Azərbaycanın Avroittifaqla münasibətlərinə bir cümləlik qiymət - hansı saziş üzvlüyə qəbulla nəticələndi ki...

Yeganə Hacıyeva: “Avropa Birliyinin genişlənməsini istəməyən Rusiya belə cəhdlərə silahlı müdaxilə ilə cavab verir”

img

Prezident İlham Əliyev yanvarın 12-də yerli televiziya kanallarına müsahibəsində Azərbaycanın Avropa İttifaqı ilə əlaqələrindən, ötən ilin iyul ayında Avropa İttifaqının Prezidentinin Azərbaycana gəlişindən, özünün isə Brüsselə səfərindən danışıb. Ölkə başçısı Bakı-Brüssel əlaqələrinin perspektivini yüksək qiymətləndirdiyini deyib:

“Prezident Şarl Mişelin Azərbaycana səfəri və burada keçirdiyim görüş çox müsbət idi. Brüsseldə keçən ay keçirdiyimiz görüşlə bağlı eyni sözləri deyə bilərəm. Bizim üçün əsas məsələ, Avropa İttifaqı ilə gələcək planlarımızı düzgün tərtib etmək idi. Mən bunu dəfələrlə keçmiş rəhbərliklə görüşlər əsnasında dilə gətirmişdim. Deyirdim ki, bilirsiniz, bizim hər hansı bir xüsusi gözləntilərimiz yoxdur. Bildiyiniz kimi, biz assosiasiya sazişinə qoşulmadıq. Bu gün həyat göstərir ki, haqlı idik. Çünki qoşulan o biri ölkələr haqqında mən indi bir şey demək istəmirəm. Əgər biz real baxsaq, bu assosiasiya sazişi nə verdi?! Əlbəttə ki, sual doğurur. Yəni üzvlük perspektivi varmı? Yoxdur. Yəni yaxın gələcəkdə və orta müddətli gələcəkdə yoxdur. Hansısa başqa imtiyazlar varmı? Bilmirəm. Hər halda, yenə də deyirəm, bizim mövqeyimiz həmişə realist olub. Deyirdim ki, biz gərək həyata keçirə bilmədiyimiz şeylərin, necə deyərlər, ətəyindən yapışmayaq. Real. Biz istəyirik ki, Avropa ilə daha yaxın əlaqələr olsun. Avropa da istəyir ki, onun sərhədlərində vəziyyət sabit olsun. Hesab edirəm ki, cənab Mişellə görüşlər əsnasında biz bu gündəliyi formalaşdıra bildik. Ümid edirəm, bu müştərək yanaşma imkan verəcək ki, tezliklə yeni sazişi də tamamilə razılaşdırılacaqdır. Çünki hazırda sazişin təqribən 90-92 faizi razılaşdırılıb. Bir neçə maddə var ki, orada fikir ayrılığı var. Amma hesab edirəm ki, ciddi iradə göstərilərsə, hər iki tərəfdən buna biz nail ola bilərik”.

Göründüyü kimi, Prezident Avroittifaqla Assosiyasiya Sazişini imzalamaqla doğru addım atdığını faktlarla əsaslandırıb.

Beynəlxalq məsələlər üzrə ekspert Yeganə Hacıyeva “Bakı-Xəbər”ə açıqlamasında bildirdi ki, Avropa qurumları ilə Azərbaycan arasındakı münasibətlərdən əvvəl, onların qonşu ölkələrə faydasının olub-olmadığı barədə danışmaq lazımdır: “Bilirik ki, tərəflər arasında qurulan münasibətlərdə qarşılıqlı faydalılıq əmsalı əsas götürülür. Bu münasibətlərin inkişaf etməsinin əsasında duran amil həm də ölkələrin bütün sahələr üzrə rifahının təminatına lazımdır. Avropa Birliyi ilə Azərbaycan yaxından əməkdaşlıq edib. Biz NATO ilə yaxından əməkdaşlıq etmişik. Avropa Birliyinin özünün  təsisatları ilə münasibətlərində ciddi fərq nəzərə çarpır. Həmin təsisatlardan 44 günlük müharibə dönəmində elə də obyektiv mövqe görmədik.  Ermənistan ballistik raketlər atıb mülki əhalini öldürdü, ancaq biz cəmi bir zəif bəynatın verildiyinin şahidi olduq. Azərbaycana qarşı daha çox sərt münasibətdə olan təsisat Avropa Şurasıdır. Şərq Tərəfdaşlığı Proqramı ilə bağlı da biz obyektiv yanaşmanın şahidi olmadıq. ATƏT-in Minsk Qrupu formatı bir addım da olsun irəli gedə bilmədi. Hətta bəzi hallarda Ermənistana dəstəklərini ifadə etdilər.  Assosiyasiya sazişi ilə bağlı da Azərbaycan çox doğru və praqmatik addım atıb. Biz həmin sazişə qoşulanlarla bağlı yaşanan aqibəti gördük. Hətta həmin sənədə imza atanlara edilən təzyiqlərdə Avropa Birliyi bir qədər kənarda qalmaqla seyrçi olmağa üstünlük verdi. Heç bir ölkənin də quruma  üzvlüyü təmin edilmədi, əvəzində həmin ölkələrə ciddi təzyiqlər edildi. Avropa Birliyinin genişlənməsini istəməyən Rusiya belə cəhdlərə silahlı müdaxilə ilə cavab verir. Əvəzində Avropa bir bəyanat verməklə kifayətlənir”.

Məhəmmədəli QƏRİBLİ

Son xəbərlər