Şou sənətçilərimiz sığorta bazarından niyə qaçır?

Tarix: 02.05.2014 / 18:18
Bölmə: Mədəniyyət

Günay İbrahimli: "Həyatımı 100 000 manata sığortalamışam"

Röya Ayxanın mətbuat katibi Kənan Bayramov: "Normal sığorta şirkəti olarsa, təbii ki, Röya xanım səsini sığorta elətdirər"

Yaşar Cəlilov: "Səyahətə və ya konsert səfərlərinə gedəndə həyatımı bir neçə günlük sığortalatdırdım"

Leyla Ramazanlı: "Ağlımı sığorta elətdirərdim"

Rəqqasə Aytən: "Bədən üzvlərini deyil, rəqsimi sığortalatdırardım"

Xatunun mətbuat katibi Rauf Şirinoğlu: "Xatun xanım nə öz bədən üzvlərini, nə də səsini sığorta elətdirib"

Sevda Sanaliyeva: "Səsimi sığorta elətdirərdim"

Sığorta xidmətlərindən faydalanan insanlar çoxdur. Bir çox dünya ulduzları kimi, bizim sənətçilər də sığortalanmağa dəb kimi baxmaqla yanaşı, sahib olduqları mülklərinin taleyini göz altına almaq üçün bu imkandan bəhrələnirlər. Avtomobili ilə tez-tez qəza törədən sənət əhli böyük maddi itkidən yayınmaq üçün bu vasitəyə əl atır.
Bir müddət əvvəl maşını yanan Xatirənin sığorta kağızı olduğundan, itkisi az olub. Bu hadisədən sonra bir neçə həmkarı "ehtiyat tədbirinə" əl atıb.
Qeyd edək ki, xarici ölkələrdə sənətçilər əmlakları ilə yanaşı, bədənlərinin müxtəlif hissəsini də sığortaladıqlarını ictimaiyyətdən gizlətmirlər. Bizim mentalitet isə bu dəbin formalaşmasına imkan yaratmır.
Tanınmış dünya ulduzları əsasən öz səslərini sığorta elətdirir. Model sahəsində çalışan xanımlar öz bədənlərini sığortalayır.
Rusiya şou-biznesində özünəməxsus səsi ilə seçilən bəstəkar-müğənni Polina Qaqarina səsini müxtəlif risqlərə qarşı 1 milyon dəyərində sığorta elətdirib. Sığorta sertifikatı isə müğənniyə "Qızıl Qrammofon" mükafatının təqdimatı mərasimində təqdim edilib.
Məlumat üçün qeyd edək ki, səsini ilk dəfə sığortalayan ifaçı Hollivudun əfsanəvi müğənnisi Marlen Ditrix olub. Bundan başqa, Luçano Pavarotti, Tina Törner, Mik Caqqer, Rod Stüart və digər sənətkarlar da səslərini sığortalayanlar sırasındadır.
Ayaq, sinə, üz, hətta gülüşü sığortalayan sənətçilər var. Heç də təəccüblü deyil. İnsanların bədən üzvlərinin sığortalanması sığorta məhsullarından biridir. Ən çox da bunu dünya şöhrətli ulduzlar edir. Bədən əzalarının sığortalanması növü üzrə ən bahalı sığorta müğənni Meray Keriyə aiddir. O, ayaqlarını bir milyard dollar məbləğində sığortalatmaqla dünyanın ən bahalı sığortasını həyata keçirib. Müğənni Tina Törner də ayaqlarını 3 milyon 200 min dollara sığortalayıb. Onun sinəsinin qiyməti isə 780 min dollardır. Almaniyalı top-model Haydi Klumun ayaqlarını 2 milyon 200 min dollara sığorta etdirib. Onun bir ayağının dəyəri o biri ayağından bahadır. Səbəbi isə bir ayağında çapığın olmasıdır. Tanınmış müğənni Rihanna da ayaqlarını 1 milyon dollara sığortalayıb. Müğənni Cenifer Lopes isə yanını sığortalayıb - 300 min dollara. Müğənni Dolli Partonun sinəsi isə 600 min dollara sığortalanıb.
Məşhur idmançılar arasında da bu sığorta növündən istifadə halları var. Bu sahədə ən bahalı sığortanı futbolçu Devid Bekhem etdirib. Bu oyunçunun ayaqlarının dəyəri 70 milyon dollardır.
Gülüşün sığortalanması faktı isə kino aktrisası Amerika Ferrera məxsusdur. Onun gülüşünün sığorta qiyməti 10 milyon dollar dəyərindədir.
Azərbaycanda isə ilk dəfə olaraq ölkəmizi "Eurovision-2011" musiqi yarışmasında təmsil edən Nigar Camalın üzü sığorta etdirilib. Bir sığorta şirkəti tərəfindən Nigar Camalın üzü 1,5 milyon manat məbləğində sığortalanıb. Həmin vaxt risqlərin 50 faizdən çox hissəsi Almaniyanın "Hannover Life Re" təkrar sığorta şirkətinə ötürülüb.
Elə bu yaxınlarda tanınmış müğənni Günay İbrahimli öz həyatını 100 000 manata sığortalayıb. Günay İbrahimlinin qəzetimizə verdiyi məlumata görə, bu təklifi sığorta şirkətindən alıb: "Təklif sığorta şirkətindən gəldi. Həmin insanların məclisində çıxış etmişdim. Onlar da ifamı bəyəndilər. İnsanın həyatda başına hər iş gələ bilər. Sabahımızdan əmin deyilik. Buna görə də təklifi məmnuniyyətlə qəbul etdim. Artıq həyatım sığortalanıb, nəsə baş versə, mənə 100 min manat ödəniləcək".
Tanınmış müğənni Röya Ayxanın mətbuat katibi Kənan Bayramov "Bakı-Xəbər"ə açıqlamasında qeyd etdi ki, ölkədə normal şəkildə fəaliyyət göstərən sığorta şirkəti mövcud deyil: "Normal sığorta şirkəti olarsa, təbii ki, Röya xanım səsini sığorta elətdirər".
Tanınmış müğənni Xuraman Şuşalı da sığortanın insanın ümid yeri olduğunu düşünür və bildirdi ki, bu günə qədər bir neçə avtomobili idarə edib və onların hər biri vaxtlı-vaxtında sığortalanıb: "Mənim dəfələrlə qəza keçirdiyim barədə xəbəriniz var. Hər dəyən ziyanı şirkət ödəyib və maliyyə itkim olmayıb. Bu səbəbdən də sığorta mənim üçün vacibdir".
Müğənni Leyla Ramazanlı da ağlını sığorta etdirməyə üstünlük verir: "Əgər mümkün olsa, ağlımı sığorta etdirərdim. Allah heç kəsin ağlını başından almasın. Əsas budur".
Rəqqasə Aytən isə daha çox rəqsinə dəyər verir. O vurğuladı ki, bədən üzvlərini deyil, rəqsini sığortalatdıra bilər.
Məşhur müğənni Cəmilə bizimlə söhbətində qeyd etdi ki, hər bir şey yaradana məxsusdur: "Hər bir kəsin səsini də, bədənini də Allah qorusun. Sığorta şirkətləri tərəfindən belə bir təklif gəlsəydi, heç kimdə olmayan səsimi sığortalayardım".
Gənc və populyar müğənni Yaşar Cəlilov "Bakı-Xəbər"ə açıqlamasında qeyd etdi ki, sığorta çox gözəl mövzudur və sahədir: "Hər bir sahədə çalışan şəxs sığortaya meyl etməlidir. Cözün düzü, hələlik evimi və avtomobilimi sığorta elətdirmişəm. Səyahətə və ya konsert səfərlərinə gedəndə bir neçə günlük özümü sığortalatdırmışam. Ola bilsin ki, gələcəkdə həyatımı bir neçə günlük deyil, həmişəlik sığortalayım".
Tanınmış Xatunun mətbuat katibi Rauf Şirinoğlu qəzetimizə açıqlamasında qeyd etdi ki, ölkədə fəaliyyət göstərən müğənnilər bu sahəyə maraqlı deyil: "Xatun xanım nə öz bədən üzvlərini, nə də səsini sığorta elətdirib. Heç bu barədə düşünmür. Ancaq əmlakını sığorta elətdirib".
R.Şirinoğlu düşünür ki, müğənnilər səs tellərini sığorta elətdirməlidir: "Çünki onlar səsinə görə sevilirlər".
Tanınmış müğənni Sevda Sanaliyeva "Bakı-Xəbər"ə açıqlamasında qeyd etdi ki, sığorta barəsində düşünməyib: "Ancaq belə bir təklif olarsa, səsimi sığorta elətdirərəm".