Cari il ərzində Azərbaycan büdcəsinə daxil olacaq vergilərin 92 faizi Bakıda toplanacaq. Bu barədə məlumat "Fineko" agentliyi tərəfindən yayılıb. Ekspertlər isə bunun həyəcanverici bir durum olması qənaətindədir. Belə hesab olunur ki, göstərilən rəqəm hələ də ölkə iqtisadiyyatının əsas aparıcı gücünün məhz Bakıda olduğunu deməyə əsas verir.
   Həmçinin o da aydın olur ki, son illərdə regionların inkişafı məqsədilə dövlət tərəfindən xeyli işlər görülsə də, böyük həcmdə investisiyalar yatırılsa da, Azərbaycanın əsas iqtisadi güc mərkəzi kimi hələ də paytaxt Bakı çıxış edir.
   İqtisadi və Sosial İnkişaf Mərkəzinin (İSİM) rəhbəri Vüqar Bayramov bununla bağlı qeyd edir ki, paytaxtda biznes qurulması daha rentabelli səciyyə daşıyır. Onun sözlərinə görə, regionlarla müqayisədə paytaxtda bazarın cəmi də böyükdür. Ekspert "Exo" qəzetinə açıqlamasında maraqlı bir məqama da toxunur. Onun fikrincə, ümumi vergilərin 92 faizinin Bakının payına düşməsi burada yaşayan əhalinin sayının rəsmi rəqəmlərdə səsləndiyindən çox olduğunu göstərir: "Rəsmi statistikaya əsasən, Bakıda ölkə əhalisinin 25 faizi yaşayır. Lakin real statistikaya nəzər salsaq, Bakıda 2 milyon insanın yaşadığını demək çətindir. Çünki 2 milyon insan tərəfindən 92 faiz vergi ödənilməsi mümkün görünmür. Yəni Bakıda əhalinin sayı rəsmi rəqəmlərdə göstərildiyindən çoxdur". Ekspertin qiymətləndirməsinə görə, paytaxtda ölkə əhalisinin haradasa 40 faizi yaşayır və onların sayı 3,5 milyon nəfərdən çoxdur.
   Qeyd edək ki, paytaxt iş müəssisələrinin sayına görə də regionları hələ çox geridə qoyur. Hesablamalara görə, təkcə Bakıda 50 mindən çox müəssisə var. Ümumiyyətlə, ölkədəki 90 mini keçən müəssisənin 55 mindən çoxu və ya 61 faizi Bakıda və Abşeron yarımadasındadır. Paytaxtdan sonra iqtisadi aktivlik ən çox Sumqayıt, Gəncə, Abşeron, Lənkəran, Cəlilabad və İmişlidə, eləcə də Naxçıvanda müşahidə olunur. Buradakı müəssisələrin sayı 1000-2000 arasındadır. Ötən il ölkədə yeni yaradılan müəssisələrin də əksəriyyəti paytaxtın payına düşür.
   Mütəxəssislər bildirir ki, müəssisə və sahibkarların böyük hissəsinin Bakıya toplanması paytaxtda əhalinin sıxlığı ilə bağlıdır. Belə ki, müəssisə və sahibkarların 60 faizdən çoxu ticarət sektorunda fəaliyyət göstərdiyindən, əhalinin sıx olduğu ərazilərdə işləməyə üstünlük verir. Ticarət müəssisələrinin paytaxtda çoxluğunun başqa bir səbəbi burda həyat səviyyəsinin rayonlara nisbətən yüksək olmasıdır. Müəssisələr isə daha yaxşı alıcılıq qabiliyyəti olan müştərilərə yaxın olmaq istəyir. Fərdi sahibkarlıqla məşğul olanlar da ən çox Bakıya üstünlük verir.
   Mütəxəssisin sözlərinə görə, bölgələrdə kredit şərtlərinin ağır olması, kredit götürəndə girovlarla bağlı çətinliklər də rayonlardakı şirkətlərə problemlər yaradır. Bakıda çalışan msüəssisələrin isə həm girovları etibarlı olur, həm də banklar adətən belələrinə krediti daha asan verir.
   Əvəzində istehsalla məşğul olan müəssisələr getdikcə daha çox rayonlarda işləməyə üstünlük verir. Əvvəla, bölgədə vergi yükü Bakıya nisbətən azdır. Bundan başqa, kənd təsərrüfatı məhsullarının emalı ilə məşğul olanlar xammala yaxın olmalıdır. Üstəgəl, rayonlarda işçi qüvvəsi də Bakıya nisbətən ucuzdur. Nəticədə konserv məhsulları, süd, ümumiyyətlə qida məhsullarının istehsalçıları rayonlarda işləməyə üstünlük verir. Araşdırmalar göstərir ki, iş adamlarının Bakıya üz tutması bir neçə səbəblə bağlıdır. Bakıda mövcud olan iqtisadi imkanlar, bəzi regionlarda iş yerlərinin azlığı və kənd təsərrüfatında gəlirliliyin aşağı olması iş axtaranların və sahibkarların yerlərini dəyişməsinə səbəb olur. Yuxarıda qeyd olunduğu kimi, rəsmi məlumatlara görə, Bakının əhalisi təxminən 2 milyon nəfərdən bir qədər artıqdır, amma bu rəqəm rəsmi olaraq ölkənin başqa yerlərində qeydiyyatda olan, ancaq faktiki Bakıda yaşayan insanları əhatə etmir. Nəticədə, ekspertlərin hesablamalarına görə, Bakının real əhalisi rəsmi rəqəmlərdən iki dəfə artıqdır.
   Bundan başqa, araşdırmalar göstərir ki, iş adamlarının əksəriyyəti az pul tələb edən və gəliri tez çıxaran bizneslə məşğul olmağa üstünlük verdiyindən, paytaxt hələ də əsas cəlbedici məkandır. Müşahidələr də göstərir ki, sahibkarların əksəriyyəti işə başlamaq üçün çox pul tələb etməyən və tez gəlir gətirən sahələrdə, xüsusilə ticarətlə məşğuldur. İş adamlarının çox cüzi hissəsi böyük investisiya tələb edən və nisbətən uzun müddətdən sonra gəlir verməyə başlayan istehsalla məşğul olur. Beləliklə məlum olur ki, özəl biznesin böyük hissəsi Bakıda və respublikanın iri şəhərlərində cəmləşib.
   

Qlobal maliyyə böhranı və onun nəticəsi olaraq alıcılıq qabiliyyətinin aşığı düşməsi nəticəsində ölkə vətəndaşlarının avtomobil almaq imkanları da daralıb. Ona görədir ki, cari ilin altı ayı ərzində Azərbaycana cəmi 22812 ədəd minik avtomobili gətirilib.
   Bu isə o deməkdir ki, hesabat dövründə ölkəyə avtomobil idxalı keçən ilin müvafiq dövrü ilə müqayisədə 39 faiz azalıb. 2009-cu ildə isə hardasa 38 min maşın idxal olunub. Avtomobillərin neftdən əldə olunan yanacaqla işlədiyini nəzərə alsaq, bu durumun ölkə daxilində neft məhsulları satışına da təsir edəcəyini düşünmək olar. Amma həmsöhbət olduğumuz "Turan" İnformasiya Agentliyinin eksperti Hafiz Babalı heç də güman etmir ki, avtomobil idxalının azalmasının onun xidmətində duran neft məhsulları satışına hər hansı bir formada təsiri olsun: "Avtomobillərin əvvəlki ilə nisbətən az sayda gəlməsi iqtisadi amillə bağlı məsələdir. Əhalinin alıcılıq qabiliyyətinin aşağı düşməsi keçən ilkinə nisbətən bir qədər az sayda avtomobilin daxili bazara girməsilə nəticələnib. İstəklərin maliyyə vəziyyətilə uyğun gəlməməsi belə vəziyyətə gətirib çıxarıb. Amma burada ikinci bir məqam var. Azalmada işlənmiş maşınların xüsusi çəkisi xeyli böyükdür. Əvvəlki illə müqayisədə köhnə maşınların gətirilməsi təxminən iki dəfəyə kimi azalıb. Bu da ondan irəli gəlir ki, avtomobil həvəskarı olan şəxslər ehtiyaclarını ödəmək üçün maşın gətirmək sahəsində artıq seçim qarşısında qalıb. Daha doğrusu, onları dövlət bir qədər küncə sıxaraq, ucuz maşınlardansa, bahalı və ekoloji cəhətdən normalara uyğun avtonəqliyyat vasitələrinin gətirilməsini tələb edir. Ona görə də onlar ucuz maşınları artıq gətirə bilmir. Çünki onlar standartlara cavab vermir. Lakin idxal edilən avtomobillərin orta qiymətinə baxdıqda görürük ki, bu ilin 6 ayı ərzində hətta işlənmiş maşınların orta qiyməti əvvəlki illərə nisbətən xeyli artıb. Deməli, avtomobil həvəskarları tələblərə uyğunlaşmağa başlayıb. Yanacaq sərfinə gəldikdə, yeni avtomobillər enerjiyə az tələbkardır.
   100 kilometrə orta hesabla 10 litr yanacaq işlədən maşınlardır. Bu mənada, idxalın azalmasının ölkədə neftdən əldə olunan yanacaq istehlakına mənfi və ya müsbət təsir imkanları elə də yüksək deyil. Son dövrlər ölkəyə yeni maşınlar gətirilir. Müştərilər də məsələyə ayıq başla yanaşmağa başlayıb. 3-5 ildən sonra köhnə avtomobilləri satmaq problemə çevrilə bilər.
   Ona görə də yaxın 5-7 il ərzində Azərbaycanda avtonəqliyyat parkının tamamilə yenilənməsi faktı ilə rastlaşacağıq. Çünki qarşıda avro-3, avro-4, avro-5 standartlarına keçid gözlənir. Həmin müddətdə 2000-ci ildən qabaq buraxılan avtomobillərin xüsusi çəkisi 20 faizdən yüksək olmayacaq".
   

Meksika körfəzində baş vermiş qəza ilə bağlı Britaniyanın BP neft şirkəti maliyyə zərərinin məbləğini açıqlamaq niyyətindədir.
   APA-nın bbc.com saytına istinadən verdiyi xəbərə görə, zərərin həcminin 25 - 30 milyard dollar səviyyəsində olduğu ehtimal olunur. Belə olduğu halda bu, Böyük Britaniyanın korporativ biznesi tarixində ən böyük maddi zərər olacaq.
   

Cari ilin yanvar-iyun aylarında Azərbaycana 4 517,2 ton çay idxal olunub. Bu barədə "APA-Economics"ə Dövlət Gömrük Komitəsindən məlumat verilib. Hesabat dövründə Azərbaycan çay idxalını 11,3% artırıb. Azərbaycana idxal olunmuş çayın dəyəri 6 685,1 min ABŞ dolları təşkil edib. Qeyd edək ki, Dövlət Statistika Komitəsinin məlumatına görə, cari ilin birinci yarısında Azərbaycanın çay plantasiyalarından 257 ton yaşıl çay yarpağı yığılıb və çay yığımı 2009-cu il iyulun 1-nə nisbətən 0,8% azalıb.
   

Vyetnam bu ilin avqust ayından etibarən Azərbaycandan xam neftin idxalına başlayacaq.
   "APA-Economics"in bildirdiyinə görə, bu barədə Vyetnam Neft və Qaz Şirkətlər Qrupu - "PetroVietnam" məlumat yayıb.
   Şirkətin məlumatına görə, Azərbaycan Dövlət Neft Şirkəti, (ARDNŞ) ilə əldə olunmuş razılaşmaya əsasən, Azərbaycandan ilkin mərhələdə ildə təxminən 408 837 barel "Azeri Light" markalı neft idxal olunacaq. Azərbaycan nefti Vyetnamın Dung Quat neftayırma zavodunda emal ediləcək.
   "PetroVietnam" BP şirkəti ilə əldə olunmuş razılaşmaya əsasən, Malayziyanın "Miri" yatağından hasil olunan neftin də bir hissəsini alacaq.
   Qeyd edək ki, cari ilin aprel ayının 8-də ARDNŞ və "PetroVietnam" arasında əməkdaşlığa dair memorandum, ARDNŞ-in Asiya ölkələri üzrə treydinq şirkəti "SOCAR Trading Singapur" ilə "PetroVietnam" arasında Azərbaycan xam neftinin Vyetnama satışına dair uzunmüddətli müqavilə imzalanıb.