Oxuyub öyrənmək müqəddəs kitabımızda da vacib buyurulub. Bu da onu göstərir ki, kitab tarixən bir mənəvi dəyər, bilik mənbəyi kimi insanların həyatında mühüm yer tutub. Azərbaycan insanı da tarixən oxuyub öyrənməyə, kitablarla təmasda olmağa üstünlük verib.
Vaxtilə Azərbaycan keçmiş ittifaq respublikaları arasında ən çox mütailə edən respublika kimi tanınıb. Əvvəlki dövrlərdə insanların kitaba tələbatı, marağı o qədər çox idi ki, ictimai nəqliyyatda, avtobusda, tramvayda, trolleybusda, metroda belə mutaliə etməkdən əl çəkmirdilər. Hətta belə bir fikir var ki, uzun yol gedərkən mütaliə ilə məşğul olmaq yolu qısaldır.
Çox təəssüflər olsun ki, son 20-25 ildə Azərbaycanda insanların mütaliəyə həvəsi get-gedə öləziməyə başladı. Uzun illər mütaliədən kənarda qalan Azərbaycan insanı bununla çox şey itirdi. Ən azından, bu amil bizim insanların intellektual səviyyəsinin zəifləməsinə səbəb oldu.
Son illər insanlarımızın kitaba qayıdışında bir irəliləmə var və artıq avtobuslarda, metro qatarlarında nəinki yaşlı və orta nəslin, eləcə də gənclərin əlində kitab görürük. Bu da onu göstərir ki, artıq cəmiyyət intellektual səviyyəsini yüksəltmək yolunu seçib.
Başqa nəqliyyat vasitələrindən fərqli olaraq, kitab oxuyanlara Bakı metropolitenində daha çox rast gəlirik. Gənclər mobil telefondan, internetdən ayrılaraq kitaba üz tuturlar.
Qiymət Məhərrəmli: “Bakı Metropoliteni Qapalı Səhmdar Cəmiyyətinin “Metroda oxu” sosial aksiyası da insanlarda mütaliəyə həvəs yaratdı”
Filologiya üzrə fəlsəfə doktoru, şairə Qiymət Məhərrəmli “Bakı-Xəbər”ə bildirdi ki, insanların kitaba qayıdışında Bakı Metropoliteninin həyata keçirdiyi “Metroda oxu” adlı aksiyanın da faydası olub. O qeyd etdi ki, bu sosial aksiya çərçivəsində metropolitenin bütün stansiyalarına kitabı təbliğ edən plakatlar, reklam löhvələri yerləşdirilib. Bunun da insanlara müsbət təsir etdiyini deyən Q.Məhərrəmli hesab edir ki, kitabı daha çox təbliğ etmək lazmdır. “Mütaliə insan həyatında, onun dünyagörüşünün artmasında, intellektual səviyyəsinin qalxmasında mühüm bir amildir. Bir vaxtlar Azərbaycanda kəskin oxucu böhranı yaranmışdı və insanlar kitaba elə də meyl göstərmirdilər. Bu da onunla bağlı idi ki, kitab təbliğatı çox aşağı düşmüşdü. Paytaxtdakı kitab mağazalarının böyük əksəriyyəti bağlanmışdı, onlara məxsus olan binalarda kafe, restoran fəaliyyət göstərirdi. Kitabla bağlı bütün təsisatların ləğv edilməsi insanların kitabdan soyumasına səbəb oldu. Son illər dövlətin, Mədəniyyət Nazirliyinin kitabı təbliğ etməsi, bu sahəyə xüsusi diqqət yetirməsi insanların kitaba qayıdışını şərtləndirdi. Bu gün metroda gedərkən heç olmasa 10 nəfərdən birinin əlində kitab görürsən, bu, insana xoş təsir göstərir. Fikirləşirsən ki, artıq gənclik kitaba qayıdıb. Bilirsiniz, internet resursları, elektron oxu kitabın insana yaşatdığı zövqü yaşada bilməz. Yeri gəlmişkən onu da deyim ki, Bakı Metropoliteni Qapalı Səhmdar Cəmiyyətinin “Metroda oxu” sosial aksiyası da insanlarda mütaliəyə həvəs yaratdı. Bir neçə stansiya gedən adamın məşğuliyyəti olmasa darıxır, yol ona uzaq görünür, ancaq yol gedərkən kitab oxumaq isə vaxtın necə keçdiyini hiss etdirmir. İndi sərnişinlərin əlində kitab görürsən, qəzet görürsən. Bu gün metro sərnişinlərinin əlində yalnız Azərbaycan dilində deyil, digər dillərdə də kitablar görürük. Gənclərimiz rus dilində, ingilis dilində, ərəb, fransız dillərində kitablar oxuyurlar”.
Q.Məhərrəmli onu da qeyd etdi ki, bu gün metro stansiyalarında kitab mağazalarının yaradılmasına da ehtiyac var. Çünki metrodan istifadə edən sərnişinlər bu mağazalardan istədikləri kitabları ala bilərlər. Onun sözlərinə görə, bəzi metrostansiyaların yaxınlığında açıq səma altında kitab satışı həyata keçirilir. Bunun da mütaliənin artmasına müsbət təsir etdiyini deyən Q.Məhərrəmli hesab edir ki, oxucuları daha kütləvi şəkildə kitaba qaytarmaq üçün maarifçilik işinə yaradıcı təşkilatlar, kitab mağazaları, eləcə də vətəndaş cəmiyyəti qoşulmalıdır.
İradə SARIYEVA
