"Bakı" klubu qış transfer dövründə 3 futbolçunun transferini həyata keçirib.
   Komandanın baş məşqçisi Aleksandr Starkovun Lent.az-a verdiyi məlumata görə, bunlar Sloveniyanın "Domjale" klubunun mərkəz yarımmüdafiəçisi Lukaş Xorvat, Xorvatiyanın "Rieka" klubunun mərkəz müdafiəçisi Duje Bakoviç, Serbiya yığmasının və "Srvena Zvezda" klubunun sabiq dayaq müdafiəçisi Nenad Kovaçeviçdir.
   Xorvat və Bakoviç artıq məşqlərə də qatılıblar. Kovaçeviç isə hələlik komandanın düşərgəsində deyil.
   Artıq "Bakı" klubunun və Azərbaycan milli komandasının futbolçusu Elvin Məmmədovun əsgərlik problemi həll olunub. Baş məşqçi Aleksandr Starkovun sözlərinə görə, artıq 24 yaşlı yarımmüdafiəçi komandanın Türkiyənin Antalya şəhərindəki təlim-məşq toplantısına qoşulub. Starkov Məmmədov üçün növbəti çağırışadək Hərbi Komissarlıqdan icazə götürüldüyünü söyləyib: "Elvin üçün müvəqqəti də olsa, icazə alınıb. Hesab edirəm ki, bu, seleksiya işində ən böyük qələbəmizdir. Elvin artıq burdadır, hazırlaşır. O, yarım ildir klubumuzda olsa da, potensialını hələ açmayıb. Ümidvaram ki, qarşıdakı müddətdə komandamızın uğurları naminə əlindən gələni edəcək".

"Fənərbaxça"nın kapitanı Aleks de Souza baş məşqçi Aykut Kocamana etirazını "Twitter" sosial şəbəkəsində bildirib.
   "Qafqazinfo"nun Türkiyə mətbuatına istinadən verdiyi xəbərə görə, azarkeşlərdən biri braziliyalı futbolçunun "Twitter" səhifəsində Aleksin mərkəzi hücumçu mövqeyində uğurlu olmadığını yazıb. Aleks isə cavabında bunu Aykut Kocamana dəfələrlə dediyini, lakin bunun nəticəsiz qaldığını bildirib. 34 yaşlı futbolçu həmçinin komanda yoldaşı Mehmet Topuza da söz atıb. O, Topuzun "İstanbul BB" ilə son matçda meydanda "gəzdiyini" qeyd edib.
   Qeyd edək ki, "Fənərbaxça" superliqanın son turunda "İstanbul BB" klubuna səfərdə 2:3 hesabı ilə məğlub olub.

Rusiyanın CSKA klubunun futbolçusu Vaqner Lav yenidən ölkəsi Braziliyaya qayıdıb. Qol.Az-ın məlumatına görə, 27 yaşlı futbolçu Braziliyanın "Flamenqo" klubu ilə anlaşıb. Braziliyalı futbolçunun 2014-cü ilə qədər "Flamenqo"da çıxış edəcəyi bildirilir. Bu transfer "Flamenqo"ya 10 milyon avroya başa gəlib. 2005-ci ildə "Palmeyras"dan CSKA-ya transfer olunan Lav burada keçirdiyi 154 oyunda 75 qola imza atıb. 2010-cu ildə "Flamenqo"da icarə əsasında çıxış edən futbolçu yenidən Moskva klubuna qaytımışdı. Qeyd edək ki, "Flamenqo"da dünya futbolunun canlı əfsanəsi Ronaldinyo da çıxış edir.

"Real" (Madrid) klubunun baş məşqçisi Joze Mourinyo "Barselona" ilə oyundan sonra stadionun çıxışında matçın hakimlərini gözləyib.
   Qol.Az-ın məlumatına görə, portuqaliyalı mütəxəssis stadiondan çıxan referiləri, əsasən də matçın baş hakimi Fernando Teyxeyranı söyüb.
   Qeyd edək ki, Mourinyo "Barselona" ilə (2:2) oyunun hakimliyindən narazılığını bildirmişdi.

"Mançester Yunyated" klubunun hücumçusu Dimitar Berbatov karyerasını Türkiyə Superliqasında davam etdirə bilər.
   Qol.Az-ın məlumatına görə, bolqarıstanlı futbolçu "Qalatasaray"ın transfer hədəfinə düşüb. Bu mövsüm hücum xəttində ciddi sıxıntı yaşayan "Qalatasaray" klubunun baş məşqçisi Fatih Terim Berbatovu mövsümün sonuna qədər icarəyə götürmək niyyətindədir.
   İstanbul təmsilçisi 30 yaşlı futbolçu üçün 8,5 milyon avro ödəməyə hazırdır. Lakin "Mançester Yunayted" klubu bu məsələdə tələsmək niyyətində deyil. Rəhbərlik Berbatovu daha yüksək məbləğə satmaq istəyir.
   Qeyd edək ki, 2008-ci ildən "Mançester Yunayted"də çıxış edən Berbatov keçirdiyi 105 oyunda 47 dəfə rəqib qapılarına yol tapıb.

Azərbaycan milli komandasının futbolçusu Araz Abdullayev görmədiyi halla üzləşib.
   Apasport.az saytının məlumatına görə, bu ayın əvvəlində Yunanıstanın "Panionios" klubuna keçən 20 yaşlı yarımmüdafiəçi ilk dəfə matçı kənardan izləyib. Araz Yunanıstan kubokunun 1/4 final matçının "Olimpiakos"la oyununda (0:4) baş məşqçi Apostolos Mantziosa lazım olmayıb. Hərçənd İngiltərə "Everton"unun "Panionios"a icarəyə verdiyi gündən Araz bütün oyunların iştirakçısı olmuşdu.
   

"Barselona" klubu əzəli rəqibi "Real Madrid"i futbol üzrə İspaniya Kubokundan kənarlaşdırıb.
   Lent.az-ın məlumatına görə, yanvarın 25-də keçirilmiş cavab görüşündə Kataloniya komandası 2:2 hesablı heç-heçəyə nail olub. İlk yarının 43-cü dəqiqəsində "Barsa"dan Pedro Rodriges, bundan 2 dəqiqə sonra isə Dani Alveş fərqlənib. Fasilədən sonra "Real Madrid" səhnəyə çıxıb. 68-ci dəqiqədə Kriştianu Ronaldu, 71-ci dəqiqədə Kərim Benzema qol müəllifləri olublar.
   İki oyunun nəticəsinə əsasən, "Barselona" növbəti mərhələyə yüksəlib. Yanvarın 19-da Madriddə keçirilmiş ilk qarşılaşmada 2:1 hesabı ilə qalib gəldiyi üçün "Barsa" yarımfinala çıxıb. Qeyd edək ki, növbəti mərhələdə Kataloniya komandası "Valensiya" - "Levante" cütünün qalibi ilə üz-üzə gələcək. Digər yarımfinal matçı isə II divizionda çıxış edən "Mirandes"lə "Atletik" arasında olacaq.
   

UEFA-nın baş katibi Gianni İnfantino maraqlı açıqlamaları ilə diqqət çəkib. Qol.Az-ın məlumatına görə, UEFA rəsmisi Avropanın nəhəng klublarının getdikcə daha çox zərər etdiyini bildirib:
   "Artıq Avropanın nəhəng klubları getdikcə daha çox ziyana uğrayırlar. 2008-ci ildən 2010-cu ilə qədər klubların zərəri 1 milyard avroya çatıb. Halbuki 2006-cı ildə bu rəqəm sadəcə 216 milyon avro idi. Doğrudur, son zamanlar klubların gəlirləri də artıb. Ancaq zərərin böyük olması, gəlirlərin artmasına mənfi təsir göstərir. Bunun qarşısını almaq üçün təcili tədbir görülməlidir". Qeyd edək ki, Avropada ən az ziyan edən çempionat isə Almaniya Bundesliqasıdır. Bundesliqanın gəliri 2,23 milyon avro olarkən, zərər 52 milyon avro təşkil edir.
   

UEFA Ukrayna və Polşanın birgə təşkilatçılığı ilə keçiriləcək Avropa çempionatına gələcək azarkeşlərin sayı haqda proqnoz verib.
   Qol.Az-ın məlumatına görə, Avro-2012-ni izləmək üçün adı çəkilən ölkələrə 1,5 milyon azarkeşin gələcəyi gözlənilir. Eyni zamanda bu rəqəmin daha da artacağı istisna olunmur. Bu turnir Ukrayna və Polşaya gəlir gətirməklə yanaşı, həmin ölkələrin beynəlxalq aləmdə tanınmasına da xidmət edəcək. Avro-2012-də turistlərin və azarkeşlərin təhlükəsizliyini təmin etmək üçün isə xüsusi tədbirlər görülür.
   

Türkiyənin "Manisaspor" klubunun yeni baş məşqçisi müəyyənləşib.
   Fanta.az xəbər verir ki, istefa verən Kemal Özdeşin əvəzləyicisi artıq məlumdur. Belə ki, Manisa təmsilçisini bundan sonra Ümit Özat çalışdıracaq. Ege klubu bununla bağlı rəsmi bəyanat da yayıb.
   Məlumatda bildirilir ki, yeni baş məşçqçi Ümit Özatla mövsümün sonunadək müqavilə imzalanıb.
   Qeyd edək ki, son 10 matçında qələbəyə həsrət qalan "Manisaspor"un sabiq baş məşqçisi Özdeş son turun "Samsunspor"la ev oyunundakı heç-heçədən (1:1) sonra gözlənilmədən istefa vermişdi. Komanda hazırda 26 xalla 13-cü pillədə qərarlaşıb.