Tanınmamış Dağlıq Qarabağ Respublikasında 90-cı illərin əvvəllərindən bəri fəaliyyət göstərməyən hava nəqliyyatının işini bərpa etməyə hazırlaşırlar. Hazırda yeni hava limanı tikilməkdədir və onun oktyabr ayında hazır olacağı planlaşdırılır. Bu məqsədlə Mülki Aviasiya İdarəsi də yaradılıb.
   O da gözlənir ki, ermənilər Xocalı hava limanını da bərpa etsinlər. Həmin hava limanının işlək vəziyyətə gəlməsilə separtçı rejim Ermənistanla əlaqlərini gücləndirməyə və özü üçün beynəlxalq çıxış yaratmağa cəhd göstərir.
   Ümumiyyətlə, son dövrlər Ermənistanın Qarabağ siyasətində bir radikallaşma hiss olunur. Məsələn, Ermənistanın hakim Respublika Partiyasının üzvü, ölkə parlamentinin vitse-spikeri Samvel Nikoyan bildirib ki, İrəvan Dağlıq Qarabağı müstəqil qurum kimi tanıya bilər.
   O iddia edib ki, ATƏT-in Minsk Qrupunun bütün resursları tükənərsə, İrəvan bu prosesə start verə bilər.
   Lakin Ermənistan Milli Konqresinin koordinatoru Levon Zurabyan bildirib ki, İrəvanın hazırkı mərhələdə Dağlıq Qarabağın müstəqilliyini tanıması məqsədəuyğun deyil: "Hazırda Ermənistanın Dağlıq Qarabağın müstəqilliyini tanıması beynəlxalq ictimaiyyətdən əks reaksiya ala, nizamlanma prosesində İrəvanın mövqelərini xeyli zəiflədə bilər".
   Ermənistanın "İravnuk" qəzeti yazır ki, Serj Sarksiyan iqtidarının Qarabağ məsələsində fəallaşması onun hakimiyyəti itirmək qorxusundan irəli gəlir. Çünki erməni lobbisi Sarkisyanın Qarabağla bağlı siyasətindən açıq narazılıq ifadə edir və onun Azərbaycana güzəştə getdiyini düşünür. Bu səbəbdən Sarkisyan qarabağ məsələsində mövqeyinin dəyişmədiyini hər vəchlə nümayiş etdirməyə çalışır. Dağlıq Qarabağ separatçılarının lideri Bako Saakyanın bu fonda açıqlamaları da xüsusi diqqət çəkir. Onun sözlərinə görə, rəsmi bəyanatlarda erməni tərəfi qeyd edir ki, danışıqlarda Dağlıq Qarabağı təmsil edir: " Lakin onu da bildirir ki, Dağlıq Qarabağın iştirakı olmadan nizamlanma ilə bağlı qərar qəbul etmək mümkün deyil". Qarabağ separatçılarının lideri hesab edir ki, onlar danışıqlarda iştirak etsəydilər, ATƏT-in Minsk Qrupu daha böyük nəticələrə nail ola bilərdi.
   Ermənistanın sabiq xarici işlər naziri Aleksandr Arzumanyan Qarabağ probleminin həllində yaranmış dalandan yeganə çıxış yolunun Ermənistanda hakimiyyət dəyişikliyi olduğunu söyləyib. "Yeganə çıxış yolu prezidentin istefası, növbədənkənar seçki, güclü, legitim, xalqın dəstəyini almış hakimiyyətin formalaşdırılması, asayişin bərpasıdır. Yalnız bundan sonra Ermənistan beynəlxalq ictimaiyyətlə bir masa arxasına əyləşə və problemdən çıxış yollarını müzakirə edə bilər".
   Sabiq XİN başçısı bildirib ki, hazırda nəinki Dağlıq Qarabağ separaçtıları, hətta Ermənistanın özü danışıqlar prosesindən kənarda qalıb: "Bu hakimiyyət martın 1-də insanları qətlə yetirməklə hakimiyyəti qəsb edib. Onun danışıqlar prosesində nə Ermənistanı, nə Dağlıq Qarabağı, nə də ordunu təmsil etmək haqqı var".
   Türkiyənin Beynəlxalq Strateji Araşdırmalar Mərkəzinin (USAK) eksperti Reha Yılmaz isə bildirir ki,
   bu gün beynəlxalq ictimaiyyət problemin həlli üçün lazım olan təzyiqi etmədiyi kimi, siyasi təşəbbüsü də üzərinə götürmür: "Elə buna görə də münaqişə tərəfləri, məsələnin həllinə yaxınlaşmaq əvəzinə, ondan daha da uzaqlaşır. Ermənistan qlobal güclərin bölgədəki maraqlarını təmin etməklə hiyləbaz oyununu həyata keçirir. Azərbaycan isə beynəlxalq arenada haqq və ədalət axtarır. Məsələ burasındadır ki, Qarabağ probleminin həllində indiyə qədərki vəziyyət davam edərsə, bu, Azərbaycan üçün yaxşı nəticələr verməyə də bilər. Bu vəziyyətdə Azərbaycan bu gedişatı dəyişdirməli, fərqli ifadə ilə, öz yolunu özü müəyyən etməlidir".
   

BMT Beynəlxalq Məhkəməsinin (Haaqa Məhkəməsi) Kosovonun 2008-ci ildə Serbiyadan ayrılmaq haqqında birtərəfli bəyannaməsini qanuni hesab etməsi ciddi müzakirələrə yol açıb. Qeyd olunur ki, Kosovonun müstəqillik bəyannaməsinə legitimliyin verilməsi Şimali Kipr, Somali, Dağlıq Qarabağ, Cənubi Osetiya, Abxaziya və Dnestryanı kimi müxtəlif yerlərdə separatçı hərəkatlar tərəfindən presedent kimi istifadə oluna bilər.
   Beynəlxalq səviyyəli problemlərə, mübahisələrə baxan Haaqa Məhkəməsinin qərarlarında bəzi hallarda siyasi çalarların da olduğu bildirilir. Qeyd olunur ki, Haaqa Məhkəməsi, başda ABŞ olmaqla, Qərbin maraqlarını həyata keçirir.
   Qərbin Dağlıq Qarabağ münaqişəsilə bağlı mövqeyi birmənalı deyil və bəzi hallarda məsələyə ikili standartlarla yanaşırlar. Bu mənada mümkündür ki, Haaqa Məhkəməsi Dağlıq Qarabağla bağlı bura ünvanlanan müraciət əsasında qəti qərar verməsin. Amma bütün hallarda ekspertlər Azərbaycanın bu qurumla əməkdaşlığını vacib sayır.
   1991-ci ildə Ermənistan birtərəfli qaydada Dağlıq Qarabağın müstəqilliyini elan edib. Bu qərar Ermənistan səviyyəsində hələ də hüquqi qüvvədədir.
   Bu qərarın ləğvi üçün Azərbaycan Haaqa Məhkəməsinə müraciət edə bilərmi? Məsələ ilə bağlı müraciət etdiyimiz politoloq Zərdüşt Əlizadə hesab edir ki, Dağlıq Qarabağın müstəqilliyi heç bir ölkə tərəfindən tanınmır: "Bu məsələ ilə bağlı Azərbaycanın Haaqa Məhkəməsinə müraciət etməsinə ehtiyac yoxdur. Çünki Ermənistanın 1991-ci ildə çıxardığı qərarın heç bir hüquqi qüvvəsi yoxdur və ola da bilməz.
   Əvvəl-axır bu münaqişə öz həllini tapmalıdır. Çox güman ki, münaqişə Haaqa Məhkəməsi səviyyəsində həll olunmayacaq. Yeganə çıxış yolu iki ölkənin cəmiyyətində bir-birinə qarşı normal fikir formalaşdırmaqdır. Dağlıq Qarabağın müstəqilliyilə bağlı Ermənistan hökumətinin çıxardığı qərara bu ölkənin özündə də şübhə ilə yanaşırlar. O qərarı heç saya salan da yoxdur. Mən əminəm ki, Azərbaycan tərəfi həmin qərarın ləğvilə bağlı Haaqa Məhkəməsinə müraciət etsə, məsələ uzadılacaq və mücərrəd bir qərar veriləcək. Yaxşısı budur ki, heç bu məsələ qaldırılmasın".
   

ATƏT-in Demokratik Təsisatlar və İnsan Haqları Bürosu (ATƏT/ DTİHB) noyabrın 7-də Azərbaycanda keçiriləcək parlament seçkilərini müşahidə edəcək. APA-nın məlumatına görə, ATƏT/DTİHB Azərbaycanda seçkiləri izləmək üçün artıq müşahidəçilər qrupu formalaşdırmağa başlayıb, müşahidəçi yeri üzrə müsabiqə elan olunub.
   Gözlənir ki, ATƏT/DTİHB kampaniya və seçki hazırlıqlarını izləmək üçün 30 uzunmüddətli müşahidəçinin və seçki günü prosedurlarını, o cümlədən səsverməni, səslərin sayılması və nəticələrin protokollarının doldurulmasını izləmək üçün 450 qısamüddətli müşahidəçini Azərbaycana ezam edəcək.
   Xatırladaq ki, parlament seçkilərini müşahidə etmək üçün Azərbaycanın ATƏT-dəki Daimi Missiyasının dəvəti əsasında ATƏT/DTİHB 21-24 iyun tarixlərində Azərbaycanda Ehtiyacların Qiymətləndirilməsi Missiyasını (EQM) həyata keçirib. Seçki Departamentinin rəhbəri Nikolas Kajorovski və Baş Seçki Mütəxəssisi Conatan Stounstritdən ibarət missiya Bakıda hökumət orqanları, seçki administrasiyası, siyasi partiyalar, media, vətəndaş cəmiyyəti və diplomatik ictimaiyyətin nümayəndələrilə görüşlər keçirib.
   DTİHB-in Ehtiyacların Qiymətləndirilməsi Missiyasının iyulda dərc olunmuş hesabatında seçkiləri Müşahidə Missiyasının (SMM) tətbiqini tövsiyə olunur.
   Hesabatda deyilir ki, seçkilərin texniki təşkilini təkmilləşdirmək üçün tədbirlər görülsə də, seçkilərin demokratik mühitinin yaxşılaşdırılmasında müəyyən çətinliklər var. Xüsusilə, Bakının mərkəzində siyasi partiyaların müntəzəm olaraq toplaşmaq müraciətləri rədd edildiyindən, toplaşma azadlığı faktiki olaraq məhduddur. Azərbaycanda media azadlığı sahəsində müəyyən məhdudiyyətlərin olması demokratik seçki prosesinə xas olan ideyaların sərbəst ifadə edilməsi üçün əlverişli olmayan mühit yaradır: "2010-cu ilin iyun ayında Seçki Məcəlləsində mühüm düzəlişlər edilib. Düzəlişlərə əsasən, namizədlər üçün dövlət tərəfindən maliyyələşdirmə ləğv olunub, 2008-ci ilin iyun ayında aparılan düzəlişlərlə yarıya bölünmüş ümumi seçki müddəti, kampaniya dövrü də daxil olmaqla, daha da qısaldılıb. Belə ki, 2005-ci il parlament seçkilərindən etibarən seçki kampaniyası üçün əlverişli olan vaxt müddəti 60 gündən 23 günə salınıb. Rəsmi kampaniya dövrü yığıncaqlar və toplantılar keçirmək və kütləvi informasiya vasitələrində çıxış etmək imkanı nöqteyi-nəzərindən namizədlərə və partiyalara xüsusi hüquqlar verir. Seçkilər arasındakı müddətdə mülki və siyasi hüquqların icrası ilə bağlı mövcud maneələri nəzərə alaraq, Seçki Məcəlləsindəki son dəyişikliklər namizədlər və partiyaların öz fikirlərini seçicilərə çatdırmaq imkanını müəyyən qədər məhdudlaşdırır".
   

Azərbaycan qanunvericiliyi İnternetdə sosial şəbəkələrdə deputatlığa namizədlərin təşviqatının aparılmasını qadağan etmir.
   Bu barədə Seçkilərin Monitorinqi və Demokratiyanın Tədrisi Mərkəzinin (SMDT) hüquqşünası Azər Qasımov "Turan"-ın müxbirilə söhbətində Facebook və Twitter sosial şəbəkələrində vaxtından əvvəl seçkiqabağı təşviqatın qanunsuz olması barədə MSK katibi Natiq Məmmədovun bəyanatını şərh edərkən bildirib.
   Qasımovun sözlərinə görə, Seçki Məcəlləsinin 75.2-ci maddəsində seçkiqabağı təşviqatın səsvermə gününə 23 gün qalmış başlaması və səsverməyə 24 saat qalmış dayandırılması göstərilib. Bu da qeydə alınmış namizədin seçkiqabağı təşviqatını göstərir. Lakin Qanunvericilik rəsmi seçki kampaniyası başlayana qədər adamların öz planlarını açıqlamasını qadağan etmir.
   Bundan əlavə, 74.2-ci maddədə deyilir ki, təşviqat qanunla qadağan edilməyən digər üsullarla həyata keçirilə bilər. "Odur ki, gələcəkdə seçkilər dövründə belə İnternetdə sosial şəbəkələrdə təşviqatın aparılması qanunla qadağan edilmir" - -ekspert deyib.
   

Qərb dövlətləri tərəfindən sərt sanksiyalarla üzləşməkdə olan İran neft satışından əldə etdiyi gəlirlərin gələcək taleyi barədə ciddi narahatlıq keçirməkdədir. Rəsmi Tehran özünün neft və qaz pullarını indi Qrəb məkanından çıxararaq Asiya dövlətlərində saxlamaq üzərində genişmiqyaslı fəaliyyət planı hazırlayır.
   Gözlənir ki, qarşıdakı dövr ərzində İran öz pullarının bir hissəsini də Azərbaycanda saxlamaq üçün konkret addımlar atsın. Lakin İran həm də Azərbaycanda özəl bankların səhmlərini almaq, öz banklarının buradakı filiallarını genişləndirmək, təkcə Bakıda yox, Azərbaycan rayonlarında, xüsusən ölkənin cənub regionunda filiallarını yaratmağı düşünür.
   Bu barədə danışmazdan öncə qeyd edək ki, İran Mərkəzi Bankı bildirib ki, onlar potensial risqin mövcud olduğu bütün ölkələrdəki maliyyə vəsaitlərini daha təhlükəsiz yerlərə köçürəcəklər. Xatırladaq ki, BMT-nin ardınca Avropa Birliyi İrana qarşı yeni sanksiyalar paketini qəbul edib. Sanksiyalar, əsasən İranın strateji sahəsini - neft-qaz sektorunu hədəfə alır. Avropa Birliyi ölkələrinin İranın enerji sektoruna yatırım qoyması, bu ölkəyə texnologiya ötürməsi və texniki yardım göstərməsi yasaqlanır. Rəsmi Tehran isə ona qarşı sanksiyalar tətbiq edəcək ölkələrin banklarındakı pulları çıxaracaq. İran Mərkəzi Bankının sədr müavini Həmid Burhaninin dediyinə görə, onlar potensial risqin mövcud olduğu bütün ölkələrdəki maliyyə vəsaitlərini daha təhlükəsiz yerlərə köçürəcəklər: "Bu, yetərincə məntiqi qərardır".
   Britaniyanın "The Financial Times" qəzeti isə yazır ki, İran AB banklarındakı pulları Asiya banklarına köçürəcək. Qeyd olunduğu kimi isə, belə məkanlardan biri kimi Azərbaycanın seçiləcəyi gözlənir. Bundan əlavə, İran Azərbaycanda öz vəsaitini reallaşdırmaq üçün kommersiya banklarının nizamnamə kapitalında iştirak payı almaqda maraqlı olduğunu bəyan edib. Hələ ötən ay İranın Mərkəzi Bankı sədrinin birinci müavini Seyyid Həmid Purməhəmmədi də təsdiq edib ki, İran bank rəhbərləri bu işdə maraqlıdır və öz fikirlərini bildiriblər: "İran dövlətinin qanunları da buna icazə verir və biz, İran Mərkəzi Bankı olaraq, İran banklarına Azərbaycandakı kommersiya bankları ilə işləməyə lisenziya verək".
   Bununla yanaşı o da məlumdur ki, İran Milli Bankı Azərbaycanda fəaliyyətini genişləndirmək, iranlı tacirlər və investorlara daha yaxşı xidmət göstərmək məqsədilə bankın Azərbaycanın digər şəhərlərində, o cümlədən Astara və Biləsuvarda şöbələrinin açılması nəzərdə tutub. İran Milli Bankının məlumatına görə, sözügedən məsələ ilə bağlı Azərbaycan tərəfilə ilkin razılaşma artıq əldə olunub. O da məlumdur ki, İran hökumətinin Azərbaycanda açacağı banka ilkin olaraq yatıracağı sərmayənin miqdarı 50 milyon dollar olacaq.
   Bununla yanaşı, İran Azərbaycanda İslam bankçılığının inkişaf etdirilməsində də maraqlı tərəf kimi çıxış edir. Seyyid Həmid Purməhəmmədi bununla bağlı qeyd edib: "İran hər şeydən öncə öz bank sistemini islami qanunlara əsasən tənzimləyir. Bu da 70 il əvvəl iranlı alim Məhəmmədbaqir Sədrin İslam bankçılığı barədə yazdığı kitaba əsaslanır. Bizim İslam bankçılığı haqda kifayət qədər təcrübəmiz var və bu təcrübəni Azərbaycanlı qardaşlarımızla bölüşməyə hazırıq. Biz həm Azərbaycan bank sistemində işləyənləri İran Mərkəzi Bankına dəvət edirik, həm də özümüzdən bank sahəsində olan təcrübəli insanları qrup şəklində Azərbaycana göndərə bilərik. Beləliklə, iki ölkə arasında İslam bankçılıq sistemini inkişaf etdirə bilərik. Onu da qeyd edim ki, İranda bank sistemində işləyənlərin çoxu azərbaycanlıdır. Elə bilirəm ki, bu, əməkdaşlığımızın inkişafına daha da müsbət təsir göstərəcək".
   Qeyd edək ki, İranla Azərbaycan arasında beynəlxalq pulköçürmə əməliyyatlarının ümumi həcmi də artır və bu da Tehranın xüsusi maraq dairəsindədir. Çünki İran banklarının sanksiyalara məruz qalması fonunda Tehrana Azərbaycan vasitəsilə maliyyə əməliyyatlarının miqdarını genişləndirmək olduqca sərfəlidir. Hazırda İran Milli Bankı da sanksiyalara məruz qalan qurumlar sırasında yer alır. Bu banka qarşı sanksiyalar yalnız Tehrandakı baş ofisə deyil, həm də Azərbaycanda, İraqda, Çində, Fransada, Almaniyada, Omanda və BƏƏ-dəki filiallara da aid edilib. Bundan əlavə, sanksiyalar bankın törəmə strukturlarına tətbiq olunub. Onlar "Bank Melli Iran" QSC (Moskva), "Melli Bank" PLC (London), Tehrandakı "Bank Cargoshaee" və "Kabildəki Arian Bank" şirkətləridir.
   Azərbaycanda hazırda "Bank Melli"dən başqa digər İran bankları fəaliyyət göstərmir. Sanksiyalara görə ABŞ şirkətlərinin və fiziki şəxslərinin bu İran bankları və təşkilatları ilə olan istənilən əməliyyatları qadağan olunur. Onların ABŞ-ın yurisdiksiyası altında olan bütün aktivləri dondurulacaq.
   

Milli təhlükəsizlik naziri, general-leytenant Eldar Mahmudov BMT-nin Azərbaycana yeni təyin olunmuş Rezident-Əlaqələndiricisi, BMT İnkişaf Proqramının Rezident Nümayəndəsi, səfir Fikrət Akçuranı qəbul edib.
   MTN-in İctimai Əlaqələr Mərkəzindən APA-ya verilən məlumata görə, Eldar Mahmudov səfir Fikrət Akçuranı Azərbaycanda diplomatik fəaliyyətə başlaması münasibətilə təbrik edib.
   Milli təhlükəsizlik naziri BMT ilə Azərbaycan arasında münasibətlərin inkişafı yönümündə, habelə BMT İnkişaf Proqramı və "Cənubi Qafqazda Narkotiklərə Nəzarət" (SCAD) Regional Yardım Proqramı üzrə həyata keçirilən layihələr çərçivəsində ölkəmizin hüquq-mühafizə orqanlarının, o cümlədən MTN-in texniki və metodiki baxımdan təchizatı və beynəlxalq təcrübə mübadiləsinin təşkili, narkotik qaçaqmalçılığı ilə mübarizə sahəsində yardımları və önəmli səyləri yüksək qiymətləndirib.
   Nazir Ermənistan-Azərbaycan Dağlıq Qarabağ münaqişəsi və onun yaratdığı fəsadlar, ölkəmizin problemin hamılıqla qəbul olunmuş beynəlxalq prinsip və hüquq normalarına uyğun ədalətli həlli uğrunda göstərdiyi səylər, Azərbaycanın işğal edilmiş ərazilərinin azad olunmasına dair BMT-nin müvafiq qətnamələrinin yerinə yetirilməsi və bu işdə aidiyyəti beynəlxalq strukturların ardıcıl çalışmalarının zəruriliyi barədə danışıb. Daha sonra, nazir Eldar Mahmudov beynəlxalq terrorçuluqla və transmilli mütəşəkkil cinayətkarlığın digər təhlükəli təzahürləri ilə aparılan mübarizə ilə bağlı məlumat verib.
   Fikrət Akçura Azərbaycanda BMT-in Rezident-Əlaqələndiricisi təyin olunmasından qürur duyduğunu, təmsil etdiyi beynəlxalq qurumun ölkəmizdə həyata keçirdiyi müvafiq proqramların xalqın rifahı və inkişafına əhəmiyyətli töhfə verməsi üçün bundan sonra da hərtərəfli kömək göstəriləcəyini qeyd edib. O, Azərbaycanın tərəqqisi üçün başlıca təminat olan mövcud ictimai-siyasi sabitliyi yüksək qiymətləndirib, bu işdə, eləcə də bütün sahələrdə hər cür təhdidlərin xəbərdar olunmasında və qarşısının alınmasında, həmçinin ölkədə fəaliyyət göstərən diplomatik korpusun təhlükəsizliyinin təmin olunmasında MTN-in rolunu xüsusi vurğulayıb.

ABŞ prezidenti Barak Obama çoxlu sayda məxfi sənədin mətbuata sızmasından narahatlığını bildirib. Əfqan müharibəsilə bağlı Wikileaks saytında dərc edilən 90 mindən çox məxfi sənəd haqda ilk dəfə danışan Obama bildirib ki, sənədlərin özündə narahatedici yeni məqam yoxdur.
   Onun sözlərinə görə, belə məxfi məlumatların, həm də təfərrüatları ilə sızması narahatedicidir. Sənədlərin özündə əks edilənlər isə onlar üçün el ədə narahatedici deyil. Çünki burdakı məsələlər haqda əvvəlcədən xəbərdar idilər və ötən il ABŞ-ın Əfqanıstanla bağlı yeni təşəbbüslə çıxış etməsi də bu cür məlumatlar üzündən olub.
   WikiLeaks-in dərc elədiyi sənədlərdə NATO qoşunlarının Əfqanıstanda dinc sakinləri öldürməsi faktlarının gizlədilməsi, ABŞ ordusunda bəzi insan ovçuları dəstələrinin olması və Pakistan kəşfiyyatının "Taliban" yaraqlılarına təlim keçməsi iddiaları var.
   

Gürcüstan Prezidentinin mətbuat xidməti dövlət başçısının Maliyyə Nazirliyindəki görüşdə işlətdiyi bəzi ifadələrlə bağlı izahat verməyi zəruri hesab edib.
   Mixeil Saakaşvili Maliyyə Nazirliyinin əməkdaşları ilə görüşü zamanı ölkədə tez-tez işlədilən "Belə etmək olmaz" mənasını verən "Biz ki zənci deyilik" ifadəsindən istifadə edib. Bu barədə mətbuat xidməti məlumat verib.
   Gürcüstan dövlət başçısının mətbuat xidmətinin bildirdiyinə görə, Prezidentin sözlərinin hansısa irqə heç bir aidiyyəti yoxdur və onlar irqi ayrı-seçkilik kontekstində deyilməyib. Gürcüstan dövlət başçısının mətbuat xidməti Mixeil Saakaşvili tərəfindən işlədilən və heç bir halda irqi kontekstdə istifadə olunmayan ifadənin bir sıra KİV tərəfindən bilərəkdən irqi rəng verilməklə düzgün şərh edilmədiyindən təəssüflənir.
   

Cenevrədə Rusiya, Gürcüstan və onun iki separatçı bölgəsi - Abxaziya və Cənubi Osetiya nümayəndələrinin iştirakı ilə beynəlxalq vasitəçilərin apardığı danışıqların yeni dövrəsi başlanıb.
   APA-nın bbc.com saytına istinadən verdiyi xəbərə görə, bu danışıqlarda məqsəd bölgədə 2008-ci ildə baş vermiş zorakılıqların təkrar olunmasının qarşısının alınmasıdır. Bundan əvvəl Abxaziya liderləri bildirmişdilər ki, danışıqlarda real tərəqqinin olmaması üzündən danışıqlardan çıxırlar. Lakin BMT-nin nümayəndəsi Yelena Ponomaryova bildirib ki, tərəflərin hamısı 12-ci raunda qatılıb. Danışıqlar Avropa İttifaqı və ATƏT-in vasitəçiliyilə keçirilir. Bu arada cənubi Osetiyada aparıcı insan haqları fəallarından biri ağır basqına məruz qalıb.
   Müstəqil qəzetin redaktoru və Dəmir Respublikaçı Partiyasının lideri Timur Tsoxrebov onadək naməlum şəxs tərəfindən döyüldükdən sonra xəstəxanaya düşüb,
   Tsoxrebov Cənubi Osetiya Rusiya tərəfindən tanındıqdan sonra üzə çıxmış azsaylı fəallardan biridir. Bu qruplar bu yaxınlarda Cenevrə danışıqlarına gürcü fəallarla birgə imzalanmış məktub göndərmişdilər.
   Bəzi ehtimallara görə, jurnalistə basqının arxasında məhz bu dura bilərdi. Bu günlərdə prezident Kokoytının Cenevrə danışıqlarındakı daimi nümayəndəsi Çorçiyev yerli televiziyaya müsahibəsində birgə məktubu kəskin şəkildə tənqid edib və onu imzalayanları osetin xalqının satqınları adlandırıb. O deyib ki, bu məktub Cənubi Osetiyanın danışıqlardakı mövqeyinə ziyan vurur və Cənubi Osetiyanın beynəlxalq arenda tanınmasına əngəl yaradır.