Bu günlərdə Haaqa Məhkəməsi Kosovonun 2008-ci ildə birtərəfli qaydada müstəqilliyini elan etməsinə bəraət qazandırıb. Bu vəziyyətin digər münaqişə ocaqlarına, o cümlədən Dağlıq Qarabağ münaqişəsinə hansı təsirlər göstərəcəyi isə siyasi dairələrdə hələ də müzakirə mövzusudur.
   Məsələ Qərb mediasının da diqqətindən yayınmış deyil. Baş verənlərin isə daha çox mənfi presedent yaradacağı, Cənubi Qafqazda Azərbaycan və Gürcüstan üçün xoşagəlməz halların yaşana biləcəyinə gətirib çıxaracağı vurğulanır.
   ABŞ-ın aparıcı media orqanlarından sayılan "New York Times" qəzetinin yazdığına görə, hüquqşünaslar hesab edir ki, Haaqa Məhkəməsi Kosovonun müstəqilliyini qanuni elan etsə də, onun beynəlxalq hüquqa əsasən qanuni dövlət olduğunu açıq bildirməyib. Bu isə münaqişə tərəflərinin hər birinə qərarda qalib kimi əks olunduqlarını yozmaq imkanı verir.
   Siyasi analitiklər tövsiyə mahiyyəti daşıyan "10:4" nisbətindəki qərarın başqa ölkələrdə separatçı hərəkatlara təkan verə biləcəyini proqnozlaşdırır. BMT Baş Assambleyasında təmsil olunan 192 dövlətdən yalnız 69-u, o cümlədən ABŞ və Avropa İttifaqı Kosovonun müstəqilliyini tanıyıb. London İqtisadiyyat məktəbinin Balkanlar üzrə eksperti Ceyms Ker-Lindsi deyir ki, məhkəmə qərar verərkən milli müqəddaratını təyin etmə hüququ ilə dövlətin ərazi bütövlüyü anlayışlarını balanslaşdırmağa çalışıb, lakin sonda bu məsələlərdən tamamilə kənar durub. Lindsinin sözlərinə görə, reallıqda Kosovonun müstəqilliyini məhkəmə qərarı deyil, onu tanıyan dövlətlərin sayı müəyyənləşdirəcək. "New York Times" daha sonra yazır ki, Kosovonun müstəqillik bəyannaməsinə legitimliyin verilməsi Dağlıq Qarabağ, Cənubi Osetiya, Abxaziya və Dnestyanı kimi müxtəlif yerlərdə separatçı hərəkatlar tərəfindən presedent kimi istifadə oluna bilər. Lakin hüquqşünaslar həmçinin vurğulayır ki, məhkəmənin hər vəchlə Kosovonun hüquqi statusuna toxunmaqdan yayınması başqa yerlərdə millətçi-separatçı hərəkatların şirnikləndirilməməsinə hesablanmış addım olub.
   Lakin ermənilər Dağlıq Qarabağdakı separatçı rejimin dünya ictimaiyyəti tərəfindən qəbul edilməsi istiqamətində artıq ciddi fəaliyyətə başlayıb. Bununla belə, dünyanın aparıcı dövlətləri və beynəlxalq təşkilatlarının məsələ ilə bağlı mövqeləri onları məyus edib. ABŞ dövlət katibinin Avropa və Avrasiya məsələləri üzrə müavini Filipp Qordon bildirib ki, beynəlxalq məhkəmənin Kosovo haqqında qərarı digər bölgələr və ya dövlətlər üçün presedent ola bilməz.
   Xatırladaq ki, bundan əvvəl Azərbaycan Xarici İşlər Nazirliyinin sözçüsü Elxan Poluxov bildirib ki, münaqişələr fərqlidirsə, yanaşmalar da fərqli olmalıdır: "Hesab edirik ki, beynəlxalq məhkəmə tərəfindən verilən rəy yalnız Kosovo məsələsinə aiddir. Dünyada olan konfliktlər özəlliyilə fərqlənir və onların həllinə dair hansısa bir yeganə müvafiq həll yoxdur. Verilən qərarın Dağlıq Qarabağ münaqişəsinə hər hansı bir təsirini biz görmürük və münaqişə öz formatında həll olunmaqdadır".
   Onun sözlərinə görə, Ermənistan-Azərbaycan Dağlıq Qarabağ münaqişəsinin nizamlanması ilə beynəlxalq mandatı olan Minsk Qrupu məşğuldur, yəni danışıqlar bu çərçivədə gedir.
   Haaqa Məhkəməsinin qərarının qlobal təsirlərindən bəhs edən "Washington Post" qəzeti isə Serbiya və Kosovonun artıq dünyanın müxtəlif ölkələrində öz mövqelərinə dəstək qazanmaq üçün lobbiçiliyə başladığını bildirir: "Serbiya ümid edir ki, Kosovonun müstəqilliyinə qarşı sərt çıxış edən Rusiya və Çinin BMT Təhlükəsizlik Şurasına üzvlüyü bu dövlətin BMT-yə daxil olmasının qarşısını almaqda yardımçı ola bilər. Belə ki, rəsmi Pekin və Moskva şurada veto gücünə malikdir. Sentyabrda BMT Baş Assambleyasının yığıncağında Kosovonun müstəqilliyinin tanınması ilə bağlı təzyiqlərin artacağı gözlənir. ABŞ və Böyük Britaniya başda olmaqla, Qərb öz müttəfiqlərinin bu dövləti tanımasını istəyir. O biri tərəfdən, Kosovonun müstəqilliyini tanımayan dövlətlərin bir çoxu özlərinin separatçı hərəkatları ilə üzləşir. Avropa İttifaqı üzvləri sırasında İspaniya, Yunanıstan, Slovakiya, Kipr və Rumıniya separatçı hərəkatlarla üzləşir. İspaniyanın xarici işlər naziri Angel Moratinos qərara hörmətlə yanaşdığını bildirib, lakin o, Madridin Kosovonu tanıyıb-tanımayacağını açıqlamayıb. Yunanıstan və Slovakiya isə mövqelərini dəyişməcəklərini elan edib. Yunan Kiprinin rəhbərliyi bir qədər də uzağa gedərək Serbiyanı tam dəstəklədiyini bəyan edib".
   Qeyd edək ki, artıq Serbiya parlamentinin deputatları payızda BMT Baş Assambleyasının gündəliyinə təqdim edilməsi nəzərdə tutulan qətnaməni müzakirə edərək qəbul edib. "İnterfaks" agentliyi məlumat verir ki, qətnamədə Kosovo ilə yeni danışıqlara başlanması nəzərdə tutulur.
   Səsvermə zamanı təklifi 192 deputat dəstəkləyib, 26 deputat isə əleyhinə səs verib. Sənəddə deyilir ki, parlament hökumətə bu qətnamənin BMT Baş Assambleyasına çıxarılmasını təmin etmək üçün bütün diplomatik qərarları qəbul etmək səlahiyyəti verir. Bununla belə, qəbul olunan sənəddə deputatlar bir daha qeyd edib ki, Serbiya Kosovonun müstəqilliyini tanımaq fikrində deyil.
   Xatırladaq ki, Haaqa məhkəməsi Serbiyanın qaldırdığı iddia əsasında Kosovonun müstəqilliyini birtərəfli qaydada elan etməsinin nə dərəcədə qanuni olduğunu araşdırıb. Məhkəmə qərarına görə, Kosovonun birtərəfli qaydada müstəqilliyini elan etməsi beynəlxalq hüquq normalarına zidd deyil.
   

Britaniyanın BP neft şirkəti Robert Dadlinin şirkətin baş direktoru vəzifəsinə təyin edilməsini rəsmən təsdiqləyib.
   "APA-Economics"in məlumatına görə, R.Dadli 2003-2008-ci illərdə "TNK-BP" Britaniya-Rusiya birgə müəssisəsinin prezidenti vəzifəsində çalışıb, 2009-cu ildən isə BP-nin Direktorlar Şurasının üzvüdür. Cari ilin may ayında şirkət rəhbərliyi onu həmçinin Meksika körfəzində baş verən qəzanın nəticələrinin aradan qaldırılması üçün yeni yaradılmış bölmənin başçısı vəzifəsinə təyin edib.
   R.Dadli BP şirkətinin baş direktoru vəzifəsində Toni Heyvordu əvəz edəcək. T.Heyvord, öz növbəsində, noyabrın 30-dək BP-nin Direktorlar Şurasının üzvü qalacaq, daha sonra isə onun "TNK-BP"-nin Direktorlar Şurasında məsləhətçi vəzifəsinə təyin edilməsi planlaşdırılır.

"Haaqa Məhkəməsinin Kosovonun müstəqilliyini tanıma qərarı -beynəlxalq ictimaiyyətin Dağlıq Qarabağı da tanıması ilə nəticələnəcəksə, biz bu qərarı alqışlayırıq. Separatçı Dağlıq Qarabağın lideri Bako Saakyan iyulun 24-də jurnalistlərə açıqlamasında belə deyib.
   Son üç ildə ilk dəfə mətbuat konfransı verən Saakyan Haaqa Məhkəməsinin qərarını "mühüm hadisə" adlandırıb, onun fikrincə, bu qərar yeni siyasi vəziyyət yaradır.
   Qarabağ münaqişəsinin tənzimlənməsi məsələsinə gəlincə, separatçı rejimin lideri bildirib ki, münaqişə kompromis yolu ilə həll olunmalıdır. Saakyan separatçı Dağlıq Qarabağın son statusunu Dağlıq Qarabağ Muxtar Vilayətinin keçmiş sərhədi çərçivəsində nəzərdən keçirmədiklərini də əlavə edib.
   Bako Saakyan Ermənistan prezidenti Serj Sarkisyanın münaqişənin həllində radikal siyasət aparmamasını alqışladığını bildirib.
   Rəsmi Bakı isə BMT-nin Haaqa Məhkəməsinin Kosovonun müstəqilliyinin qanunsuz olmaması barədə qərarının Dağlıq Qarabağ danışıqlarına hər hansı təsirini gözləmir.

Türkiyənin xarici işlər naziri Əhməd Davudoğlu ötən həftə maraqlı təkiflə çıxış edib. "Cihan" agentliyinin məlumatına görə, Davudoğlu Livanı Qəzzaya yardım gəmisi göndərmək fikrindən daşındırmağa çalışıb.
   "Yedioth Ahronoth" qəzeti İsrail rəsmilərinə istinadla yazır ki, Qəzzaya tətbiq edilən embarqonun yumşalmasından sonra Ankara bu əraziyə gəmi göndərilməsini gərəksiz sayır və İsraillə də münasibətləri normallaşdırmaq istəyir.
   Nazir Davudoğlu ötən həftə Suriyanın paytaxtında olub və Livanın baş naziri Səid Həriri və "Həmas" lideri Xalid Məşəllə görüşüb. İsrail rəsmilərinin verdiyi bilgiyə görə, Davudoğlu Livandan Qəzzaya hərəkət etməyə hazırlaşan gəmilərin bölgəyə girişinə icazə verilməməsini xahiş edib. Bu addım israilli diplomatlar üçün də sürpriz olub. İsrail rəsmiləri güman edir ki, Davudoğlunun bu xahişi Türkiyənin xarici siyasət kursunun dəyişməsini göstərir: "Rəsmi Ankara ABŞ və Avropa ilə münasibətləri korladığının fərqindədir".
   Xəbərə görə, İsraillə münasibətləri normallaşdırmaq istəyən Türkiyə rəsmiləri bağlı qapılar arxasında türk gəmilərinin Qəzzaya tətbiq olunan embarqonu yumşaltdığını bildirir və yeni gəmi göndərməyin gərəksiz olduğunu deyir. Ankara, həmçinin, ABŞ və Avropaya İsraillə münasibətləri normallaşdırmaq istəyini də bildirir.
   

"Ukrayna Kollektiv Təhlükəsizlik Müqaviləsi Təşkilatına daxil olmağı planlaşdırmır". APA-nın "UNİAN"a istinadən verdiyi məlumata görə, bunu Ukrayna Xarici İşlər Nazirliyinin mətbuat xidmətinin rəhbəri Aleksandr Dikusarov deyib.
   O bildirib ki, prezidentin və hökumətin gündəmində belə məsələ yoxdur. Diplomat xatırladıb ki, "Daxili və xarici siyasətin əsasları" haqqında qanuna əsasən, Ukrayna bloklara qoşulmayan ölkə statusuna malikdir: "Bu o deməkdir ki, Ukrayna hərbi-siyasi təşkilatlarda iştirak etmir. Biz Ukrayna qanunvericiliyinə riayət edəcəyik".
   Qeyd edək ki, Kiyevdə keçirilən "Kollektiv Təhlükəsizlik Müqaviləsi Təşkilatı: Ukrayna üçün yeni kollektiv təhlükəsizlik formatı" adlı beynəlxalq konfransda hakimiyyətdəki Regionlar Partiyasının deputatı, keçmiş müdafiə naziri Aleksandr Kuzmuk ölkəsinin bu qurumla siyasi əməkdaşlıq etməsi və blokun hava hücumundan müdafiə sisteminə qoşulması təklifini irəli sürüb.
   

"Diplomat üçün ən böyük nöqsan şöhrətpərəstlikdir..."
   Bunu məşhur ingilis diplomatı Nikolson deyib.
   Dünya diplomatiyasının tarixi çox qədimlərə gedib çıxır. Dövlətlər yaranandan sonra onlar arasında münasibətlərin qurulmasında iştirak edən şəxslər ilk ibtidai diplomatlar olub.
   Hələ XVII əsrdə İspaniya kralının qəbulunda Fransa səfirinə məclisin aşağı hissəsində yer göstərilir. Fransa səfiri Melan Berner oturmaqdan imtina edir. Deyir ki, mən adi adam kimi lap stolun altında da otura bilərəm. Amma Fransanı təmsil etdiyimdən layiq olduğum yerdə oturmalıyam". Kral məcbur olub, diplomatı yuxarı başa dəvət edir.
   Xalq şairi Bəxtiyar Vahabzadənin oğlu İsfəndiyar Vahabzadə hələ bir neçə il öncə yazırdı ki, bizi xaricdə təmsil edənlər heç öz dilində düz-əmməli danışa bilmir.
   Əlbəttə ki, müstəqillik qazandığımız ilk illərdə Azərbaycan diplomatiyasında ağır böhranlı vəziyyət yarandı. Humanitar, hətta texniki sahədə tanınmış şəxslərə diplomatik korpuslarda müxtəlif vəzifələr verildi. Vəzifəsindən uzaqlaşdırılan siyasətçilər, məmurlar da həmin korpuslardakı vakant yerlərə göndərilməklə Azərbaycandan uzaqlaşdırılırdı. Azərbaycan diplomatlarının peşəkarlığının aşağı səviyyədə olması rəsmi qaydada da etiraf olunurdu.
   Xarici İşlər nazirinin müavini, Diplomatiya Akademiyasının rektoru Hafiz Paşayev dəfələrlə bəyan edib ki, Azərbaycanda diplomat çatışmazlığı var. Azərbaycanın ali məktəblərdə təhsilin səviyyəsindən da narazı olan rektorun fikrincə, lkriteriyalar olduqca yüksəkdir, peşəkar kadrlar isə yoxdur".
   Son iki ildə xaricdəki Azərbaycan səfirliklərinin sayı iki dəfə artırılaraq, 52-yə çatdırılıb. Hafiz Paşayev deyir ki, bu, peşəkar diplomatlara tələbatı artırıb: "Məndən məsləhət istəyəndə ki, xaricə kimi göndərək, cavab verməkdə çətinlik çəkirəm. Kriteriyalar olduqca yüksəkdir, peşəkar kadrlar isə yoxdur".
   Qeyd edək ki, Azərbaycanda peşəkar diplomatların hazırlanması üçün bir neçə il öncə Diplomatiya Akademiyası yaradılıb.
   Təəssüflər olsun ki, bu günə qədər Azərbaycanda diplomat ixtisası olmadığından bu sahənin peşəkarları da az olub. Bəzi ekspertlər düşünürlər ki, diplomatiya ürəkdən gələn bir peşədir və bu peşəyə yiyələnmək üçün bu sahə ilə bağlı xüsusi biliklər əldə etmək lazımdır. Həmçinin qeyd olunur ki, Diplomatiya Akademiyası bu gün peşəkar kadrlar yetişdirmək gücündədir. Bu Akademiya qısa müddətə özünü nəinki Azərbaycanda, həm də bütün dünyada tanıtmağa müvəffəq olub. Beynəlxalq konfranslar, elmi tədqiqatlar, eyni zamanda təhsil prosesi bunları deməyə imkan yaradır. XİN-ə qəbul olunan bütün gənc diplomatlar dövlət imtahanlarını keçəndən sonra 6 ay ərzində Akademiyada ixtisaslaşma kurslarında iştirak edirlər. Bu da artıq kadr potensialına arxayın olmağa imkan yaradır.
   Azərbaycanın İrandakı keçmiş səfiri Əliyar Səfərliyə görə, diplomat hər şeydən əvvəl vətənpərvər olmalıdır: "Son vaxtlar diplomatlarımız arasında peşəkarların sayı artıb.
   Getdikcə bu proses daha da güclənəcək. Çünki Diplomatiya Akademiyası fəaliyyətə başlayıb və öz işini yüksək səviyyədə qurub. Onun rektoru, Azərbaycanın ABŞ-dakı keçmiş səfiri Hafiz Paşayev də öz işinin peşəkarı sayılır. Akademiya xarici diplomatlarla sıx əməkdaşlıq edir. Dünya şöhrətli diplomatlar Azərbaycana dəvət olunur və onlarla hərtərəfli söhbətlər aparılır, müzakirələr həyata keçirilir. Mən arzu edərdim ki, Diplomatiya Akademiyası Azərbaycanın təcrübəli diplomatlarının da bilik və bacarıqlarından istifadə etsin, yararlansın. Sovet dövründə peşəkar diplomatiya ilə məşğul olan və Heydər Əliyev məktəbinin yetirməsi sayılan Vəfa Quluzadənin tələbələrlə görüşünün təşkil edilməsi çox yaxşı olardı. Diplomat olmaq o demək deyil ki, yalnız ingilis diplomatlarını dinləməlisən, onların kitablarını oxumalısan. Xarici diplomatlar Azərbaycan haqqında bizim qədər məlumatlı ola bilməzlər. Azərbaycanın siyasi, ictimai vəziyyətilə bağlı öz diplomatlarımızın bilikləri tələbələrə çatdırılmalıdır".
   Ə.Səfərli qeyd edir ki, tədricən xaricdəki diplomatik korpuslarımızda ixtisarlar aparılmalı və peşəkarlar önə çəkilməlidir: "Elə səfirlərimiz, diplomatlarımız var ki, Azərbaycan dilini bilmirlər. Yalnız qonaq qəbul edib-yola salmaqla məşğuldurlar. Amma diplomatlar öz ölkələri barədə kitablar yazmalı, nüfuzlu nəşrlərdə məqalələrlə çıxış etməlidirlər. Bu sahədə ciddi islahatların aparılmasına ehtiyac var. Elə səfirlərimiz var ki, onlar siyasi fəaliyyətlə deyil, bizneslə məşğuldurlar".
   

Müxalif Vətəndaş və İnkişaf Partiyasının (VİP) və Liberal Partiyanın seçki bloku yaratmaq planları təxirə salınıb. Bu barədə çərşənbə axşamı Trend-ə VİP sədri Əli Əliyev bildirib.
   "Keçən həftənin sonlarında hər iki partiya rəhbəri bir araya gələrək, seçki blokunun yaradılması məsələsini müzakirə etdi. Belə qərara gəldik ki, blokun yaradılmasını sentyabr ayının əvvəllərinə qədər ertələyək. Bununla belə, blokun təsisçilərilə bağlı müəyyən qərarımız, mövqeyimiz var. Sentyabr ayında blokun cəmiyyətə təqdim edilməsi prosesi başlayacaq" - Əliyev əlavə edib. İyulun 13-də "Azadlıq" blokuna daxil olan AXCP-nin Müsavat Partiyası ilə seçki blokunun yaradılması haqqında qərar verməsi xəbəri yayıldıqdan sonra bloka daxil olan digər partiyalar blokun fəaliyyətinin dayandığını elan etdilər. "Azadlıq" blokunda üç müxalifət partiyası - Azərbaycan Xalq Cəbhəsi (AXCP), Liberal (ALP), Vətəndaş və İnkişaf (VİP) partiyaları təmsil olunurdu. Əliyevin sözlərinə görə, blokun yaradılması ilə bağlı lazım olan hazırlıq işlərinə başlanıb. "Blokun təsisçiləri haqqında da razılıq əldə edilib. Bizimlə əməkdaşlıq etmək istəyən bir çox fərdi namizədlər, ictimai-siyasi təşkilatların müraciətləri var. Bizimlə əməkdaşlıq edəcək təşkilat və şəxslər cəmiyyətdə təsir imkanlarına malik olmalıdır. Ona görə də qərara alınıb ki, blokla əməkdaşlıq etmək istəyənlər barəsində araşdırma aparılsın. Bizim məqsədimiz ondan ibarətdir ki, yaradacağımız seçki bloku parlament seçkilərində əsas blok kimi çıxış etsin" - Əliyev bildirib.
   Partiya sədri bloku təsis edəcək təşkilatların adlarını açıqlamayıb. "Bu vaxta qədər "Azadlıq" blokunda əməkdaşlıq edən hər iki partiya blokda təmsil olunacaq. VİP və ALP-dən əlavə, bloka bir partiya da qoşulacaq. Hazırda ciddi məsləhətləşmələr həyata keçirilir. Qəti qərar veriləndə cəmiyyətə də bu barədə məlumat veriləcək" - Əliyev deyib.

Azərbaycan ilə Beynəlxalq Valyuta Fondu (BVF) arasında cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə (PL/TMM) sahəsində əməkdaşlığın genişləndirilməsi tədbirləri çərçivəsində BVF-nin PL/TMM sahəsi üzrə ekspertlərindən ibarət missiyasının Bakıya növbəti səfəri başlayıb.
   Azərbaycan Mərkəzi Bankı yanında Maliyyə Monitorinqi Xidmətindən "APA-Economics"ə verilən məlumata görə, 2010-cu il iyulun 29-dək davam edəcək səfərin ilk günündə Maliyyə Monitorinqi Xidmətinin rəhbərliyilə missiyanın nümayəndələri arasında görüş keçirilib. Görüşdə Azərbaycanda PL/TMM sahəsində görülən işlərə dair ətraflı məlumat verilib. BVF-nin ekspertləri Azərbaycanda PL/TMM sisteminin inkişafı sahəsində qısa müddət ərzində əldə edilmiş uğurları yüksək qiymətləndirib. Daha sonra görüşdə Azərbaycanda PL/TMM sisteminin inkişafı ilə bağlı aktual məsələlər və ortamüddətli dövr ərzində BVF tərəfindən Maliyyə Monitorinqi Xidmətinə göstəriləcək dəstək tədbirləri və digər əməkdaşlıq istiqamətləri barədə müzakirələr aparılıb.
   Səfər zamanı missiyanın Maliyyə Monitorinqi Xidmətilə yanaşı, PL/TMM sahəsində fəaliyyət göstərən digər aidiyyəti dövlət orqanlarında da görüşlərin keçirilməsi nəzərdə tutulur. Bununla bərabər, səfər ərzində missiyaya daxil olan ekspertlər tərəfindən Maliyyə Monitorinqi Xidmətinin əməkdaşları üçün informasiya-kommunikasiya texnologiyaları, məlumatların emalı və analitikası mövzuları üzrə təlimlər aparılacaq. Qeyd edək ki, BVF-nin PL/TMM sahəsi üzrə ekspertlərindən ibarət missiyasının Azərbaycana ilk səfəri 2009-cu ilin avqust 31-dən sentyabr 4-dək baş tutub. Həmin səfər çərçivəsində Azərbaycanda PL/TMM sisteminin inkişafı, o cümlədən yeni yaradılmış Azərbaycan Mərkəzi Bankı yanında Maliyyə Monitorinqi Xidmətinin inkişafına müvafiq dəstəyin verilməsi məsələləri ilə bağlı müzakirələr aparılıb. Xatırladaq ki, Azərbaycanda Maliyyə Monitorinqi Xidməti ölkə prezidentin fərmanı ilə 2009-cu il fevralın 23-də yaradılıb. Bu qurum Azərbaycanda cinayət yolu ilə əldə edilmiş pul vəsaitlərinin və ya digər əmlakın leqallaşdırılması və terrorçuluğun maliyyələşdirilməsinin qarşısının alınması sahəsində qanunvericiliklə və "Azərbaycan Respublikasının Mərkəzi Bankı yanında Maliyyə Monitorinqi Xidməti haqqında Əsasnamə" ilə müəyyən edilmiş səlahiyyətləri həyata keçirən dövlət orqanıdır.
   

Dünən Müasir Müsavat Partiyasının qərargahında Qərbi Azərbaycanlıları Əlaqələndirmə Şurası ilə MMP İdarə Heyətinin birgə növbəti toplantısı keçirilib.
   Toplantıda bir neçə ay bundan öncə Qərbi Azərbaycan İcmasının yaradılması üçün verilən qərarların icrası müzakirə olunub.
   Qeyd edək ki, bir müddət bundan öncə Qərbi Azərbaycan İcmasının yaradılması üçün xüsusi işçi qrupu təşkil edilib. Həmin İşçi Qrup bütün bölgələri əhatə edən Qərbi azərbaycanlıların statistik siyahısını çıxarıb və həmin regiondan olan ziyalı və ağsaqqallarla görüşlər keçirib. Həmin görüşlərdə bütün qərbi azərbaycanlıların bir qurum altında birləşməsi üçün müəyyən işlər görülüb. Belə ki, öz ata-baba yurdundan deportasiya olunmuş qərbi azərbaycanlıların həmin torpaqlara qayıtması və yaxud itirilən əmlaklarının geri alınması, beynəlxalq təşkilatlar tərəfindən onların qaçqın kimi statuslarının tanınması üçün imzatoplama kampaniyası başa çatıb. Dünənki toplantıda həmin imzaların Avropa Şurasına, ATƏT-ə, BMT-yə göndərilməsi üçün qəti qərar qəbul edilib. Qərara alınıb ki, həmin imzalar avqust ayında beynəlxalq təşkilatlara göndərilsin.