Xəyalə Rais: “İTV-nin çəkdiyi “Əqrəb mövsümü”ndəki öpüşmə səhnəsinin tənqid edilməsi, normal qarşılanmaması təbiidir”
Kino həyatın bir parçası hesab edilsə də, qətiyyən həyatı olduğu kimi ifadə edə bilməz, bayağılıq isə kinoya heç yaraşan deyil. Çox təəssüf ki, son dövrlər çəkilən kinolarda, seriallarda bayağılıq, çiylik, qondarma səhnələr kifayət qədərdir.
Elə götürək, sosial şəbəkələrdə, sosial mediada günlərdir tənqid edilən “Əqrəb mövsümü” serialını. İctimai Televiziyanın bu serialındakı bir bayağılıq neçə gündür ki, müzakirə edilir, tənqidlərə məruz qalan serialda yer alan öpüşmə səhnəsi kəskin olaraq qınanılır. Məlumdur ki, aktyor Əli Əlizadənin həmkarı Şəhanə Rzayeva ilə öpüşmə səhnəsi İctimai Televiziyada ərsəyə gələn teleserialın son bölümündə yayımlanıb.
Bir məqamı da qeyd edək ki, izləyicilər arasında həmin kadrları sosial şəbəkədə qınayan və tənqid edənlər də, hətta bu səhnənin təbiiliyini önə çəkib onu bəyənənlər də olub. Bəziləri iddia edib ki, kadrlarda əks olunan öpüşmə səhnəsi çox təbii (?) alınıb. Deməzdik. Bu kadrın seriala salınması hansı məqsədə xidmət edir, bunu deyə bilmərik, onu deyə bilərik ki, bu öpüşmə səhnəsi çox bayağı alınıb. Bunu iyrənc bir səhnə kimi də qeyd etmək olar. O öpüşdə təbiilik yox, sünilik var, bayağılıq var. Əlbəttə, Azərbaycanda belə səhəninin serialda, kinoda göstərilməsi biabırçılıqdır, onun göstərilməsi yaxşı hal deyil. Yeri gəlmişkən, obrazına görə öpüşən aktrisa Şəhanə Rzayeva bəyan edib ki, bu öpüşmə səhnəsi lazım idi və çox təbii alınıb, o öz hədəfinə çatıb, hətta başqa filmlərdə də belə rollar oynamağa hazır olduğunu deyib. Bir sözlə, aktrisa öpüşmədən böyük “ləzzət” alıb. Bunu özü etiraf edib.
- “...Qırmızı xətt gözlənilməlidir”
Keçək ekspert fikrinə. Sənətşünas Xəyalə Rais hesab edir ki, tamaşaçılar Azərbaycan film və seriallarında belə səhnələri görməyə alışmayıb, bu səbəbdən də belə halları qəbul etmir. O qeyd etdi ki, xarici filmlərdə öpüşmə səhnələrinə baxan və buna görə heç bir irad irəli sürməyən Azərbaycan tamaşaçısı özümüzdə bunu qəbul etmir. Bunun təbii olduğunu deyən X.Raisin sözlərinə görə, hələ Azərbaycan kinosu bu kimi səhnələrə hazır deyil, heç tamaşaçılar da bunu qəbul edəcək düşüncədə deyil. Bizim kifayət qədər milli düşüncəyə, milli gələnəklərə, ailə dəyərlərinə bağlı olduğumuzu deyən ekspert bildirir ki, bu cür açıq səhnələri bu üzdən qəbul edə bilmirik. “Bu serialda yer alan öpüşmə səhnəsi neçə gündür sosial şəbəkələrdə müzakirə edilir, bunu ciddi şəkildə qınayanlar çoxdur. Əlbəttə, Azərbaycan tamaşaçısının bu səhnəni bu şəkildə tənqidlə qəbul etməsi təbiidir, bu mental dəyərlərimizə zidd sayılır. Tənqidlərə kifayət qədər əsaslar var. Biz müasirlik adı altında bu kimi səhnələri filmlərə salmalı deyilik, çünki bu ilk növbədə Azərbaycan tamaşaçısının qəbul etmədiyi bir məqamdır. O səhnədə hanısa təbiilik yoxdur, əksinə bayağılıq var. Tamaşaçı da bunu qəbul etmir.
Bəziləri deyir ki, XXI əsrdə yaşayırıq, amma hələ də Azərbaycan kinosunun müzakirə mövzusu dəyişməyib, dəyişməlidir, hansısa kiçik intimə meylli səhnə normal qarşılanmalıdır. Hər kəsin öz yanaşması var. Bizdə hansı rejissor, aktyor bu səhnəyə can atırsa da cəmiyyət onu elə içindəcə boğur. “Xarici filmlərdə öpüşmə səhnələrini sevərək izləyən Azərbaycan tamaşaçısı bu kadrları niyə öz filmlərimizdə bəyənmirlər, müzakirə mövzusuna çevirirlər?” sualı çox verilir. “Mentalitet, dəyərlər məgər öz fimlərimizə baxandamı yadlarına düşür?” kimi fikirlər də var.
Təbii olaraq tarixin istənilən dönəmində Azərbaycan filmlərində yer verilən erotik səhnələr həmişə ciddi müzakirələrə səbəb olub, bu gün də müzakirə mövzusudur. Bir neçə il öncə “Ilahi məxluq” filmində bu mövzunu dəfələrlə müzakirə etdik. Yaşı 50-ni ötən sənətkarlar deyir ki, indiki gənclər filmdə öpüşməyə meyllidir. “İlahi məxluq” filmində də bu səhnədə xalq artistləri çəkilib.
Bu filmdəki erotik bir səhnə - çoban atanın rəssam qızı zorlaması səhnəsi əməlli-başlı səs-küy doğurmuş, geniş müzakirələrə səbəb olmuşdu. Belə müzakirələrə qoşulanların çoxu həmin səhnəni oynamış aktyor (Nurəddin Mehdixanlı) və aktrisanı (Vəfa Rzayeva) qınayır, tənqid edir və o kadrların milli mentalitetimizə uyğun olmadığını deyirdilər.
“Təhminə və Zaur” filmi də onun kimi zamanında çox qınandı, ancaq bu gün ən çox sevilən, baxılan filmlərimizdəndir. Bu müzakirələr xeyli getdi.
İTV-nin çəkdiyi “Əqrəb mövsümü”ndəki öpüşmə səhnəsinin tənqid edilməsi, normal qarşılanmaması təbiidir. Çünki cəmiyyətimiz nə qədər müasirləşsə də, postmodernist dəyərlərə sarılsa da, sonda yenə də əxlaq məsələsində qırmızı xətt gözlənilməlidir...
Hesab edirəm ki, tamaşaçıların fikirlərinə dəyər verilməlidir”-deyə X.Rais qeyd etdi.
Leyla QARAXANLI
