Rusiya Xarici İşlər Nazirliyi dekabrın 3-də Ermənistan parlamenti spikerinin “Lavrov planı” barədə şərhinə reaksiya verib və bildirib ki, “həqiqətdə yox, xəyalda olan nəyəsə” şərh vermək çətindir.
Məsələ ondadır ki, Rusiya KİV nümayəndələri ilə görüşündə Ermənistan parlamentinin spikeri Alen Simonyan “Lavrov planını” xatırladıb və “Qarabağın təhvil verilməsini” Rusiya ilə əlaqələndirib. Hələ noyabrın 24-də dərc olunmuş səs yazısında Rusiya jurnalisti Ermənistan hakimiyyətini “Qarabağı təhvil verməkdə” ittiham edir və bildirir ki, bu, Ermənistanın öz siyasi kursunu dəyişməsi üçün edilib. Sözügedən audioda Alen Simonyan ittihama belə cavab verir: “Siz hesab edirsiniz ki, biz Qarabağı təhvil vermişik. Ermənistan cəmiyyətində də belə bir yanaşma və belə bir rəy var ki, Qarabağı Rusiya təhvil verib. Çünki kimsə Qarabağı təhvil vermək istəyirdisə, burda “Lavrov planı” da daxil, bir neçə variant vardı”. Rusiya XİN onu da bildirib ki, ATƏT-in Minsk Qrupu həmsədrlərinin tənzimləmə planının son redaksiyası tərəflərə 2019-cu ilin iyununda verilib. Bu sənədə görə, “birinci mərhələdə Azərbaycana beş rayonun, ikinci mərhələdə isə Dağlıq Qarabağın statusunun mütləq şəkildə buna bağlanması şərtilə daha iki rayonun qaytarılması nəzərdə tutulurdu”. Lavrovun başçılıq etdiyi qurum müharibədən bir il sonra Alen Simonyanın bəyanatlarının təkzibi üçün Minsk Qrupunun sonuncu sənədinin detallarını dərc edib. Bu detallar isə belə idi: “Planın başqa elementləri - Kəlbəcər və Laçın rayonlarının Azərbaycana qaytarılması şərtilə Dağlıq Qarabağ əhalisinin tam həyat fəaliyyətini təmin edən hüququnun tanınması; Dağlıq Qarabağ nümayəndələrinin ATƏT-in iclaslarında iştirakı; blokadanın götürülməsi; sərhədlərin açılması; tərəflərin güc tətbiq etməmək barədə öhdəlik götürməsi; Laçın dəhlizinin eni və statusu məsələsinin həllini nəzərdə tuturdu”. Burada diqqəti çəkən məqam odur ki, “Lavrov planın”da Dağlıq Qarabağ ermənilərinin ATƏT-də xüsusi nümayəndəliyinin yaradılması olub. Bir daha qeyd edək ki, söhbət müharibədən əvvəlki danışıqlar prosesindən gedir. Hansı ki, bir müddət münaqişənin tənzimlənməsində “Lavrov planı” gündəmdə idi. Maraqlıdır, doğrudanmı Qarabağ ermənilərinin ATƏT-də nümayəndəliyinin yaradılması nəzərdə tutulurmuş?
“Müharibə dövründə Rusiyanın neytral qalmasını ermənilər həzm edə bilmədikləri üçün belə uydurmaları ortaya atırlar”
Məsələyə münasibət bildirən sabiq diplomat, politoloq Fikrət Sadıqovun fikrincə, “Lavrov planı”nda çox şey ola bilər: “Bu o demək deyil ki, Azərbaycan onların hamısını qəbul edəcəkdi. Təbii ki, yox. Birinci Qarabağ müharibəsindən sonra təklif olunan və bizim mənafeyimizə cavab verməyən variantları Azərbaycan heç vaxt qəbul etməyib. O cümlədən, separatçıların danışıqlarda hansısa formada tərəf olmasını qəbul etməyib. Bu baxımdan rəsmi Bakı heç vaxt buna getməzdi. Ola bilər ki, Lavrov ermənilərin mənafeyinə uyğun hansısa məsələləri ora daxil etmək istəyib. Başqa bir tərəfdən, erməni təbliğatı zaman-zaman müəyyən uydurmalarla çıxış edib. Bu baxımdan sözügedən məsələ ilə bağlı da belə hallar ola bilər. Baxın bunlar nə qədər həyasızdılar ki, yeri gələndə məsələni tamam başqa cür təqdim edirlər. Guya ki, “Lavrov planı” sırf Azərbaycanın maraqlarına xidmət edib. Çünki müharibə dövründə Rusiya neytral qaldı. Bunu da ermənilər həzm edə bilmirlər. Ona görə də müharibədən əvvəlki danışıqlara görə Rusiyanı tənqid edirlər və bunu müxtəlif formada təqdim etməyə çalışırlar”. Politoloq onu da əlavə etdi ki, Azərbaycan bundan sonra da o cür planları yaxın buraxmayacaq. Vidadi ORDAHALLI
