“Torqovıda” pulqabısını itirmişdi, polis və vicdanlı vətəndaş yardımçı oldu...

14 Fevral 2020 17:08 (UTC+04:00)

Vətəndaşların polisə olan müraciətləri təkcə cinayətlərlə, şikayətlərlə bağlı deyil. Onlar həm də polisə inanır və etibar edirlər.

Polis-vətəndaş həmrəyliyinin daha bir təzahürü bu günlərdə baş verib. Belə ki,  fevralın 12-də DİN-in “102” Zəng Mərkəzinə müraciət edən vətəndaş həmin gün Səbail rayonu ərazisində pulqabısını itirdiyini bildirib. 

Müraciətlə əlaqədar Bakı şəhər sakini Nüsrət Sultanov Səbail RPİ-nin 9-cu Polis Bölməsinə dəvət edilib. O, paytaxtın “Torqovı” kimi tanınan ”Nizami” küçəsində içərisində bank kartları, sənədləri və 980 manat pulu olan pulqabısını naməlum şəraitdə itirdiyini deyib. 

Polis əməkdaşları tərəfindən müvafiq tədbirlərə başlanıb.

Həmin gün axşam saatlarında DİN-in “102” Zəng Mərkəzinə müraciət edən digər bir vətəndaş isə yerdən pulqabı tapdığını və sahibinə qaytarılması üçün polisə təhvil vermək istədiyini bildirib.

Həmin şəxs - Qaradağ rayonunun Lökbatan qəsəbəsində yaşayan Həsən Həsənov da  9-cu Polis Bölməsinə dəvət edilib. O, içərisində bank kartları, sənədlər və pul olan pulqabını polisə təhvil verib.

Araşdırma zamanı məlum olub ki, bu, N.Sultanovun itirdiyi, ona məxsus sənədlər və qeyd edilən məbləğ olan pulqabıdır.

H.Həsənov Nizami küçəsində olarkən həmin pulqabını yerdən tapdığını, içində sənədlər olduğundan onu sahibinə qaytarmaq üçün ancaq polisə etibar etdiyini qeyd edib.

Hər iki şəxs 9-cu Polis Bölməsinə dəvət edilib, polis əməkdaşlarının iştirakı ilə  həmin pulqabı sahibinə qaytarılıb.

Nüsrət Sultanov və Həsən Həsənov göstərdikləri bu köməkliyə görə polis əməkdaşlarına təşəkkürlərini bildiriblər. Azərbaycan polisinin etimad ünvanı olduğunu, ona güvəndiklərini qeyd ediblər.