Bir gözəl deyim var ki, onu da həmişə qulağımızda sırğa edib saxlamışıq. Bu gün də "su həyat mənbəyidir" deyib, elə bu mənbənin üzərində dayanırıq. Ancaq təəssüfləndirici haldır ki, əksər vaxtlar örnək dolu kəlamları "qulaqardına" vurub işləri istədiyimiz məcraya yönəldirik.

   Elə bizim ayrı-ayrı dövlət strukturlarında çalışan bəzi səlahiyyət sahibləri kimi. Deyəsən, bu dəfə iş onların istədiyi məcraya deyil, əks səmtə yönəlib ki, bütün gizli "paxırlar" üzə çıxıb. Lap elə Sumqayıt şəhər 9-cu mikrorayon sakinlərinin şikayətləri kimi.

   Beləliklə, ölkənin 3 ən böyük şəhərindən biri olan Sumqayıtın 9-cu mikrorayon ərazisində yerləşən "Şərq" bazarına yaxın hissəsində su gölməçələri, az qalıb ki, Kür çayı kimi kükrəyib daşsın. İş orasındadır ki, yaşayış binalarına içməli su nəql olunan böyük diametrli boru xətti 2009-cu il dekabrın 29-dan deşilib və bunun nəticəsində yüksək təzyiqlə gedən suyun bir hissəsi ətrafdakı obyektlərin ərazisinə və yaxınlıqdakı küçəyə axaraq bütün qış boyu ərazidəki küçədə çoxsaylı gölməçələr, palçıq əmələ gətirib. Artıq 7 aya yaxındır davam edən bu acınacaqlı vəziyyət həm piyadalar, həm də avtomobil sahibləri üçün əlavə problem, narahatlıq yaradır. Bundan başqa, ərazidə suyun yaratdığı çirkab, üfunətli qoxu az qalıb sakinlərin canına malyariya xəstəliyi salsın. Kanalizasiya sisteminin işləməməsi isə problemi daha dözülməz həddə çatdırıb.

   Qeyd edək ki, bizdə, ümumiyyətlə, kanalizasiya sistemi düzgün qrulmadığından, yollar isə bir qayda olaraq normativə uyğun çəkilmədiyindən bu ərazi, bir çox başqa yerlər kimi, yağışdan sonra keçilməz vəziyyətə düşür. Ətrafda yaşayan sakinlərin, fəaliyyət göstərən ticarətçilərin dediyinə görə, qəza yerinə bir dəfə əlaqədar təşkilatlardan, konkret olaraq su istismarı idarəsinin məsul işçiləri, fəhlələri gəlsələr də, məsələ həllini tapmayıb. Şahidlərin dediyinə görə, boru ətrafında qazıntı işləri aparılaraq, borunun təmirinə cəhd edilib. Ancaq cəhd uğursuz olub və bu da təbiidir. Çünki boruya sadəcə olaraq çiv-taxta-kol vurmaqla problemi həll etmək mümkün deyil.

   Aydındır ki, boru bir neçə yerdən deşildiyindən, müvafiq hissəsi bütövlükdə dəyişdirilməlidir və bu da aidiyyəti idarədən həm daha ciddi münasibət, həm də müəyyən vəsait tələb edir. Hər bir halda, artıq məşhur olmuş borunun təmiri, sakinlərin deyil, müvafiq qurumların işidir.

   əhalinin suya olan borcunun su idarəsi tərəfindən inadla tələb olunması fonunda milli sərvət olan suya qarşı belə israfçı münasibət başadüşülən deyil. Acınacaqlı və təhlükəli məqam odur ki, adıçəkilən ərazidən həm də yüksək gərginlikli elektrik xətləri, kabellər keçir.

   Ərazidə fəaliyyət göstərən sahibkarlar onu da bildirir ki, dəfələrlə bu barədə müvafiq orqanlara müraciət etmələrinə baxmayaraq, hələ ki, aidiyyəti orqanlar müsbət nəticə verəcək addım atmayıblar. Əvəzində cavab olaraq sahibkarlara "pul verin düzəltdirək" təklifini irəli sürüblər. Yəni dövlət sturukturu olan Su Təsərrüfatı İdarəsinin görəcəyi iş sahibkarların üzərinə atılıb. Onlar da mövcud problemin qanun çərçivəsində həll olunmasını istəyir. Qeyd edək ki, borunun təmir olunması üçün sahibkarlardan heç də az vəsait tələb olunmayıb.

   Şikayətçilər içməli suyun aylardır boş-boşuna küçələrə axmasından, israfçılıqdan ürək dolusu danışdılar. Bunun əlaqədar təşkilatlar tərəfindən bilindiyini isə xüsusi vurğuladılar. Ümid edirik, bu yazıdan sonra Sumqayıt şəhərinin müvafiq qurumları məsələnin həlli istiqamətində müəyyən addımlar atacaq. Şikayətçilərin, sahibkarların su arzusunu ürəyində qoymayacaq.