Azərbaycan Əmək və Əhalinin Sosial Müdafiəsi Nazirliyində ilk dəfə olaraq, yerli mərkəzlərlə canlı əlaqə saxlamaq üçün videobağlantı sistemi yaradılıb.

   APA-nın məlumatına görə, ƏƏSMN-in mətbuat xidmətinin rəhbəri Elnur Kələntərli jurnalistlərə açıqlamasında deyib ki, əvvəllər nazirliyin əməkdaşları məsələləri araşdırmaq üçün rayonlara ezam olunurdu. Bu, vaxt itkisi yaradaraq problemlərin operativ həllinə imkan vermirdi. Yeni sistemin tətbiqi sayəsində isə ƏƏSMN işçiləri artıq işdən ayrılmadan nazirliyin yerli strukturları ilə əlaqə yarada biləcək. Hazırda belə videokonfranslar Gəncə və Göyçayın yerli mərkəzlərilə təşkil olunur. Artıq Naxçıvan Muxtar Respublikasında da bu sistem yaradılıb. Gələcəkdə isə respublikanın bütün rayon və şəhər mərkəzlərində bu yenilik tətbiq ediləcək. E.Kələntərli bildirib ki, nazirlik vətəndaşları da videokonfranslara dəvət etməyi nəzərdə tutur: "Əhaliyə ünvanlı sosial yardımların verilməsi, əlillik dərəcələrinin təyini, xaricdə müalicə, Qarabağ müharibəsi əlillərinə və şəhid ailələrinə mənzillərin paylanılması, avtomobillərin verilməsi kimi məsələlərdə bəzi problemlər yaranır. Vətəndaşlar bu problemləri həll etmək üçün uzaq rayonlardan Bakıya gəlməli olur. Videobağlantı sistemi rayonlarda tətbiq ediləndən sonra gələcəkdə belə videokonfranslar vasitəsilə vətəndaşların problemləri onlarla birgə araşdırılacaq. Bu, işlərin operativ həllinə imkan verəcək".

   Nazirlik ünvanlı sosial yardımların verilməsi prosesində ciddi nöqsanlara yol verdiyinə görə 40 nəfər məsul işçisini cəzalandırıb. APA-nın məlumatına görə, bunu ƏƏSMN-in şöbə müdiri Natiq Qasımov bildirib.

   N.Qasımovun sözlərinə görə, rayon və şəhər Əhalinin Sosial Müdafiəsi Mərkəzlərinin işçilərindən 2 nəfər tutduğu vəzifədən azad edilib, 1 nəfər aşağı vəzifəyə keçirilib, 3 nəfərin ixtisas dərəcəsi bir pillə aşağı salınıb, 8 nəfərin vəzifə maaşı 6 ay müddətinə aşağı salınıb, 23 nəfərə töhmət verilib və 3 nəfərin nəzərinə çatdırılıb.

   N.Qasımov deyib ki, işdə yol verdiyi ciddi nöqsanlara görə Beyləqan rayon Əhalinin Sosial Müdafiəsi Mərkəzinin müdiri işdən azad edilib.

   Əmək və Əhalinin Sosial Müdafiəsi Nazirliyi ünvanlı sosial yardımın verilməsi prosesində yeniliklər həyata keçirəcək. APA-nın məlumatına görə, bu barədə, ƏƏSMN-in şöbə müdiri Natiq Qasımov dünən ünvanlı sosial yardımlara həsr edilən tədbirdə deyib.

   Onun sözlərinə görə, gələn ildən aztəminatlı ailələrə sosial xidmətin göstərilməsi, məşğulluğun artırılması, yardımların daha effektiv xərclənməsinə şəraitin yaradılması məqsədilə vətəndaşlarla sosial müqavilələrin bağlanması nəzərdə tutulur. Eyni zamanda, yardımların verilmə prosesində də yeniliklər olacaq. Məqsəd ailələrin yoxsulluğuna təsir edən amilləri aradan qaldırmaqla tədricən özünütəminetməyə şərait yaratmaqdır. Bunlardan əlavə, Dünya Bankının tövsiyəsilə 2 pilot rayonda - Quba və İsmayıllıda özünütəminetmə proqram layihəsinin 1 il müddətinə sınaqdan keçirilməsi planlaşdırılır. N.Qasımov deyib ki, gələn ildən pilot rayonlarda ailələrə bir il üçün nəzərdə tutulan ünvanlı sosial yardım əvvəlcədən veriləcək. Bunun üçün ailələr nazirliyə biznes planlarını təqdim etməlidir.

   Qeyd edək ki, tədbirdə Gəncə və Ağstafa Əhalinin Sosial Müdafiə mərkəzlərilə ünvanlı sosial yardımların verilməsi prosesilə bağlı canlı bağlantı olub.