Rusiyadan qeyri-strateji nüvə silahlarının Belarus ərazisinə ötürülməsinə artıq başlanılıb. Bu sözləri Belarus Prezidenti Aleksandr Lukaşenko deyib:
"Rusiya Prezidenti Vladimir Putin mənə bildirdi ki, bu gün Belarusda nüvə silahının yerləşdirilməsi üzrə fəaliyyətimiz haqqında fərman imzalayıb. Söhbət konkret sənəddən gedir”.
Qeyd edək ki, bundan əvvəl Rusiya və Belarusun müdafiə nazirləri Sergey Şoyqu və Viktor Xrenin Minskdə Rusiya nüvə silahlarının Belarus ərazisindəki xüsusi anbarda saxlanması qaydasını müəyyən edən sənədləri imzalayıblar.
Nüvə silahı elədir ki, onu hədəfə raketlə çatdırırlar. Rusiyada hətta qitələrarası raketlər də var. Yəni Rusiya öz ərazisindən ABŞ-ı vura biləcək gücdə olan raketlərə sahibdir. Məntiqlə, Rusiya istənilən hədəfə öz ərazisindən də nüvə zərbəsi endirə bilər. Onda nüvə silahının Belarusa yerləşdirilməsi hansı anlam daşıyır? Bu psixoloji gedişdi, yoxsa hərbi zərurətdən irəli gəlir?
Hərbi ekspert, ehtiyatda olan polkivnik-leytenant Elxan Şıxəliyev “Bakı-Xəbər”ə açıqlamasında bildirdi ki, Ukrayna müharibəsinin fonunda Rusiya və Belarus bunu nüvə silahının mövcudluğuna dair çəkindirmə silahı kimi ərazilərində istifadə etməyi düşünürlər: “Çəkindirmə silahı nədir? Onlar düşünürlər ki, əgər öz ərazilərində nüvə silahı mövcud olacaqsa, bundan gələcəkdə Ukrayna müharibəsi fonunda Şimali Atlantika Alyansının dəstəyi ilə bu ərazilərə müharibənin keçməsindən sığortalanma kimi istifadə edəcəklər. Təbii ki, indi bu, dövlət başçılarının qərarına əsasən baş verə bilər. Xüsusilə Rusiyanın, Belarusun prezidentinin artıq vahid dövlət üzərinə yol xəritələri var. Vahid dövlət dedikdə, yəni iki ölkə bir millət kimi çıxış edəcəklər. Nüvə silahının Belarus ərazisində yerləşdirilməsi ilə bir mesaj verəcək ki, əgər nüvə silahı mövcud olan ölkələr bu iki ölkəyə qarşı təhdid yaradacaqsa, bu, ciddi problemlərə yol aça bilər. Nüvə silahına malik ölkələrin əslində öz aralarında anlaşma var ki, nüvə silahına malik ölkə yalnız o halda bundan istifadə edə bilər ki, digər bir nüvə silahına malik ölkə onun ərazilərinə təhdid yaratmış olsun. Əks təqdirdə nüvə silahı olmayan ölkə ilə Rusiya və Belarus müharibə edərsə, onların Ukrayna ərazisinə nüvə silahından istifadəsini əsaslandıra bilməzlər. Çünki Ukraynada nüvə silahı yoxdur. Amma özlərinin gələcəkdə NATO-nun, Ukraynanın müttəfiqləri kimi hərbi əməkdaşlığı çərçivəsində Belarus və Rusiyaya müharibə elan etməmək, onları çəkindirmə məqsədilə silah yerləşdirəcəklər. Onlar hansısa bir ölkəyə bunu tədbiq etməklə yalnız şantaj kimi istifadə edəcəklər. Siyasi bir dividend kimi, siyasi danışıqlarda atılacaq addımlardır hamısı. Bu, Belarusu da gələcəkdə mövcud ola biləcək təhlükələrdən sığortalamaq üçün Rusiya və Blıarusun birgə düşündükləri addımdır. Düşünmürəm ki, o ölkələrin ərazisində faktiki nüvə sistemləri yerləşdirilsə, digər ölkələr üçün bunu istifadə edə bilərlər. Amma ölkələri onlarla müharibə etməkdən çəkindirə bilərlər. Xüsusən də indi Ukrayna müharisinin nəticələrindən çox çəkinirlər. Belarus da bundan ehtiyatlanır. Ona görə də, özlərini sığortalamaq üçün strateji-hərbi müttəfiqlik çərçivəsində atılan addımlardır”.
Məhəmmədəli QƏRİBLİ
