Qeyri-Hökumət Təşkilatlarına Dövlət Dəstəyi Şurası 2010-cu maliyyə ilində keçirilən növbəti müsabiqənin nəticələrini elan edib. Qeyd edək ki, bundan əvvəl də analoji müsabiqə keçirilərək bir sıra layihələr maliyyələşdirilib.

   Ümumilikdə QHT-lərə dövlət dəstəyi siyasəti bu sektorda inkişafı stimullaşdırar. Son layihənin yekunları, hansı istiqamətlərin seçilməsi və nə qədər vəsaitin ayrılması maraq doğurur.

   Bu haqda "Bakı-Xəbər"ə ətraflı açıqlama verən Qeyri-Hökumət Təşkilatlarına Dövlət Dəstəyi Şurası Katibliyinin icraçı direktoru Fərasət Qurbanovun sözlərinə görə, 2010-cu ildə QHT-lər üçün növbəti maliyyə yardımı müsabiqəsi elan olundu: "Müsabiqənin müddəti iyunun 25-dən iyulun 23-ə qədər müəyyən olundu. Müsabiqəyə 10 mövzu üzrə layihələrin təqdim olunması üçün QHT-lərə istiqamət verilmişdi. Mövzular bunlar olub: Demokratik proseslərin dərinləşməsinə dair təşəbbüslər; Ermənistan-Azərbaycan-Dağlıq Qarabağ münaqişəsi ilə bağlı həqiqətlərin dünya ictimayətinə çatdırılması; Qaçqın və məcburi köçkünlərin hüquqlarının beynəlxalq təşkilatlarda və məhkəmə orqanlarında müdafiəsi; Virtual məkanda Azərbaycan həqiqətləri ilə bağlı elektron resursların mövcud vəziyyətinin öyrənilməsi və müvafiq hesabatların hazırlanması; Beynəlxalq təşkilatlar və xarici QHT-lərlə əməkdaşlığın dərinləşməsi istiqamətində təşəbbüslər; Tibbi xidmətin yaxşılaşmasına dair təşəbbüslər; Təhsilin keyfiyyətinin artırılmasına dair təşəbbüslər; Mədəniyyətə dair təşəbbüslər; Xüsusi qayğıya ehtiyacı olan uşaqların sosial problemlərinin həllinə dəstək və ən nəhayət sonuncu mövzu Sosial xidmətlərin yaxşılaşması sahəsində təşəbbüslərə dəstək. Beləliklə, Qeyri-Hökumət Təşkilatlarına Dövlət Dəstəyi Şurasına göstərilən müddət ərzində 210 QHT-dən layihə təklifi daxil olub. Layihə təkliflərinin araşdırılması bir neçə mərhələdə aparılıb. Bu zaman 65 təşkilatın sənədlərində müəyyən qüsurlar aşkarlandı. Qüsurlar, əsasən müsabiqə qaydalarına və şərtlərinə cavab verməmək, elanda göstərilən sənədlərin ərizəyə əlavə olunmamasından ibarət idi. Bax, bütün bunlar ilkin texniki seleksiyadır. Şura katibliyə rəsmi şəkildə tapşırdı ki, həmin ilkin tələblərə cavab verməyən təşkilatlar növbəti mərhələyə, yəni ekspertizia mərhələsinə buraxılmasın. Beləliklə, 65 təşkilatın sənədləri geri qaytarıldı. Yerdə qalan 145 təşkilatın sənədləri isə ekspertizaya təqdim olundu. Ekspertizada 9 nəfər ekspert iştirak etdi. Hər istiqamət üzrə layihəni 2 ekspert dəyərləndirdi. Ekspertiza başa çatdıqdan sonra şura katibliyi hər bir layihə, təşkilat haqqında müvafiq arayışlar hazırlayaraq şuranın müzakirəsinə təqdim etdi. Şura keçirdiyi sonuncu, 46-cı iclasda bu mərhələləri müzakirə etdi və 65 təşkilatın layihəsinin maliyyələşməsilə bağlı qərar qəbul etdi".

   F.Qurbanovun açıqlamasından o da məlum oldu ki, qalib təşkilatların siyahısı şuranın internet səhifəsində yerləşdirilib: "Həm şuranın rəsmi saytında, həm də QHTXƏBƏR.AZ saytında yerləşdirilib. Bir məqamı da vurğulayım ki, yardım fondunun vəsaiti 175 min manatdan ibarət idi. QHT-lər tərəfindən istənilən məbləğ isə 1 milyon 500 min manata yaxın idi. Bununla belə, şura müsabiqə fonduna, özünün sərbəst fondundan əlavə olaraq, 78 min manat ayırmaq məcburiyyətində qaldı. Bununla da 65 layihəyə 253 min manat vəsait ayrıldı. Maliyyələşən layihələr içərisində yalnız bir təşkilat maksimum 6 min manat aldı. Çünki həmin təşkilat beynəlxaq televiziyalar vasitəsilə ölkə həqiqətlərinin dünya ictimaiyyətinə çatdırılmasını həyata keçirəcək. Digər az sayda layihəyə 5 min manat ayrıldı. Əksər layihələr 4000-4500, 3000-3500 manat civarında maliyyələşən layihələrdir. Bu o demək idi ki, çox böyük rəqabət var idi və hər 9-10 təşkilatın layihəsindən biri maliyyələşməli idi. Qərar qəbul olunarkən şura ekspert rəylərini və həmin təşkilatın təcrübəsini, potensialını nəzərə alaraq 65 təşkilatın layihəsinə dəstək verməklə bağlı qərar verildi".