"Sənət dözüm tələb edir"

Tarix: 30.04.2014 / 11:35
Bölmə: Mədəniyyət

Tamaşanın başlanmasını bildirən üçüncü zəngin çalınmasına az qalıb. Bir azdan Dövlət Musiqili Komediya Teatrında "Evlənmə" tamaşası oynanılacaq. Bu günlərdə "Əməkdar artist" fəxri adına layiq görülən Emma Məlikova Qoqolun məşhur əsərində Alina Pantelemonovna obrazı ilə tamaşaçıların görüşünə gəlir.
Qrim otağında oturub növbəti dəfə səhnəyə çıxmağa hazırlaşan istedadlı aktrisa ilə söhbətləşirik. 1949-cu ildə anadan olan Emma Məlikova 1976-cı ildə Azərbaycan Dövlət Mədəniyyət və İncəsənət Universitetinin "Musiqili komediya aktyorluğu" fakültəsini bitirib. Gözəl vokal səsə (metso-soprano) malik olduğuna görə tələbə ikən o zamankı Dövlət Musiqili Komediya Teatrının aktyor truppasına qəbul olunub. Bir neçə illik fasiləni çıxmaq şərtilə elə o vaxtdan bu teatrda çalışır.
Doğma teatrın səhnəsində Nargilə (Fikrət Əmirov, Məhərrəm Əlizadə "Gözün aydın"), Жalə (Emin Sabitoğlu, Rüfət Əhmədzadə "Hələlik"), Ballı (Oqtay Kazımi, Ramiz Heydər "Qızıl toy"), Mülayim (Zakir Bağırov, Məcid Şamxalov "Qaynana"), Nabat (Süleyman Ələsgərov, Şıxəli Qurbanov "Özümüz bilərik"), Səlbi (Səid Rüstəmov, Məmməd Səid Ordubadi "Beş manatlıq gəlin"), Kəblə Qubadın arvadı (Üzeyir Hacıbəyov "Ər və arvad"), Təşəkkür (Ramiz Mustafayev, Cahangir Məmmədov "Volqalı canan"), Səməni (Süleyman Ələsgərov, İsi Məlikzadə "Subaylarınızdan görəsiniz"), Qızbacı (Emin Sabitoğlu, Sabit Rəhman "Hicran"), Yengə (Üzeyir Hacıbəyov "O olmasın, bu olsun"), Xumar ( Sərdar Fərəcov, Əziz Nesin "Şəhərdə manyak var") kimi müxtəlif rollar ifa edib.
- Emma xanım, yəqin ki, tələbəlik illərini yaxşı xatırlayırsınız...
-Əlbəttə. 1972-ci ildə Dövlət İncəsənət İnstitutuna qəbul olundum. Axşam şöbəsində təhsil alırdım. Çox gözəl müəllimlərim, istedadlı kurs yoldaşlarım olub. 1976-cı ildə təhsilimi başa vurub diplom aldım, buna baxmayaraq, hələ ikinci kursda oxuyandan - 1974-cü ildən Azərbaycan Dövlət Musiqili Komediya Teatrında işə qəbul olunmuşdum. Bu da hər sənət adamına nəsib olan xoşbəxtlik deyildi. O zamanlar teatrımızın səhnəsində görkəmli sənət xadimləri çalışırdı. 3 il teatrda işlədim.
- Bəs niyə belə az?
- Bunun da səbəbləri var idi. Daha doğrusu, şəxsi həyatımla bağlı məsələ idi. Artıq ailə həyatı qurmuşdum, oğlum dünyaya gəlmişdi. Ona görə də bir müddət səhnədən ayrı qalmalı oldum.
- Bu fasilə uzunmu çəkdi?
- Düz dörd il. 1981-ci ildə yenidən doğma teatra qayıtdım və rollar oynamağa başladım. Şükür Allaha ki, o vaxtdan bu günə qədər də fasiləsiz çalışıram, tamaşalarda müxtəlif obrazlar yaradıram.
- Yaratdığınız obrazlardan biri də "Hicran" tamaşasındakı Qızbacıdır. 1993-cü ildə Sabit Rəhman və Emin Sabitoğlunun birgə yaradıcılıq məhsulu olan bu əsərin yeni quruluşunda siz Qızbacını ifa etmisiniz. 1970-ci ildə bu rolu səhnəmizin korifeylərindən sayılan Nəsibə xanım Zeynalova yaradıb...
- Nəsibə xanım kimi qüdrətli sənətkardan sonra Qızbacını oynamaq asan məsələ deyildi. Nəsibə xanım elə nəhəng aktrisa idi ki, onu nə təkrarlamaq olurdu, nə də üstələmək. Azərbaycan səhnəsinə, kinosuna ikinci bir Nəsibə Zeynalova gəlməyəcək. Qızbacı roluna gəlincə, çalışdım ki, bu obrazı özünəməxsus şəkildə yaradım.
- Müsahibələrinizin birində demişdiniz ki, məni Nəsibə Zeynalovaya oxşadırlar...
- Demişdim. Axı mən onun qızıyam. Rəhmətlik Nəsibə xanım özü həmişə mənə deyirdi ki, sən mənim qızımsan... Nəsibə xanım həm böyük sənətkar, həm də gözəl insan idi. Onun haqqında saatlarla danışmaq olar. Ruhu şad olsun.
- Teatrda oynadığınız rollardan hansını daha çox fərqləndirərdiniz?
- Şəxsən mən rollarımdan heç birini digərindən ayırmaq istəmirəm. Çünki hamısı mənim üçün əzizdir. Böyük rolu da, epizodu da özünəməxsus oynamağa çalışmışam.
- Hər halda Gülcahan rolu sizi daha çox tanıtdırdı...
- "Qaynana" serialındakı qatıqsatan Gülcahan tez populyarlaşdı. Televiziyanın imkanları teatrla müqayisədə daha genişdir. Teatra gəlməyən, səhnədəki rollarımı görməyən teleserialdakı oyunumu görən kimi bəyənir, yadda saxlayır. İndi hara gedirəm, hamı deyir ki, Gülcahan gəlir. Hətta balaca uşaqlar belə Gülcahan xala deyib qabağıma qaçırlar. Uzun illər teatrda çalışan aktrisa üçün bəlkə də bu hissləri yaşamaq bir qədər çətindir. Lakin mən çətinlikdən qorxan deyiləm, çünki çox dözümlü insanam. Məhz bu dözümün, səbrin sayəsində sənətdə qalmışam, fəxri ada layiq görülmüşəm. 65 yaşımda "Əməkdar artist" fəxri adına layiq görüldüm. Bu, yubileyimə də yaxşı bir hədiyyə oldu. Dövlətimizin başçısına, Mədəniyyət və Turizm Nazirliyinin rəhbərliyinə, teatrımızın direktoruna, çiyin-çiyinə çalışdığım iş yoldaşlarıma minnətdarlığımı bildirirəm. Bir də tamaşaçılara təşəkkürümü çatdırmaq istəyirəm.
- Yaşınız və fəxri adınız imkan verir ki, gənc aktrisalara məsləhət verəsiniz. Onlara deyiləcək sözünüz varmı?
- Əgər bu sənətdə uğur qazanmaq istəyirlərsə, çətinliklərə dözməyi bacarmalıdırlar. Sənətdə heç nə asanlıqla əldə olunmur.
- Uzun fasilədən sonra teatrınızın binasında təmir işləri başa çatdı, yenidən tamaşaçılarla müntəzəm görüşmək imkanı yarandı. Sizi hansı tamaşalarda görəcəyik?
- Təmirdən sonra teatrımızda çox gözəl şərait yaradılıb, hər şey yüksək səviyyədədir. Ən əsası isə daimi tamaşaçılarımızla daha tez-tez görüşə bilirik. İndi bir azdan "Evlənmə"də səhnəyə çıxıram. Repertuarımızdakı 5 tamaşada rolum var. "Qızıl toy" yeni quruluşda hazırlanır. Bu tamaşada əvvəllər baş rolda oynamışam. İndi isə Nabat rolunu həvalə ediblər. Görək də, sağlıq olsun...

DİGƏR XƏBƏRLƏR

Tarix: 10.10.2026 / 17:17

Mollanəsrəddin lətifələrində memarlıq cizgiləri...

Tarix: 10.10.2026 / 11:07

Yazıçılar Birliyi üzvlük haqqını ödəməyənlərə növbəti dəfə xəbərdarlıq etdi - məsuliyyətli davransınlar...

Tarix: 08.10.2026 / 17:49

Susqun fırçanın ölməz fəryadı: Bəhruz Kəngərlinin rəngli irsi...

Tarix: 08.10.2026 / 17:03

Noyabrın 1-dək üzvlük haqqını ödəməyənlər Yazıçılar Birliyindən xaric edəcək - XƏBƏRDARLIQ...

Tarix: 07.10.2026 / 16:58

HAMAM SANDIĞININ İZİ İLƏ: SƏDİDƏN ŞƏKİYƏ, POEZİYADAN MADDİ MƏDƏNİYYƏTƏ

Tarix: 07.10.2026 / 07:03

Ustad aşıq Hüseyn Saraçlının 110 illik yubileyinə həsr olunan beynəlxalq elmi konfrans keçiriləcək

Tarix: 06.10.2026 / 22:01

Nizaminin qəzəli, Xətainin türkcə şeirləri hələ də Ermənistanda əsir saxlanılır...

Tarix: 06.10.2026 / 14:14

Beynəlxalq memarlıq arenasında Azərbaycan memarlığının yeri və rolu: Tarixi irslik və müasir parametrlər...

Tarix: 05.10.2026 / 21:34

Afina ilə Londonun “incəsənət davası” Azərbaycanın da sərvətlərini yada saldı...

Tarix: 03.10.2026 / 15:15

Faiq Ələkbərlinin Türk fəlsəfəsinə həsr olunmuş əsərinə dair düşüncələrim

Tarix: 30.09.2026 / 22:20

Dağlıq ərazilərdə unudulmuş və dağılmış Alban məbədlərinin bərpası gündəmdə...

Tarix: 29.09.2026 / 11:02

Şair-publisist Dəyanət Osmanlının yeni nəşrləri oxuculara təqdim edilib

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 08.10.2026 / 18:55

Erməni təcavüzündən hələlik 32 kütləvi məzarlıq qalıb - Xarici dipkorpusun mövqeyi...

Tarix: 08.10.2026 / 18:27

Prezident Əliyevin məntiqi - “Belə nankor qonşusu olanlar daim öz hərbi gücünü artırmalıdır...”

Tarix: 08.10.2026 / 15:19

1000-5000 pensiya alanların artımı nə qədər olacaq?..

Dövlətçilik tarixinə siyasi-ideoloji baxış, milli-mədəni mühitin mühafizəsi...