İrəvanın KTMT arzuları puç olur - Azərbaycan Zəngəzuru hissə-hissə alacaq...

img

Məlum olduğu kimi, bu günlərdə Ermənistan Soçi bəyanatından və Brüssel danışıqlarından sonra növbəti dəfə öhdəliklərini pozaraq Kəlbəcərdəki Azərbaycan mövqelərini atəşə tutdu. Buna görə də çox ağır cavab aldı.

Qeyri-rəsmi məlumatlara əsasən, Ermənistan silahlı qüvvələrinin yanvarın 11-i günorta saatlarından etibarən başlatdığı təxribata cavab olaraq Azərbaycan ordusunun əsgərləri dövlət sərhədinin Kəlbəcər rayonu istiqamətində düşmənin iki postunu dağıdıb. Əsgərlərimiz səkkiz nəfər düşmən hərbi qulluqçusunu məhv edib. Bundan başqa, düşmənin xeyli yaralısı var.

Bundan əvvəl ötən il noyabrın 16-da da sərhəd təxribatı erməni tərəfinə baha başa gəlmişdi. İndi maraq doğuran odur ki, Ermənistan hər dəfə sərhəddə belə itkilər verdiyi halda, nədən təxribatlarını davam etdirir. Ekspertlər qeyd edir ki, Ermənistan hələ müharibədən öncə dəfələrlə Rusiyanın iradəsi altında olan Kollektiv Təhlükəsizlik Müqaviləsi Təşkilatını  (KTMT) münaqişəyə cəlb etmək istəyirdi, amma bütün bu cəhdlər boşa çıxdı. Amma Qazaxıstan hadisələri İrəvanı yenidən sərsəm ideyalara doğru itələyir. Ermənistanın baş naziri Nikol Paşinyan yanvarın 10-da KTMT-nin Qazaxıstan hadisələrinə həsr olunmuş növbədənkənar iclasında həmin hərbi təşkilatın Qazaxıstandakı fəaliyyətinin çərçivəsini genişləndirərək Qarabağ zonasına gəlişini arzulayan bəyanat səsləndirdi. KTMT-nin Qazaxıstana qüvvə yeritməsindən cuşa gələn Nikol Paşinyan Rusiyadan yanvarın 11-də Kəlbəcər istiqamətində təxribatlar törətdi. Ermənistanın bundan sonra da təxribatlara yol verəcəyi istisna oluna bilməz, amma bunun İrəvan üçün nəticələri daha ağır olacaq. Bunu Ermənistan Milli Təhlükəsizlik Xidmətinin keçmiş rəhbəri David Şahnazaryan da təsdiq edir. O bildirib ki, Ermənistan üçün əsas təhlükə Azərbaycanla sərhədin delimitasiyası və demarkasiyasının uzanmasıdır. Şahnazaryan qeyd edib ki, proses başlasa uzun sürməyəcək və nəticədə Gorus-Qafan yolunda olduğu kimi, Kərki və Əskipara kəndlərinin yaxınlığındakı ərazilərdə də Azərbaycanın sərhəd və gömrük-keçid məntəqələri yaranacaq. Şahnazaryan kommunikasiyaların blokdan çıxarılmasının Ermənistan üçün ciddi nəticələri olacağını da bildirib: “Görünür, onlar artıq bu barədə razılığa gəliblər. Söhbət Azərbaycanı Naxçıvanla birləşdirməli olan marşrutdan gedir. Ermənistanda bütün kommunikasiyaların açılmasından danışırlar”.

Hələlik isə Ermənistanın əsas niyyəti postmüharibə dövründə sülh prosesinə zərbə vurmaq, təxribatçı fəaliyyətlə KTMT-ni Azərbaycana qarşı hərəkətə keçməyə təhrik etməkdir. KTMT tərəfindən bütün bunlarla bağlı verilən reaksiya və açıqlanan rəsmi mövqe erməni tərəfinin təxribat xarakterli fəaliyyətinin fiaskoya uğradığını göstərir. KTMT, o cümlədən onun aparıcı üzvü olan Rusiya Azərbaycanın beynəlxalq hüquq normaları daxilində hərəkət etdiyini qəbul edir. Elə bu səbəbdən Ermənistanın bütün təxribatçı cəhdləri iflasla nəticələnir. Rusiyalı ekspert Vitali Arkov bu fonda bildirib ki, KTMT sərhəd məsələsində İrəvanın yardımına gəlməyəcək: “Unutmaq olmaz ki, məhz bu yaxınlara qədər Ermənistan Azərbaycan torpaqlarını işğal altında saxlayırdı. KTMT-ni istifadə etmək üçün Nikolun heç bir “kozırı” yoxdur - nə təcavüz var, nə terrorçular, nə də xaricdən dövlət çevrilişinə cəhd. Hazırda Paşinyan rejimini devirə biləcək qüvvələr elə İrəvanın özündə oturur – “Qarabağ klanı”nın timsalında rusiyapərəst müxalifət. Amma Moskva hələ ki, bu “rıçaq”dan istifadə etmir”. Bununla yanaşı, ekspertlər diqqəti ona yönəldir ki, Azərbaycanın beynəlxalq hüquq normalarına uyğun olaraq Ermənistanla sərhədlərinin delimitasiya və demarkasiyası istiqamətində atdığı addımlara hələ də rəsmi İrəvan tərəfindən adekvat reaksiya verilmir. Postmüharibə dövründə qalıcı sülhün bərqərar olmasına xidmət edən bu addımın əksinə olaraq, Ermənistan sərhədlərin müəyyənləşdirilməsi prosesinə əngəl törətməyə çalışır, bu məqsədlə müxtəlif təxribatçı fəaliyyət həyata keçirir. Lakin əvəzində daha çox itkilərə məruz qalır. Ermənistanın “Alternativ layihələr” qrupunun üzvü Vahe Hovhannisyan da məsələyə bu prizmadan yanaşır: “Bizi alçaldırlar, daim güzəştə gedirik, kütləvi şəkildə ölkəni tərk edirik, hamımızı bir-birimizə düşmən ediblər, perspektivdən məhrum ediblər. Və vəziyyəti dəyişə bilmərik. Ermənistan Təhlükəsizlik Şurasının katibi Armen Qriqoryan İctimai Televiziyaya verdiyi müsahibədə “KTMT vaxtilə Ermənistana kömək etmədi, Ermənistan niyə indi reaksiya verir?” tənqidinə toxunaraq deyib: “Biz incimiş gənc kimi deməməliyik ki, siz etməmisiniz, biz də etməyəcəyik. Biz məsuliyyət götürmüşük, görünür tarixdə ilk olaraq KTMT mexanizmlərini işlətmişik, onun necə işləməli olduğunu göstərmişik. Ümid edirik ki, Ermənistan gələcəkdə bənzər vəziyyətə düşsə, müvafiq köməyi alacaq”. Armen Qriqoryan ümid edir ki, hakimiyyətinə qarşı kütləvi iğtişaş olacağı halda, onlar KTMT-nin - Rusiyanın, Belarusun, Qazaxıstanın, Qırğızıstanın, Tacikistanın qoşunlarını çağıracaq, nümayişçiləri güllələyəcəklər. Onlar da süngülər üzərində oturmağın çox ağrılı olacağını anlamayaraq yad süngülər üzərində oturacaqlar. Həm də baş verənlər göstərir ki, Azərbaycanla sərhəddə baş verənlərə KTMT müdaxilə etməyəcək. Bu gedişlə Azərbaycan Zəngəzuru hissə-hissə alacaq”.

Ramil QULİYEV

Son xəbərlər