15/12/2018 16:11
728 x 90

Əli Həsənov İstanbul sammitində İlham Əliyevin siyasətinin üç böyük yekununu təhlil etdi

Ölkədaxili inkişaf, Avropa və Asiyanın mədəni-iqtisadi inteqrasiyası, Avropanın enerji təhlükəsizliyinə təminat...

img

Əli Həsənov: “İşğal yolu tutan hərbi xunta öz xalqına yalnız fəlakət gətirə bilər ki, bu da Ermənistanın timsalında öz təsdiqini bir daha tapır”
İlham Quliyev: “İqtisadi proseslərin idarə olunmasında medianın xüsusi rolu var”
Müşfiq Ələsgərli: “Medianın informasiya dəstəyi verdiyi bütün məsələlər müsbətə doğru həll olunur”

 

İstanbulda noyabrın 26-da “Hər kəs üçün davamlı inkişaf və sülh” devizi ilə 9-cu Boğaziçi Forumu öz işinə başlayıb. Forum noyabrın 28-nə qədər davam edəcək.

Qeyd edək ki, Türkiyə Prezidenti Rəcəb Tayyib Ərdoğanın şəxsi təşəbbüsü və himayəsi altında fəaliyyət göstərən “Beynəlxalq Əməkdaşlıq Platforması” tərəfindən 2011-ci ildən etibarən İstanbulda təşkil olunan ənənəvi illik forum artıq nüfuzlu beynəlxalq tədbir səviyyəsinə yüksəlib. Haqqında danışılan forum regional, həmçinin, qlobal miqyasda əməkdaşlığın genişləndirilməsi imkanlarının dəyərləndirilməsi baxımından ciddi maraqla qarşılanır və bu maraq ildən-ilə artmaqdadır.

Bunun təsdiqi olaraq, 100-dən çox ölkənin dövlət və hökumət başçılarının, rəsmi şəxslərin, qeyri-hökumət təşkilatlarının, analitik mərkəzlərin və qlobal şirkətlərin rəhbərlərinin builki foruma qatıldığını göstərə bilərik.

Forumda iştirak edən dövlət başçıları sırasında Türkiyə Prezidenti Rəcəb Tayyib Ərdoğan, Makedoniya Prezidenti George İvanov, Şimali Kipr Türk Respublikasının (ŞKTR) Prezidenti Mustafa Akıncı və digərləri var. Sözügedən tədbirdə ölkəmizi Azərbaycan Prezidentinin ictimai-siyasi məsələlər üzrə köməkçisi Əli Həsənov təmsil edir. Əli Həsənov forumda çıxış edərək çox mühüm beynəlxalq əhəmiyyət daşıyan belə bir tədbirin təşkilinə görə Türkiyə Prezidenti Rəcəb Tayyib Ərdoğana və Türkiyə dövlətinə təşəkkürünü bildirib.

Çıxışında dövrümüzün acı reallıqlarından bəhs edən Prezidentin köməkçisi bildirib ki, bəzi dövlətlər əməkdaşlıq şəraitində davamlı inkişafa nail olmaq yolunu deyil, əksinə, qəsb, işğal, silahlanma yolunu seçiblər: "Bu cür antihumanist siyasət hazırda Mərkəzi və Şimali Amerika sərhədlərindən Suriya və Türkiyə, Myanma və Banqladeş sərhədlərinədək bütün dünyanın geosiyasi məhvərindən keçir. Belə bir fəlakət artıq 30 ilə yaxındır ki, Cənubi Qafqazda da yaşanmaqdadır. Müstəqilliyimizin ilk illərində qonşu Ermənistanın yürütdüyü təcavüzkar siyasət, Azərbaycana qarşı heç bir tarixi və hüquqi əsası olmayan ərazi iddiaları bir milyondan çox vətəndaşımızın qaçqın və köçkünə çevrilməsinə, ərazimizin 20 faizinin işğalına səbəb olub. Həmin torpaqlarda qədim dini və tarixi abidələrin vəhşicəsinə darmadağın edilməsi ATƏT-in faktaraşdırıcı missiyası tərəfindən də təsdiq edilib. Dünyanın 10-dan çox ölkəsi və çoxsaylı beynəlxalq qurumlar azərbaycanlılara qarşı törədilmiş Xocalı soyqırımını tanıyıb".

Ə.Həsənov diqqətə çatdırıb ki, Dağlıq Qarabağ münaqişəsi bu gün yalnız Cənubi Qafqazdakı kövrək sülhü deyil, bütün Avropanın və dünyanın təhlükəsizliyini təhdid edir. Bunun kökündə beynəlxalq hüquqa, digər ölkələrin ərazi bütövlüyünə, səmavi dinlərin sülh çağırışlarına məhəl qoymamaq, böyüklük maniyası, dənizdən-dənizə ərazilərə sahiblənmək iddiası, bu iddianı reallaşdırmaq naminə hər cür saxtakarlığa və bəşəri cinayətə yol vermək amili durur.

“İşğal faktına baxmayaraq, bu gün Azərbaycan Respublikasının Prezidenti İlham Əliyevin siyasəti nəticəsində Azərbaycan nəinki öz dinamik inkişafını təmin edə bilib, həm də Avropanın və Yaxın Şərqin iqtisadi və mədəni inteqrasiyasında, Avropanın enerji təhlükəsizliyinin təminatında xüsusi rol oynayan ölkəyə çevrilib”, - deyən Prezidentin köməkçisi qeyd edib ki, Azərbaycan dövlətinin öz tərəfdaşları ilə həyata keçirdiyi qlobal layihələr təkcə enerji təhlükəsizliyi və kommunikasiya layihələri deyil, onlar təhlükəsizliyin təmin edilməsinə böyük töhfə verir, qitələri biri-birinə birləşdirir, dünyanın geoiqtisadi xəritəsinin yenidən çəkilməsini şərtləndirir. Prezident İlham Əliyevin qeyd etdiyi kimi, Azərbaycanın təşəbbüsçüsü olduğu layihələrdən bütün iştirakçı dövlətlər, xüsusən qonşu ölkələr də faydalanmaqdadırlar. Elə bu yaxınlarda istifadəyə verilmiş “STAR Refinery” zavodunun həm Türkiyə, həm də Azərbaycan üçün gətirəcəyi faydanı xatırlamaq kifayətdir. Lakin orta əsr qəsbkarları kimi daha asan yolla, özgə torpaqlarını işğal etməklə varlanmaq istəyən cinayətkar Ermənistan rejimi bu gün regional təşəbbüslərdən təcrid olunub. Bu, belə də olmalıdır. İşğal yolu tutan hərbi xunta öz xalqına səadət deyil, yalnız fəlakət gətirə bilər ki, bu da Ermənistanın timsalında öz təsdiqini bir daha tapır.

Azərbaycanın bölgədəki sülhyaratma əməliyyatlarında fəallığı ilə seçildiyini vurğulayan Ə.Həsənov qeyd edib ki, ölkəmiz NATO-nun, Avropa İttifaqının, ATƏT-in, MDB-nin əməkdaşlıq proqramlarının fəal iştirakçısıdır. Azərbaycan işğalçı Ermənistan istisna olunmaqla, bütün qonşularla ikitərəfli və çoxtərəfli əməkdaşlıq formatlarında işbirliyini inkişaf etdirir. Əlbəttə, ərazi bütövlüyümüzə hərbi təcavüz olmasaydı və ölkəmizin maddi, insani resursları işğalın aradan qaldırılmasına yönəldilməsəydi, indi həm Azərbaycanın, həm də bölgənin inkişafı başqa bir səviyyədə olardı.

“Biz elə bir bölgə, elə bir dünya arzusundayıq ki, eyni coğrafiyanı, eyni və ya yaxın mədəniyyətləri bölüşən insanlar mühacirət yolu seçməyə məhkum olmasınlar, öz tarixi torpaqlarında qalsınlar, yaşayıb inkişaf etsinlər”, - deyən Prezidentin köməkçisi bildirib ki, bunun üçün hər kəs özündə təcavüzkara “dur” demək cəsarəti tapmalı, bu istiqamətdə irəli sürülən bütün təşəbbüslər dəstəklənməli, səylər birləşdirilməlidir. Bu baxımdan 9 ildir Boğaziçi Zirvəsi hər kəs üçün davamlı inkişafa, sülh axtarışlarına öz töhfəsini verir. Türkiyənin münaqişələrin həllində, bölgədə davamlı sülhün bərpasında çox böyük zəhməti var. Prezident Rəcəb Tayyib Ərdoğanın başçılığı ilə dünyanın mühüm geosiyasi aktoruna çevrilmiş Türkiyə dövlətinin yürütdüyü siyasət, keçirdiyi sülhyaratma əməliyyatları, apardığı gərgin diplomatik mübarizə bölgədəki münaqişələrin, o cümlədən Dağlıq Qarabağ probleminin ədalətli həllinə yönəlmiş böyük fəaliyyətdir. Bu işdə qardaş Türkiyəyə uğurlar arzu edirik.

Sonra çıxış edən Makedoniyanın Prezidenti George İvanov və Polşa hökumətinin keçmiş üzvü Jacek Rostovski İkinci Dünya Müharibəsindən ötən dövrdə Avropada yaşanan siyasi-iqtisadi problemlərdən bəhs ediblər. Diqqətə çatdırılıb ki, dünyadakı bütün münaqişə və qarşıdurmalar bu və ya digər formada Avropa ölkələrinə mənfi təsir göstərir. Dünyada sülh və inkişafa nail olmaq üçün bu problemlərdən yaxa qurtarmaq vacibdir.

Türkiyənin Avropa İttifaqı məsələləri üzrə sabiq naziri Egemen Baxış qeyd edib ki, mövcud münaqişələr, dövlətlərin ərazi bütövlüyünə qəsd müasir dünyanın başlıca humanitar problemləridir. Çünki bu problemlərdən ən çox əziyyət çəkən dinc insanlardır. Mövcud münaqişələrin həll olunmaması sülh ümidlərinə zərbə vurur.

Yaxın Şərq probleminin olduqca təhlükəli mərhələyə çatdığını vurğulayan İordaniya Senatının sədri Faisal əl-Fayez qeyd edib ki, İordaniya sülh və inkişaf tərəfdarıdır. O bildirib ki, Suriyada vətəndaş müharibəsi bölgə ölkələri arasında ticarət əlaqələrinə zərbə vurub. Bölgədəki humanitar böhran tezliklə həllini tapmazsa, münaqişə yalnız qonşuların ərazisinə yox, uzaq ölkələrə də sıçraya bilər.

Rusiya-Türkiyə iqtisadi əlaqələrinin bölgənin inkişafına töhfəsindən danışan Rusiya Federasiyasının Çeçenistan Respublikasının Baş naziri Muslim Huçiev ölkəsinin iqtisadi potensialı və sərmayə mühiti barədə geniş məlumat verib. Baş nazir əminliklə bildirib ki, Çeçenistana sərmayə yatırmaq istəyən türkiyəli iş adamları bunun yaxşı bəhrəsini görə bilərlər.

Türkiyədə istehsal və tədarük olunan məhsulların xarici bazarlarda sürətlə artdığını diqqətə çatdıran Türkiyə İxracatçılar Məclisinin sədri İsmayıl Güllə bildirib ki, ixracatçılar üçün qısa və təhlükəsiz yol axtarışı müasir dünya iqtisadiyyatında ən mühüm məsələdir. Bu mənada, Bakı-Tiflis-Qars dəmir yolu xətti və İstanbul Hava Limanı Avrasiya məkanında iqtisadi münasibətlər üçün yeni üfüqlər açır. Lakin bundan da irəlidə olan sülh və sabitliyin mövcudluğudur.

Bütün qonaqlara Boğaziçi Forumda iştiraka görə təşəkkürünü ifadə edən Beynəlxalq Əməkdaşlıq Platformasının qurucusu Cengiz Özgengcil əmin olduğunu bildirib ki, müzakirə edilən məsələlər sülhsevər dünya ictimaiyyəti tərəfindən maraqla qarşılanacaq.

Çıxışçılar sülh, sabitlik və inkişafın yollarına dair fikir və mülahizələrini bölüşüblər. Diqqətə çatdırılıb ki, müasir dünyada qlobal iqtisadiyyatın başlıca problemi münaqişə və qarşıdurmalardır. Qeyd olunub ki, münaqişə və qarşıdurmalar cəmiyyətlərin inkişafında ən pozucu amildir. Davamlı sülhə nail olmaq üçün istənilən zəmində əsassız iddialardan əl çəkmək lazımdır.

Forum işini “Hər kəs üçün inkişafa beynəlxalq təhdid: Ticarət müharibələri”, “Yeni istiqamətlər axtaran dünyada dayanıqlı gələcəyin şifrələri”, “Dünyanın idarə olunmasında dəyişiklik ehtiyacı”, “Sülh üçün müdafiə və təhlükəsizlik”, “Gələcəyin texnologiyalarına doğru”, “İqtisadi inkişafın təşkilində medianın rolu” və digər mövzularda “dəyirmi masa”lar və panellərlə davam etdirəcək.

Prezidentin ictimai-siyasi məsələlər üzrə köməkçisi Ə.Həsənov tədbir çərçivəsində Azərbaycanın və xarici ölkələrin KİV-inə müsahibə verib.

Bir sıra mühüm məsələlərin ətraflı müzakirə olunacağı forumda “İqtisadi inkişafın təşkilində medianın rolu” mövzusuna da geniş yer ayrılacaq. Məlumdur ki, iqtisadiyyatın inkişafı medianın inkişafı deməkdir. Ölkə iqtisadiyyatının inkişafı medianın yüksəlişinə səbəb olur.

Ölkə iqtisadiyyatının inkişafında medianın rolu barədə fikirlərini öyrənmək üçün media kapitanlarına müraciət etdik.

“Kaspi” qəzetinin baş redaktoru İlham Quliyev “Bakı-Xəbər”ə açıqlamasında qeyd etdi ki, media cəmiyyətin həyatında mühüm yerlərdən birini tutur. Cəmiyyətdəki problemlər, görülən işlər, gələcəklə bağlı perspektivlər məhz media müstəvisində müzakirə olunur. Proseslərin inkişaf istiqamətinin müəyyən edilməsində də avanqard rollardan biri medianındır. Bu baxımdan, iqtisadi proseslərin idarə olunmasında da medianın xüsusi rolu var: “Heç kimə sirr deyil ki, bu gün dünya bazarlarındakı indekslərin formalaşmasında medianın xüsusi çəkisi var. Hər hansı bir ciddi media orqanında yer almış sanballı bir məqalə ilə ölkələrin valyutası dəyər itirə və ya dəyər qazana bilər. Və ya dünya bazarında neftin qiymətinin formalaşmasında medianın xüsusi rolu var. Bu baxımdan, dövlətlərin iqtisadi inkişafında, iqtisadi təhlükəsizliyinin təmin olunmasında media ciddi bir rola malikdir”.

Baş redaktor onu da vurğuladı ki, dövlətlərin iqtisadi müstəvidə apardığı islahatların cəmiyyətə çatdırılmasında, idarə olunmasında, yarana biləcək risqlərin idarə olunmasında da medianın xüsusi rolu var.

Jurnalistlərin Həmkarlar İttifaqının sədri Müşfiq Ələsgərli bizimlə söhbətində bildirdi ki, istənilən məsələnin cəmiyyətə çatdırılmasında medianın xidməti var. Medianın informasiya dəstəyi verdiyi bütün məsələlər müsbətə doğru həll olunur.

Nəzərə almaq lazımdır ki, medianın dəstəyi olmazsa, hər hansı bir sahədə inkişaf yaşana bilməz. Eləcə də iqtisadiyyatda: “Son vaxtlar istər Azərbaycanda, istərsə də Türkiyədə yeni inkişaf modelləri hazırlanır. Və ölkə iqtisadiyyatında qeydə alınan inkişaf media sahəsinə də təsir göstərir”.

Həmsöhbətimizin sözlərinə görə, iqtisadi inkişafda medianın nə kimi töhfə verməsi bu günlərdə “Hər kəs üçün davamlı inkişaf və sülh” devizi ilə 9-cu Boğaziçi Forumunda müzakirə olunur: “Həm Türkiyə, həm də Azərbaycan tərəfindən bu foruma qatılanlar kifatət qədər ciddi şəxslərdir. Ümid edirəm ki, Əli Həsənovun iştirak etdiyi forumda Azərbaycan nümayəndə heyəti dəyərli təkliflərlə çıxış edəcək və foruma öz töhfələrini verəcək”.

Günel CƏLİLOVA

Son xəbərlər