Əflatun Amaşov: “Çox yaxşı ifadə ediblər ki, “Yada düşdü” düşüncələr antologiyasıdır”
Keçmişlə gələcək arasında etibarlı körpü rolunu oynayan və çağdaş yazılı mətbuatda ədəbi-bədii, nostaljı jurnal kimi özünü təsdiqləyən “Yada düşdü” jirnalının 10 illik yubileyinə həsr edilmiş silsilə tədbirlər davam edir. Dekabrın 27-də Azərbaycan Mətbuat Şurasının təşkilatçılığı ilə “Azərkitab” Kitab Mərkəzində “Yada düşdü” jurnalının 10 illik yubileyi qeyd edildi. Nəzakət Məmmədovanın təsisçiliyi və baş redaktorluğu ilə çap olunan jurnal 2011-ci ildə nəşrə başlayıb və mediamızda ilk uzunömürlü müstəqil jurnal kimi özünü doğruldub. Özünə həm xarici ölkələrdə, həm də ölkə daxilində böyük oxucu auditoriyası qazanan “Yada düşdü” həm də azərbaycançılıq ideologiyasını geniş şəkildə təbliğ edir. Milli-mənəvi dəyərlərimizin təbliğinə üstünlük verən və unutmağa haqqımız olmayan insanlarımızı yadımızdan çıxmağa qoymayan, dünənkiləri bugünə, bugünümüzdəkiləri isə sabaha daşıyır “Yada düşdü”. Bizim mediada ədəbi-bədii jurnallar çox olub, amma nostaliji jurnal statusunu daşıyan dərgi isə, bildiyimiz qədər, “Yada düşdü” jurnalıdır ki, onu vərəqləyəndə oxucuda xoş, həlim, isti duğular, kövrək xatirələr baş qaldırır. “Yada düşdü” digər ədəbi-bədii jurnallardan fərqli olaraq özünə böyük və müqəddəs bir missiya seçib - xatirələri, nostalji duyğuları yaddaşımızda diri və duru saxlamaq.
“Yada düşdü” jurnalının 10 illik yubileyi ilə bağlı tədbiri Mətbuat Şurasının sədri Əflatun Amaşov açaraq jurnalın missiyasından danışdı: “Hamınızın qarşısında bu jurnal var. Çox yaxşı ifadə ediblər ki, “Yada düşdü” düşüncələr antologiyasıdır. Əgər bizim dünənimiz olmasaydı, bugünü necə yaşayardıq, gələcəyimizi necə planlaşdırardıq? Bu jurnalda Azərbaycan mənəvi həyatı tam görünür. Bu jurnalı vərəqləyərkən XIX əsrin sonu, XX əsrin əvvəlləri yada düşür. O zaman Azərbaycanda xeyriyyə hərəkatı kifayət qədər güclü idi”.
Ə.Amaşovun sözlərinə görə, “Yada düşdü” jurnalı da xeyriyyəçilik missiyasını yerinə yetirir, çünki jurnal heç bir yerdən yardım almadan təsisçi və baş redaktorun öz büdcəsi hesabına işıq üzü görür. “Jurnalın bir yaşını Mətbuat Şurasında keçirmişdik. Bu on ildə heç yerdən bu jurnalın büdcəsinə bir qəpik pul daxil olmayıb. Bu jurnal xeyriyyəçilik əsasında çıxır”. Nəşrin, buradakı yazıların keyfiyyətinin çox yüksək olduğunu deyən Ə.Amaşovun bildirdiyinə görə, bütün bunlar isə ağır zəhmət tələb edir.
Rəşad Məcid: “Bir jurnalın 10 il davamlı nəşr olunması böyük hadisədir”
.Amaşovun çıxışından sonra “Yada düşdü” jurnalının 10 illiyinə həsr olunan film təqdim edildi. Filmdən sonra çıxış edən Azərbaycan Yazıçılar Birliyinin sədr müavini, “525-ci qəzet”in baş redaktoru Rəşad Məcid bildirib ki, “Yada düşdü” jurnalı öz fərqliliyi, rəngarəng mövzuları, say-seçmə müəlliflərin yazıları ilə oxucuların görüşünə gəlir. “ On ilə gəlib çatmaq çox çətindir və bir jurnalın 10 il davamlı nəşr olunması böyük hadisədir. Çünki dövlət büdcəsi hesabına çıxan jurnalları nəzərə almasaq, demək olar ki, davamlı çıxan müstəqil jurnal yoxdur. Amma jurnalın təsisçisi və rəhbəri Nəzakət Məmmədova “Yada düşdü” jurnalını davamlı olaraq nəşr edir”. O qeyd edib ki, N.Məmmədova təkcə “Yada düşdü”nün təsisçisi deyil, həm də Mədəniyyət Nazirliyinin “Xatirə kitabı” redaksiyasının baş redaktorudur.
Seyran Səxavət: “10 il jurnal saxlamaq və ona hörmət qazandırmaq çox çətin bir işdir”
anınmış yazıçı Seyran Səxavət də “Yada düşdü” jurnalı haqqında söz dedi. “Jurnal yaxşı jurnaldır. Nəzakət xanım jurnalın həm təsisçisi, həm də baş redaktorudur. İndiki zamanda insanlar öz ailəsini saxlaya bilmir, amma Nəzakət xanım on ildir ki, belə dəyərli bir jurnalı nəşr edir. 10 il jurnal saxlamaq və ona hörmət qazandırmaq çox çətin bir işdir, amma Nəzakət xanım bunun öhdəsindən gəlib. Jurnalda xoşuma gələn məqamlar çoxdur, onlardan biri odur ki, “Yada düşdü” jurnalı dünyadan köçmüş ədibləri, yazarları yada salır. Bu jurnalda həm də ondan xoşum gəlir ki, mənəvi cəhətdən 40 ildir ölən yazıçılar görsənmir. Bu jurnal xatirələri oyadar, sədaqət nümayiş etdirir” Yazıçı daha sonra bu yolda “Yada düşdü” jurnalına uğurlar arzulayıb.
AMEA-nın Nəsimi adına Dilçilik İnstitutunun şöbə müdiri, filologiya elmləri doktoru, professor Sayalı Sadıqova “Yada düşdü” jurnalının dili, daşıdığı missiya haqqında geniş danışdı. S.Sadıqovanın sözlərinə görə, Azərbaycan xalqının mənəviyyatının, dilinin bütün gözəllikləri bu jurnalda əks olunub. Jurnalın dilinin çox sadə olduğunu deyən S.Sadıqova dedi ki, “Yada düşdü” hər kəsin, bütövlükdə ölkə ziyalılarının, elm adamlarının səbrsizliklə gözlədiyi jurnaldır. O vurğuladı ki, dilçilik aspektindən yanaşdıqda XX əsrin əvvəllərində çap olunan “Füyuzat”, “Şəlalə” və başqa jurnallar kimi “Yada düşdü” də dilimizin gözəlliyini çağdaş oxucuya yenidən çatdırır. Jurnalda həm də günümüzlə səsləşən məqalələr var. Qarabağ hadisələri, jurnalda yer alan digər yazılar doğru olaraq dövrün həyat hadisələrini həqiqi formada oxucuya çatdırır”. “Yada düşdü” jurnalının ilk rəssamı Nəvai Mətin də çıxışında jurnalın nəşrə başladığı günləri xatırladı: “Bu jurnalın çapında mənim də azacıq xidmətim varsa çox sevinirəm. Bu jurnal keçmişimizə, tariximizə işıq tutdu və bizim görmədiyimiz, tanımadığımız şəxsiyyətləri bizə tanıtdı. Çox maraqlı bir jurnaldır”.
Aydın Quliyev: “Bu jurnal təkcə ədəbiyyat hadisəsi deyil, həm də ictimai və media hadisəsidir”
Bakı-xəbər” qəzetinin baş redaktoru, Azərbaycan Mətbuat Şurasının İdarə heyətinin üzvü Aydın Quliyev isə bildirdi ki, “Yada düşdü” jurnalı son illərin ən uğurlu layihəsidir və bir ədəbiyyat hadisəsidir. “Onu deyim ki, həqiqətən də “Yada düşdü” bir ədəbiyyat hadisəsi oldu. Doğrudan da, bir ədəbi-bədii jurnal kimi yarandı və ədəbiyyatda bir hadisə oldu. Amma bu jurnal təkcə ədəbiyyat hadisəsi deyil, həm də ictimai və media hadisəsidir. Çünki təkcə ədəbiyyat adamı olmayan şəxsləri də oxucu kimi öz çevrəsinə toplayıb sevdirməyin özü ictimai hadisədir, böyük bir media hadisəsidir. Son 10 ilin “Yada düşdü”sü ən uğurlu çap olunan media orqanıdır”. Layihənin uğurlu olduğunu deyən Aydın Quliyev bildirdi ki, bu templə jurnalın uğurları davam edəcək, onda olan yenilməyən güc jurnalı yaşadacaq.
Əsəd Cahangir: “…Jurnalın adı ilə artıq o uğur qazanıb”
dəbi tənqidçi, şairi Əsəd Cahangir də çıxışında jurnalın özləlliklərini xüsusi vurğuladı: “Nəzakət xanımın on ildən bəri təsisçiliyi və baş redaktorluğu ilə çap edilən “Yada düşdü” jurnalı ilk növbədə mənə adı ilə qəribə təsir göstərmişdi…Jurnala “Yada düşdü” adı qoymaqla Nəzakət xanlm risqə getmişdi. Risqin də iki başı olur, tuta da, tutmaya da bilər. Nəzakət xanımın on illik fəaliyyətində görürük ki, jurnalın adı ilə artıq o uğur qazanıb...”
Tədqiqatçı-jurnalist Şəmistan Nəzirli də jurnalın özəl məziyyətlərindən danışaraq bildirdi ki, Azərbaycanda memuar mətbuatı deyərkən ilk xatırlanan “Yada düşdü” olur.
Yazıçı-jurnalist Zemfira Məhərrəmli, şairə Sona Çərkəz, şairə Kəmalə Abıyeva, qəzəlxan şairə Mahcamal xanım, Fəxrəddin Meydanlı, Əməkdar jurnalist Zöhrə Əliyeva və başqaları da çıxış edərək jurnal haqqında duyğu və düşüncələrini bölüşdülər.
Nəzakət Məmmədova: “Jurnal fəaliyyətə başladığı gündən ictimai-ədəbi prosesləri geniş tədqiq edir, nostalji təfərrüata varır”
Sonda jurnalın təsisçisi və baş redaktoru şair-publisist Nəzakət Məmmədova xoş sözlərə görə təşəkkür etdi və jurnal haqqında məlumat verdi. Bildirdi ki, çağdaş yazılı mətbuatın əsas işi dövlətçilik ənənələri, ictimai-sosial və ədəbi resursları tədqiq etməkdir. “Yada düşdü” ədəbi-bədii nostalji jurnalı da bu istiqamətdə lazımi mətbu dəyərlər ehtiva edir: “Jurnal fəaliyyətə başladığı gündən ictimai-ədəbi prosesləri geniş tədqiq edir, nostalji təfərrüata varır”. Jurnalın 2011-ci ildə nəşrə başladığını deyən Nəzakət Məmmədova bildirdi ki, jurnal ötən illər ərzində tək ölkəmizdə deyil, həm də onun hüdudlarından kənarda böyük oxucu auditoriyası qazanıb. N.Məmmədovanın sözlərinə görə, bu 10 ildə jurnal mətbuata, ədəbiyyata və cəmiyyətə müsbət mənada ciddi təsir edib, layiqli töhfələr verib, həmçinin media-oxucu əlaqələrinin təşkilində həlledici rol oynayıb…
İradə SARIYEVA
