Dünən Yasamal Rayon Məhkəməsində ABŞ vətəndaşı Amanda Erikson və Böyük Britaniya vətəndaşı Selia Deyvisə qarşı xuliqanlıq hərəkətləri etməkdə və onları döyməkdə təqsirləndirilən Adil Tağızadə, Roman Həsənov, Vüsal Qurbanov və Nazim Hüseynovun məhkəmə prosesi davam etdirilib.
   APA-nın xəbərinə görə, hakim Elçin Qurbanovun sədrlik etdiyi prosesdə təqsirləndirilən şəxslər son sözlə çıxış edib. Onlar özlərini təqsirli bilmədiklərini bildirib və hakimdən barələrində bəraət hökmünün çıxarılması barədə xahiş edib. Daha sonra hakim hökmü elan etmək üçün müşavirəyə gedib. Proses yanvarın 27-də davam etdiriləcək.
   Qeyd edək ki, 2011-ci il iyunun 15-dən 16-na keçən gecə saat 00:20 radələrində paytaxtın Yasamal rayonu Vidadi küçəsində Böyük Britaniya vətəndaşı Silviya Devis və ABŞ vətəndaşı Amanda Erikson döyülüblər. Bununla əlaqədar həmin gün Yasamal rayon Polis İdarəsinin istintaq şöbəsində Cinayət Məcəlləsinin 221.2.1-ci (bir qrup şəxs tərəfindən törədilən xuliqanlıq) maddəsi ilə cinayət işi başlanıb. Cinayətdən zərər çəkmiş şəxslər dindirilib, onu törədənlərin fotorobotları tərtib olunub və məhkəmə-tibbi ekspertizası təyin edilib. Həyata keçirilən tədbirlər nəticəsində hadisəni Adil Tağızadə, Roman Həsənov, Vüsal Qurbanov və Nazim Hüseynovun törətdiyi məlum olub və onlar tutulub.
   A.Erikson və S. Devisin Azərbaycandakı fəaliyyəti yerli qeyri-hökumət təşkilatları ilə əməkdaşlıq etməkdən, jurnalistlər və vətəndaş cəmiyyəti fəalları üçün treninqlər keçirməkdən ibarət olub. A.Erikson, həmçinin, ABŞ-ın nüfuzlu "Vaşinqton Post" və "Nyu-York Times" qəzetləri ilə də əməkdaşlıq edir.

Dünən Sumqayıt şəhər Məhkəməsində Azərbaycan İslam Partiyasının həbsdə olan təşkilati işlər üzrə sədr müavini Arif Qəniyevin cinayət işi üzrə məhkəmə prosesi başa çatıb.
   Vəkil Anar Qasımov APA-ya verdiyi xəbərə görə, prosesdə hökm oxunub. Hökmə əsasən, A.Qəniyevin 1 il 6 ay müddətinə azadlıqdan məhrum edilib. Qeyd edək ki, A.Qəniyev Azərbaycan Milli Təhlükəsizlik Nazirliyi (MTN) və Baş Prokurorluq tərəfindən birgə həyata keçirilmiş istintaq hərəkətləri və əməliyyat-axtarış tədbirləri nəticəsində həbs olunub. O, Azərbaycana qarşı düşmənçilik fəaliyyəti aparmaqda, xarici dövlətə və onun nümayəndələrinə kömək etməkdə, eləcə də ölkədə iğtişaşların törədilməsində, ictimai təhlükəsizliyin pozulmasında, insanların itaətsizliyə təhrik edilməsində şübhəli bilinir. Keçirilmiş baxışlar nəticəsində Arif Qəniyevin üzərindən təxminən 19 qram narkotik vasitə olan həşiş və ona məxsus avtomobildən 1 ədəd "Makarov" tipli tapança, həmin odlu silaha aid 1 ədəd tapança darağı, 5 ədəd "PM" patronu aşkar edilərək götürülüb.

Azərbaycan paytaxtında qumarxana aşkar edilib. Daxili İşlər Nazirliyindən APA-ya verilən məlumata görə, Yasamal rayonu, H.Cavid prospekti ev 552 D, mənzil 12-də yerləşən internet klubda orada işləyən Hacıqabul şəhər sakini Səlim İsayev tərəfindən "onlayn" sistemi ilə qumarxana təşkil edildiyi müəyyənləşdirilib. Kluba baxış zamanı qumardan əldə edilən 324 manat pul, 10 kompüter, 1 ədəd prosessor və 2 klaviatura aşkar edilərək götürülüb.
   

Bakı metrosunda ajiotaj yaşanıb. Daxili İşlər Nazirliyindən APA-ya verilən məlumata görə, hadisə Bakı Metropoliteninin "Gənclik" stansiyasının ərazisində qeydə alınıb. Bakı şəhər sakini, əvvəllər məhkum olunmuş 77 yaşlı Əşrəf Babayev bıçaqla sərnişinləri hədələyərək qatarın hərəkətinə maneçilik törədib. Həyata keçirilən tədbirlər nəticəsində Əşrəf Babayev tutulub.
   

Gəncə şəhərində maskalı şəxslər mağazaya basqın edib. Bu barədə APA-ya Daxili İşlər Nazirliyindən bildirilib. Məlumata görə, Gəncə şəhəri N.Nərimanov küçəsində, şəhər sakini Şaməddin Binnətova məxsus mağazada satıcı işləyən Şahin Məmmədov polisə zəng edərək, maskalı 2 naməlum şəxsin idarə etdikləri "VAZ-2101" markalı avtomaşınla mağazanın vitrin şüşəsini sındıraraq oraya girdiyini, bıçaqla onu hədələyərək, oradan 400 manat pul və 800 manat dəyərində ərzaq məhsulları apardığını bildirib. Soyğunçuluqda istifadə olunan avtomaşın hadisə yerində qalıb. İlkin əməliyyat-axtarış tədbirləri aparılır.