ABŞ qoşunlarının Əfqanıstandakı hərbi əməliyyatlarına dair məxfi sayılan 92 minə yaxın material mətbuata sızıb. Məxfi materiallara dair minlərlə fayl məxfi sənədlər və məlumatların dərci sahəsində ixtisaslaşmış "WikiLeaks" saytının əlinə keçib.

   Amerika və Böyük Britaniyanın iri nəşrləri isə "WikiLeaks" saytından əldə etdikləri həmin materiallardan çıxarışlar dərc edib. Bu materiallar ABŞ-ın "New York Times", Böyük Britaniyanın "Qardian", Almaniyanın "Der Spigel" qəzetlərində nəşr olunub. Bu, Amerika tarixində ən qlobal informasiya sızıntısı hesab olunur.

   Maraqlıdır ki, məxfi sənədlər ABŞ prezidenti Barak Obamanın Əfqanıstan strategiyasının uğursuz olduğuna yönəlik tənqidlərin artdığı bir dönəmdə ortaya çıxır.

   Ağ Ev artıq rəsmi açıqlama yayıb və sənədlərin 2004-2009-cu illərə aid olduğu bildirilib. Ağ Ev "WikiLeaks" tərəfindən sənədlərin yayımlanmasına da sərt reaksiya verib. Barak Obama administrasiyası məxfi məlumatların dərci barədə qərar qəbul etdiyinə görə sayt rəhbərliyini kəskin tənqid edib.

   Bildirilir ki, sözügedən materiallar Əfqanıstanda amerikalıların həyatını təhlükə altına qoya və ABŞ-ın Əfqanıstana dair yeni strategiya planına ciddi zərbə vura bilər.

   Açıqlamada qeyd olunur ki, ABŞ-ın dövlət qurumlarını risqə atan və milli maraqları təhdid edən bu sənədlərin mətbuata ötürülməsi şəxslər və qurumlar tərəfindən qınanmalıdır. ABŞ hökuməti "WikiLieaks"ı da bu sənədlərlə bağlı Ağ Evlə məsləhətləşməməsini də tənqid edib.

   "WikiLeaks" məxfi məlumatları hansı mənbədən aldığını açıqlamır.

   Əfqanıstan müharibəsi barədə məxfi məlumatlar Amerika hərbçilərinin Əfqanıstandakı hərbi əməliyyatları barədə əsl həqiqətləri üzə çıxarıb.

   Materiallarda, əsasən, Amerika hərbçilərinin "Taliban" liderlərinə qarşı əməliyyatlarından, mülki əfqanların ölümü ilə bağlı indiyədək gizli saxlanan əməliyyatlardan söz açılır.

   Qəzetlər bu hadisəni məlumatların sızdırılması adlandırır. "WikiLeaks" istifadəçiləri qeyd edir ki, Əfqanıstan müharibəsində məxfi xidmət idarələrinin fəaliyyətinə dair 90 min hesabat və məlumat əldə ediblər.

   "Sənədlər Əfqanıstanın münaqişə zonasında vəziyyətə dair brifinqlərin hazırlanması və yeni əməliyyat planlarının təşkil olunması üçün Pentaqon və hərbçilər tərəfindən istifadə olunub" - deyə onlar bildirib.

   Hesabatlar 6 illik hərbi əməliyyatlar gedişində hazırlanıb. Bu müddət ərzində mindən artıq amerikalı və 300 ingilis əsgəri həlak olub.

   Məxfi materiallardan məlum olur ki, koalisiya gücləri Əfqanıstan müharibəsini uduzub. NATO hərbçiləri yüzlərlə dinc sakini qətlə yetirib, taliblər isə koalisiya qüvvələrinə qarşı hücumları intensivləşdirib. Lakin bu məlumatlar uzun müddət KİV-dən gizlədilib.

   Bu sənədlər əfqan münaqişəsilə bağlı açıqlanmamış hallara aiddir və burada "Taliban"a yardım etdiyi üçün Pakistan və İran günahlandırılır.

   Məxfi sənədlərdə "Taliban" liderlərini öldürmək və ya ələ keçirmək üçün xüsusi təyinatlılardan təşkil olunan "qara" birliklərdən, "Taliban"ın təyyarə və vertolyotları vurmaq üçün raketlərə sahib olmasından, Əfqanıstanda hədəfi məhv etməyə qadir "Reaper" pilotsuz aparatlarından istifadə edilməsindən, "Taliban"ın yol kənarına döşədiyi bomba tələlərindən bəhs olunur.

   Sənədlərdən birində yaraqlılarla Pakistanın sabiq kəşfiyyat rəisi, general Həmid Gül arasında iddia edilən görüş təsvir edilib.

   General Gül isə BBC-yə deyib ki, bu hesabat əsl uydurmadır. Rəsmi Vaşinqton Əfqanıstandakı müharibə ilə bağlı on minlərlə məxfi sənədin dərc edilməsini pisləyib. ABŞ bildirib ki, bu, NATO və əfqan əsgərlərini təhlükə ilə üz-üzə qoyaraq, milli təhlükəsizliyi hədə altına alır.