Seçki günü yaxınlaşdıqca, partiyalar arasında namizədlərin müəyyənləşməsi prosesi də sona çatmaq üzrədir. Srağagün Müsavat Partiyası və Demokratiya Uğrunda İttifaqa(DUİ) daxil olan partiyaların-Klassik Xalq Cəbhəsi Partiyası, Azadlıq Partiyası, Böyük Azərbaycan Partiyası, Azərbaycan Xalq Partiyası, Milli Qurtuluş Partiyası bir sıra seçki dairələrində razılaşma əldə olunması ilə əlaqədar birgə bəyanat yayıb.

   Müsavat Partiyasının başqanı İsa Qəmbər və DUİ tərəfdən Klassik Xalq Cəbhəsi Partiyasının(KXCP) sədri Mirmahmud Mirəlioğlunun imzaladığı bəyanatda o da göstərilir ki, tərəflər razılığa gələrək, zərurət yaranacağı təqdirdə, seçki dairələri üzrə vahid namizədlərin müəyyən edilməsini davam etdirəcək. Bu iki təşkilat arasında 2010-cu ilin aprel ayında imzalanmış protokola uyğun olaraq, Müsavat Partiyası və DUİ-yə daxil olan partiyalar seçki kampaniyası dövründə də siyasi məsləhətləşmələri davam etdirmək, seçki pozuntularına və saxtakarlıqlara qarşı birgə mübarizə aparmaq, seçki prosesini birgə müşahidə etmək, seçkilərin nəticələrinə vahid qiymət vermək istiqamətində əməkdaşlığı davam etdirəcəklərini bəyan edib.

   Razılaşdırılmış seçki dairələrinin (SD) siyahısı isə belədir:

   DUİ-nin namizədləri:

   7 saylı Ordubad-Culfa SD-İlqar Səidoğlu

   9 saylı Binəqədi II SD-Elşad Musayev

   11 saylı Qaradağ SD-Bəybala Əbil

   18 saylı Nərimanov-Nizami SD-Əhməd Oruc

   22 saylı Nəsimi II SD-Pənah Hüseyn

   42 saylı Sumqayıt II SD -Mirmahmud Mirəlioğlu

   63 saylı Sabirabad I SD-Qiyas Sadıxlı

   Müsavat Partiyasının namizədləri:

   8 saylı Binəqədi I SD-Arzu Səmədbəyli

   15 saylı Yasamal I SD-İsa Qəmbər

   25 saylı Nizami II SD-Rauf Arifoğlu

   26 saylı Sabunçu I SD-Tofiq Yaqublu

   29 saylı Səbail SD-Mehman Cavadoğlu

   34 saylı Xətai II SD-Nəsib Nəsibli

   41 saylı Sumqayıt I SD-İkram İsrafil

   43 saylı Sumqayıt III SD-Sülhəddin Əkbər

   79 saylı İmişli SD-İltizam Əkbərli

   113 saylı Şəki şəhər SD-Hikmət Hacızadə

   115 saylı Şəki kənd SD-Adil Qeybulla

   Siyahıdan göründüyü kimi, Müsavat DUİ-nin 7, ikincilər isə birincinin 11 namizədini dəstəkləmək öhdəliyi götürüb.

   Qeyd edək ki, Müsavatın bundan başqa, AXCP ilə də qarşılıqlı öhdəliyi var. Onlar seçki bloku yaratmaq istiqamətində fəaliyyət göstərir. Artıq Müsavatla AXCP 70-ə yaxın dairədə vahid namizədlərini razılaşdırıb. 30-a yaxın dairə isə mübahisəlidir ki, bunların da hazırda 10-da razılığa gəlmək olduqca müşküldür. Həmin 10 dairə əsasən paytaxta və Sumqayıta düşür və buradan namizəd olanlar hər iki partiyada rəhbər strukturlarda təmsil olunanlardır. Müsavatla DUİ arasında bəzi dairələrdə bir-birinin namizədini müdafiə etmək barədə məsələ hələ xeyli əvvəl qalxmışdı. Bu isə Müsavatla blok yaratmaq ərəfəsində olan AXCP-ni heç də qane etmirdi. Belə ki, cəbhəçilər blok tərəfdaşı ilə DUİ arasında bağlanan sazişin onlara aidiyyəti olmadığını, ikincilərin razılaşdığı namizədləri AXCP-nin dəstəkləməyəcəyini dəfələrlə bəyan etmişdilər. Onu da qeyd edək ki, həmin ərəfədə Müsavatın DUİ-dəki dəstəkləyəcəyi namizədlərin sayı bəlli olsa da, onların konkret hansı dairələr üzrə olduğu bəlli deyildi. Hətta bir ara AXCP-də şübhə yaranmışdı ki, Müsavat cəbhəçilərin marağında olan bəzi əsas dairələrdə DUİ-dən olan namizədləri dəstəkləyəcək. Belədə isə hər iki cəbhədə Müsavatın bir sıra dairələr üzrə verdiyi vədin üstündə dayanmayacağı şübhələri formalaşdı. Artıq Müsavatın dəstəkləyəcəyi DUİ namizədlərinin siyahısı ortalıqdadır. Belədə maraqlıdır, görəsən bu siyahı AXCP-nin Müsavatla razılaşdırmaq istədiyi və ya razılaşdırdığı dairələrlə toqquşmur ki? Ümumiyyətlə, DUİ ilə bağlı açıqlanan siyahı AXCP-nin Müsavatla əməkdaşlığına mənfi mənada hər hansı təsir göstərə bilərmi?

   AXCP sədrinin müavini Razi Nurullayev bunu gözləmir: "Bildiyiniz kimi, Müsavatın hansı mövqe tutmasından asılı olmayaraq, təşkilatımız DUİ-nin namizədlərini dəstəkləmir. Ona görə də sadaladığınız həmin dairələr üzrə bizim partiyanın öz namizədləri var. Artıq bu namizədlərimiz dəqiqləşib. Onlardan biri 9 saylı Binəqədi dairəsindən Şahvələd Çobanoğludur. 18 saylı Nərimanov-Nizami dairəsindən isə sədr müavini Nurəddin Məmmədlidir. Müsavatla razılığımıza əsasən, DUİ-nin bizə aidiyyəti olmadığından, onlar həmin dairələrdən namizəd irəli sürmür. Eyni zamanda, DUİ-ilə razılığa əsasən onların namizədlərini dəstəkləyir və bu bizə problem yaratmır. Belədə bizim həmin dairədən namizəd irəli sürməyimiz də Müsavat üçün problem yaratmır. Çünki "niyyət protokolu" DUİ ilə Müsavat arasında imzalanıb. Həmin protokolun AXCP-yə dəxli olmadığından, biz sözügedən dairələrdən öz namizədlərimizlə çıxış edəcəyik. Müsavat Partiyasının da buna etirazı yoxdur. Eyni zamanda, bizim Müsavatın DUİ ilə olan razılaşmasına da etirazımız yoxdur. Sadəcə olaraq, düşünürəm ki, Pənah Hüseynlə Mirmahmud Mirəlioğlunun namizəd olduğu dairələr üzrə müəyyən razılığa gəlmək olar. Yəqin ki, həmin dairələr nəzərə alına bilər. Hələlik bunu dəqiq deyə bilmərəm. Digər 5 dairə üzrə isə nəzərə alınmaq şansı sıfıra bərabərdir. Bu məqam əməkdaşlıq etdiyimiz Müsavat Partiyası ilə heç bir narazılığa səbəb olmayacaq. Ola bilsin, müəyyən mənada narazılıq yaransın, amma bunun yaradacağımız bloka heç bir aidiyyəti yoxdur. Çünki bizim DUİ ilə heç bir razılığımız yoxdur".