Kütləvi informasiya vasitələrinin əsas vəzifələrindən biri ana dilinin qayğısına qalmaq, onu təcavüzdən qorumaq, ondan yerli-yerində istifadə eləməkdir. Lakin çox zaman efirdə buna əməl edilmir. Xüsusən də bəzi özəl radiolarda dilimizə hörmət edilmir.
   Jarqon sözlərdən istifadə isə artıq o həddə çatıb ki, bir çox verilişlərdə aparıcılar bu ifadələrdən istifadə edir. Nədənsə, radio sahəsində çalışan həmkarlarımız yalnız gecə efirində deyil, gündüz də dinləyiciləri bəs deyincə jarqon sözlərə "qonaq" edir.
   Küçədə, bayırda işlənən elə sözlər, ifadələr var ki, biz onları heç məişətimizdə dilə gətirməyi özümüzə rəva görmürük. Amma radiolarda işləyənlər bunları işlətməkdən, dilə gətirməkdən yorulmur.
   Dünən səhər ANS ÇM radiosunu dinləyərkən bir söz diqqətimizi çəkdi. Aparıcı hansısa bir proqramda "geydirmədir" sözünü işlətdi. Tək bir televiziya yox, başqa teleradiolarda da belə faktlara rast gəlmək mümkündür. "Geydirmə" jarqon ifadədir və çox zaman onu evdə, ailə yanında dilə gətirmirik. Amma efirdən aparıcı bunu səsləndirir.
   Pedaqoji elmlər namizədi Allahverdi Eminov bizimlə söhbətində bildirdi ki, nəinki efiri, hətta bəzi qəzetləri də jarqon sözlər başına götürüb. A.Eminovun dediyinə görə, o dəfələrlə küçə sözlərini televiziya efirindən eşidib: "Yalnız ANS ÇM radiosu deyil, başqa radiolarda da, televiziyalarda da jarqon sözlərdən istifadə edilir. Bir aparıcının radiodan birbaşa "geydirmə" sözünü dilə gətirməsi yaxşı hal deyil. Bunu pisləyirəm. Ümumiyyətlə, jarqon sözlərin mətbuata gətirilməsinə yaxşı baxmıram. "Geydirmə" sözün etimologiyasına nəzər salsaq, pis məna verir. Bu şeyləri qəbul eləmirəm. Redaktorlar bu məsələyə xüsusi önəm verməlidir. Unutmaq lazım deyil ki, kütləvi informasiya vasitələri insanları maarifləndirməlidir. Ölkənin aparıcı qəzetlərində də kifayət qədər dil qüsurları, jarqon ifadələrə rast gəlinir. Xüsusən də köşə yazılarında. Yeni jurnalistlər mətbuata jarqon sözlər gətirir. Hesab edirlər ki, bu yaxşı haldır. Amma mən əksini düşünürəm. Dilimizin qayda və prinsiplərinə bütün KİV-lər əməl eləməlidir".
   A.Eminov hesab edir ki, KİV-də çalışan hər bir jurnalist, redaktor təqdim elədiyi sözün, ifadənin dərindən mənasına varmalı, yalnız bundan sonra onu ortalığa çıxarmalıdır.
   

Ərköyünlüyə adət eləmiş bəzi şou müğənniləri az-çox populyarlıqlarından istifadə edərək qanunları pozmağa vərdiş edib. Onlar bir qədər bərkə-boşa düşəndə, cəmiyyətin digər təbəqələrində təmsil olunan insanların haqlı iradı ilə qarşılaşanda isə çaşır. Bu adamlar heç bir kəsdən özlərinə təzyiqi qəbul etmək istəmir.
   Bir çox hallarda, şou-biznesçilərə elə elə gəlir ki, kimlərinsə gözü onların məşhurluğunu götürmür.
   Şou-biznesçilərin hərəsinin öz şəxsi avtomobili var. Maşınların əksəriyyətinin qiyməti isə 100-200 min manat dəyərindədir. Bu adamların çoxu istəyir ki, avtomobili özü idarə eləsin. Şou müğənnilərinin sükan arxasında əyləşməsi isə çox zaman qəzalara səbəb olur. Bu yaxınlarda Rəqsanənin qəza törətməsi çoxlarına məlumdur. Onun ardınca isə digər müğənni Ülviyyə Rəhimova avtomobilini aşırdı, nəticədə özü ağır bədən xəsarəti aldı, anası isə dünyasını dəyişdi. Şou müğənnilərin paytaxt küçələrində, eləcə də şəhərətrafı yerlərdə avtomobili çox böyük sürətlə idarə etdiyi bildirilir. Hətta çox zaman onların sükan arxasına içkili vəziyyətdə oturduğu da deyilir.
   Müğənnilər bəzən şikayət edirlər ki, Yol Polisinin əməkdaşları onları tez-tez cərimələyir. Onların sözündən belə çıxır ki, guya yol polisi bunu nahaqdan edir. Yol polislərinin qeyri-obyektivliyindən şikayətlənənlərdən biri də müğənni Zamiqdir. Zamiq mətbuata deyib ki, yol polisləri onu yaman incidir. Müğənninin sözlərinə görə, demək olar ki, hər gün o, yol polisinə cərimə ödəyir. Maraqlıdır ki, bu zaman Zamiq özünün qanunsuzluq etməsini, qəza vəziyyəti yaratmasını dilə gətirmir. Necə ola bilər ki, sürücü hər gün cərimə ödəsin, hər dəfə də günahkar yol polisi olsun?
   Zamiq onu yolda saxlayan "QAİ" işçilərinin hərəkətini pisləməklə yanaşı, bildirib ki, maşın qoşa ağ zolağın üstündən keçən kimi Yol polisi onu saxlayır. Yol polisinin şou müğənnilərini çox incitdiyini deyən Zamiq hesab edir ki, onlar səhnə adamı olduğu üçün bütün sahələrdə onlara güzəştlər edilməlidir. Yol polisinin də müğənnilərin vəziyyətini başa düşməli olduğunu bildirən Zamiqin sözlərinə görə, yalnız şou müğənniləri deyil, avtomobil sahiblərinin böyük əksəriyyəti şəhərdə normal maşın sürə bilmir.
   Başqa şou müğənniləri də yol polisindən narazıdır. Şou-biznesçilərə elə gəlir ki, "QAİ" işçiləri bütün vaxtlarda onların yol hərəkəti qaydalarını pozmasına göz yummalıdır. Onların sözündən belə çıxır ki, şou müğənnilərinin qanuna riayət eləməsi, törətdiyi qəzaya görə qarşılıq ödəməməsi keçərli olmalıdır. Şou əhli Azərbaycan qanunlarına həmişə sayğısızlıq göstərir. Məlumdur ki, onların çoxunun dövlətə kifayət qədər vergi borcu var. Bu adamlar vergi ödəmək əvəzinə fikirləşirlər ki, şou müğənnilərinin vergi borcları ləğv olunmalıdır. Çünki onlar şou müğənniləridir. Deyirlər ki, vergi sahəsində çalışanların, polislərin və başqa yerlərdə işləyənlərin şad günündə pulsuz oxuduqlarına görə onlara "yaşıl işıq" yandırılmalıdır. Şou əhli özünü yazıq görkəmdə təqdim eləmək istəsə də, buna heç kəs inanmaz. Çünki az qala bütün sahələrdə onlara, cüzi də olsa, güzəşt edilir. Yol polisləri deyir ki, şou müğənnilərini saxlayarkən yeri gələndə heç onlara cərimə də ödətdirmirlər. Amma bəzilərinin özlərini çox yekəxana, göydən aparması polisləri hiddətləndirir. Zamiqin şikayətinə gəlincə, yol polisləri deyir ki, yalnız o deyil, başqaları da avtomobilini saxlayanda polislərin üstünə hücüm çəkib "siz kimsiniz ki, məni saxlayırsınız? Heç bilirsiniz mən kiməm?" deyir. Yəni şou əhli öz kobudluğu, başqalarının peşəsini aşağılamaq niyyəti güddüyü üçün bu şəkildə cəzalandırılır. Yol Patrul Xidmətində çalışan tanışımızın dediyinə görə, şou əhlinin tərbiyəsizliyi onları cana doydurub. Hətta bəzi şou müğənnilərinin mənfi davranışı üzündən elə olub ki, onların maşını bir-iki günlük də olsa cərimə meydançasında qalıb. Yol Patrul Xidməti əməkdaşı onu da bildirdi ki, şou müğənniləri çox zaman içkili, hallı vəziyyətdə yaxalanır. Bu halda onlar polislərə dil töküb yalvarmaqla canını qurtarır. Gecələr şou müğənnilərinin çox pis maşın sürdüyünü deyən Xidmət əməkdaşının bildirdiyinə görə, onlar bəzən özlərini məmurlarla müqayisə edir. Yəni deyir ki, niyə filankəs bu yoldan keçəndə onun üçün yol boşaldılır, bizim üçün yox? Tanışımız dedi ki, artıq şou müğənnilərinin biabırçılığına, tərbiyəsiz davranışlarına, Azərbaycan qanunlarını saymamasına rəsmi qurumlar göz yummaq fikrində deyil. Onlar qarşısına tez bir zamanda şou müğənnilərinə bu və digər şəkildə öz hədlərini göstərmək məqsədi qoyub.