Bu gün ictimai iaşə obyektlərinin yalnız sanitar-gigiyenik vəziyyəti deyil, onlara verilən adlar da müzakirə mövzusuna çevrilib. Ümumiyyətlə, mağazalara, restoran və kafelərə verilən adlar çox zaman standartlara uyğun gəlmir. Bir vaxtlar tarixi şəxsiyyətlərimizin, qədim şəhərlərimizin, hətta işğal altında olan ərazilərimizin adları verilirdisə, indi obyekt sahibləri başqa bir yol tutublar. Paytaxtda bir sıra ictimai iaşə obyektlərinə xarici ölkələrdə istehsal edilən pendir adları verilir.
Məsələn, şəhərimizdə “Macerello”, “Suluqunu” kimi adlar daşıyan ictimai iaşə obyektləri fəaliyyət göstərir. Bu kimi hallar da ictimai iaşə obyektlərinə adların verilməsi sahəsində ciddi nöqsanların olduğunu üzə çıxarır.
Qeyd edək ki, “Macerello” italyan xalqına, “Suluqunu” isə gürcülərə aiddir. Hər iki pendir növü dünyada çox məşhurdur.
Azərbaycan dilinin işləkliyinin bütün sferalarda tətbiq edilməsi ilə bağlı rəsmi dövlət sənədinin olmasına baxmayaraq, hələ də bəzi sahibkarlar bu sənədin əhəmiyyətini nəzərə almaq istəmirlər.
Qara Məşədiyev: “Xarici ölkələrə aid pendir çeşidlərinin adlarının ictimai iaşə obyektlərinə verilməsi düzgün deyil”
Azərbaycan Milli Elmlər Akademiyasının (AMEA) Nəsimi adına Dilçilik İnstitutunun şöbə müdiri, professor Qara Məşədiyev “Bakı-Xəbər”ə açıqlamasında bildirdi ki, Azərbaycan dilinin işləkliyinin təmin olunması olduqca vacibdir və bu qaydalara əməl etmək hər bir sahibkarın borcudur. “Öz dilimizdə ictimai iaşə obyektlərinə veriləcək kifayət qədər ad olduğu halda, çox təəssüf ki, bunu bəziləri nəzərə almaq istəmir. Ümumiyyətlə, restoranlara, şadlıq evlərinə, otellərə, eləcə də digər ictimai iaşə obyektlərinə milli adların verilməsini tövsiyə edərdim. Əlbəttə, ictimai iaşə obyektlərinə gəlmə adların qoyulmasını uyğun hesab etmək olmaz. Biz bunu qəbul etmirik. Həmişə çalışmalıyıq ki, bu cür obyektlərə özümüzə aid adlar qoyulsun. Həmin ictimai iaşə obyektinin pendir satışı ilə heç bir əlaqəsi yoxdursa, ora pendir adlarının verilməsi düzgün deyil. Xarici ölkələrə aid pendir çeşidlərinin adlarının ictimai iaşə obyektlərinə verilməsi düzgün deyil. Biz mümkün qədər başqa xalqlara məxsus adlardan, ənənələrdən uzaq durmalıyıq. İctimai iaşə obyektlərinin adları ana dilimizdə olmalıdır. Sahibkarlar öz obyektlərinə ad qoyarkən mütləq mənada ana dilimizin tələblərini və xüsusiyyətlərini nəzərə almalıdırlar. Amma çox təəssüf ki, bəziləri bunu nəzərə almaq istəmir” - deyə Q.Məşədiyev bildirdi.
İradə SARIYEVA
