Bakı şəhərində fəaliyyət göstərən "Sərham" MMC-də standartın tələblərinə cavab verməyən çörək istehsalı aşkar olunub. Bu barədə "APA-Economics"ə Standartlaşdırma, Metrologiya və Patent üzrə Dövlət Komitəsinin (SMPDK) mətbuat xidmətindən məlumat verilib.

   SMPDK-in 1 saylı Ərazi Dövlət Nəzarəti İdarəsinin Bakı şəhəri, Sabunçu rayonu, Bakıxanov qəsəbəsi, Y.Əliyev,00/37 ünvanında yerləşən dairəvi çörək istehsalı ilə məşğul olan "Sərham" MMC-də apardığı araşdırmalar zamanı çörəyin istehsalı zamanı istifadə olunan xammalların (un və duz) normativ sənədlərin tələblərinə uyğun saxlanmadığı müəyyən olunub. Sexdə araşdırma zamanı çörəyin hazırlanmasında istifadə olunan mənşəyi məlum olmayan, çəkisi 50 kq olan 30 kisə un və çəkisi 30 kq olan 43 kisə duz aşkar edilib.

   Müəssisədə istehsal olunan çörəyin sınağı üçün mövcud olan laboratoriya tələblərə cavab verməyib. Çörəyin müayinəsinin mütəmadi aparılmadığı və bununla da çörəyin keyfiyyətinə təminat verilmədiyi məlum olub. Belə ki, sexdə çörəyin istehsalı zamanı normativ sənədin (QOST 28808-90) tələblərindən kənara çıxılıb, normativ sənəddə nəzərdə tutulmayan sirkə turşusundan (uksusdan) çörəyin turşuluğunun artırılması və göbələk xəstəliyinin qarşısının alınması məqsədilə istifadə olunduğu müəyyən edilib. Müəssisədəki nöqsanlarla bağlı qanunvericiliyin tələblərinə uyğun olaraq tədbirlər görülüb.

   "Russkiy xolod" əmtəə nişanlı dondurmaların satışına da qadağa qoyulub. Bu barədə "APA-Economics"ə Standartlaşdırma, Metrologiya və Patent üzrə Dövlət Komitəsinin (SMPDK) mətbuat xidmətindən məlumat verilib.

   SMPDK-in 1 saylı Dövlət Nəzarəti İdarəsinin dondurma idxalı ilə məşğul olan fiziki şəxs C.Cavadova məxsus müəssisədə (Nəsimi rayaonu, B.Mirzəyev küçəsi,24/133) apardığı araşdırma zamanı Rusiyadan "Russkiy xolod" əmtəə nişanlı dondurmaların idxalı zamanı AZS Milli Sertifikatlaşdırma Sisteminin tələblərinin pozulduğu müəyyən olunub. Monitorinq zamanı məlum olub ki, idxal olunmuş məhsullar sertifikatlaşdırılmadan satışa çıxarılır.

   Komitə "Russkiy xolod" əmtəə nişanlı "Yubileynoye", "Plombir SSSR", "Stoliçnoe eskimo", "Plombir "Nastoyaşiy", "Lakomka, "Enerqo", "Lakomka "Traditsionnaya" dondurmalarının təhlükəsizliyi və keyfiyyəti təsdiq edən sənədləri olmadığını aşkarlayıb.

   Komitə əməkdaşları tərəfindən idxalçı firmada aşkar olunmuş nöqsanlar aradan qaldırılanadək məhsulların satışının dayandırılması barədə müəssisə rəhbərinə göstərişlər verilib.

   Abşeron rayonunun Saray qəsəbəsi ərazisində yerləşən "Azəri-Şah" MMC-də insan orqanizmi üçün təhlükəli duz istehsal edilməsi faktı aşkarlanıb.

   Bu barədə "APA-Economics"ə Standartlaşdırma, Metrologiya və Patent üzrə Dövlət Komitəsinin (SMPDK) mətbuat xidmətindən məlumat verilib.

   Aparılan araşdırmalar zamanı "Azəri-Şah" MMC-də Masazır qəsəbəsi ərazisində mövcud olan duz gölündən tədarük edilmiş 2 ton duz aşkar edilib. Müəyyən olunub ki, yodlaşdırılmış duz istehsalı üçün lazımi şərait olmadığı halda tədarük edilən duz sexdə emal olunaraq qablaşdırılır.

   Komitənin məlumatında bildirilir ki, mövcud standartın tələbinə uyğun olaraq yodlaşdırılmış duz istehsalı zamanı duzun nəmliyi, suda həll olmayan qalığın kütlə payı və yodun miqdarı istehsalçı tərəfindən hər 7 saatdan bir təyin olunmalıdır. Eyni zamanda, kalsium (Ca), maqnezium (Mg), sulfat ionlarının, dəmir-oksidin (FeO) və natrium-xloridin (NaCl) kütlə payı vaxtaşırı, 7 gündə bir dəfədən az olmayaraq təyin edilməlidir. Lakin adıçəkilən müəssisədə bütün bunların təyin edilməsi üçün laboratoriya mövcud olmayıb. Bundan başqa, ticarət şəbəkəsindən götürülmüş "Azəri-Şah" MMC-nin istehsalı olan duz nümunəsinin üzərində saxlanma müddəti 1 il qeyd olunub. Halbuki, yodlaşdırılmış duz üçün mövcud olan standart AZS 280-2007 üzrə məhsulun saxlanma müddəti 9 ay nəzərdə tutulur. Həmçinin, markalanmada qüvvədə olmayan normativ sənədə TŞ Az 00900003-17-2003 istinad olunaraq hazırlandığı qeyd edilib. Hazırda Dövlət Komitəsi müəssisədə araşdırmanı davam etdirir.