"Vest Hem" rəhbərliyi "Milan"ın hücumameylli yarımmüdafiəçisi Ronaldinyonu heyətə qatmaq istəyir. Apasport.az saytının xəbərinə görə, ingilislər 30 yaşlı braziliyalı üçün italyanlara 7 milyon avro təklif etmək niyyətindədir. Ronaldinyo ilə ABŞ-ın "Los-Anceles Qelaksi" və Braziliyanın "Flamenqo" klubları da maraqlanır.
   Futbolçunun agenti və qardaşı Roberto De Assis isə bildirib ki, Ronaldinyo "Milan"da qalmaq niyyətindədir. "Milan"ın sahibi Silvimo Berluskoni də futbolçunun karyerasının sonunadək "rossonyeri" futbolkası geyəcəyini deyib: "Ronaldinyo karyerasını "Milan"da bitirmək istəyir. Cənab Berluskoninin dedikləri də bizi sevindirdi. Ronni və klub arasında ciddi, möhkəm əlaqələr var. Həmin əlaqələr nə qədər çox davam edərsə, hamı üçün o qədər yaxşıdır. İstəklərimiz də Berluskoninin mövqeyi ilə tam üst-üstə düşür. Klubun vitse-prezidenti Adriano Qalliani ilə görüşüb danışacağam. Ümid edirəm ki, Ronninin müqaviləsinin müddətinin uzadılması ilə bağlı heç bir problem olmaz".
   Onun sözlərinə görə, Ronaldinyonun "Los-Anceles Qelaksi"nin oyunçusu Lendon Donovana dəyişdirilməsi ilə bağlı şayiələrin də heç bir əsası yoxdu: "Qardaşım "Milan"ın futbolçusudur və onun klubla imzaladığı müqavilənin vaxtının başa çatmasına bir il qalıb. Klub rəhbərliyi ilə danışıqlar aparacağıq".

"Arsenal"ın yarımmüdafiəçisi Fransesk Fabreqas komandanı tərk edir.
   Apasport.az saytının Britaniya mətbuatına istinadən xəbərinə görə, ispan futbolçu "Barselona" ilə fərdi müqavilənin şərtlərini razılaşdırıb. Fabreqas doğma klubu ilə 5 illik müqavilə imzalayacaq.
   Sənədin şərtlərinə görə, katalonlar Seskə mövsüm üçün 7 milyon avro verəcəklər. İndi Fabreqasın "Barselona"ya transferinə mane olan yeganə problem "topçular"ın kapitanı buraxmaq istəyində olmamalarıdır. "Barsa" isə inad edərək, 23 yaşlı havbeki heyətinə qatmaq istəyir.

"İnter"in forvardı Mario Balotelli "Mançester Siti"nin transfer təklifini qəbul edib. Apasport.az saytının xəbərinə görə, danışıqlar nəticəsində futbolçu və klub arasındakı anlaşmanın şərtləri razılaşdırılıb. Balotellinin "Mançester Siti" ilə 4 illik müqavilə imzalaması nəzərdə tutulur. Həmin anlaşmaya əsasən, Mario ildə 4 milyon avro maaş alacaq.
   "İstənilən futbolçunu satın almaq üçün gücümüz yetərlidir. Məsələn, Balotelli ilə bahəm, 5 forvard nəzərimizdədir. Lakin həmin futbolçularla müqayisədə Marionun iki önəmli üstünlüyü var: - o, hədsiz istedadlı və gəncdir. Unutmayın ki, Balotellinin istedadına inanan ilk məşqçiyəm" - deyə 45 yaşlı Mançini söyləyib.
   "Mançester Siti" həm də "Liverpul"un ispan ulduzu Fernando Torresi heyətinə qatmaqda israrlıdır. "Şəhərlilər" bunun üçün "Liverpul"a nə az, nə çox - düz 70 milyon funt-sterlinq ödəməyə hazır olduğunu bəyan edib. Hücumçunu satmaq istəməyən "Liverpul" ona məhz bu qədər qiymət qoysa da, "Mançester Siti" bossları məbləği ödəməyə hazır olduqlarını açıqlayıblar. "Fernando Torres Avropanın ən yaxşı futbolçularından biridir. İndi hər şey onun qərarından asılıdır", - deyə Mançini bildirib.
   Bu transfer baş tutarsa, o, İngiltərə Premyer-Liqasında ən bahalı keçid kimi rekord müəyyənləşdirəcək. Hazırkı rekord da "Mançester Siti"yə məxsusdur. 2 il əvvəl "Real"dan Robinyonu 32,5 milyon funt sterlinqə almış klub yeni rekord müəyyənləşdirməyə yaxındı.

Türkiyənin "Beşiktaş" klubu Qutinin transferini rəsmən açıqladı. Klub futboçu ilə illik 2,7 milyon avro olmaqla iki illik razılaşmanın mövcudluğunu da təsdiqləyib. İspaniyalı futbolçu artıq İstanbula gəlib. 33 yaşlı oyunçunu "Beşiktaş"ın prezidenti Yıldırım Dərimörənin şəxsi təyyarəsi gətirib. Onu hava limanında təxminən 400 azarkeş qarşılayıb.
   Onu da qeyd edək ki, futbolçunun "Real"da olduğu kimi, İstanbul klubunda da geyəcəyi 14 nömrəli formalar artıq çatışa çıxarılıb.

Futbol üzrə Argentina yığma komandasının baş məşqçisi Dieqo Maradona milli komandada qalmaq təklifini rədd edib. Lent.az-ın "Ole" qəzetinə istinadən verdiyi məlumata görə, Maradona artıq qərarını Argentina Futbol Assosiasiyasının prezidenti Xulio Qrondoneyə çatdırıb.
   Maradona iyulun 26-da futbol televerilişi zamanı bəyan edib ki, bütün köməkçiləri postlarında qalsalar o da baş məşqçi kimi fəaliyyətini davam etdirəcək. Bundan əlavə, Maradona məşqçi qərargahında zamanının məşhur futbolçusu Oskar Rucerini də görmək istəyib. Amma onun namizədliyi Qrondonenin xoşuna gəlmir.
   Öz növbəsində Qrondone Maradonaya postunda qalmağı, amma yeni köməkçilər tapmağı təklif edib. Baş məşqçi isə belə şəraitdə işləməkdən imtina edib.

Bukmeker kontorları Avroliqanın III təsnifat mərhələsinin ilk oyunları ilə bağlı proqnozlarını açıqlayıblar. Apasport.az saytının məlumatına görə, bukmekerlər bu mərhələdə oynayacaq Ağdamın "Qarabağ" klubunun qələbə qazanmasına möcüzə kimi baxırlar.
   Belə ki, iyulun 29-da Krakov şəhərində keçiriləcək "Visla" - "Qarabağ" oyununda ev sahiblərinin qalib gələcəyinə 1.21 əmsal verən kontorlar Qurban Qurbanovun yetirmələrinin qələbəsini 14.00 əmsalla qiymətləndiriblər. Onların proqnozuna görə, oyunun heç-heçə başa çatacağına inananlar isə qoyduqları pulu 5.70 dəfə artırmaq şansı qazanacaqlar.
   

Belçikanın "Anderlext" klubunun çexiyalı futbolçusu Yan Polakın "Qalatasaray"la ilkin razılığa gəldiyi bildirilir. Buna görə futbolçu "Anderlext"in Çempionlar Liqası turnirinin üçüncü seçmə turu çərçivəsindəki qarşılaşmada forma geyinməyəcəyi bildirilir.
   "Anderlext"in rəsmi saytında yaydığı məlumatda qeyd olunur ki, Jan Polak komandanın heyətində oyuna çıxarsa, yeni komandası ilə Avropa Kubokunda yarışlarda iştirak edə bilməz: "Buna sayğı ilə yanaşaraq onu heyətə salmadıq. Bir il sözləşməsi qalmışdı, müqaviləsini uzatmaq təklifini qəbul etmədi. Bu şərtlər altında onunla yollarımızı ayırmaq məcburiyyətindəyik".
   Çexiyalı futbolçunu heyətinə qatmaq istəyən klublar arasında Portuqaliyanın "Sportinq" (Lissabon) klubu da var idi.
   Xatırladaq ki, Yan Polak 2007-ci il ildə Almaniyanın "Nürnberq" klubundan "Anderlext"ə transfer olunmuşdu.
   

Braziliya yığma komandasının yeni təyin olunmuş baş məşqçisi Mano Menezes yığmada islahatlara başlayıb. Baş məşqçi Braziliya - ABŞ yoldaşlıq qarşılaşması üçün 11 yeni futbolçuya dəvət göndərib.
   Menezes Dünya Çempionatı-2010-da yığmanın şərəfini qoruyan yalnız 4 futbolçunu heyətə cəlb edib. Menezesin dəvət göndərmədiyi futbolçular siyahısında Kaka, Luiş Fabiano və Julio Sezar kimi oyunçular da var.
   Xatırladaq ki, Braziliya - ABŞ yoldaşlıq matçı avqustun 10-da baş tutacaq. Braziliya yığmasının eksperimental heyətlə hansı nəticəyə imza atacağı isə maraqla gözlənilir.
   

Futbol üzrə yığma komandamız Avro-2012-nin seçmə mərhələsi çərçivəsində Türkiyə komandası ilə qarşılaşacaq.
   AFFA-dan verilən məlumata görə, matç oktyabrın 12-də keçiriləcək. Tofiq Bəhramov adına Respublika stadionunda keçiriləcək qarşılaşma saat 20:00-da başlayacaq.
   Xatırladaq ki, yığma komandamız Avro-2012-nin seçmə mərhələsi çərçivəsində "A" qrupunda Almaniya, Türkiyə, Avstriya, Belçika və Qazaxıstan milliləri ilə mübarizə aparacaq.