Azərbaycan-Türkiyə hərbi əlaqələri genişlənir

Tarix: 01.05.2015 / 03:29
Bölmə: Siyasət

Ərazilərinin bir hissəsi işğal altında olan Azərbaycan hərbi sahədə gücünü artırmaqda, silahlı qüvvələrinin döyüş hazırlığını daha yüksək səviyyəyə gətirməkdədir. Bu fonda diqqət yetirilən əsas məsələlərdən biri də silahlı qüvvələrin ən müasir hərbi texnika ilə təchiz olunmasıdır. Azərbaycan bu istiqamətdə müxtəlif ölkələrlə, o cümlədən qardaş Türkiyə ilə yaxından əməkdaşlıq edir.

Eyni zamanda daxili istehsalın genişləndirilməsi də xüsusi diqqət mərkəzindədir. Müdafiə Sənayesi Nazirliyinin tabeli müəssisələrində 2015-ci ilin birinci rübünün yekunları bu istiqamətdə mühüm irəliəlyişlərin olduğunu göstərir. Hesabat dövründə istehsal olunan məmulatların 78 faizini müdafiə və xüsusi təyinatlı, 22 faizini isə mülki təyinatlı məmulatlar təşkil edir.

Qeyd olunduğu kimi, Azərbaycan hərb sahəsində müxtəlif xarici ölkələrlə də sıx əməkdaşlıq edir ki, onların sırasında Türkiyə də var. Yeri gəlmişkən qeyd edək ki, hazırda hərbi təchizatların alınması baxımından Türkiyə şirkətləri Azərbaycanla sıx əməkdaşlıq həyata keçirməkdir. Hərbi təyinatlı məhsulların istehsalında xüsusi çəkiyə malik olan Türkiyənin ASELSAN şirkəti isə ölkəmizlə bu sahədə əlaqələri daha da dərinləşdirməkdə maraqlıdır. ASELSAN şirkətinin baş direktoru Faiq Eken bu xüsusda bildirir: «ASELSAN olaraq biz hər zaman Azərbaycan Ordusunun ehtiyaclarını Türkiyə Silahlı Qüvvələrinin ehtiyacı ilə eyni gördük, onun qarşılanmasına eyni cür yanaşdıq. 1998-ci ildə ASELSAN-Bakı şirkətini qurmaqda da məqsədimiz bu oldu. Bizim bu gün Azərbaycan Ordusu və müdafiə sənayesi ilə bağlı üzərində işlədiyimiz bəzi layihələr var. Düşünürəm ki, bu layihələr Azərbaycan Ordusunun daha da güclənməsinə, müdafiə sənayesinin inkişafına öz töhfəsini verəcək. ASELSAN olaraq ilk gündən Azərbaycanın yanında olduq və bundan sonra da dəstəyimiz davam edəcək».

Bu arada bir məqamı da qeyd edək ki, ASELSAN yeni hərbi məhsullarını da təqdim etməyə hazırlaşır və istisna deyil ki, həmin məhsulların əsas alıcılarından biri məhz Azərbaycan olacaq. Yeni məhsullara gəlincə, Faiq Eken «Azeridefens» portalına bu xüsusda bildirir: «Qarşıdan İDEF sərgisi də gəlir. Biz İDEF-də yeni yaradılmaqda olan Aşağı Hündürlükdə Havadan Müdafiə Sisteminin bəzi hissələrini - atış kontrol sistemlərini, radarını təqdim edəcəyik. Hazırda «Qorqud» adlı zenit topu üzərində çalışırıq. FNSS şirkətinin paletli platforması üzərində yerləşən «Qorqud»un radarı uzaq məsafədən hədəfləri və havadan atılan mərmiləri təsbit edir, hesablamanı aparır, daha sonra silahı avtomatik olaraq hədəfə yönləndirir və «ağıllı» mərmilərlə atəş açır. Mərmilər ona verilən informasiya üzrə təyin edilmiş məsafədə partlayaraq, bir növ, dəmir divar yaratmış olur. «Qorqud» üzərində MKE istehsalı olan iki ədəd 35 mm top yer alır. Bu sistem artıq test mərhələsinə gəlib və testlər hazırda uğurla davam edir. Düşünürəm ki yaxın bir il içində testlər başa çatandan sonra sistem silahlanmaya qəbul olunacaq.

Türkiyədə hazırda uğurla tətbiq olunan bazaların və zastavaların təhlükəsizliyi ilə bağlı bir sistem formalaşdırdıq. Bu, hərbi bölgəni, sərhəd zastavalarını xarici təhdidlərdən, xüsusilə də minaatan və raket hücumlarından mühafizə məqsədilə yaradılıb. Sistemə radar, gecə və gündüz kameraları və buna inteqrasiya olunmuş silah sistemləri də daxil olmaqla müxtəlif sensorlar daxildir. Bu, personalın bayıra çıxmadan öz obyektini mühafizə etməsini təmin edən böyük və özəl təhlükəsizlik həllidir. Qeyd etdiyim kimi, bu sistem istifadəyə yeni verilib və uğurla istifadə olunur».

Onun sözlərinə görə, ASELSAN-ın radar sahəsində qısa və orta mənzilli radarları mövcuddur:»Hazırda radiusu 400 km-dən çox olacaq uzaqmənzilli radar üzərində işlər aparılır. Bununla bərabər, hava hücumundan müdafiənin dayanıqlı çalışması üçün bir komanda-idarəetmə həllinə ehtiyac duyulur. ASELSAN bu komanda-idarəetmə həllini də hazırlayıb. Fərqli layihələrdə bunu 10 ildir Türkiyə Silahlı Qüvvələri istifadə edir. ASELSAN-ın məhsulları arasında müxtəlif peyk qəbulediciləri və rabitə cihazları mövcuddur. Biz son illərdə Türkiyənin mühüm peyk layihərində yer almağa başladıq. Bu sahə dünyada gələcəyi olan bir sahədir. ASELSAN-ın bu günədək gəldiyi nöqtə, əldə etdiyi nəticələr kosmik sənayedə də öz sözünü deməyə imkan verəcək». Qeyd edək ki, ötən il Azərbaycan Müdafiə Sənayesi Nazirliyinin «Alov» zavodu ilə Türkiyənin ASELSAN şirkəti arasında yeni məhsulların Bakıda istehsalı və birgə müəssisənin yaradılmasına dair niyyət protokolları imzalanıb. Bununla yanaşı, Azərbaycan və Türkiyənin müdafiə sənayesi sektorunda istehsal olunan məhsulların marketinqi və satışı ilə məşğul olan birgə şirkətin yaradılması gündəmdədir. Bütün bunlar iki ölkə arasında hərbi sahədə əməkdaşlığın sürətli yüksəliş dövrünü yaşadığını aydın şəkildə nümayiş etdirir.