Azərbaycan Milli Demokrat (Bozqurd) Partiyasının (AMDP) sədri Tufan Kərimlə partiyanın cari baxışları barədə söhbət etdik.

   - Tufan bəy, sədri olduğunuz partiya "ərəb baharına" necə baxır?

   - Bir çox Azərbaycan siyasətçiləri "ərəb baharı"nı, Liviyada və Suriyada baş verənləri beynəlxalq anqlo-sakson mediası nöqteyi-nəzərindən dəyərləndirir. Bu media isə heç də həmişə obyektivliyi ilə seçilmir, əksinə, anqlo-sakson (əsasən, ABŞ-İngiltərə) mənafelərinə uyğun informasiya yaymaqdadır.

   "Ərəb baharına" gəldikdə isə, bunun kökü hələ 2000-ci illərin əvvəlinə gedib çıxır. O zaman ABŞ və İngiltərənin siyasi çevrələri Böyük Orta Şərq layihəsi adlı bir plan cızmışdı. Plan Türk mediasında Böyük Ortadoğu Planı (BOP) kimi də tanınır. Əsas məqsədləri SSRİ dağıldıqdan sonra güclənməkdə olan Çinin, Pakistanın və Hindistanın ərəb neftinə çıxışını əngəlləmək idi. Digər məqsəd - İslam ölkələrini ya zəiflətmək, ya da daha xırda hissələrə parçalamaqdır.

   2007 və 2009-cu ilində bu proseslərə hazırlıq öz pik nöqtəsinə çatdı. Ərəb ölkələrindən gənclər Qərbin kəşfiyyat mərkəzləri tərəfindən dəstəklənən və maliyyələşən müxtəlif "institutlar", "fondlar" vasitəsilə Türkiyədə, Avropada və ABŞ-ın özündə yaradılmış xüsusi mərkəzlərdə internetdə kütləvi narazılıqların hazırlanması və idarə olunmasının incəliklərini öyrənirdilər. Paralel olaraq, ABŞ kəşfiyyatı islamçı müxalifətlə də əlaqələr yaradırdı. Bunların nəticəsini biz bu gün görürük. Maraqlıdır ki, ABŞ-ın Yaxın Şərqdə siyasətini dəstəkləyən Səudiyyə Ərəbistanındakı və ya Bəhreyndəki etirazların yatırılmasını Qərb mediası, ümumiyyətlə, geniş işıqlandırmaqdan vaz keçdi.

   Qəribəsi budur ki, ərəb ölkələrində sünni-şiə qarşıdurması, ərəb-kürd konflikti, ərəblərin daxilindəki tayfa nifaqı "despotizmə qarşı demokratik hərəkat" kimi qələmə verilir.

   Azərbaycan bütün bunlarla vaxtilə üzləşmişdi. 1990-cı ilin 20 Yanvardan sonra Sovet mediası Azərbaycanda tam ayrı məlumatları yayır, SSRİ məkanında və dünyada isə azərbaycanlıları "erməni qanına susamış vəhşilər", "islamçı terroristlər" kimi tanıdırdı.

   - Sizin fikrinizcə, regionda bu proseslər hansı sonluqla bitəcək?

   - ABŞ-ın və Qərbin təhdidi ilə marionet rejimlərin başda durduğu və bir-birilə konfliktdə olan xırda dövlətlər yaranacaq. Bizim üçün narahatlıq yaradan əsas məsələ Kürdüstanın ortaya çıxmasıdır. Çünki Kürdüstan regionda Türkiyə və Azərbaycan (o cümlədən, Güney Azərbaycan) əleyhinə ermənilərlə ittifaqda yeni forpost ola bilər.

   - Amma Azərbaycanın əksər siyasətçiləri tam ayrı fikirdədir və baş verən hadisələri dünyada gedən demokratik proseslə bağlayırlar.

   - Dediyiniz siyasətçilərin bir qismi bu cür qiymətləndirməni Qərbdən gələn sifariş əsasında edir. Gəlin qəbul edək ki, Azərbaycanda fars şovinistlərinin, rus imperialistlərinin marionetləri olduğu kimi, xristian dünyasının da, Qərb imperializminin də marionetləri var. Avropada anti-türkizm, anti-islamizm gücləndiyi bir dövrdə, multikulturalizmin çökdüyü bir zamanda "Avropa dəyərlərindən", "Avropaya inteqrasiyadan" dəm vurmaq, ən azından, siyasi korluqdur.

   - Bəs çıxış yolunu nədə görürsünüz?

   - Millətçi bir partiyanın sədri kimi çıxış yolunu yalnız cəmiyyətimizin bütün sferalarını əhatə edə biləcək millətçiliyin təbliğində görürəm. Qarşıda regionu böyük təlatümlər gözləyir. Burada yeganə düzgün istiqamət millətçilikdir. Rusiyanın, Qərbin və fars şovinistlərinin marionet siyasətçilərindən fərqli olaraq, AMDP-də cəmlənmiş və sayı gündən-günə artan millətçilərimiz milli mənafelərin önəmliliyini hansısa bir sosialist, liberal və ya dini şüardan həmişə üstün tutur.

   - AMDP-nin iqtidara münasibəti necədir?

   - İqtidarın gördüyü yaxşı işləri yüksək dəyərləndirir, çatışmazlıqlarını tənqid edirik. Bəziləri, vaxtilə bu iqtidarın hakimiyyətə gətirilməsində böyük rol oynayanlar belə bir fikir təlqin edirlər ki, iqtidara qarşı yalnız itaətsizlik nümayiş etdirilməlidir. Qərbin ermənipərəst, anti-türk və islamafob gerçəkliyi fonunda, düşmənlərin əhatəsində olan ölkəmizdə millət daxilində qarşıdurma yaratmaq düşmənlərimizin əlinə oynamaq deməkdir. Biz millətçilər millətimizi, torpaqlarımızı və dövlətçiliyimizi hansısa utopik sosialist, liberal şüarlara qurban vermək fikrində deyilik.

   Azərbaycanın indiki təhlükəli geopolitik durumunda millətçiləri də milli qarşıdurmaya aparmaq istəyənlər var. Bu qrupcuqlar bu mövzuda öz uğursuzluqlarını görəndə, qondarma bir "millətçi partiya" yaratmaq və onun başına millətçilikdən uzaq, gündə bir partiyanın üzvü olan macəraçını gətirmək kimi ucuz şouya da əl atırlar. Sizi inandırım ki, Türkiyədəki Milliyetçi Hareket Partisinin sıravi üzvü belə bilsə ki, Azərbaycanda özünə "bozqurd" deyən birisi sorosçuların yedəyində gedir, bu cür "milliyyətçini" topa tutar.

   İqtidara münasibətdə bizim taktikamız aydındır. Seçkilərdə iştirak və milli qanunvericilikdə nəzərdə tutulmuş dinc mübarizə metodlarından istifadə edərək hakimiyyətə gəlmək uğrunda sivil mübarizə aparmaq. Eyni zamanda, iqtidara ünvanlı millətçi təbliğatımızı və təşviqatımızı davam etdirmək. Biz millətçi əqidəli partiyanı təmsil edirik və hətta ciddi səhvlər buraxmış millət övladının da son nəticədə millətin xeyirinə çalışacağına ümid edirik. Biz bəziləri kimi yad və bizə potensial düşmən millətlərin "beynəlmiləlçisində", "demokratında" və ya "liberalında" özümüzə dost axtarmırıq.

   - Bildiyimə görə, AMDP ATƏT-in Bakı ofisi ilə əlaqələri kəsib. Bunun səbəbi?

   - Bu suala qısa cavab verim. Bizim üçün nə Rusiya, nə Farsistan və nə də Qərb avtoritetdir. Bizim onlarla nə işbirliyimiz ola bilər ki?! Yeganə hesablaşdığımız amil - milli və dövlət maraqlarımızdır.