Yaponiyanın paytaxtı Tokioda keçirilən XXXII Yay Olimpiya Oyunları başa çatdı. Azərbaycan yığması Tokio olimpiadasını qızıl medalsız başa vurdu. Azərbaycan medal sıralamasında 200-ə yaxın ölkə içərisində 67-ci oldu. Keçmiş SSRİ-nin 15 ölkəsi arasında isə medal əyarına görə 8-ci, medal sayına görə isə Belarusla birgə 5-ci yerdə qərarlaşdıq.
Bunlardan üçü gümüş, dördü bürünc medal oldu. Belə ki, Hacı Əliyev (sərbəst güləş), Rafael Ağayev, İrina Zaretskaya (karate), İrina Kindzerskaya (cüdo), Loren Alfonso Dominqes (boks), Rafiq Hüseynov (yunan-Roma güləşi) və Mariya Stadnik (qadın güləşi) Azərbaycana medal qazandıran idmançılar oldu. Olimpiya komandamız ilk dəfə müstəqil Azərbaycanın bayrağı ilə qatıldığımız 1996-cı il Atlanta Yay Olimpiya Oyunlarında olduğu kimi qızıl medal üzünə həsrət qaldı.
Məlumat üçün qeyd edək ki, 2016-cı ildə Braziliyanın Rio-de-Janeyro şəhərində baş tutan XXXI Yay Olimpiya Oyunlarında 18 medal (1 qızıl, 7 gümüş və 10 bürünc) qazanan Azərbaycan yığması medalların sayına görə dünyada 15-ci yeri tutub. 2012-ci il London Yay Olimpiadasında 9 medalla (2 qızıl, 2 gümüş və 5 bürünc) 30-cu yerə sahib olub. Təəssüf ki, Tokio olimpiadasında iştirak edən Azərbaycan komandası 2012-ci ilin uğurlarını belə təkrarlaya bilmədi.
Bir çoxları buna haqq qazandırmaq üçün pandemiya ilə əlaqədar tətbiq edilən məhdudiyyətləri əsas gətirir. Bu cür aşağı nəticənin əldə olunmasını yalnız pandemiya ilə əlaqələndirmək doğrudurmu?
“Bu da yerli məşqçilərdə, idmançılarda ruh düşkünlüyü yaradır, onlarda həvəsi aşağı salır”
Məsələyə münasibət bildirən idman üzrə ekspert Cavid Zamanovun sözlərinə görə, qeydə alınan aşağı göstəricinin səbəbini yalnız pandemiya ilə əlaqələndirmək doğru deyil: “Düzdür, bütün ölkələrin olimpiadadakı çıxışına pandemiya təsirsiz ötüşmədi. O cümlədən Azərbaycana da bunun bəzi təsirləri oldu. Məsələ ondadır ki, 2020-ci ilin aprel ayından etibarən Azərbaycanda pandemiya səbəbindən bir neçə vacib iaşə obyekti bağlandı. İnsanların çox üz tutduğu qapalı idman zalları da koronavirusa yoluxmanın qarşısının alınması məqsədilə qapadıldı. Ancaq bu elə də uzun sürmədi. Çünki sonradan Gənclər və İdman Nazirliyi Nazirlər Kabineti yanında Operativ Qərargahdan razılıq alaraq, olimpiadada çıxış edəcək idmançılar üçün qapalı idman zallarından istifadə razılığı aldı. Məğlubiyyətin kökündə dayanan səbəblər müxtəlifdir. Problem ondadır ki, ölkədə 60-dan çox idman federasiyası olsa da işini düzgün qura bilmir. İdman federasiyaları idmançılara vəsait xərcləmək istəmir. Əvvəl bu sahədə vəziyyət bir qədər fərqli idi. Yeri gəldi-gəlmədi legionerləri cəlb edirlər. Bu da yerli məşqçilərdə, idmançılarda ruh düşkünlüyü yaradır, onlarda həvəsi aşağı salır. Kişilərdən ibarət cüdo millisi ilk dəfə tam heyətlə mübarizə apardı. Nə olsun. Bunun müqabilində yeddi nəfərdən ibarət kişi millimiz bir medal da qazana bilmədi. Bu uğursuzluğun əsas səbəbi kimi məşqçilər heyəti göstərildi. Digər idman növlərində də federasiyaların işi qura bilməməsi ortadadır. Bu və digər nöqsanlar nə qədər ki, aradan qaldırılmayıb, bu sahədə dönüş yaranmayacaq. Ona görə də idman sahəsindəki problemlər kökündən həll edilməlidir”.
İdman eksperti hesab edir ki, qarşıdakı dövrdə idman sahəsindəki çatışmazlıqlar kompleks şəkildə aradan qaldırılmalıdır.
Vidadi ORDAHALLI
