Argentina milli komandasının baş məşqçisi, əfsanəvi futbolçu Diyeqo Armando Maradona öz postunu tərk edir. Lent.az-ın İTAR-TASS agentliyinə istinadən verdiyi məlumata görə, bunu Argentina Futbol Federasiyasının təmsilçisi Ernesto Çerkis Bialo söyləyib.
   O bildirib ki, Argentina Futbol Federasiyasının İcraiyyə Komitəsi Maradona ilə müqavilənin müddətini uzatmamaq barədə qərar verib. Argentina yığmasının baş məşqçisi postunu müvəqqəti olaraq gənclərdən ibarət yığmanın baş məşqçisi Serxio Batista tutacaq.
   Yığmanın baş məşqçisi postuna namizədlər arasında "Estudiantes" komandasının baş məşqçisi Alexandro Sabelya və "San-Lorenso" komandasının baş məşqçisi Ramon Diasın adları çəkilir.

"Araz Abdullayevinin "Everton"a keçidini həll etmişik. Yəni, bu məsələnin xırdalıqları bizim tərəfimizdən yerinə yetirilib.
   Hətta Araz "Everton"da tibbi müayinədən də keçib. İndi "Everton" rəsmilərinin səfərini gözləyirik". Fanat.az xəbər verir ki, bu sözləri "Neftçi" futbol klubunun prezidenti Sadıq Sadıqov deyib. "Futbolumuzun inkişafı, Arazın daha da püxtələşməsi üçün onu İngiltərə klubuna göndərə bilərik. Amma gərək "Everton" rəhbərliyi bu məsələnin üstünə düşsün və nümayəndələrini Bakıya göndərsin. Ancaq hələ də onlardan xəbər yoxdur",- deyə klub prezidenti əlavə edib.

Türkiyənin "Qalatasaray" klubunun sabiq futbolçusu George Popesku vətəni Rumıniyada biznes fəaliyyətinə başlayıb. Lent.az-ın "Sabah" qəzetinə istinadən verdiyi məlumata görə, Popesku Rumıniyanın paytaxtı Buxarestin ən böyük ticarət mərkəzlərindən birinin inşasına başlayıb.
   O, şəhərin Rahova məhəlləsində tikiləcək "Doldora Bazaar"ın ərsəyə gəlməsi üçün 10 milyon avro sərmayə qoyacaq. Bu məbləği Popeskuya Türkiyənin "Garanti" bankı kredit formasında verib. Ticarət mərkəzində 2000 nəfər işlə təmin olunacaq. Mərkəzdə xüsusən tekstil və geyim əşyaları satışa çıxarılacaq. Obyektin 12 min kvadratmetr ərazisində 200 avtomobillik park da olacaq.
   Popesku "Doldora Bazaar"ın ardından 25 milyon avroya otel tikmək istədiyini də söyləyib. Hələlik 41 yaşlı futbol ulduzunun Buxarestdə sənət əsərləri qalereyası var.
   Qeyd edək ki, George Popesku "Qalatasaray"da 1997 - 2001-ci illərdə çıxış edib. "Sarı qırmızılar"ın heyətində 122 matçda 9 qol vuran Popesku 3 dəfə Türkiyə çempionluğu, iki dəfə ölkə kuboku, eləcə də UEFA Kuboku və Superkubokunu qazanıb. O, karyerasına 2003-cü ildə son qoyub.

İspaniyanın "Real" komandasının sabiq kapitanı Raul Qonsales Almaniyanın "Şalke-04" futbol klubu ilə müqavilə bağlayıb. Lent.az-ın Gelzenkirhen klubunun rəsmi saytına istinadən verdiyi məlumata görə, 33 yaşlı hücumçu ilə 2 illik anlaşma əldə edilib.
   Raul son 16 ildə çıxış etdiyi "Real"ı iyulun 16-da tərk edib. Onun şərəfinə "Santyaqo Bernabeu" stadionunda yolasalma mərasimi təşkil olunub. "Kral klubu"nda 1994-cü ildən çıxış edən forvard oynadığı qarşılaşmaların (740) və vurduğu qolların sayında (323) rekordçu, 6 dəfə İspaniya çempionu, 4 dəfə ölkə Superkubokunun, 3 dəfə Çempionlar Liqasının, 2 dəfə Qitələrarası Kubokun, 1 dəfə isə UEFA Superkubokunun sahibi olub. "Şalke-04" isə 2009-2010-cu il mövsümündə Almaniya vitse-çempionu olaraq, Çempionlar Liqasının qrup mərhələsində iştirak hüququna yiyələnib. Qeyd edək ki, "Real" iyulun 26-da təkcə Raul Qonsaleslə yox, 1995-ci ildən komandada çıxış edən Quti Hernandeslə də vidalaşıb. Quti Türkiyə "Beşiktaş"ı ilə 2 illik müqavilə bağlayıb.
   

Futbol üzrə son Rusiya çempionu olan "Rubin" klubu "Qalatasaray"ın braziliyalı üzvü Elano ilə maraqlanır. Kazan klubu 29 yaşlı futbolçu üçün 9 milyon avrosundan keçməyə hazırdır. Elano "Rubin" klubuna transfer olunarsa, illik 3,5 milyon avro məvacib alacaq. Xatırladaq ki, Elano Türkiyənin "Qalatasaray" klubuna "Mançester Siti" kollektivindən transfer olunmuşdu.
   

Hazırda Rusiyanın "Rubin" komandasının formasını geyinən Türkiyə millisinin sabiq hücumçusu Fatih Təkkə klub alır. Apasport.az saytının xəbərinə görə, 32 yaşlı futbolçu ən yaxın dostu - milyonçu Muzaffer Bilazerlə birlikdə Türkiyə II Liqasında mübarizə aparan "Erzurumspor"un səhmlər paketinə yiyələnmək istəyir. Türkiyə mətbuatında yer alan xəbərə əsasən, artıq sənədləşmə işlərinə start verilib. Ötən il "Zenit"dən transfer olunan Təkkə "Rubin"in heyətində Premyer Liqada cəmi 5 qarşılaşmada forma geyinib.
   Qeyd edək ki, "Erzurumspor" azərbaycanlı futbolsevərlər üçün yad komanda deyil. Belə ki, 1999-2000-ci il mövsümündə Türkiyə klubunu mərhum məşqçi Ruslan Abdullayev çalışdırıb.

Türkiyənin "Qalatasaray" klubu yeni formalarını "Qalatsaray TV" vasitəsilə təqdim edib.
   Klub bunun üçün manekenlər və futbolçulardan istifadə etməyib. İstanbul klubu 2010-2011-ci il mövsümü üçün 4 yeni forma hazırlayıb. Onlardan 3-ü təqdim olunsa da, 1-inin təqdimatı sürpriz olaraq sonraya saxlanılıb.
   

"Barselona" tarixinin ən çətin dövrünü yaşayır. Apasport.az saytının məlumatına görə, klub rəsmisi Xavyer Faus Kataloniya komandasının 442 milyon avro borcunun olduğunu açıqlayıb.
   Yarandığı gündən bu qədər borcu olmayan klubun belə çətin vəziyyətə düşməsində isə sabiq prezident Xoan Laporta günahkar hesab edilir. Faus bildirib ki, "Barselona" iflasa uğramasa da gəlirləri azlıq təşkil edir: "Komandamızın iflasa uğramaq qorxusu yoxdur. Lakin klubun xərcləri gəlirlərindən çoxdur. 1 il əvvəl 445,5 milyon avro xeyir əldə edilsə də, bu il məbləğ 408,9 milyon avroya düşüb. Xərclər isə 1 ildə 50 milyon avro artıb".
   Qeyd edək ki, komandaya ən böyük ziyanı "Deloitte" firması vurub. Onlar "Barselona"nı bu il 77,1 milyon avro geri salıblar.
   

"İnter" və Madrid "Real"ı braziliyalı futbolçu Maykonun İspaniyaya transferi ilə bağlı anlaşma əldə edib. Fanat.az xəbər verir ki, bu barədə İtaliyanın "La Gazzetta dello Sport" və "Corriere della Sera" qəzetləri məlumat yayıb.
   İddialara görə, "İnter" 28 milyon avro qarşılığında futbolçusunu "Real"a satmağa razılıq verib. Xəbərdə qeyd edilir ki, artıq "Real" Maykonun keçidini həll edib və transfer 48 saat içində rəsmiləşəcək.
   Xəbərdə həmçinin bildirilir ki, Maykon 4 illik müqavilə çərçivəsində hər il üçün 6 milyon avro istəyib, lakin "Real"ın prezidenti braziliyalı futboçluya ildə 5,5 milyon avro maaş təklif edib. Tərəflər bu məsələdə anlaşan kimi rəsmi müqavilə imzalanacaq.
   

Dünya çempionatının final mərhələsində keçirdiyi hər üç oyunda məğlub olaraq, mundialı xalsız başa vuran Şimali Koreya yığmasının baş məşqçisi və futbolçuları hökumət tərəfindən danlanılıb.
   Fanat.az Free Asiya Radiosuna istinadən xəbər verir ki, bu günlərdə hökumət üzvlərinin iştirakı ilə paytaxt Pyonqyanqda millinin çıxışına həsr olunmuş toplantı keçirilib.
   Baş məşqçi Kim Yonq Hun və futbolçuların qatıldığı toplantıda milli üzvləri ciddi şəkildə tənqid edilib, hökumət üzvləri onları danlayıblar. Şimali Koreya mətbuatı isə bütün bunlarla bağlı bir cümlə belə xəbər yayımayıb.
   

Latviya yığma komandasının qapıçısı Denis Romanovs "Xəzər Lənkəran" klubuna keçib. Klubdan verilən məlumata görə, futbolçu klubla iki illik müqavilə imzalayıb. İmzalamadan qabaq futbolçu tibbi müayinədən keçib.
   Xatırladaq ki, 1978-ci il təvəllüdlü D.Romanovs bundan əvvəl Çexiyanın "Slaviya" komandasında forma geyinib. Futbolçu latış, rus, ingilis və çex dillərində danışır.