Yazıçılar Birliyinin "Ədəbiyyat" qəzeti yeni dövrə başlayır

Tarix: 30.04.2014 / 09:07
Bölmə: Mədəniyyət

Məlum olduğu kimi, bir neçə həftə əvvəl "Ədəbiyyat" qəzetinin baş redaktoru postunda dəyişiklik baş verdi. Bu qəzetə uzun illər rəhbərlik edən şair Ayaz Vəfalının yerinə Azərbaycan Yazıçılar Birliyinin katibliyi tərəfindən dramaturq, "Ulduz" jurnalının baş redaktoru Elçin Hüseynbəyli təyin edildi.
Qeyd edək ki, ədəbi ictimaiyyət arasında "Ədəbiyyat" qəzeti ən çox tənqid edilən mətbuat orqanı idi. Nüfuzlu ədəbiyyat adamları bu qəzetin fəaliyyətinin ədəbi aləmlə nəfəs almadığını bildirir, onun mövqeyini kəskin tənqid edirdi.
Elçin Hüseynbəyli "Ədəbiyyat"a baş redaktor təyin edildikdən sonra deyəsən sular durulmağa başlayıb. Artıq ciddi ədəbi sima sayılan şəxslərin "Ədəbiyyat" qəzeti ilə bağlı fikirləri dəyişməyə başlayıb.
Dünən "Ədəbiyyat" qəzetinin yeni baş redaktoru Elçin Hüseynbəyli ilə görüşüb qəzetin hazırkı durumu barədə və illərdən bəri üst-üstə yığılan problemlərin həlli haqqında danışdıq.
Elçin Hüseynbəyli bildirdi ki, artıq qəzetin əvvəlki şöhrətini özünə qaytarmaq istiqamətində işlərə start verilib və qısa vaxt ərzində "Ədəbiyyat" qəzeti ədəbi ictimaiyyətdəki simasını bərpa etməyə başlayıb":Mən bura təyin ediləndə qəzetin vəziyyəti heç də ürəkaçan deyildi. Hətta məndən çox tanınmış nüfuzlu bir ədəbiyyat adamı soruşdu ki, orada vəziyyət necədir? Vəziyyət haqqında ona ətraflı məlumat verdim. O da bildirdi ki, kənardan "Ədəbiyyat" çox pis görünürdü, ancaq vəziyyətin bu dərəcədə acınacaqlı olduğunu bilmirdim. Özünüz də görürsüz ki, oturduğum otağın təmirə ciddi ehtiyacı var. Başqa otaqların da həmçinin. Görürsüz ki, hər yer tökülüb dağılır. Mən bura gələndə burada cəmi iki kompyuter vardı. İnternet xətti də yalnız dizaynerin otağında idi. Bilirsiz ki, müasir qəzetçiliyi, jurnalistikanı internetsiz təsəvvür etmək mümkün deyil. Hər bir işçinin kompyuteri də, interneti də olmalıdır. Məsələ burasındadır ki, bizim mövcud büdcəmiz redaksiyanın dərhal kompyuterləşməsinə imkan vermir. Çünki paralel olaraq burada bir çox işlər görülməlidir. Redaksiyanın təmirə ciddi ehtiyacı var. Qəzetin problemləri çoxdur. Mən bura gələndə bir çox şeylərlə maraqlandım, gördüm ki, heç mühasibliyin sənədləri yoxdur. Bunun səbəbini mühasibdən soruşanda dedi ki, mən neynəyirəm o sənədləri, onların bir nüsxəsini Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fonduna, bir nüsxəsini də Azərbaycan Yazıçılar Birliyinə vermişəm. Bu adam heç olmasa surətləri saxlamayıb. Vaxtilə redaksiyanın xidməti maşını olub. Ancaq o maşın da müəmmalı şəkildə yoxa çıxıb. Bilmirəm, bu məndən əvvəlki redaktorun, yoxsa ondan əvvəlkinin vaxtında yox olub. Bu iş qeyri-müəyyəndir. Deyərdim ki, təvazökarlıqdan uzaq olsa da, baş redaktorun görəcəyi işi 10 min faiz yerinə yetirmişəm. Artıq, qismən də olsa, redaksiyanı kompyuterlə və internetlə təmin etmişik. Texniki baxımdan işləri nisbətən qaydasına salmışıq. Yeni mühasib götürdük işə, o artıq sənədləşmə ilə məşğuldur".
Baş redaktorun sözlərinə görə, qəzetdə islahatlar da aparılıb, adı işdə, özü isə işə gəlməyən insanlarla artıq vidalaşıblar: "Maşın olmadığına görə xidməti maşın ştatını ləğv etmişəm. Katibədən də, çoxlu işə gəlməyən, lakin adı işdə gedən adamlardan da imtina etmişəm. "Mir literatura"nın əməkdaşları da daxil olmaqla işçilərin sayını 34 nəfərdən 21 nəfərə endirdik. Artıq kənar müəlliflərlə də əməkdaşlığa başlamışıq. Qonorar fondu yaratmışam. Çünki indiyə qədər kənar müəlliflərə qonorar verilmirdi. Qəzetin formatını da dəyişmişik. Artıq "A 3" formatda çıxır qəzet. "Ədəbiyyat"ın məzmununu da dəyişdik. Siyasi materiallar dərc etməkdən imtina etmişik, onsuz da siyasi materialları rəsmi qəzetlər və gündəlik qəzetlər, internet portalları verir. Biz sırf ədəbiyyat materialları verməyə başlamışıq. Maliyyə vəziyyətimiz imkan versə, 16 səhifədən 24, hətta 32 səhifədə də çıxmaq olar. Onu da deyim ki, biz dövlətin ədəbiyyatla, mədəniyyətlə bağlı bütün tədbirlərini işıqlandıracağıq. Bura gələndə kollektivlə söhbətimdə dedim ki, yaxşı qəzet çıxarmağın bizə üç faydası olar. Birincisi, qrafamanlar qəzetə yaxın gəlməz. İkincisi, qələmi olan istedadlı adamlar bizə yazı verməyə başlayacaqlar. Üçüncüsü, kollektiv özünə olan hörməti geri qaytaracaq. Ancaq indiyə qədər qəzetin heç bir işçisi qürurla, əminliklə "mən "Ədəbiyyat" qəzetində işləyirəm" deyə bilmirdi. "Ədəbiyyat" qəzeti simasını, müəlliflərini, oxucularını itirmişdi. İndi qəzetin şöhrətini özünə qaytarmağa başlamışıq. Ən müxtəlif səviyyələrdə bizə edilən zənglərdən hiss edirik ki, biz yavaş-yavaş "Ədəbiyyat" qəzetini əsl ədəbiyyat qəzetinə oxşada bilməyə başlamışıq.
Bizim ədəbiyyatla bağlı çoxsaylı layihələrimiz var. Bunlar həm dünya ədəbiyyatı, həm də iç ədəbiyyatla bağlıdır. Yeni səhifələrimiz var, gəncliklə bağlı səhifə açmışıq. Hər sayımızda tanınmış bir ədəbiyyat adamı ilə qoşa səhifəlik ədəbiyyat söhbəti veririk. Qəzetin üz qabığında "Günaydın" rubrikası açmışam. Demişəm ki, ölkənin tanınmış ədəbiyyat adamları, ictimai-siyasi xadimlər ədəbiyyat haqqında köşə formasında qənaətlərini yazsın. Məqsədimiz odur ki, "Ədəbiyyat" qəzeti elita, nüfuzlu ədəbiyyat arasında ictimailəşsin".
E.Hüseynbəyli onu da bildirdi ki, qarşıdan həm Azərbaycan Yazıçılar Birliyinin, həm də "Ədəbiyyat" qəzetinin 80 illiyi gəlir. Baş redaktor dedi ki, artıq Azərbaycan Respublikasının Prezidenti tərəfindən yubileylərin keçirilməsilə bağlı maliyyə vəsaiti ayrılıb.
Qeyd edək ki, iyun ayının 17-də Azərbaycan Yazıçılar Birliyinin qurultayı da keçiriləcək.