Azərbaycan prezidentinin pensiyaların baza hissəsinin 13,3% artırılaraq 75 manatdan 85 manata yüksəldilməsi barədə verdiyi sərəncamdan 1 291 200 nəfərə yaxın pensiyaçı yararlanacaq.

   "APA-ECONOMICS"in məlumatına görə, Dövlət Sosial Müdafiə Fondunun (DSMF) sədri Səlim Müslümov deyib ki, bu ilin iyul ayının 1-ə olan məlumata əsasən, Azərbaycanda pensiyaçıların sayı 1 291 139 nəfərdir. İlin sonunadək pensiyaçıların sayının 1 291 308 nəfərə çatacağı gözlənir.

   DSMF sədri qeyd edib ki, 1 mln. 116 min nəfərin pensiyasının baza hissəsi 10 manat, 15 min nəfər I qrup əlilin pensiyasının baza hissəsi 12 manat artacaq. Bundan əlavə, pensiyasının baza hissəsini 200% həcmində alan 7630 nəfər I qrup gözdən əlilin pensiyasının baza hissəsində artım 20, pensiyasının baza hissəsini 55% həcmində alan III qrup əlillərdə pensiyanın baza hissəsinin artımı daha az - 5 manat 50 qəpikdir.

   S.Müslümov bildirib ki, ailə başçısını itirməyə görə iki və daha çox ailə üzvü pensiya alırsa, I ailə üzvünə pensiyanın baza hissəsinin 100%, digər ailə üzvlərinə isə yalnız (yalnız hər iki valideyni itirmiş yetim uşaqlar istisna olmaqla, onlara 100% ödənilir) 50% həcmində ödənildiyi üçün onların pensiyasının baza hissəsində 5 manat artım olacaq. Belə şəxslərin sayı 87 min 675 nəfərdir.

   Fond sədrinin sözlərinə görə, bu artımların daha çox şamil olunacağı kateqoriyadan olan vəfat və həlak olmuş Azərbaycan Milli Qəhrəmanlarının ailə üzvlərinin pensiyasının baza hissəsi 20 manat artıb: "Hazırda belə pensiya alanların sayı 78 nəfərdir. Onların pensiyasının baza hissəsi hər bir ailə üzvü üçün 150 manatdan 170 manata qaldırıldı. 19 min nəfərdən çox şəhid ailə üzvü bu gün pensiya alır.

   Onların da pensiyasının baza hissəsi 18 manat 50 qəpik artırılıb. Böyük Vətən Müharibəsi əlilləri istisna olmaqla, I qrup müharibə əlilləri üçün artım 20 manat, II qrup müharibə əlillərində 17 manat, III qrup müharibə əlillərində 15 manat təşkil edəcək".

   S.Müslümov bildirib ki, 2010-cu ilin sonunadək bu pensiyaların maliyyələşdirilməsi üçün əlavə 50 mln. manat vəsait tələb olunur.

   Pensiyaların maliyyələşdirilməsində heç bir problem yaranmayacaq. Artımların yaxın gələcəkdə də davam edəcəyini söyləyən S.Müslümov qeyd edib ki, bu artımdan sonra Azərbaycanda əmək pensiyalarının baza hissəsi 106 dollara çatıb.