Azər Həsrət: “QMİ sədri o sualı verməli idi...”
Mayın 24-də Qafqaz Müsəlmanları İdarəsinin (QMİ) sədri şeyxülislam Allahşükür Paşazadə Vatikan Dövlətinin, iqamətgahı Ankarada olmaqla, Türkiyə və Azərbaycandakı apostol nunsisi arxiyepiskop Marek Solçinski ilə görüşüb.
Mətbuatda yayılan məlumata görə, QMİ sədri və nunsi bir sıra məsələlər barədə müzakirə aparıblar. A.Paşazadə qonağa, həmçinin, Azərbaycan ərazilərinin işğalı zamanı dini abidələrin, o cümlədən məscidlərin və kilsələrin dağıdıldığı barədə məlumat verib, hazırda isə həmin ərazilərdə dini-mənəvi irsin bərpası, məscid, kilsə və məbədlərin yenidən qurulması sahəsində görülən işlər barədə danışıb. Vurğulanıb ki, Azərbaycan dünya miqyasında dinlərarası, millətlərarası münasibətlərin qurulmasında nümunəvi ölkə kimi tanınır, respublikamızda bütün dinlərə məxsus tarixi-dini abidələr qorunur, onlara xüsusi qayğı ilə yanaşılır. Azərbaycanda multikulturalizmin dövlət siyasəti kimi həyata keçirildiyi və dövlət başçısının bu dəyərli ideyanın qlobal müstəvidə fəal müdafiəçisi olduğu diqqətə çatdırılıb.
Görüşdə nunsi Azərbaycanın işğaldan azad olunmuş ərazilərinə səfər edəcəyini vurğulayıb.
Vatikan nümayəndəsi Azərbaycanın azad ərazilərinə səfər etmək istəyini dilə gətirib.
Aydın olmayan bir məqam var, nunsi niyə indi səfər haqda danışır? 30 il boyunca ermənilər ərazilərimizi işğal altında saxladılar, amma Vatikanın səsi çıxmadı. Bu gün ermənilərin, guya azad ərazilərdə “xristin dini abidələri təhlükə altındadır” kimi absurd, əsassız iddialarından sonra Vatikan təmsilçisinin bu niyyəti diqqəti çəkir. Vatikanın papasının apostolu azad rayonlarımıza işğal illərində niyə gəlmədi?
- “Bir xristian təəssübkeşliyi, xristian həmrəyliyi var və o həmrəylik çərçivəsində də onlar hərəkət edirlər”
Siyasi şərhçi Azər Həsrət “Bakı-Xəbər”ə şərhində “QMİ sədri o sualı verməli idi, amma ondan əvvəl bəzi məsələləri özümüz üçün aydınlaşdırmalıyıq. Azərbaycan onları əvvəlki illərdə dəvət edibmi, bu prosesə cəlb edibmi? Özəlliklə də Şeyxin özü bu məsələlərlə bağlı hansısa müraciətlər edibmi? Edibsə, hansı cavablar alınıb, o cavablar ictimailəşdirilibmi? Bunları araşdırmaq lazımdır. Əlbəttə, QMİ-dən bu barədə məlumat əldə etmək və dəqiqləşdirmək lazımdır. Ümumiyyətlə isə, adıçəkilən şəxsin, təmsil etdiyi qurumun, yaxud dövlətin Azərbaycan-Ermənistan münasibətlərində mövqeyi heç də birmənalı olmayıb. Bundan sonra da olacağını düşünmürəm. Çünki bir xristian təəssübkeşliyi, xristian həmrəyliyi var və o həmrəylik çərçivəsində də onlar hərəkət edirlər. Eyni zamanda xatırlatmaq istəyirəm ki, əslinə qalanda məsələyə başqa qurumların da münasibəti fərqli olmayıb. Elə UNESCO-nu götürək. Xatırlayırsınıza, bir müddət əvvəl ölkəmizin birinci xanmı UNESCO-nun xoş məramlı səfiri vəzifəsindən imtina etməli oldu. Bunun da səbəbi o idi ki, torpaqlarımız işğaldan azad edildikdən sonra UNESCO faktaraşdırıcı missiya göndərmir, buradakı vəziyyətlə tanış olmaq istəmir. Daha doğrusu, onlar burada ermənilərin törətdiyi vəhşilikləri gəlib görmək istəmirlər və iddia edirlər ki, guya Azərbaycan “erməni mirası”nı “dağıdıb”. Bunu rəsmləşdirmək istəyirdilər, ona görə də Mehriban Əliyeva etirazını bildirdi”-deyə vurğuladı.
Siyasi şərhçinin sözlərinə görə, halbuki, o torpaqlar Ermənistanın işğalı altında olarkən Azərbaycan dəfələrlə müraciət etmişdi ki, UNESCO gedib o abidələrin vəziyyətini görsün və onları qeydə alsın, amma təəssüf, qurum bunu etmədi. “Vatikan nümayəndəsinin, bütövlükdə Vatikanın da yanaşması heç də fərqli deyil. Onlar üzdə xoş sözlər deyirlər, münasibətlər haqqında boş danışırlar, amma arxada öz bildiklərini edirlər. Bu da xristian təəssübkeşliyi, xristian həmrəyliyidir. Bizim Şeyxin ona bu sualı verib-verməməsinə gəlincə, şəxsən düşünürəm ki, qeyd etdiyim kimi, məsələ bir qədər araşdırılmalıdır. Öyrənməliyik ki, biz onlara o təklifi vermişikmi, onlar gəlməkdən imtina edibmi. Bəlkə heç o təklifi verməmişik. Verməmişiksə, əvvəlcə sualı özümüzə ünvanlamalıyıq, sonra da onlara”-deyə A.Həsrət bildirdi.
Əli TURABOV
