar arzulayırıq”.
.jpg)