Eldəniz Cəfərov: “Təxminən yay aylarında ikinci əl avtomobil bazarında köhnə maşınlar 2 % civarında bahalaşa bilər”
Xəbər verdiyimiz kimi, 29 aprel tarixində Baş nazir Əli Əsədovun qərarı ilə zavod buraxılış tarixinə görə yaşı 10 ildən çox olan minik avtomobillərinin (raritet minik avtomobilləri və gömrük ərazisinə müvəqqəti gətirilən minik avtomobilləri istisna olmaqla) Azərbaycan Respublikası ərazisinə gətirilməsi məhdudlaşdırılıb.
Beləliklə, artıq ölkəyə istehsal ili 2013-dən aşağı olan maşınların gətirilməsinə icazə verilməyəcək.
Dövlət Statistika Komitəsinin məlumatlarına əsasən ölkədə 1,4 milyondan çox minik avtomobili mövcuddur. Bunun 1,3 milyondan çoxu şəxsi minik avtomobillərinin payına düşür. Azərbaycanda minik avtomobillərinin yaş strukturu belədir:
- 2 ilə qədər olan minik avtomobilləri 2%;
- 2 ildən 5 ilə qədər olan minik avtomobilləri 3%;
- 5 ildən 10 ilə qədər olan minik avtomobilləri 11,9%.
Beləliklə, yaşı 10 ildən artıq olan minik avtomobillərinin payı 80%-dən çoxdur.
İstehsal tarixi 10 ildən çox olan avtomobil idxalının məhdudlaşdırılmasının yaradacağı imkanlar:
- Ekoloji təmiz olan hibrid və elektrik avtomobillərin ölkəyə gətirilməsini stimullaşdıracaq;
- Yararsız avtomobillərin dövriyyədən çıxarılması ilə avtomobil parkı yenilənəcək, yol-nəqliyyat hadisələrinə səbəb olan hallar azalacaq;
- “Yeni qərar əsasən ölkədə avtomobil parkının yenilənməsinə və ekoloji vəziyyətin, eko-sistemin yaxşılaşdırılmasına yönəlib”
Yaşı 10 ildən çox olan minik avtomobillərinin Azərbaycan Respublikası ərazisinə gətirilməsi məhdudlaşdırılmasının avtomobil bazarına necə təsir edəcəyi barədə fikir bildirən nəqliyyat eksperti Eldəniz Cəfərov bildirdi ki, Nazirlər Kabinetinin yeni qərarı əsasən ölkədə avtomobil parkının yenilənməsinə və ekoloji vəziyyətin, eko-sistemin yaxşılaşdırılmasına yönəlib: “Danılmaz faktdır ki, yaşı 10 ildən artıq olan avtomobillərin sayı ölkəmizdə həddindən artıq çoxdur. Həmçinin qeyd etmək lazımdır ki, son illər ərzində Gürcüstandan da ölkəyə yararsız, ömrünü başa vurmuş metallom daşınırdı. Bunun da qarşısı qismən alınmış olacaq. Bu qərar bəzi yeniliklərin müjdəçisi ola bilər. Hazırda ölkəmizdə avro-4 standartları tətbiq olunur. Bu qərardan sonrakı qərar ola bilər ki, avro-5 standartlarına keçid olsun".
Ekspert onu da əlavə etdi ki, xarici ölkələrdən avtomobil sifariş etmiş şəxslər hazırda məlum qərarla bağlı çox narahatdır. Cənubi Koreya, Yaponiya və ABŞ kimi ölkələrdən həmin avtomobillərin gəmi ilə gətirilməsi 2-3 ay çəkir: “Ona görə düşünürəm ki, dövlət bunları nəzərə alaraq, həmçinin özünün sosial yönümlü siyasətini nəzərə alaraq bu müddəti 30 gündən 60 günə qədər uzatsa, daha yaxşı olar ki, vətəndaşların ödəniş edərək sifariş etdiyi avtomobillər ölkəyə daxil ola bilsin, vətəndaşlar ziyana düşməsin. Əks təqdirdə həmin maşınlar Gürcüstan limanlarında qala və vətəndaşlarımıza, sahibkarlara külli miqdarda ziyan dəyə bilər. Bu qərar təbii ki, maşın bazarına təsir edəcək. Təxminən yay aylarında ikinci əl avtomobil bazarında köhnə maşınlar 2 % civarında bahalaşa bilər”.
Günel CƏLİLOVA
