Avropa Komissiyası Azərbaycanda akademik qurumlar və ali məktəblər üçün vahid məlumat bazasının yaradılmasını zəruri saydı

13 Fevral 2020 16:19 (UTC+04:00)

Azərbaycanda akademik qurumlar və ali təhsil müəssisələri tərəfindən elmi infrastrukturun müştərək istifadəsi üçün vahid məlumat bazasının yaradılması zəruridir. “Trend”-in məlumatına görə, bunu Avropa Komissiyasının nümayəndəsi, Sosial İnnovasiyalar Mərkəzinin layihə meneceri Martin Feliks Qajdusek Azərbaycan Milli Elmlər Akademiyasının (AMEA) Birinci vitse-prezidenti İbrahim Quliyevlə görüşdə deyib.

Martin Feliks Qajdusek Avropa Komissiyasının Azərbaycan Təhsil Nazirliyi ilə həyata keçirdiyi birgə layihələr haqqında danışıb.

İ.Quliyev qeyd edib ki, AMEA-nın elmi müəssisələri ilə respublikanın müxtəlif nazirlikləri, bəzi ali məktəbləri arasında bağlanan saziş və müqavilələrə əsasən müştərək laboratoriyalar fəaliyyət göstərir, birgə layihələr həyata keçirilir.

Görüşdə AMEA ilə ölkənin ali təhsil müəssisələrinin müştərək məlumat bazasının yaradılması üçün standartların müəyyənləşdirilməsi, elmi-tədqiqatların səmərəli təşkili məqsədilə avadanlıq və cihazların alınması və saxlanılması üzrə yanaşmaların müvafiq müəssisələr arasında müzakirəsi, bu sahənin optimallaşdırılması və təkmilləşdirilməsi üçün müxtəlif qurumlar tərəfindən müvafiq tədbirlərin həyata keçirilməsi və digər mühüm məsələlər ətrafında fikir mübadiləsi aparılıb.