Avropa Liqasında mübarizəni dayandıran "Bakı" klubunun rəhbərliyi istefa verib. Bu haqda apasport.az saytına məlumat verən paytaxt təmsilçisinin baş meneceri Zeynal Məmmədov bildirib ki, özü də daxil olmaqla, digər rəhbər şəxslərin hamısı istefa ərizəsini yazıblar.
   Qeyd edək ki, "Bakı" Avroliqanın III təsnifat mərhələsində Çernoqoriyanın "Buduçnost" klubu ilə hər iki oyunda 2:1 hesablı qələbə qazansa da, mərhələ keçə bilmədi. Buna səbəb UEFA-nın Bakıdakı matçda kamerunlu futbolçu Joel Epallenin cəzası bitmədiyi halda, meydana çıxması və verilən 0:3 hesablı texniki məğlubiyyət idi.
   Məmmədov son qərarı klub prezidentinin verəcəyini bildirib: "Baş verənlərlə bağlı klubdaxili toplantımız olmasa da, qərarımızı vermişik. Düzdür, istefa versək də, klubun işinin dayanmasına imkan vermirik. Çünki yeni çempionatın başlanmasına az vaxt qalıb. Premyer Liqanın startı ərəfəsində lazımi sənədlərin düzəlməsi ilə məşğuluq. Klubumuzun prezidenti Hafiz Məmmədov hazırda ölkə xaricindədir. Yaxın günlərdə vətənə dönəcək və bundan sonra son qərarını verəcək. Onun hansı addım atacağı, klubda fəaliyyətimizi davam etdirib-etdirməyəcəyimizi zaman göstərəcək".
   Məmmədov cəzaya görə, günahın bölünməsini düzgün saymır: "Fikrimcə, burada hamı - İdarə Heyətindən tutmuş adi işçiyə qədər hamı məsuliyyət daşıyır. Günahın daha çox kimdə olub-olmamağı ilə bölgü aparmaq düzgün olmazdı. İnanın ki, baş verənlər mənə bərk təsir edib. Bunu özümə heç cür bağışlaya bilmirəm. Çünki bu məsələdə söhbət tək "Bakı" klubundan yox, bütün Azərbaycan futbolundan gedirdi".
   Qeyd edək ki, Epallenin transfer işləri ilə məşğul olan "Bakı"nın türkiyəli vitse-prezidenti Tunc Afşar ötən həftə istefa verib.

"Xəzər Lənkəran" heyətini Latviya yığmasının üzvü ilə gücləndirib. Fanat.az xəbər verir ki, Lənkəran klubu Denis Romanovsla anlaşıb. Latviyalı futbolçu ilə danışıqlar müsbət yekunlaşıb və o, yaxın günlərdə lənkəranlılarla rəsmi müqaviləyə imza atacaq.
   Qeyd edək ki, "Xəzər Lənkəran" iki gün əvvəl Dmitri Kromarenko ilə yollarını ayırıb. Məlumata görə, "Xəzər Lənkəran" Romanovsun transferi üçün "Slaviya" klubuna 50 min dollar ödəyib.
   Denis bir müddət əvvəl "Neftçi"nin də hədəfində idi. "Neftçi"nin prezidenti Sadıq Sadıqov Romanovsla danışıqlara başladıqlarını açıqlamışdı. Hətta 32 yaşlı qolkiperin iyunun 20-dən start götürəcək növbəti mövsümün hazırlıq prosesinə cəlb olunacağını da bildirmişdi. Lakin sonradan Rauf Mehdiyevlə anlaşan flaqman bu qapıçıdan imtina etdi. Latviyanın "Skonto", "Valmiera", "Ventspils", "Ditton", Rumıniyanın "Dinamo" klublarında forma geynən Romansovun son klubu Çexiya "Slaviya"sı olub. Futbolçu Praqa klubunda heyətə düşə bilməyib. O, 2004-cü ildən sonra 3 dəfə Latviya millisinə dəvət alıb.

"Real" (Madrid) klubunun canlı əfsanəsi və kapitanı Raul Qonzales doğma komandasını tərk etdiyini rəsmən açıqlayıb. Milli.Az "Sport-Ekspress"ə istinadən xəbər verir ki, "Kral klubu"ndakı 18 illik çıxışını başa vuran 33 yaşlı futbolçu guman ki, karyerasını "Şalke"də davam etdirəcək.
   Qeyd edək ki, onun Almaniya klubu ilə 2 illik müqavilə imzalaması barədə məlumat da yayılıb.
   "Bu, mənim həyatımda ən ağır günlərdən biridir. "Real" mənim ikinci evimdir. Burada unuda bilməyəcəyim illər keçirmişəm", - deyə Raul bildirib.
   Xatırladaq ki, Raul 1992-ci ildən "Kral klubu"nun formasını geyir. O, "Kral klubu"nun tarixində ən çox qol vurmuş futbolçudur: Raul 323 qolla digər əfsanə Alfredo di Stefanonu arxada qoyur. O, "Kral klubu"nun heyətində 6 dəfə İspaniya çempionu, 4 dəfə ölkənin Super kubokunun sahibi olub. Raulun aktivində 2 dəfə Çempionlar Liqası çempionluğu da var.

Dieqo Maradona Argentina yığmasının baş məşqçisi kimi qalmağa razıdır. Bir şərtlə ki, ona öz köməkçilərini seçmək hüququ verilsin. Maradona bunu Argentina Futbol Federasiyasının rəhbəri ilə görüşü ərəfəsində deyib. Argentina son dünya çempionatının 1/4 finalında Almaniyaya 0:4 hesabı ilə uduzub. Bundan sonra Maradona istefaya getmək istədiyini demişdi. Amma həmin vaxt ondan vəzifəsində qalmasını xahiş edənlər də az deyildi.

"Mançester Siti" "Liverpul"un ispaniyalı ulduzu Fernando Torresi heyətinə qatmaqda israrlıdır.
   "Guardian" yazır ki, klub bunun üçün "Liverpul"a nə az, nə çox - düz 70 milyon funt sterlinq ödəməyə hazır olduğunu bəyan edib. Məlumata görə, hücumçunu satmaq istəməyən "Liverpul" ona məhz bu qədər qiymət qoysa da, "Mançester Siti" bossları məbləği ödəməyə hazır olduqlarını açıqlayıblar. "Fernando Torres Avropanın ən yaxşı futbolçularından biridir. İndi hər şey onun qərarından asılıdır", - deyə "şəhərlilər"in baş məşqçisi Roberto Mançini bildirib. Bu transfer baş tutarsa, o, İngiltərə Premyer-Liqasında ən bahalı keçid kimi rekord müəyyənləşdirəcək. Hazırkı rekord da "Mançester Siti"yə məxsusdur. 2 il əvvəl "Real"dan Robinyonu 32,5 milyon funt sterlinqə almış klub yeni rekord müəyyənləşdirməyə yaxındır.
   

"Qalatasaray"ın braziliyalı futbolçusu Elano Blumer karyerasını Rusiya Premyer Liqasında davam etdirməyə yaxındır. Apasport.az saytının məlumatına görə, Moskva MOİK-i 29 yaşlı hücuma meylli yarımmüdafiəçinin keçidi ilə bağlı "Cim Bom"a rəsmi təklif irəli sürüb. Ruslar Elanonun transferini 9 milyon avro qiymətləndirir. Bu isə "Qalatasaray"ın bir il öncə Blumeri almağa görə "Mançester Siti" klubuna ödədikləri məbləğdən 2 milyon çoxdur. Ancaq istanbullular Braziliya yığmasının da əsas heyətinin üzvü olan futbolçunu 12 milyondan aşağı satmaq fikrində deyil. Qeyd edək ki, MOİK-lə "Qalatasaray" arasında danışıqlar Elano tətildən qayıdandan sonra bərpa olunacaq.
   

Dünya futbolunun kralı Pele Bakıya gələ bilər. Milli.Az xəbər portalının azerisport.com saytına istinadən verdiyi məlumata görə, AFFA rəhbərliyi 2012-ci ildə Pelenin Azərbaycana dəvət olunması məsələsini nəzərdən keçirir. Qeyd edək ki, həmin il Azərbaycanda 17 yaşadək olan qızlardan ibarət millilər arasında dünya çempionatı keçiriləcək.
   

Türkiyə Bank Asiya I liqasında çıxış edən "Mersin İdman Yurdu" borcunu ödəməyin yolunu tapıb. Apasport.az saytının məlumatına görə, Azərbaycan yığmasının sabiq üzvləri İlqar Qurbanov və Ernani Pereyranın forma geyindiyi komanda avqustun 8-də Suriya millisi ilə yoldaşlıq görüşü keçirəcək və açılış mərasimində Hadisə oxuyacaq.
   Klub prezidenti Ali Kahramanlı bildirib ki, belə bir addım atmalarında əsas məqsəd komandasına avtobus almaq və borclarından bir hissəsini ödəməkdir: "Klubu sevən hər kəsin bizə dəstək verəcəyinə əminəm. Çünki bizim belə bir addım atmağımız komandamızın gələcəyi üçündür. İnanıram ki, "Evrovizion" iştirakçısı Hadisənin konserti bizə daha çox pul qazandıracaq".
   Qeyd edək ki, növbəti mövsümdə Türkiyə Super Liqasına yüksəlməyi planlaşdıran "Mersin İdman Yurdu" Hadisə ilə müqavilə imzalayıb və belə konsertlərin tez-tez olması planlaşdırılır.
   

Rusiya yığmasının qapıçısı İqor Akinfeyev karyearsını İngiltərə Premyer Liqasında davam etdirəcək. Fanat.az xəbər verir ki, "Mançester Yunayted" və "Arsenal"dan təklif alan rus qolkiper London klubunun xeyrinə seçim edib.
   "The Sun" qəzetinin xəbərinə görə, həmyerlisi və komanda yoldaşı Andrey Arşavin amilini nəzərə alan Akinfeyev "Arsenal"ın təklifinə müsbət cavab vermək niyyətindədir.
   Rus qapıçı açıqlamasında "Arsenal"la "Mançester Yunayted"in dünyanın ən böyük klubları olduğunu bildirib və bu klublarda oynamağın qürurverici olduğunu deyib. O, eyni zamanda ingilis klubları ilə yanaşı, "Yuventus"dan da təklif aldığını qeyd edib.
   Qeyd edək ki, Akinfeyev 2003-cü ildən Moskva ÇSKA-sının formasını geyinir və indiyədək 180 oyunda komandanın qapısını qoruyub. Moskva klubunun heyətində 3 dəfə Rusiya çempionu, 4 dəfə ölkə kubokunun və 4 dəfə Super Kubokun qalibi olan qolkiper 2004/2005 mövsümündə UEFA Kubokunu başı üzərinə qaldırıb. 2004-cü ildən 40 dəfə Rusiya millisinin formasını geyinən Akinfeyev 2008-ci ildə Avropa çempionatının bürünc medalını qazanıb.