Prezident İlham Əliyevin Sərəncamı ilə Dövlət Turizm Agentliyinin sədri Fuad Nağıyevə işində yol verdiyi nöqsanlara görə şiddətli töhmət elan edilib.
Səhv etmiriksə, ilk dəfə belə hadisə olur. Bu, Azərbaycan idarəçilik praktikasında çox nadir hallarda rast gəlinən bir cəza üsuludur. Son 15-20 ildə bunun analoqu görünməyib, tanınmayıb. İşində nöqsana yol verən yüksək vəzifəli şəxsi ya tutublar, ya da işdən çıxarıblar. Hətta vəzifəsinin endirilməsi kimi bir cəzanı da xatırlamırıq. Yəni indi çox nadir səciyyə daşıyan belə cəza üsuluna əl atılıb. Bu nə deməkdir?
Azər Həsrət: “Hər kəs burdan öz dərsini çıxarsın”
Siyasi şərhçi Azər Həsrət “Bakı-Xəbər”ə bildirdi ki, işlərində yol verdikləri nöqsanlara görə məmurların cəzalandırılması praktikasının daha geniş səviyyədə tətbiq edilməsi yerinə düşər. “İndi müəyyən səbəblərdən bəlli dövrdə Azərbaycan Prezidenti məmurlara, vəzifəli şəxslərə yetərincə şans verib. Yəni onların öz vəzifələri yerinə yetirməsi üçün imkanlar tanıyıb. Tapşırıqlar verib, şəraitlər yaradıb, bircə işləmək qalıb. Bəzən olub ki, məmurlar işləməyiblər, yaxud nöqsanlara yol veriblər. Bəlli bir müddətdən sonra onlar ya işlərindən azad olunublar, ya da həbsə atılıblar və sair. Biz bu dəfə başqa bir cəzalandırmanın şahidi oluruq. Bu cəzalandırma, təbiidir ki, əsassız deyil, Prezidentin əlində ciddi dəlil-sübut olmasa belə sərt addım atmaz. Hesab edirəm ki, bu cəzadan o məmur nəticə çıxarmalıdır. Vəzifəsində qalıb işləyəcəksə, burda, yaxud başqa işdə olcaqsa nəticə çıxarmalıdır. Bu başqaları üçün bir dərs, örnək olmalıdır. Yəni artıq müəyyən səbəblərdən bəzi insanların öz işini normal yerinə yetirməməsinə göz yumma mərhələsi arxada qalıb. Azərbaycan hamımıza bəlli olan problemlər mərhələsini arxada qoyub. İndi yeni bir səhifədən başlayırıq. Bu səhifədə o cür yaramazlıqlara yer yoxdur. Hər kəs burdan öz dərsini çıxarsın”.
İlqar Hüseynli: “Bu tipli cəza mexanizmləri...”
Sosial Strateji Tədqiqtlar və Analitik Arașdırmalar Ictimai Birliyinin rəhbəri İlqar Hüseynli “Bakı-Xəbər”ə bildirdi ki, dövlət idarəçilik sistemində, aparatında işləyib korrupsiya cinayətlərinə yol verən məmurlar var. “Məsələn, icra başçılarının silsilə həbsi bu kateqoriyaya aid olan cəza mexanizmləri sırasındadır. Onlar birbaşa həbs olunublar, əmlakları müsadirə olunub. Konkert olaraq onların törətdiyi iqtisadi cinayətlarlıq, koorrupsiya, vəzifə səhaliyyətlərindən sui-istifadə halları açıq-aşkar göz önündə olub. Buna görə də cəzalanıblar. Digər kateqoriyalı dövlət məmurlarının vəzifə səlahiyyətləri var ki, onlar işlərinin öhtəsindən gələ bilməyiblər, səlahiyyətlərindən qanunsuz istifadə edərək müxtəlif sərəncamlar və tapşırıqlar icra ediblər, özəlləşmə proseslərində aktiv iştirak ediblər. Bu tip məmurların da sadəcə işdən azad edilməsi ilə bağlı Prezident tərəfindən müvafqi sərəncamlar və cəza mexanizmi işə salınıb. O ki qaldı Fuad Nağıyevə verilən şiddətli töhmət məsələsinə, artıq burda məmurun potensialı, tutaq ki, nəyə cavab verir, onun iş imkanları nəzərə alınır, sadəcə olaraq işində yol verdiyi nöqsanlar sırasında məmurun reabilitasiyası üçün hardasa bir imkan yaradılır. Hələlik ona şiddətli töhmət verilir. Bu tipli cəza mexanizmləri Sovetlər dönəmindən mövcud olan bir cəza mexanizmidir. Düşünürəm ki, əgər məmur hansısa potensila malikdirsə ona bir şans verilir, o işdən azad olunmur, onun korrupsiya faktları hələ ki, mövcud deyil. Ona görə də bu məmura bu tipli cəzalar verilir ki, işində daha da məsuliyyətli olsun, yol verdiyi nöqsanları aradan qaldırmış olsun, daha da səmərəli idarəetmə sistemini öz rəhbərlik etdiyi qurumda tətbiq edə bilsin. Bilirsiz ki, turizm sahəsində vəziyyətimiz ürəkaçan deyil. İstər xarici turistlərin cəlb olunması, istərsə də yerli turistlərin məmnuniyyət məsələlərində çox ciddi böhranlı bir vəziyyət var. Fakt budur ki, daxili turizm də bizdə yüksək səviyyədə deyil. Yalnız pullu məmurlar və bizneslə məşğul olan bir qrup insanlar var ki, onlar yalnız Azərbaycan daxilində turistik məkanlardan yararlana bilirlər. Turizm Agentliyinin burda yenilikçi, innovativ təklifləri mövcud deyil ki, bütün Azərbaycan xalqı daxili turizmdən bəhrələnə bilsin. Hesab edirəm ki, bu sahənin inkişafı ilə bağlı agentlik bütün imkanlarını ortaya qoymalıdır və bu məsələdə irəliləyişə nail olmalıdır. Görünür, bu irəliləyişi, bu inkişafı görə bilməyən ölkə Prezidenti şiddətli töhmət elan etməklə Fuad Nağıyevə sonuncu bir şans verib”-deyə İ.Hüseynli bildirdi.
Aydın Xan Əbilov: “Mən müstəqil Azərbaycanın tarixində şifahi şiddətli töhmətlər görmüşdüm, amma yazılı töhmət görməmişdim”
Yeni Yazarlar və Sənətçilər İctimai Birliyinin sədri, analitik-ekspert, yazıçı-kulturoloq Aydın Xan Əbilovovun fikrincə, təəssüflər olsun ki, bir sıra sahələrdə olduğu kimi turizm sahəsində də ciddi problemlər mövcuddur. “Turzim intibahı baş verdi, amma bu proses indi istənilən səviyyədə deyil. Ölkə başçısı turizmin inkişafı ilə bağlı çox böyük proqramlara imza atdı. İstər müxtəlif beynəlxalq idman yarışlarının, istər Avroviziyanın, istərsə də digər beynəlxalq tədbirlərin, mədəniyyət forumlarının Bakıda təşkil edilməsi daxili və xarici turizmin inkişafına böyük təsir etdi. Əslində bu təsir həm də turizm, əyləncə biznesinin get-gedə genişlənməsinə aparıb çıxarmalı idi. Amma əksini gördük. Hətta struktur dəyişikliklərinə də gedildi, Turizm Agentliyi yaradılıdı. Əvvəlcə bu, Mədəniyyət Nazirliyinin tabeliyində idi, sonradan ayrıca bir qurum kimi fəaliyyət göstərməsi üçün dövlət təşkilatı kimi Turizm Agentliyi yaratdılar. Orda işləyən məmurlardan çox şey gözlənilirdi. Təəssüflər olsun ki, o məmurlar və o quruma rəhbərlik edən şəxslər onlara həvalə edilmiş belə məsul vəzifələri layiqincə yerinə yetirə bilmədilər. Bu səhv idarəetməyə görə də agentliyin rəhbəri ölkə başçısı tərəfindən çox ciddi tənbeh növü sayılan şiddətli töhmət aldı. Əslində şiddətli töhmət kimi cəza növləri vaxtilə çox böyük təsirə malik idi. Bu o deməkdir ki, sənə tapşırılan məsul vəzifəni yetirməsən, elədiyin nöqsanları düzəltməsən yaxın vaxtlarda fəaliyyətinlə bağlı araşdırma aprılacaq, sənin işlərin yoxlanılacaq, yeyintilərə, yaxud hansısa qanun pozuntularına görə həbs oluna da, işdən çıxarıla da bilərsən. Mən müstəqil Azərbaycanın tarixində şifahi şiddətli töhmətlər görmüşdüm, amma yazılı töhmət görməmişdim. Məsələn, rəhmətlik Heydər Əliyev məmurları səhvlərinə görə danlayırdı, onları məzəmmət edirdi, şifahi töhmət elan edirdi, daha sonra işdən çıxarırdı. Bəziləri hətta həbs olunurdu. Cənab Prezident İlham Əliyevin daxili siyasətində bu bir ilk idi. Düşünrəm ki, bu şiddətli töhmət öz vəzifələrini layiqincə yerinə yetrməyən digər məmurlar üçün də bir növ dövlət başçısının silkələdiyi barmaq idi. Unudulmasın ki, bu barmaq dəmir yumruğun barmağıdır” - deyə bildirən A.X.Əbilov qeyd etdi ki, azad ərazilərin turizm bölgəsinə çevrilməsi əsas hədəflərdən biridir.
İradə SARIYEVA
