Prezident İlham Əliyev sentyabrın 21-də Laçın şəhərində Azərbaycan Bayrağını ucaldan zaman çıxışında bildirib ki, biz müharibədən dərhal sonra onlara sülh təklif etmişik:
“Bu da dünya hərb tarixində bəlkə də nadir hallardan biridir ki, 30 il ərzində torpağımız işğal altında olsun, insanlarımız əzab-əziyyət içində yaşasın, tarixi-dini abidələrimiz dağıdılsın, şəhərlərimiz dağıdılsın, milyondan çox mina döşənsin, buna baxmayaraq, biz sülh təklif etdik. Ancaq yenə də görürük ki, Ermənistan sülh istəmir, yenə də revanşist fikirlərlə yaşayır".
Dövlət başçısı deyib ki, biz təklif etdik ki, delimitasiya prosesinə start verək: “Bunu təxminən bir ildən çox müddət ərzində uzatdı. İndi isə bu proses başlasa da, sırf formal xarakter daşıyır, mahiyyət üzrə heç bir danışıqlar aparılmır, xəritələr üzrə heç bir müzakirə aparılmır. Biz bütün xəritələri hazırlamışıq. Həm XX əsrin xəritələrini, həm əvvəlki dövrün xəritələrini və delimitasiya işləri bu xəritələr üzrə aparılmalıdır”.
Prezident İlham Əliyev qeyd edib ki, Ermənistanla sülh müqaviləsini imzalamaq üçün 5 prinsip təklif etmişik: “Sözdə onları qəbul ediblər, amma biz bunu əməldə görmürük. Yenə də vaxt uzatma taktikası. Ermənistanın 2020-ci il noyabrın 10-da imzaladığı kapitulyasiya aktına əsasən, erməni silahlı qüvvələri Qarabağdan çıxarılmalı idi. Hələ də tam çıxarılmayıb. Ermənistan Azərbaycanın əsas hissəsi ilə Naxçıvan Muxtar Respublikasının birləşməsini təmin edən dəhliz verməli idi. Bugünə qədər nəinki dəhliz verilməyib, hətta dəhlizin marşrutu bizə deyilməyib. Heç bir praktiki iş aparılmayıb. Biz isə indi dəmir yolunu Zəngilana qədər çəkmişik. Avtomobil yolunu Zəngilana qədər çəkmişik. Biz gələn ilin sonunda Ermənistan sərhədinə həm dəmir yolunu, həm avtomobil yolunu gətirəcəyik. Ancaq Ermənistan ərazisində heç bir iş görülmür və görünür ki, heç bir iş görmək istəmirlər. Yenə də vaxt uzadırlar”.
Göründüyü kimi, ölkə başçısı Ermənistanın məqsədli şəkildə sülh danışıqlarından yayındığını, sərhədlərin dəqiqləşməsi prosesinə formal yanaşdığını bildirdi. Prezidentin bu tip çıxışları Ermənistanı sülh sazişinə və sərhədlə bağlı məsələyə konstruktuv yanaşmaya vadar edə bilərmi?
Tərxis Olunmuş Hərbçiləri Maarifləndirmə İctimai Birliyinin sədri, hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, Silahlı Qüvvələrin Ali Baş Komandanı, Prezident İlham Əliyevin verdiyi bəyanatlar hər zaman real həyatda öz təsdiqini tapıb: “Onun verdiyi sözlərin hamısı yerinə yetirilib. Qarabağla bağlı qarşıya qoyulan bütün məqsədləri Azərbaycan xalqı, Azərbaycan Ordusu reallaşdırıb. Prezident beynəlxalq qanunlara, haqqa və ədalətə söykənən çıxış edir, bəyanatlar verir. Ermənistan və onun arxasında duran qüvvələr bundan düzgün nəticə çıxarmalıdır. Əks halda, Prezident açıq şəkildə bildirdi ki, bizdə həm 19-cu, həm də 20-ci əsrin xəritələri var. Seçim Ermənistanındır. Onlar üzr istəyib Azərbaycanın ərazi bütövlüyünü tanısa, məsələyə müasir xəritə ilə baxmaq olar. Yox, bunu etməsə, biz məsələyə 1918-ci ildən əvvəlki xəritələrə müraciət etməli olacağıq. Onda da Ermənistan adlı dövlət olmayıb. Biz həm də məcbur olacağıq ki, Qazaxdan Naxçıvana qədər böyük bir bufer zona yaradaq. Necə ki, ABŞ ökeanın o tayından gəlib Əfqanıstanda öz milli maraqlarına uyğun əməliyyat keçirir, necə ki Rusiya Suriyada əməiyyatlar keçirir, Azərbaycanın da bunları etməyə tam haqqı var. Qardaş Türkiyə də terrordan qorunmaq üçün Suriya ilə sərhəddə bufer zona yaradıb. Bunun başqa yolu yoxdur. Biz qarşıdakı illərdə erməni təcavüzündən əziyyət çəkə bilmərik. Ermənistan bizə qarşı bütün ağır cinayətləri törədib. Buna görə də, məsələ birdəfəlik yekunlaşmalıdır. Ermənistan bizim təkliflərimizi qəbul etməlidir. Əks halda növbəti
“dəmir yumruq” başına dəyəcək. Bunun təsiri isə daha ağır olacaq. Bu, Azərbaycan xalqının istəyi və tələbidir ki, biz növbəti təxribatlara dözə bilmərik. Ermənistan konkret mövqeyini deməlidir. Həmin ölkə ya sülhlə, ya da zor gücünə olsa belə Azərbaycanın irəli sürdüyü təklifləri qəbul etməlidir”.
Məhəmmədəli QƏRİBLİ
