24/04/2019 02:33
728 x 90

50-dən çox mübahisəli məhbus azad edilsə də, AŞ PA Azərbaycana hələ də “qərəz bucağından” baxır...

“Həmin beynəlxalq qurumlar düşünməlidirlər ki, Azərbaycanla təhdid, şərt dili ilə danışmaq heç bir fayda vermir”

img

Aprelin 9-da Strasburqda Avropa Şurasının Parlament Assambleyasının yaz sessiyası çərçivəsində AŞ PA-nın Monitorinq və Hüquqi Məsələlər və İnsan Hüquqları komitələri Azərbaycanda “siyasi məhbus” problemi ilə bağlı dinləmələr təşkil ediblər. Dinləmələrin kifayət qədər sərt keçdiyi bildirilir.

Həmin iclasda hətta hazırda Hollandiyada mühacir həyatı yaşayan hüquq müdafiəçisi Leyla Yunusun iştirakı və çıxış etməsi diqqətdən yayınmayıb. Onunla yanaşı, digər hüquq müdafiəçisi Rəsul Cəfərov və “ReAL” partiyasının sədri İlqar Məmmədov da hakimiyyəti məhz bu mövzuda sərt tənqid ediblər.

Müzakirələr zamanı Azərbaycanın AŞ PA-dakı nümayəndə heyətinin sədri Səməd Seyidov müzakirə iştirakçılarını qeyri-obyektivlikdə və siyasi ambisiyalarda ittiham edib. O, toplaşanları Azərbaycanda siyasi təqiblər barədə iddialara inanmamağa çağırıb: “Bəli, Azərbaycanda siyasi məhbuslar var - onlar Ermənistanın işğal etdiyi rayonlardan olan 1 milyon qaçqınlardır”.

Azərbaycanla Avropa İttifaqı arasında sazişin imzalanması ərəfəsində belə bir sərt dinləmələrin keçirilməsi ciddi suallar yaradıb. Ən maraqlısı isə budur ki, hətta bəzi radikal mövqeli QHT və beynəlxalq təşkilatların siyahısında adları “siyasi məhbus” kimi qeyd edilən şəxslərdən 50 nəfəri ölkə başçısının imzaladığı son əfv sərəncamı ilə azadlığa buraxılıb. Belə olan təqdirdə, AŞ PA-da analoji məzmunda dinləmənin təşkili və hakimiyyəti sərt tənqid etməyə nə kimi əsas vardı? Bunu AŞ PA-nın növbəti qərəzi saymaq olarmı?

  • Rauf Zeyni: “Hətta həbsxanada olan bütün dustaqları açıb buraxsalar belə, onlar yenə prosesi tənqid edəcəklər”

Milli Qeyri-Hökumət Təşkilatları Forumunun prezidenti Rauf Zeyni qəzetimizə açıqlamasında bildirdi ki, bu cür müzakirələrin əsasında bir qərəz durur: “Artıq bu şəbəkə hamıya bəllidir. Hətta həbsxanada olan bütün dustaqları açıb buraxsalar belə, onlar yenə prosesi tənqid edəcəklər. Çünki pulları bundan çıxır. Mən çox təəssüf edirəm ki, bu cür məsələlərdə AŞ PA kimi ciddi qurum onlara havadarlıq edir, geniş tribuna verir. Azərbaycan Prezidenti son dövrlər ərzində görün hansı addımları atır. Müxtəlif sahələri əhatə edən bu islahat əhalinin müxtəlif təbəqələri tərəfindən dəstəklənir. Ən ciddi dəstəklənən addımlardan biri də ölkə başçısının imzaladığı son əfv sərəncamı oldu. Elə məhz həmin dairələrin siyahısında problemli məhbuslar kimi qeyd edilən 50 nəfər azad edildi. Əslində, bu adamlar atılan addımı təqdir etməlidirlər. Bu yaxınlarda gördünüz ki, Fransanın nüfuzlu sorğu şirkəti olan “Opinion Way” ölkə rəhbərinin birillik fəaliyyətini necə yüksək dəyərləndirdi. Bütün bunlara baxmayaraq, bir qrup adam var ki,  Azərbaycana qarşı ancaq neqativ işlərlə məşğul olur. Biz 20 ildir bunun şahidi oluruq. Eyni adamlar və eyni qurumlar bu işlə məşğuldurlar. Onların gördüyü işlər Azərbaycan dövlətini heç düşündürmür. Biz ancaq öz inkişafımız barədə düşünürük. Həmin beynəlxalq qurumlar düşünməlidirlər ki, Azərbaycanla təhdid, şərt dili ilə danışmaq heç bir fayda vermir. Əmin olun ki, Prezident kimisə əfv edirsə, bunu humanizm prinsipinə əsaslanaraq edir. Hansısa dairələrin təzyiqi, şərti burada keçərli ola bilməz. Bunlar artıq anlamalıdırlar ki, Azərbaycanın gəlib çatdığı inkişaf səviyyəsi onunla təhdidlə danışmağa imkan vermir. Bizimlə yalnız normal əməkdaşlıq dilində danışmaq olar. Hər halda, həbsdə qalan insanların taleyi bizim üçün daha önəmlidir,  nəinki xaricdəkilərə”.

Məhəmmədəli QƏRİBLİ 

Son xəbərlər