Dövr müasirləşdikcə, elmi-texniki tərəqqi inkişaf etdikcə, bu, insanların rifah halında da özünü göstərir. Texnoloji imkanlar o həddə gəlib çatıb ki, insanlar əlavə vaxt itirmədən bir sıra işlərini qısa bir vaxtda görə bilir. Məsələn, əvvəllər pensiya almaqdan ötrü insanlar poçt şöbələrində saatlarla növbəyə dururdu.
   Yaxud da görürdün ki, verilən pensiyaları şöbə rəisləri əhaliyə tam vermir. Ümumiyyətlə, bu və buna bənzər neqativ hallar çox olurdu. Bir neçə ildir ki, əhali maaş və pensiyaları plastik kartlarla alır. Bu cür xidmət həm insanların rahatlığına xidmət edir, həm də bir sıra neqativ halların qarşısını alır. Xüsusən də vergidən yayınma hallarının qarşısının alınması baxımından sözügedən xidmətlərin əhəmiyyəti böyükdür. Son illər bir sıra kommunal ödənişlərin aparılması üçün şəhərdə "PAY POİNT"lar quraşdırılıb. Təbii qazın verilməsində smartkart sayğacları tətbiq olunduğundan, abunəçilərin "PAY POİNT"lara tələbatı artıb. Onu da qeyd edək ki, sözügedən qurğulardan təkcə qaz üçün deyil, digər kommunal ödənişlər üçün də istifadə olunur. Abunə mobil telefon nömrələrinin, kabel televiziyaların və s. aylıq haqqının ödənilməsində "PAY POİNT"lardan geniş istifadə olunur. Ancaq nədənsə, sözügedən qurğular şəhərdə o qədər də çox deyil. Əhalinin sıx yaşadığı bir çox yerlərdə sözügedən qurğular yoxdur. Bəzi yerlərdən onları yığışdırıblar. Əsasən metrolarda bu tip terminallar qoyulur ki, bu da böyük növbələrə gətirib çıxarır. Maraqlıdır, buna mane olan səbəb nədir?
   İqtisadçı ekspert Akif Nəsirlinin fikrincə, bu cür terminallar və digər buna bənzər qurğuların ölkədə yerləşdirilməsi, genişləndirilməsi elektron hökumətin bir seqmentidir: "Elektron hökumət adlanan kompleks proqram var ki, indi Azərbaycan hökuməti onu həyata keçirir. İnsanların sıx yaşadığı ərazilərdə "PAY POİNT"ların quraşdırılması da elektron hökumətin bir hissəsidir. Əvvəllər ucqar kəndlərdə bankomatlar yox idi. Onların əvəzinə poçt şöbələri fəaliyyət göstərirdi. Ancaq indi yavaş-yavaş bankomatların arealı genişlənir. Bu tipli qurğuların quraşdırılması üçün təkcə kapital yetərli deyil. Gərək bu qurğuları quraşdıran, texniki servis xidmətini göstərə bilən mütəxəssislər də olsun. Deməyim odur ki, bu bütövlükdə kompleks bir işdir. Ona görə də bunu mərhələlərlə həyata keçirmək mümkündür. Yəni birdən-birə bunu geniş tətbiq etmək mümkün deyil. Şəhərin bəzi yerlərindən terminalların yığışdırılmasına səbəb isə, əhalinin həmin qurğularla davranışının çərçivəyə sığmamasıdır. Çünki məhz bu kimi səbəblərdən həmin terminallar vaxtından əvvəl sıradan çıxır. Yəni burada sözügedən qurğuların geniş tətbiqi təkcə hökumətin imkanlarından asılı olan məsələ deyil. Həm də digər obyektiv səbəblər mövcuddur. Ola bilsin, hansısa məmur Azərbaycanda ödəniş terminallarının fəaliyyət göstərməsini istəmir. Çünki məmurlar ödənişlərin nağd formada ödənilməsində maraqlıdır. Bütün dünyada elektron hökumətin tətbiqinə qarşı bir məmur etirazı olubdur. Yəni onun tətbiqində məmurlar maraqlı deyil".
   Bütün deyilənlərlə yanaşı həm də o məlum oldu ki, ölkədə müştərilərin bu tip qurğularla davranmaq mədəniyyəti hələ arzuolunan səviyyədə deyil. Səbəb budursa, o zaman bu sahədə maarifləndirmə işlərinin aparılmasına ehtiyac var.
   

"Həmkarlar təşkilatlarının nəzdində olan sanatoriyalar müasir tibb avadanlıqları ilə təchiz olunacaq". APA-nın məlumatına görə, bu açıqlamanı jurnalistlərə Azərbaycan Həmkarlar İttifaqları Konfederasiyasının (AHİK) sədri Səttar Mehbalıyev verib.
   O bildirib ki, həmkarlar təşkilatlarının nəzdində fəaliyyət göstərən sanatoriyalarda kadr problemi yoxdur və orada çalışan tibb işçiləri öz sahələri üzrə ixtisaslaşıblar. S.Mehbalıyev qeyd edib ki, AHİK-in nəzdində olan sanatoriyaların və istirahət müəssisələrinin 80 faiz çarpayılarında qaçqınlar məskunlaşıb: "İmkan yarandıqca boşalan sanatoriyalarda təmir-bərpa işləri aparılır. İyirmi ilə yaxındır ki, bu sanatoriyaların bəzilərindən qaçqın-köçkün bacı-qardaşlarımız mənzil kimi istifadə edib. Buna görə də sanatoriya kimi bu müəssisələrin fəaliyyəti yararsız hala düşüb. Çalışacağıq ki, onların müasir səviyyəyə uyğunlaşdıraq və istirahət edən həmkarlar təşkilatlarının üzvləri üçün normal şərait yaradaq". Konfederasiya sədri 2013-cü ilin əvvəlinə qədər bu sanatoriyalarda təmir-bərpa işlərinin sona çatdırılacağını qeyd edib. Uşaqların istirahət məsələsinə də toxunan S.Mehbalıyev il ərzində 7-8 min uşağın düşərgələrdə istirahətinin təmin edildiyini də bildirib: "Məqsədimiz hər il 100 minə yaxın uşağın istirahətini təmin etməkdir. Bütün bunlar yerli həmkarlar təşkilatlarının maddi vəziyyətinin yaxşılaşdırılmasından da asılıdır".
   

Siyəzən şəhərində xəstəxanada yanğın baş verib. APA-nın Fövqəladə Hallar Nazirliyinin (FHN) saytına istinadən verdiyi məlumata görə, ümumi sahəsi 1000 kv/m olan ikimərtəbəli xəstəxana binasının ikinci mərtəbəsindəki 2 otağın yanar konstruksiyaları 36 kv/m sahədə və taxta konstruksiyadan ibarət dam örtüyü 18 kv/m sahədə yanıb. Hadisə zamanı 4 nəfər tibb personalı yanğınsöndürənlər tərəfindən təxliyə olunub. Mühasibat otağında olan sənədlər və binanın qalan hissəsi yanğınsöndürənlər tərəfindən yanğından mühafizə olunub.
   

Lənkəran şəhərinin Böyük bazar ərazisində yerləşən çörək zavodunda güclü yanğın baş verib. APA-nın cənub bürosunun məlumatına görə, hadisə dünən saat 11.20 radələrində qeydə alınıb. Zavodun qazanxanasının mazut çənindən başlayan yanğın müəssisənin içərisini, həmçinin yüksək gərginlikli elektrik transformatorunu bürüyüb. İşçilər təcili evakuasiya olunub və hadisə barədə "101" xidmətinə məlumat verilib. Fövqəladə Hallar Nazirliyinin Lənkəran Rayon Yanğından Mühafizə Hissəsinin 3 yanğınsöndürən maşınının və canlı qüvvəsinin səyləri ilə güclü yanğını 30 dəqiqə ərzində lokallaşdırmaq mümkün olub. Yanğın nəticəsində çörək zavoduna məxsus qazanxana və elektrik transformatoru sıradan çıxıb, eləcə də zavodun yardımçı tikililərinə qismən ziyan dəyib. Faktla bağlı araşdırma aparılır.
   
   

Ötən il ərzində Bakıda dəm qazından zəhərlənənlərin sayı iki dəfəyə yaxın artıb. Bunu cümə axşamı "Trend"ə Bakı Baş Səhiyyə İdarəsinin baş toksikoloqu, Kliniki Tibbi Mərkəzin Toksikologiya Mərkəzinin həkimi İsmayıl Əfəndiyev deyib.
   Onun sözlərinə görə, keçən il ərzində Kliniki Tibbi Mərkəzin Toksikologiya Mərkəzinə dəm qazından zəhərlənən 685 nəfər xəstə daxil olub. Bu, 2010-cu ilə nisbətən 300 nəfər çoxdur.
   Əfəndiyev bildirib ki, əslində dəm qazından zəhərlənmə halları daha çox olub. Qeyd edilən rəqəm yalnız xəstəxanaya zəhərlənmə diaqnozu ilə daxil olanların sayıdır.
   Bakının baş toksikoloqu zəhərlənmə hallarının baş verməsində daha çox insanların özlərini günahkar sayıb. O bildirib ki, insanlar elementar təhlükəsizlik qaydalarına riayət etmir, yaşadıqları binaların tüstü bacalarının vəziyyətini vaxtlı-vaxtında yoxlamır. Əfəndiyevin sözlərinə görə, qızdırıcı qaz cihazı olan istənilən evdə hökmən xüsusi qaz detektoru olmalıdır. Amma qiymətinin çox ucuz olmasına baxmayaraq, Azərbaycanda bu cihazdan geniş istifadə edilmir. "Detektorlar Azərbaycandakı evlərin, demək olar ki, heç 1 faizində də yoxdur. Detektor qaz sızması olanda və ya havada dəm qazının konsentrasiyası çoxalanda dərhal siqnal verir və bununla da baş verə biləcək təhlükənin qarşısının alınmasına imkan yaradır" - Əfəndiyev əlavə edib. Onun sözlərinə görə, detektordan digər ölkələrdə geniş istifadə edilir. Ona görə də xarici ölkələrdə dəm qazından zəhərlənmə halları az, Azərbaycanda isə çox baş verir. Əfəndiyev qeyd edib ki, ötən il ümumilikdə Toksikologiya Mərkəzinə müxtəlif növ zəhərlənmələrlə əlaqədar 2442 xəstə daxil olub. Onların 33-35 faizini dərmanlardan zəhərlənənlər təşkil edib. Əvvəlki illərlə müqayisədə ötən il dərmanlardan zəhərlənmə halları ilə bağlı statistik rəqəmlərdə nəzərəçarpan dəyişiklik baş verməyib.
   Ötən il ərzində paytaxtda 100-ə yaxın şəxs alkoqol və narkotiklərdən zəhərlənib. Bu göstərici, demək olar ki, əvvəlki illərlə eynidir. Toksikoloqun sözlərinə görə, 1990-cı illərin sonu və 2000-ci illərin əvvəlində keyfiyyətsiz alkoqol içkilər satıldığı və narkotik vasitələrin qanunsuz dövriyyəsinə nəzarət çox zəif olduğu üçün alkoqol və narkotiklərdən zəhərlənmələr daha çox olub. Amma son illər bu növ zəhərlənmələrin sayı azalıb. Alkoqol və narkotiklərdən zəhərlənənlər arasında kişilər üstünlük təşkil edir. Amma ümumilikdə zəhərlənənlər arasında qadınlar, xüsusilə də 20-30 yaşlı qadınlar çoxluq təşkil edir. Ötən il ərzində Bakıda zəhərlənmədən ölüm halları azalıb. Əfəndiyev ölüm hallarının azalmasının səbəbini tibbi xidmətin daha yaxşı və vaxtında göstərilməsi ilə əlaqələndirib.
   

Azərbaycan Təhsil Nazirliyi məktəbdənkənar təhsil müəssisələrindəki dərnəklərə cəlb olunan şagirdlərin sayının artırılmasını vacib hesab edir.
   Təhsil Nazirliyinin Tərbiyə və məktəbdənkənar müəssisələr şöbəsinin müdiri Ağababa İbrahimov cümə axşamı "Trend"ə bildirib ki, hazırda şagirdlərin 25-30 faizi bu qurumun məktəbdənkənar təhsil müəssisələrindəki dərnəklərə cəlb olunub. Amma ibtidai sinif şagirdləri istisna olmaqla, yuxarı sinif şagirdlərinin 50-60 faizini dərnəklərə cəlb etmək lazımdır. Buna nail olmaq üçün ilk növbədə bütün məktəbdənkənar müəssisələr üçün müasir tələblərə cavab verən binalar tikilməlidir. Çünki bu gün həmin müəssisələrin əksəriyyəti ya yardımçı, ya da icarəyə götürülmüş binalarda yerləşir.
   Bununla yanaşı, bütün rayon və şəhərlərdə yerli dövlət orqanları şagirdlərin dərnəklərə cəlbi məsələsinə xüsusi diqqət yetirməli, müasir tələblərə cavab verən ekoloji mərkəzlər tikilməlidir. Uşaqların ekoloji təcrübə aparmasına imkan yaratmaq üçün həmin mərkəzlərin böyük sahələri olmalı, müəssisələrin ərazilərində hər zona üçün xas olan endemik bitkilərin sayı çoxaldılmalıdır. Uşaqların texniki yaradıcılıqla məşğul olmasına imkan yaratmaq üçün böyük torpaq sahələri ayrılmalıdır.
   İbrahimov qeyd edib ki, şagirdlərə müxtəlif sahələr aid olan 100-dən çox dərnək təklif olunur. Onların 50-yə yaxını ekoloji sahələrə aiddir. Qalan dərnəklərdə texniki, ekoloji, turizm, şahmat, idman uşaq-bədii yaradıcılığı üzrə məşğələlər keçilir. Uşaq-gənclər idman məktəblərində şagirdlərə 27 idman növü öyrədilir. Texniki yaradıcılıq üzrə olan dərnəklər şagirdlərə gəmiqayırma, maşınqayırma, təyyarəqayırma, raketqayırma, xalçaçılıq və s. üzrə fəaliyyət göstərir. Nazirlik rəsmisinin sözlərinə görə, dərnəklərdə şagirdlərin əyani vəsaitlərdən istifadə etməsi üçün lazımi şərait var.
   Hazırda şagirdlər üçün dərnəklərin təşkili ilə yalnız Təhsil Nazirliyi deyil, Mədəniyyət və Turizm, Gənclər və İdman nazirlikləri, Həmkarlar İttifaqı Konfederasiyasının məktəbdənkənar müəssisələri də məşğul olur. İbrahimov hesab edir ki, uşaqların dərnəklərə olan marağının müəyyənləşdirilməsində onun valideyni və müəllimi mühüm rol oynayır. O bildirib ki, bir şagird bir neçə dərnəkdə iştirak edə bilər. Eyni zamanda, hər hansı dərnək şagirdin marağına uyğun olmasa, onu başqası ilə əvəzləyə bilər.
   "Uşaq dərnəyə gəlməyə də bilər, onu heç kim buna məcbur edə bilməz. Əsas məsələ odur ki, uşaq öz yerini, həmfikirlərini tapsın. Dərnəklərin əsas üstünlüyü odur ki, uşaq asudə vaxtını pedaqoqun nəzarəti altında keçirir" - İbrahimov əlavə edib.

Bu gün dünyada 100 ən böyük və dayanıqlı şirkətlərin "Qlobal 100-lük" reytinqi açıqlanıb. Fəxrlə qeyd edirik ki, "Azercell" Telekom MMC-nin də bir parçası olduğu TeliaSonera şirkəti bu reytinq cədvəlində 13-cü yeri tutub.
   "Qlobal 100-lük" reytinq siyahısı srağagün Davosdakı Dünya İqtisadi Forumunda təqdim edilib. TeliaSonera ətraf mühit, sosial və idarəçilik risqləri və imkanların idarə edilməsi sahəsində ən yaxşı telekommunikasiya operatoru hesab edilib. TeliaSonera-nın korporativ məsuliyyət şöbəsinin rəhbəri Eyya Pitkanen reytinq cədvəlində yuxarı pillədə yer tutmasının şirkət üçün mühüm göstərici olduğunu qeyd edib: "Korporativ məsuliyyət sahəsində göstərdiyimiz səylərin qiymətləndirildiyini görmək yaxşı haldır. Bu onu göstərir ki, biz düzgün yoldayıq və işimizə münasibətdə nümayiş etdirdiyimiz məsuliyyət yüksək nəticə verir. Bu cür reytinq həmçinin bizə yüksək nümunə üçün mühüm bir göstəricidir."
   "Qlobal 100-lük" Dünyanın Ən Dayanıqlı Korporasiyaları reytinq cədvəlidir. Bu siyahının əsası 2005-ci ildə "Strategic Value Advisors Inc." adlı beynəlxalq sərmayə-tədqiqat şirkəti və "Corporate Knights Inc." şirkəti tərəfindən birlikdə təsis edilib. Yüzlüyə daxil olan qurumların adları səhmləri birjalara çıxarılan 3500 şirkət arasından seçilir. Xatırladaq ki, "Qlobal 100-lük" cədvəli hər il Davosda Dünya İqtisadi Forumu zamanı təqdim olunur. TeliaSonera 2002-ci ildə Telia (İsveç) ilə Sonera (Finlandiya) şirkətlərinin birləşməsi nəticəsində yaranıb. Şirkət dünyanın bir çox ölkələrində, xüsusilə də Skandinaviya və Baltik ölkələrdə, Avrasiya məkanında, o cümlədən Rusiya, Türkiyə və İspaniyada telekommunikasiya xidmətlərini göstərir. Dünyada ilk dəfə olaraq 4G xidmətlərini istifadəyə buraxan TeliaSonera, həmçinin, beynəlxalq şəbəkə mülkiyyətçisi olmaqla Avropanın aparıcı rabitə xidmətləri təmin edən şirkətidir. TeliaSonera-nın əsas amalı hər bir kəsə rahat, effektiv və ətraf mühitə zərər vurmadan bir-biri ilə əlaqə saxlamağa yardım etməkdən ibarətdir. Müştərilərə ən yaxşı təcrübəni nümayiş etdirmək, yüksək keyfiyyətli şəbəkə və sərfəli əməliyyatlarla təmin etmək, bazarda ilk yerləri tutmaq TeliaSoneranın məqsədləri sırasındadır. 20 ildən də az bir müddətdə TeliaSonera yerli operatordan Avropanın beşinci ən böyük şirkətinə çevrilə bilib.
   
   
   

Hər bir ölkədə dövlətçiliyin, müstəqilliyin daha da möhkəmləndirilməsi, gələcəyin etibarlı təminatı intellektual səviyyəli potensial kadrların yetişdirilməsindən, gənclərin cəmiyyətin bütün sferalarında iştirakından, onların aparıcı qüvvəyə çevrilməsindən çox asılıdır. Bu gün Azərbaycan gəncləri ictimai-siyasi, sosial-mədəni və digər sahələrdə fəal iştirak edir.
   Gənclərlə iş sahəsində görülən tədbirlər Azərbaycan gəncliyinin inkişafına təkan verir, onların cəmiyyətdə özlərini təsdiq etməsində böyük rol oynayıb. Artıq respublikamızda fəaliyyət göstərən gənclər təşkilatları, ictimai birliklər ölkəmizdə vətəndaş cəmiyyətinin qurulmasına töhfələrini verir. Ölkəmizdə gənc nəslin mənəvi-ideoloji tərbiyəsinə, onların sağlamlığının qorunmasına xüsusi qayğı ilə yanaşılır. Son vaxtlar Azərbaycan dövləti gənclərə malik olduqları qabiliyyət və intellektual imkanlar müqabilində geniş meydan verməyin tərəfdarı kimi bu təbəqəyə daim böyük diqqət və qayğı göstərir. Ölkəmizin qüdrətli dövlətə çevrilməsi naminə gənclərin imkanlarından daha dolğun istifadə edilməsi, həmçinin bunun üçün əlverişli şəraitin yaradılması gənclər siyasətinin əsasını təşkil edir. Gənc nəslin fiziki, sosial və mənəvi inkişafını təmin edən fəaliyyət sahələrinin istiqamətləndirilməsi, gənclərin dünya dəyərlərinə yiyələnmələri və digər məsələlər qarşıda duran əsas vəzifələrdəndir. Bildiyimiz kimi, 2 fevral 1996-cı ildən mərhum prezident Heydər Əliyevin təşəbbüsü ilə gənclərin forumlarının keçirilməsi, ölkədə gənclər gününün qeyd olunması, gənclərimizin problemlərinin həllinə yönələn fərman və sərəncamların verilməsi, onların dövlət quruculuğu prosesinə cəlb edilməsi, müvafiq qanunların qəbulu deyilənləri reallığa çevirdi.
   İmzalanan prezident fərmanına əsasən, fevralın 2-si Azərbaycan Gəncləri Günü elan edildi.
   Bundan əlavə, gənclər sahəsində dövlət siyasətinin uğurla həyata keçirilməsi məqsədilə zəruri qanunvericilik bazasının formalaşdırılmasını da təmin etdi. 1996-2002-ci illərdə qəbul olunan "Bədən tərbiyəsi və idman haqqında", "Gənc istedadlar üçün xüsusi təqaüdlərin təsis edilməsi haqqında", "Azərbaycanın gənc istedadlarına dövlət qayğısı haqqında", "Dövlət gənclər siyasəti haqqında" qanun, fərman və sərəncamlar, habelə "Gənc ailə" proqramı, "Gənclərdə vətənpərvərlik və vətəndaşlıq hisslərinin yüksəldilməsi haqqında", "İstedadlı yeniyetmələrin və yaradıcı gənclərin sosial, iqtisadi və s. problemlərinin həllinə yönəlmiş, onların öz qabiliyyətlərini inkişaf etdirmələrinə kömək edən Dövlət Proqramı", "Ordudan tərxis olunmuş gənclərin məşğulluğu" Dövlət Proqramı bu qəbildəndir. Qanunlar, fərman, sərəncam və dövlət proqramları gənc nəslin mütəşəkkil qüvvə kimi formalaşmasına, mənəvi-ideoloji cəhətdən tam yetkinləşməsinə, sosial problemlərinin həllinə, faydalı məşğulluğunun təmin olunmasına təsir göstərdi.
   Müasir Azərbaycan gəncliyi inkişafının yeni mərhələsinə qədəm qoyub. Dövlət tərəfindən uğurla davam etdirilən dövlət gənclər siyasətinin düzgünlüyünü bu sahədə qazanılmış uğurlu nəticələr də təsdiqləyir. Ölkəmizdə beynəlxalq səviyyəli yarışlar təşkil olunur, idmançılarımız hər il müxtəlif idman növləri üzrə keçirilən Avropa və dünya çempionatlarında iştirak edərək uğurlu nəticələrə imza atırlar. Vaxtilə müxtəlif səbəblər üzündən respublikamızı tərk etmiş idmançılar vətənə qayıdaraq ölkəmizin idman şərəfini uca tutur, üçrəngli bayrağımızı göylərə qaldır.
   Respublikamızda həyata keçirilən dövlət gənclər siyasəti gənclərin hərtərəfli inkişafını, onların cəmiyyət həyatında fəal iştirakını təmin etməkdədir. Bu siyasət çox geniş bir spektri - gənclərin təhsili, tərbiyəsi, sağlamlığı, intellektual və mənəvi inkişafı, asudə vaxtının səmərəli təşkili, cəmiyyətin bütün sahələrində fəal iştirakı ilə bağlı məsələləri əhatə edir. Artıq Azərbaycan gəncliyi cəmiyyətin inkişafında fəal sosial təbəqəyə çevrilib.
   Prezident İlham Əliyevin gənclərin potensialından ölkənin mənafeyi naminə tam və düzgün istifadə olunması, onların faydalı məşğulluğunun təmin edilməsi, dövlət idarəçiliyi sistemində iştirakının gerçəkləşdirilməsi məqsədilə 2005-ci il avqustun 30-da imzaladığı "Azərbaycan Gəncliyi Dövlət Proqramının (2005-2009-cu illər) təsdiq edilməsi haqqında" sərəncamı da gənclərə dövlət qayğısının artırılması məqsədinə xidmət edir. Sərəncamda ölkəmizdə gənclərlə bağlı dövlət siyasətinin əsas istiqamətləri açıqlanır. Gənclərin və yeniyetmələrin vətənpərvərlik, vətəndaşlıq tərbiyəsinin daha da gücləndirilməsi, onların məşğulluğunun təmin edilməsi, sahibkarlıq fəaliyyətlərinə kömək göstərilməsi, sosial problemlərinin həlli, o cümlədən yaradıcı və istedadlı gənclərə, gənc ailələrə dövlət qayğısının artırılması, mənzil şəraitlərinin yaxşılaşdırılması, gənclərin dövlət quruculuğu işlərinə geniş cəlb olunması və bu kimi məsələlər proqramda əksini tapır.
    Proqrama uyğun olaraq gənclərin sosial müdafiəsi, məşğulluğunun təmin edilməsi, yaradıcılıq axtarışlarının stimullaşdırılması, milli ruhda təlim-tərbiyəsi, hərbi vətənpərvərlik tərbiyəsinin gücləndirilməsi, sağlam həyat tərzinin təbliği istiqamətində tədbirlər həyata keçirilir.
   Bildiyimiz kimi, gənclərin əsas fəaliyyəti 9 aprel 2002-ci ildə qəbul olunmuş Gənclər Siyasəti Haqqında Azərbaycan Respublikasının Qanunu ilə tənzimlənir. Bu qanununda diqqət çəkən məqamlardan biri də 6-cı maddədə öz əksini tapan istedadlı gənclərə dövlət qayğısının neçə olmasıdır. Qanunun bu maddəsində deyilir:
   - sosial və maddi vəziyyətindən asılı olmayaraq, istedadlı və yaradıcı gənclərin təhsilini davam etdirməsinə dövlət təminat verir. Sosial müdafiəyə ehtiyacı olan istedadlı gənclərə təhsilini başa vurduqdan sonra qaytarmaq şərti ilə qanunvericiliklə müəyyən edilmiş qaydada kreditlər verilə bilər.
   - sosial müdafiəyə ehtiyacı olan istedadlı gənclərə təhsilini başa vurduqdan sonra qaytarmaq şərti ilə qanunvericiliklə müəyyən edilmiş qaydada kreditlər verilə bilər.
   - Dövlət istedadlı gənclərin Azərbaycan Respublikasında və onun hüdudlarından kənarda müasir peşə və ixtisaslar üzrə təhsil almalarına, təcrübə keçmələrinə şərait yaradır.
   - İstedadlı gənclərin həvəsləndirilməsi məqsədilə dövlət və yerli özünüidarəetmə orqanları, hüquqi və fiziki şəxslər xüsusi təqaüd, mükafat və müavinətlər təsis edə bilər.
   Göründüyü kimi, Azərbaycan dövləti istedadlı gənclərin meydana çıxmasında xüsusilə maraqlıdır. Dövlətin gənclərə verdiyi stimul sözdə yox, mühüm qanunvericilik aktlarında öz əksini tapıb.
   Demokratik Azərbaycan Dünyası Partiyasının gənclər təşkilatının sədri Nail Bağırzadə hesab edir ki, dövlətin gənclərlə bağlı qəbul etdiyi bütün qanunlar çox əhatəli və gözəldir":İstedadlı gənclərə münasibətin normal olduğunu görürük. Biz partiyanın gənclər təşkilatı olaraq dövlətin bu aspektəki siyasətini müsbət qarşılayırıq. Bəzən imkansızlıq ucbatından istedadlar itib batır. Onların tapılıb üzə çıxarılmasında dövlətin yardımı olmasa, biz istedad itkisi ilə üzləşə bilərik. Bu bütün dünyanın inkişaf etmiş ölkələrində belədir. İstedadlı gənc bizim gələcəyimiz deməkdir. Hansı sahədə olursa-olsun, onların hamısı bizim vətəni təmsil edəcək. Ölkə başçısı səviyyəsində gənclərlə bağlı nə lazımdırsa edilir, ancaq qanunların işləməsində biz gənclər bəzi süni maneələrlə rastlaşırıq. Məsələn, gənc ailələrin həyat səviyyəsini yaxşılaşdırmaq üçün onlara ipotekaların verilməsi haqda qanun var. Ancaq bütün gənclər bu güzəştdən yararlana bilmir. Bəzən bununla bağlı məsul şəxslər gəncləri elə süründürür ki, hər gənc bu prosedurun arxasınca getmək istəmir. Düşünürəm ki, gənclərlə bağlı qəbul olunmuş gözəl qanunların icra olunmasına da nəzarət güclənməlidir".
   Ana Vətən Partiyası Gənclər Təşkilatının sədri əvəzi Seymur Əliyev bildirdi ki, dövlət tərəfindən gənclərin hərtərəfli inkişafına xüsusi önəm verilir: "Bunu qəbul edilmiş qanunvericilik aktlarından da görmək mümkündür. Bir gənclər təşkilatı kimi biz dövlətin istedadlı gənclərə göstərdiyi qayğını müsbət qarşılayırıq. Bilirsiniz ki, dövlətin bu sahədə apardığı uğurlu siyasətinə görə çoxsaylı istedadlar üzə çıxır, onlarda olan istedad batmır. Bu da Azərbaycanın gələcək insan kapitalı deməkdir. Təbii ki, gənclərimiz bütün istiqamətlərdə inkişaf edir. Ölkə başçısının gənclərə yanaşması göz qabağındadır. İstedadlı gənclərimiz də dövlətin bu qayğısına lazımi şəkildə cavab verir və bir sıra beynəlxalq uğurlara imza atır. Belə gənclərin istedadının nəticəsidir ki, bu il "Eurovision" Azərbaycanda keçiriləcək. Prezident İlham Əliyevin imzaladığı "Azərbaycan Gəncliyi 2011-2015 illərdə proqramı" dövlətin gənclər siyasətinə diqqət və qayğının nümunəsidir.

Gəncliyin inkişafı, onların problemlərinin həlli və perspektivdə atılacaq addımlar dövlətimizin bu təbəqəyə olan xüsusi diqqətinin nümunəsidir. Bunun nəticəsidir ki, prezident İlham Əliyevin Sərəncamı ilə təsdiq edilmiş "Azərbaycan gəncliyi 2011-2015-ci illərdə" Dövlət Proqramında Bakıda Gənclər Mərkəzinin və regionlarda "Gənclər evləri"nin inşa edilməsi, Gənclər Fondunun yaradılması, gənclərin asudə vaxtının təşkili, gənclərin məşğulluğunun təmin edilməsi və s. işlərin görülməsi nəzərdə tutulub. Sözügedən proqram bir daha ölkə başçısının gənclərə diqqət və qayğısının bariz nümunəsidir.
   "Azərbaycan gəncliyi 2011-2015-ci illərdə" Dövlət Proqramının icrasına dövlət büdcəsindən 80 milyon manat vəsaitin ayrılması nəzərdə tutulur. Məsələ ondadır ki, 2005-2009-cu illər üçün Azərbaycan Gəncliyi Dövlət Proqramına büdcədən 8 milyon 375 min 385 min manat ayrılmışdısa, yeni proqrama görə 80 milyon manat vəsait ayırmaq planlaşdırılır. Bu da əvvəlki proqrama nisbətən təxminən 10 dəfə artıq göstəricidir. Bunun özü gənclərin milli mənlik şüurunun dərkində və vətənpərvərlik hisslərinin güclənməsində əhəmiyyəti böyükdür. Ümumən dövlətin gənclər siyasəti daha da gücləndirilib və gənclər proqramının təsdiqlənməsi də gənclərə dövlət qayğısının artdığını göstərir. Digər vacib məqam gənclər siyasətinin həyata keçirilməsi üçün infrastrukturun inkişafı ilə bağlıdır. Belə ki, sözügedən proqram çərçivəsində Bakıda Gənclər Mərkəzinin və 10 rayonda gənclər evlərinin tikintisi nəzərdə tutulur. Təsadüfi deyil ki, görülən bu işlər çərçivəsində artıq 12 rayonda gənclər evləri fəaliyyət göstərir. Bu ildən başlayaraq, ölkənin bir rayon və ya şəhərinin "Gənclər paytaxtı" elan ediləcəyi gözlənilir. Bunun üçün, gənclərin istəkləri nəzərə alınmaqla, müsabiqə, səsvermə keçiriləcək, paytaxtda gənclərlə bağlı tədbirlər inkişaf etdiriləcək. Həmin rayon gəncləri iş sahəsində təcrübə əldə edəcək. Digər tərəfdən, Azərbaycan dövləti "qara qızılın insan kapitalına çevrilməsi" kontekstində geniş biliklərə və dünyagörüşünə malik yeni kreativ nəsil gənclərin formalaşmasına xüsusi önəm verir. 2007-ci ildə qəbul edilmiş və gənclərin müxtəlif xarici ölkələrin təhsil ocaqlarında təhsilini davam etdirməsini nəzərdə tutan dövlət proqramı bu istiqamətdə atılan mühüm addımlardan biridir.
   Sözügedən proqram uğurla davam etdirilir və təhsil almağa göndərilən tələbələrin sayı ildən-ilə artır. Görülən bu işlər çərçivəsində bu gün xarici ölkələrdə müxtəlif proqramlar üzrə 10 minə yaxın tələbə təhsil alır. Bu yeni yaradıcı düşüncə, yeni dünyagörüşü, eyni zamanda Azərbaycan dövlətçiliyinə xidmət edəcək mühüm kadr potensialıdır.
   Bütövlükdə "Gənclər evləri"nin inşa edilməsi haqqında sərəncam ən əlamətdar hadisələrindəndir. Bu, gənclərlə işin yeni müstəvidə qurulmasına, onların ictimai həyatın bütün sahələrində fəal iştirak etməsinə və yeni inkişafın əsas qüvvəsinə çevrilməsinə imkan verəcək. Ötən ilin aprelində prezident gənclərlə görüşündə bu istiqamətdə fəaliyyətin gücləndirilməsini və gənclərə dövlət qayğısının artırılmasını əsas vəzifə kimi qeyd edib. Bu məqsədlə gənclərin peşə hazırlığının təkmilləşdirilməsi, Gənclər Evlərinin yaradılması, Gənclər Mərkəzinin tikilməsi nəzərdə tutulub.
   Reallıq odur ki, qısa müddət ərzində Azərbaycan istər siyasi, iqtisadi, sosial, istərsə də demokratiya sahəsində böyük inkişaf yolu keçib. Ulu öndər Heydər Əliyevin əzmi və iradəsi sayəsində əldə edilən sabitlik siyasi və iqtisadi islahatların həyata keçirilməsinə və Azərbaycanın öz milli xüsusiyyətlərinə uyğun yeni inkişaf modelinin özünü təsdiq etməsinə rəvac verib. Bazar iqtisadiyyatına keçidi başa vuran Azərbaycan bu gün kapital idxal edən ölkədən kapital ixrac edən ölkəyə çevrilib. Azərbaycanın özəl və dövlət şirkətləri dünyanın müxtəlif ölkələrində sərmayələr yatırır, milli ideyaların daşıyıcılarına çevrilir. Dövlət büdcəsi müstəqilliyin ilk illəri ilə müqayisədə 1000 dəfə artıb. Daxili imkanlar hesabına həyata keçirilən investisiya layihələri, iqtisadi fəaliyyət istiqamətlərinin genişlənməsi iqtisadiyyatın çoxşaxəli inkişafına xidmət edib. Qloballaşan müasir dünyada texnoloji tərəqqinin yeni nailiyyətləri kommunikasiya vasitələrinin şaxələnməsinə, internetin yaratdığı imkanlar sayəsində məlumatların daha sürətlə ötürülməsinə şərait yaradıb. Bu həm insanların şüurunda, həm də gündəlik həyatında dəyişikliklərlə müşahidə olunur.
   İnformasiya kommunikasiya texnologiyalarının inkişafı Prezident tərəfindən təyin edilən prioritet sahələrdən biridir. Bizim gələcək inkişafımızın möhkəm özüllər üzərində qurulmasının əsasını texnoloji tərəqqi təşkil edəcək.
   Ümumilikdə ölkə daxilində "Gənclər evlərinin" gənclərin milli mənlik şüurunun inkişafında və vətənpərvərlik hisslərinin güclənməsində oynayacağı rol necə dəyərləndirilir? Sözügedən məsələyə baxış necədir?
   Məsələyə münasibət bildirən "Gənclər və Dəyərlər" İctimai Birliyinin rəhbəri Albina Rzazadənin sözlərinə görə, sözügedən evlərin yaradılması gənclərin həyatında çox mühüm rol oynayacaq: "90-cı illərin sonu, 2000-ci illərin əvvəllərində gənclərin aktiv ictimai fəaliyyətə qoşulmasında qismən problemlər yaşanırdı. O üzdən, "Gənclər evləri"nin yaradılması bu sahədə atılan çox önəmli və uzaqgörən bir addımdır. Bu günə kimi bütün QHT-lərdə təmsil olunan gənclərin ümumilikdə hansısa bir iş görmək, tədbir keçirmək üçün məkan problemi olub. Zaman-zaman bu problem gənclərin aktiv fəaliyyətinə müəyyən maneçilik yaradıb. Görüşlər, tədbirlər keçirmək üçün gənclər məkan problemi ilə üzləşirdi. Ona görə də adıçəkilən evlərin yaradılması çox önəmli bir hadisə oldu. Bundan sonra, bir QHT rəhbəri olaraq, hər hansı rayona getsək, ən azından hansısa məkan problemi ilə üzləşməyəcəyik. Artıq kimlərəsə yerlə bağlı xahiş, minnət edəsi olmayacağıq. Ən azından, bu kimi problemlər yaşanmayacaq. Sözügedən evlərin yaradılması həm də gənclərin milli mənlik, vətənpərvərlik şüurunun inkişafına təkan verəcək. Həmin evlərdə gəncləri milli qəhrəmanlarla, iş fəaliyyətində uğur əldə edən insanlarla görüşdürmək olar. Gənclər üçün stimul ola biləcək bu görüşlərin əhəmiyyətini kiçiltmək olmaz. Həmin evlər onlarda vətənpərvərlik hisslərinin daha da yüksək səviyyəyə çatdırılması baxımından önəmli bir məkan ola bilər. Bölgələrdə adıçəkilən evlərin yaradılması paytaxt gəncləri ilə bölgə gəncləri arasında bir körpü rolunu oynayacaq. Çünki paytaxtdan bölgələrə səfər edən gənclər çox rahatlıqla rayonlardaki həmkarları ilə ünsiyyətdə, təmasda olmaq imkanı əldə edəcək. Nəticədə gənclər arasında bir sıra məsələlərlə bağlı fikir mübadiləsi aparmaq imkanı yaranacaq. Burada mövzular müxtəlif ola bilər. Bütün hallarda qarşılıqlı ünsiyyət, fikir mübadiləsi gənclərin intellektul baxımdan inkişafına və dünyagörüşlərinin zənginləşməsinə təkan verəcək. Bütövlükdə gənclər arasında bu səpkili görüşlərin keçirilməsi onların inkişafında çox önəmli bir mərhələ olacaq. O baxımdan hesab edirəm ki, bu addım çox əhəmiyyətli bir mərhələnin başlanğıcı olacaq. Çünki sadalanan problemləri özüm də bu və ya digər dərəcədə yaşayırdım. Elə bölgələr var ki, orada gənclərin mütəmadi olaraq qarşılıqlı görüşlər keçirməsinə böyük ehtiyac var. Bilirsiniz ki, bu gün cənub bölgəsində erkən nikahlar məsələsi ən mühüm problemlərdən biridir. Sözügedən məsələ ilə bağlı bizim layihəmiz var idi və məkan problemi ilə əlaqədar onu reallaşdıra bilmirdik. "Gənclər evi" yaradılmaqla artıq o problemlər öz həllini tapacaq. Bu minvalla bundan sonra biz məkan barəsində yox, tədbirlərin daha yaxşı keçirilməsi haqqında düşünəcəyik. Ona görə də sözügedən evlərin yaradılmasını çox müsbət hal kimi dəyərləndirirəm".
   A.Rzazadənin açıqlamasından o da məlum oldu ki, "Prezidentimiz cavan olduğuna görə, gənclərin də hansı sahədə nəyə ehtiyacı olduğunu çox gözəl görür. Eyni zamanda, bu sahədəki problemlərlə bağlı çox gözəl çıxış yolları ortaya qoyur. Sözügedən sahədəki problemlərin aradan qaldırılması istiqamətində məqsədyönlü iş aparır. Hesab edirəm ki, prezidentin bu istiqamətdə gördüyü işlər, yeritdiyi dönməz siyasət alqışlanasıdır. Prezidentə bu yöndə hər cür dəstək vermək lazımdır. QHT olaraq, prezidentin yeritdiyi siyasəti, gənclərlə bağlı gördüyü bu kimi işləri ürəkdən dəstəkləyirik. Ötən il prezidentin ictimai həyatda aktiv olan gənclərlə görüşməsi bizə daha da stimul verdi. Həmçinin, bizlərdə işlərə daha möykəm yapışmaq həvəsi yaratdı. Deməli, gördüyümüz işlərə prezident tərəfindən qayğı, diqqət var. Biz də gənclər olaraq dövlət başçısının bizə verdiyi dəyəri işimizdə layiqincə doğrultmağa çalışacağıq. Arzu edirəm ki, göstərilən bu diqqətə görə digər gənclər təşkilatları da düzgün nəticə çıxarsın və fəaliyyətində dönüş əldə etsin".