İyulun 28-də Ağır Cinayətlərə Dair İşlər üzrə Məhkəmədə Azərbaycanda partlayışlar törətməyə cəhddə təqsirləndirilən dəstənin məhkəməsinə hazırlıq iclası keçirilib. İş hakim Tamella Nəsrullayevanın icraatındadır. Hazırlıq iclasında ilkin məhkəmə baxışı avqustun 4-nə təyin edilib.

   Məhkəmə qarşısında Samir Nuriyev, Rəfail Muğumov, Yaşar Qurbanov, Roza Namazova, Xavər Namazova, İsmayıl Pənahov, Bella Pənahova, Rusiya vətəndaşı Elbert Qayrbiyev dayanacaq. İbtidai istintaq tərəfindən tərtib olunmuş ittiham aktında göstərilir ki, dəstə üzvləri Gürcüstan ərazisindən gizli yolla Azərbaycana külli miqdarda odlu silah, onun komplekt hissələrini, döyüş sursatı, partlayıcı maddələr və qurğular keçirib.

   Bundan başqa, istintaq materiallarında adı dəstənin rəhbəri kimi qeyd olunan, ölkədən kənarda olduğu ehtimal edilən Aqil Namazov bu il yanvarın 6-da Camal adlı şəxs vasitəsilə Balakən rayonunun Gülüzambinə kəndinin yaxınlığına qaçaq yolla külli miqdarda döyüş sursatı, partlayıcı maddələr və odlu silahlar göndərib.

   Rəfail Muğumov həmin silah-sursatı Camaldan qəbul edərək rayonun Gərəkli kəndindəki evində gizlədib. Sonradan isə Aqil Namazovun tapşırığı ilə həmin silah-sursatı sərnişin avtobusu ilə Bakıya gətirib və Keşlə qəsəbəsində Samir Nuriyevə çatdırıb.

   Samir Nuriyev həmin silah-sursatı və partlayıcı maddələri Aqil Namazovun tapşırığı ilə xalası Roza Namazovanın yaşadığı ünvanda sonuncuya verib. Bir müddət sonra Aqil Namazovun qayınanası Bella Pənahova və qaynı İsmayıl Pənahov Roza Namazovanın yaşadığı evə gələrək silah-sursatı ondan götürüb. Bella Pənahovanın işlədiyi Xətai rayonunda yerləşən uşaq bağçasının damında gizlədiblər.

   Daha bir müddət sonra isə Bella Pənahova silah-sursatı bağçanın damından yığışdıraraq Aqil Namazovun anası Xavər Namazovaya çatdırıb. Xavər Namazova isə silah-sursat bağlamasını Xətai rayonunun ərazisində fəaliyyət göstərən, özünün də biologiya fənni üzrə müəllim işlədiyi orta məktəbin həyətindəki daşlıqların altında gizlədib.

   Gürcüstandan Azərbaycana eyni yolla növbəti dəfə keçirilən silah-sursat isə bu il yanvarın 15-də Balakən rayonunun Gülüzambinə kəndi yaxınlığında dəstə üzvü Yaşar Qurbanova verilib. Yaşar Qurbanov həmin silahları Bakı şəhərinə gətirib, bir hissəsini özündə saxlayıb, qalan hissəsini isə burada fəaliyyət göstərən "Salam" Çeçen Əlillər Cəmiyyətinin sədri Elbert Qayrbiyevə çatdırıb.

   Dəstə 2010-cu il martın 16-da Milli Təhlükəsizlik Nazirliyinin əməkdaşları tərəfindən zərərsizləşdirilib.

   Rəfail Muğumov istintaqa ifadəsində deyib ki, silah-sursatın Azərbaycan ərazisinə keçirilməsində məqsəd cihad etmək, insanların kütləvi toplaşdığı yerlərdə partlayışlar törətmək olub.

   İşdə adı hallanan Camal adlı şəxsin kimliyi müəyyən edilməyib və ittiham aktında göstərilir ki, hazırda istintaq orqanı onun şəxsiyyətini araşdırır.