Ərazilərimiz işğaldan azad olunanda sevindik ki, bu, heyvandarlığın inkişafına ciddi təkan verəcək. Ona görə ki, kifayət qədər böyük ərazi işğaldan azad edilib və həmin ərazilər geniş örüş sahələrinə malikdir. Özü də o ərazilər ki, işğaldan əvvəl 30 rayonun qoyun-keçisi Laçın və Kəlbəcərin yaylaqlarına çıxarılırdı. Ancaq işğala son qoyulandan sonra bu gözləntilər hələ ki, özünü doğrultmur.
Ötən il Azərbaycana diri qoyun və keçi idxalı 64 faiz artıb. 2022-ci ildə Azərbaycana 15 milyon 909 min dollarlıq 194 min 573 baş qoyun və keçi idxal olunub. Bu göstərici 2021-ci illə müqayisədə həcm baxımından 64.6 (76 min 428 baş), məbləğə görə isə 43.65 faiz (4 milyon 833 min dollar) çoxdur. Təəccüb doğuran məqam həm də ondan ibarətdir ki, idxal qiymətində ucuzlaşma olsa da, daxildə qoyun əti son bir ildə 20 faiz bahalaşıb. 2021-ci ildə ölkəyə 11 milyon 76 min dollarlıq 118 min 145 baş qoyun və keçi gətirilib. Onların idxal qiyməti 93.8 dollar təşkil edib. 2022-ci ildə isə 13 faiz ucuzlaşaraq 81.8 dollara enib.
Maraqlıdır, niyə bu sahədə idxal artır? Yerli istehsalın artmasına nə mane olur?
“Problem ondadır ki, bir ara necə gəldi örüş sahələri əkinə verildi”
Sözügedən məsələyə aydınlıq gətirən millət vəkili Vüqar Bayramov “Bakı-Xəbər”ə açıqlamasında bununla bağlı bir sıra məqamlara toxundu: “Həqiqətən də işğaldan azad edilən ərazilərimizin aqrar potensialı həddən artıq böyükdür. Həm bitkiçiliyin, həm də heyvandarlığın inkişaf etdirilməsi baxımından çoxşaxəli potensial mövcuddur. Ancaq nəzərə almaq lazımdır ki, bu rayonlarda birdən-birə heyvandarlığın sürətlə inkişaf etdirilməsi mümkün deyil. Ona görə ki, işğaldan azad edilən rayonların potensialından mərhələli şəkildə istifadə edilir. İşğaldan azad edilən rayonlarda heyvandarlığın inkişafı növbəti mərhələdə nəzərdə tutulur. Çünki həmin ərazilərdə minalanmış sahələr həddən artıq çoxdur. Minalar təmizlənmədən heyvanları örüş sahələrinə necə gəldi buraxmaq təhlükəlidir. Bu, həm heyvanların, həm də insanların həyatı üçün təhlükə yaradır. Ancaq biz aqrar sektorun əkinçilik sahəsində ərazilərin xeyli hissəsini iqtisadi dövriyyəyə cəlb etmişik. Artıq bu istiqamətdə prosesin genişləndiyi müşahidə edilir. Ona görə də heyvandarlıq da işğaldan azad olunan rayonlarda inkişaf edən sektorlardan biri olacaq. Sadəcə, bu, zaman məsələsidir. Artıq Laçında məskunlaşma başlayıb və bu rayon heyvandarlığın inkişafı üzrə böyük potensiala malikdir. O cümlədən, Kəlbəcər, Zəngilan və Qubadlı da heyvandarlığın inkişafı ilə bağlı böyük potensiala malikdir. Ona görə də məskunlaşma genişləndikcə, həmin rayonlarda da heyvandarlıaq inkişaf etdiriləcək. Ancaq hec şübhəsiz, bizim üçün əsas məqsəd bu sahədə idxaldan asılılığı aradan qaldırmaqdır. Problem ondadır ki, bir ara necə gəldi örüş sahələri əkinə verildi. Bu da heyvandarlığa mənfi təsir etdi. Ona görə də tək işğaldan azad edilən rayonlarda deyil, digər rayonlarda da heyvandarlıq inkişaf etdirilməlidir. Daha məhsuldar heyvan cinsləri alınmalıdır və bununla bağlı kompleks işlər görülməlidir”.
Vidadi ORDAHALLI
