Qarabağ Azərbaycan gənclərinin ən həssas yeridir. Gənclik ermənilərin torpaqlarımızı işğal etməsi faktı ilə heç cür barışa bilmir. Kifayət qədər vətənpərvər olan Azərbaycan gəncliyi torpaqlarımızın işğaldan azad edilməsi uğrunda mübarizəyə hər an hazır vəziyyətdədir. Ekspertlər də bildirir ki, Azərbaycan dövlətinin qarşısında duran ən mühüm və həlli vacib məsələ Dağlıq Qarabağ problemidir.    Əməkdaşlarımızın bu yöndə apardıqları araşdırmalara nəzər salıb qeyd edirik ki, artıq bu münaqişə lokal konflikt halından çıxaraq qlobal fazaya daxil olduğundan, problemin həlli istiqamətində Azərbaycan dövlətinin atdığı bütün addımlar heç bir nəticə vermir. Bu məsələyə dünyanın aparıcı dövlətlərinin ikili prinsiplərlə yanaşması konfliktin ömrünün xeyli dərəcədə uzanmasına səbəb olub.    Əməkdaşımızın yazdığına görə, ancaq biz bir şeyi dərk etməliyik ki, işğal olunan bizim ata-baba torpağımızdır və onun düşməndən azad olunması üçün əlimizdən gələni etməliyik: "Artıq konfliktin yarandığı gündən 20 ildən çox bir vaxt keçib. Heç də az olmayan bu müddət ərzində Azərbaycanda yeni bir nəslin formalaşması prosesi gedir. Xüsusilə bu istiqamətdə gənclərin üzərinə böyük iş düşür. Onların tam vətənpərvər hisslərlə, milli şüura bağlı şəkildə tərbiyə olunması, Dağlıq Qarabağ probleminin əsl mahiyyəti ilə yaxından tanış olması olduqca zəruri bir məsələdir.    Vətənpərvərliyin mahiyyəti Vətənə məhəbbət və öz şəxsi maraqlarını Vətən yolunda qurban verməyə əsaslanan emosional bağlılıqdan ibarətdir. Bu bağlılıq həm də mənsub olduğu millətin etik, mədəni, siyasi və tarixi xüsusiyyətlərinə arxalanan milli hissiyyat və milli qürur kimi hallanır. Burada Vətənin xarakteri, mədəni incilərini qorumaq da vətənpərvərlik keyfiyyətinə aiddir. Bu hissin tarixi kökündə min illər boyu yaşamış, möhkəmlənmiş, öz ana torpağına, dininə və adət-ənənələrinə bağlanmış dövlətçilik durur". Tarixçi Təzəgül Yusifovanın dediyinə görə, millətin və dövlətçiliyin formalaşması şəraitində vətənpərvərlik onun inkişafının ümummilli anlarını əks etdirən ictimai düşüncənin tərkib hissəsinə çevrilir: "Milli dövlətin qarşısında duran ən başlıca işlərdən biri əhaliyə düzgün, sağlam vətəndaşlıq və vətənpərvərlik hisslərini aşılamaqdır. Qloballaşan dünyada sağlam milli-mənəvi dəyərləri qorumaq çox çətindir. Hazırkı dövrün sürətli informasiya, yeni kommunikasiyalar əsri olduğunu nəzərə alsaq, o zaman gənclərin beyninin zərərli ideologiyalarla zəhərlənməsinin qarşısı da düşünülmüş metodlarla alınmalıdır. Sözsüz ki, hər bir ölkədə vətənpərvərlik əhval-ruhiyyəsinin səviyyəsi həmin dövlətdə aparılan təbliğatın miqyasından asılıdır. İnsanların mənəvi kamillik, özünüdərk dərəcəsinin yüksəldilməsi istiqamətində işlərin görülməsi milli ideologiyanın tərkib komponenti olmalıdır. Təbii ki, söhbət zorakı metodlardan getmir. Gənclərin maraq göstərdiyi texnologiyaların tərkibində dövlətin gənclərlə bağlı siyasətinə cavab verən alternativ təbliğat sistemi qurulmalı və bu təbliğatın aparılmasına dövlətin bütün mümkün resursları cəm olunmalıdır".    Gənc nəsildə vətənpərvərlik tərbiyəsinin inkişaf etdirilməsini günümüzünən aktual məsələlərindən biri hesab edən tarixçi deyir ki, dövlətin, dilin, adət-ənənələrin yaşadılmasını şərtləndirən faktorlardan biri də gənclərin vətənpərvərlik hissini dərk etməsindən keçir: "    Milli mənlik şüuru özünüdərk deməkdir. Vətənpərvərlik də həmçinin. Milli özünüdərk deyəndə ilk növbədə insan bağlı olduğu tarixi kökü, milli mənsubiyyətini, Vətəninin tarixini bilməli və dərindən təhlil etməyi bacarmalıdır. Hər bir gənc, vətəndaş dərk etməlidir ki, hansı Vətəni, milləti, milli xüsusiyyətləri təmsil edir. Eyni zamanda, milli dəyərlərin tarixin hansı mərhələlərindən keçdiyini bilməlidir. Deyim ki, dünyada gedən qloballaşma prosesinin sürətlənməsinin bu məsələyə də mühüm təsiri var. Gənclərimizin əksəriyyəti Avropa dəyərlərini mənimsəməyə çalışır. Düzdür, Avropa dövlətləri böyük inkişaf mərhələsi keçib və hazırda bu coğrafiyada olan ölkələr dünyanın ən inkişaf etmiş dövlətləri sırasındadır. Bu baxımdan da gənclərimizin Avropadan öyrənməli olduğu çox zəruri məsələlər var. Ancaq bəzən Avropa dəyərləri altında gənclərimiz elə təbliğatın təsirinə düşür ki, bu həm bizim milli, mental, həm də dini dəyərlərimizlə kəskin ziddiyyət təşkil edir. Gənclərimizlə bağlı təbliğatın aparılmasında bir az mühafizəkar olmaq lazımdır. Milli şüuru deqradasiyaya uğradan, vətənpərvərlik hisslərini öldürən, adət-ənənələrimizlə tamamilə ziddiyyət təşkil edən təbliğatın qarşısı kəskin şəkildə alınmalıdır. Bu gün Azərbaycanda gənclərin vətənpərvər ruhda tərbiyə olunması başlıca vəzifələrdən biridir. Torpaqlarımızın bir qisminin işğal altında olduğu bir şəraitdə bu yöndə təbliğatın gücləndirilməsi vacib əhəmiyyət kəsb edir. Çünki dövlətin qarşısında duran başlıca vəzifələrdən biri də gənclərin milli mənlik şüurunun inkişaf etdirilməsi və onlara vətənpərvərlik hisslərinin aşılanmasından ibarətdir. Gənclərin aparıcı qüvvə olaraq gələcəkdə dövlətin yükünü öz üzərində daşımalı olacağını nəzərə alanda, sözügedən məsələyə son dərəcə həssas yanaşmaq reallığı ortaya çıxır. Onu da qeyd edək ki, sözügedən məsələdə milli mənlik şüuru ilə vətənpərvərlik hissi bir-biri ilə sıx bağlıdır. Bir şeyi unutmaq olmaz ki, gənclərin vətənpərvərlik ruhunun yüksək olması hər mənada dövlətin xeyrinədir. Fərqi yoxdur, həmin gənc hərbçidir, yoxsa fəhlə. Hansı peşə üzrə əmək fəaliyyəti ilə məşğul olmasından asılı olmayaraq, gənc nəsildə vətənpərvərlik, torpağa, dövlətə sədaqət hissləri yüksək olmalıdır".    Tarixçinin sözlərinə görə, Azərbaycan dövləti tərəfindən son illər bu istiqamətdə bir sıra addımlar atılır, sistemli işlər görülür, müəyyən layihələr həyata keçirilir: " Bütün bunlarla yanaşı, gənclərdə vətənpərvərlik hisslərinin yüksək olması, ilk növbədə, onların milli-mənəvi özünüdərkindən keçir. Hər bir gənc, vətəndaş dərk etməlidir ki, hansı Vətəni, milləti, milli xüsusiyyətləri təmsil edir. Xüsusilə nəzərə almaq lazımdır ki, Azərbaycan müharibə vəziyyətində olan dövlətdir. Ərazilərimizin 20 faizi işğal altındadır. Belə bir situasiyada gənclərin milli-mənəvi dəyərlərə bağlılığı çox önəmli və vacib əhəmiyyət kəsb edir. Milli mənlik şüurunun inkişaf etdirilməsi üçün bir sıra parametrlərin nəzərə alınması vacibdir. Başlıca olaraq bu məsələdə müasir dövrün tələblərinin nəzərə alınması və ona uyğun olaraq işin qurulması önəmli məsələdir.    Ölkəmizin dövlət müstəqilliyinin qorunması və ərazi bütövlüyünün bərpa olunması ilə bağlı Azərbaycan gəncliyinin qarşısında çox böyük vəzifələr var. Bu gün, siyasi mənsubiyyətindən asılı olmayaraq, bütün Azərbaycan gəncliyi Dağlıq Qarabağla bağlı məsələlərdə vahid mövqedən çıxış edir. Bu çox sevindirici haldır. Müharibə şəraitində yaşamağımıza baxmayaraq, Azərbaycan gəncliyinin hərbi xidmətə olan münasibəti çox yüksəkdir. Son vaxtlar orduda, demək olar ki, fərarilik hallarına rast gəlinməməsi gənclərin Qarabağla bağlı istənilən vaxt başlaya biləcək hərbi əməliyyatlarda iştirak etmək üçün hazır olmasından xəbər verir. Bunlarla yanaşı, Azərbaycan gəncliyi Dağlıq Qarabağla bağlı aparılan və dövlətimizin ümumi mövqeyini əks etdirən bütün siyasi tədbirlərdə olduqca fəal iştirak edir. Beynəlxalq səviyyədə Dağlıq Qarabağla bağlı aparılan təbliğatda Azərbaycan gəncliyinin göstərdiyi fədakarlığı xüsusilə vurğulamaq lazımdır".    Qəzetimizin əməkdaşının qeydlərinə görə, biz müharibə görmüş dövlətik. Ona görə də televiziyalarda, mətbuat orqanlarında, küçə və meydanlardakı böyük reklam lövhələrində vətənpərvərlik hisslərinin gücləndirilməsinə xidmət edən materialların yerləşdirilməsinə önəm vermək lazımdır: " Təkcə mifikləşmiş tarixi qəhrəmanlarımızı təbliğ etməklə kifayətlənmək doğru deyil. Gördüyümüz kimi, Azərbaycan gəncliyi bu istiqamətdə olduqca fəallıq nümayiş etdirir. Ancaq bu o demək deyil ki, bu yöndə olan təbliğat tamamilə unudulmalıdır. Bir sözlə, Dağlıq Qarabağla bağlı gənclər arasında təbliğatın daimi aparılmasına böyük ehtiyac var".    Müasir Azərbaycan gəncliyinin Dağlıq Qarabağ probleminin həllində rolu barədə fikirlərini bizimlə bölüşən Yeni Azərbaycan Partiyası Gənclər Birliyinin sədr müavini Aytac Əliyevanın fikrincə, hazırkı Azərbaycan gəncliyinin əksəriyyəti dövlətimizin taleyinə yazılmış bu acı konfliktin tarixi ilə həmyaşıddır: "Biz bu müharibənin tarixi ilə birgə böyüyərək, onun doğurduğu acıları içimizdə çəkərək gənc olmuşuq. Mən də başda olmaqla, bugünkü Azərbaycan gəncliyi torpaqlarımızın bir qarışını da düşmənə güzəştə getmək fikrində deyil. Biz Dağlıq Qarabağla bağlı dövlətimizin qəbul edəcəyi bütün qərarları canla-başla həyata keçirməyə hazırıq. Ölkə başçısı dəfələrlə vurğulayıb ki, Ermənistan tərəfi konstruktiv mövqe tutmayacaqsa, digər vasitələrə əl atacağıq. Mən əminəm ki, siyasi əqidəsindən asılı olmayaraq, özünü Azərbaycan Respublikasının vətəndaşı bilən hər bir gənc torpaqlarımızın geri qaytarılmasında əlindən gələni əsirgəməyəcək".    Gənclərin siyasi və beynəlxalq müstəvidə də Dağlıq Qarabağla bağlı aktiv təbliğat apardığını bildirən Aytac Əliyeva qeyd etdi ki, təmsil olunduqları bütün beynəlxalq tədbirlərdə haqlı tələbimizi səsləndirirlər: "Azərbaycanın hərbi büdcəsi Ermənistanın ümumi büdcəsindən bir neçə dəfə çoxdur. Bizim özümüz müasir silahlar istehsal edirik. Yəni bizim istənilən vaxt torpaqlarımızı azad etməyə gücümüz çatar. Ancaq dövlətimiz ilk əvvəl konfliktin sülh yolu ilə nizama salınmasını istəyir. İştirak etdiyimiz beynəlxalq simpoziumlarda Azərbaycanın sülh tərəfdarı olduğunu bəyan edirik. Eyni zamanda, torpaqlarımızı silah yolu ilə azad etmək gücündə və ruhunda olduğumuzu da dünyaya bəyan edirik. Gənclərimizin Dağlıq Qarabağ problemi ətrafında istənilən yöndə apardığı fəaliyyəti qənaətbəxş hesab etmək olar. Beynəlxalq tədbirlərdə siyasi fikir ayrılığı olan gənclərin bu mövzu ətrafında eyni mövqedən çıxış etməsi bizi çox sevindirir. Bir faktı sizə deyim ki, Yeni Azərbaycan Partiyasının gəncləri kimi iştirak etdiyimiz bir neçə beynəlxalq tədbirdə düşmən ölkənin də gəncləri iştirak edib".    Gənclik Azərbaycanın Qarabağ ağrısını yaşayır, zəfər sorağı ilə yaşayır və sevinməyi, bütöv Vətənin gənci olmağı arzulayır. Bu bütün vətənpərvər gənclərin dilə gətirdiyi çox böyük istəkdir.