Dəfələrlə yazılmağına baxmayaraq, bələdiyyələrlə bağlı bir sıra problemlər qalmaqdadır. Bu sahədə problemlər sanki üst-üstə gəlir. Milli Məclisin Regional məsələlər komitəsinin bu günlərdə keçirilən iclasında Ədliyyə Nazirliyi Bələdiyyələrlə İş Mərkəzinin rəisi Mehdi Səlimzadə bu sahədə olan bir sıra problemlərə toxunub.

   Onun sözlərinə görə, bu günədək 1730 bələdiyyənin 30 faizinə torpaqların dövlət aktı verilməyib: "Digər məsələ isə Bakı şəhəri üzrə torpaq hərracının keçirilməməsidir. Belə bir hərrac yalnız bir dəfə - Xəzər rayonunda keçirilib. Bələdiyyələrin qarşılaşdığı əsas problemlər maliyyə vəsaitlərini toplaya bilməmələri ilə əlaqədardır. Məsələn, torpaq sahəsinin verilməsi ilə bağlı sənədlər təqdim edilmədiyi üçün bələdiyyələr mülkiyyətindəki torpaqlardan əmlak və torpaq vergisini toplaya bilmir".

   M.Səlimzadə fevralın 24-də MM-də Ədliyyə Nazirliyinin Bələdiyyələrlə İş Mərkəzinin hesabatının dinlənəcəyini söyləyib.

   Maraqlıdır, Bakı şəhəri üzrə torpaq hərracının keçirilməməsinin səbəbi nədir? Bəlkə bələdiyyə sədrləri bütün torpaqları satdığından hərraca çıxarılası torpaq qalmayıb?

   Məsələyə münasibət bildirən ekspert İlqar Hüseynli torpaq hərraclarının keçirilməməsini bir sıra səbəblərlə əlaqələndirdi: "Bundan xeyli əvvəl torpaqların satışını bələdiyyələr birbaşa özləri həyata keçirirdi. Birbaşa özlərinin bələdiyyə şurasının qərarı əsasında istədikləri torpaq sahəsini satmaq imkanlarına malik idilər. Sonradan Nazirlər Kabinetinin qərarı ilə torpaqların bələdiyyələr tərəfindən birbaşa satışına qadağa qoyuldu. Yəni torpaqların hərrac yolu ilə satılmasına qərar verildi. Söhbət Bakı və şəhərətrafı rayonlardan gedirsə, sözügedən ərazidə olan torpaqların əksəriyyəti hərraca qədər satılmışdı. Bələdiyyələrin əsas gəlir mənbələri torpaqların satışından əldə olunan vəsaitlər, rüsumlar hesabına formalaşırdı. Ona görə də o dövrdə bələdiyyələr torpaqların satılmasını sürətlə təşkil etdilər. Bunun nəticəsi olaraq bələdiyyə mülkiyyətində olan torpaqların çoxu satıldı".

   İ.Hüseynli hərracların keçirilməməsinin digər səbəbini belə izah etdi: "Bir neçə bələdiyyə qurumu ilə bağlı məhkəmə qərarları var. Elə bələdiyyələr var ki, torpaq satışı ilə əlaqədar olaraq onlarla bağlı qanunvericilikdə məsuliyyətə cəlb olunma nəzərdə tutulub. Bütövlükdə hərracların keçirilməsəsinin əsas səbəbi torpaqların pərakəndə satışının qanunsuz olaraq təşkili ilə bağlıdır. Bir məsələni də xüsusi olaraq vurğulamaq istəyirəm ki, əksər rayonlarda bələdiyyə sədrləri əvvəlkilərdir. Onların əlində müəyyən "imkanlar" var ki, hazırda torpaqları əvvəlki tarixlərə sənədləşdirərək qanunsuz olaraq satsınlar. Məlumat üçün qeyd edim ki, 2007-ci ilin dekabrından bələdiyyələrin torpaqları birbaşa satmalarına qadağa qoyulub. Bu baxımdan cənab Mehdi Səlimzadənin fikirlərində onu bölüşmək olar ki, doğrudan da torpaqların hərrac yolu ilə satılması üsulları demək olar müşahidə olunmur. Yəni bu məsələdə konkret olaraq iki səbəb var.

   Birincisi, bələdiyyə mülkiyyətində olan toraqların kəskin şəkildə azalması və böyük əksəriyyətinin satılması. İkincisi, bu və ya digər formada, yəni qanunsuz yollarla yeni tarixə sənədləşdirilərək torpaqların satılmasıdır. Bütün bu səbəblər üzündən hərracların keçirilməsində bir irəliləyiş görmürük".

   Belə məlum oldu ki, bu sahədə mövcud olan bir sıra ciddi problemlər hələ bir müddət hərracların keçirilməsinə imkan verməyəcək.