“Həm “Kinematoqrafiya haqqında” qanun layihəsində, həm də kino haqqında hazırladığımız yeni konsepsiyada bu məsələlərin hamısı nəzərdə tutulub” “... xarici kino şirkətləri ilə müştərək filmlər çəkməyə maraq göstəririk”
Müasir Azərbaycan kinosunun dünya kinosuna inteqrasiyası zamanın tələbi kimi meydana çıxıb. Milli kino sənayesinin yenidən qurulması, yeni maddi-texniki bazaya malik olması, habelə kino sahəsində kadrların yetişdirilməsi, xarici kino şirkətləri ilə müştərək filmlərin çəkilməsi aktual məsələdir.
Kino sahəsində mövcud olan qanunvericilik bazasının yenidən işlənib hazırlanması, kino ilə bağlı gərəkli maddələrin həmin sənədlərdə əks olunması da vacibdir. Milli Məclisdə “Kinematoqrafiya haqqında”Qanuna ediləcək əlavə və dəyişikliklər də çox aktualdır.
Hesablama Palatası təklif edir ki, dövlət sifarişi ilə istehsal edilən kinofilmlər üzrə mövcud qaydalar təkmilləşdirilsin. Qurum hesab edir ki, Azərbaycanda çəkiləcək filmlərin istehsalında xarici mütəxəssislərin də iştirakı vacibdir. Hesablama Palatasının 2018-ci ildə fəaliyyəti barədə Milli Məclisə təqdim etdiyi sənəddə bütün bu məsələlər təklif kimi qeyd edilib. Sənəddə bildirilir ki, “Kinematoqrafiya haqqında” Qanuna müştərək filmlərin çəkilməsi və xarici mütəxəssislərin yerli film istehsalına cəlb edilməsi ilə bağlı yeni müddəaların daxil edilməsi barədə təkliflər verilib.
Nazirlər Kabinetindən isə Hesablama Palatasına verilən müvafiq məlumata görə, dövlət sifarişi ilə filmlərin çəkilişinə dair məsələləri ehtiva edən təlimat hazırlanıb, mədəniyyət naziri tərəfindən təsdiq edilib və hazırda tətbiq olunur. Eyni zamanda, “Kinematoqrafiya haqqında” qanun layihəsi hazırlanıb və Milli Məclisə təqdim olunub.
“Azərbaycanfilm” kinostudiyasının direktoru Müşfiq Hətəmov mövzu ilə əlaqədar “Bakı-Xəbər”ə bildirdi ki, Hesablama Palatasının təklif etdiyi məsələlərlə tanışdır və o təkliflər qanunvericilikdə öz əksini tapacaq. O vurğuladı ki, Azərbaycan kinosunun dünyaya inteqrasiyası üçün bu təkliflər vacibdir. “Yeni qanun layihəsində yer alması üçün bizim özümüz də geniş təkliflər vermişik və eyni zamanda, Hesablama Palatasının da verdiyi təkliflərə çox diqqətlə yanaşırıq. Həm “Kinematoqrafiya haqqında” qanun layihəsində, həm də kino haqqında hazırladığımız yeni konsepsiyada bu məsələlərin hamısı nəzərdə tutulub. Konsepsiyada Azərbaycan kinosunun dünyada qəbul olunmuş kino istehsalatı prinsiplərinə uyğunlaşdırılması da əks olunub. Məqsəd kinomuzun dünya kinosuna inteqrasiyasına nail olmaqdır. Biz, mütəmadi olaraq, xarici kino şirkətləri ilə müştərək filmlər çəkməyə maraq göstəririk. Əslində, məqsədimiz də xarici kino şirkətləri ilə birgə film çəkməkdir və bütün proseslərdə də bu məsələni nəzərə alırıq”.
M.Hətəmov qeyd etdi ki, həm yeni qanun layihəsinin, həm də konsepsiyanın qəbul edilməsi Azərbaycan kinosu qarşısında yeni üfüqlərin açılmasına səbəb olacaq. Onun sözlərinə görə, burada iki əsas prinsipə diqqət yetirilməlidir. “Birincisi, Azərbaycan kinosunun dünyaya çıxması daha da asanlaşacaq. İkincisi, Azərbaycanda yeni və böyük istehsalat prosesləri başlayacaq. Yeni qanun layihəsində film komissiyası ilə bağlı maddə də var. Yəni bütün dünyada qəbul olunmuş sistemdir. Bunun da məqsədi əsasən kinoya xarici investisiyanın cəlb edilməsidir. Bu çox vacib və böyük prosesdir və biz onu yeni konsepsiyada nəzərdən keçiririk” - deyə M.Hətəmov bildirdi.
“Müşfiq müəllim, bəzi kino mütəxəssisləri deyirlər ki, ölkəmizdə xarici şirkətlərlə birgə filmlərin istehsal olunması üçün Azərbaycan tərəfi hansısa beynəlxalq kino qurumlarına üzv olmalıdır. Bu fikirlər nə dərəcədə əsaslıdır?” - deyə soruşduqda, o bildirdi ki, xarici kino qurumlarının öz missiyası var. “Bu qurumların özünün başqa missiyası var. Müştərək film istehsalına bütün dünya kino şirkətləri açıqdır. Yəni əgər razılığa gəlirsənsə, fikir və ideyaların üst-üstə düşürsə, bu iş alınır. Bu məsələyə hansısa beynəlxalq kino qurumları müdaxilə etmirlər. Ancaq kinonun inkişafına dəstək layihələri var ki, onlarda həmin qurumların rolu böyükdür. Müştərək filmlər çəkməyə hansısa bir qurumun heç bir maneəsi yoxdur”.
Yeni formalaşdırılan qanunvericilik bazasının Azərbaycanda kinoprodüsserlik institutunun ayağa durmasına nə kimi dəstək olacağına gəlincə, M.Hətəmov qeyd etdi ki, prodüsserlik institutunun inkişafı olduqca vacib bir məsələdir və bu, yeni hazırlanan sənədlərdə əsas götürülən məsələlərdən biridir: “Burada əsas diqqət Azərbaycan kinoprodüsserlik məktəbinin və özəl kino studiyalarının inkişafıdır. Bu məsələlər nəzərdə tutulub. Bu da onunla bağlıdır ki, artıq bütün dünya buna doğru gedir. Dövlətin, “Azərbaycanfilm”in əsas rolu isə peşəkar kino məktəbinin qorunub saxlanması, gənc kadrların üzə çıxarılması və sairdir. İndiki qanun layihəsində özəl studiyaların inkişafına üstünlük verilir. Həm qanun layihəsində, həm də konsepsiyada özəl kino studiyaların inkişafı və onlara dəstək nəzərdə tutulur”.
İradə SARIYEVA
