ABŞ qoşunlarının Əfqanıstandakı hərbi əməliyyatlarına dair məxfi sayılan 92 minə yaxın material mətbuata sızıb. Məxfi materiallara dair minlərlə fayl məxfi sənədlər və məlumatların dərci sahəsində ixtisaslaşmış "WikiLeaks" saytının əlinə keçib.
   Amerika və Böyük Britaniyanın iri nəşrləri isə "WikiLeaks" saytından əldə etdikləri həmin materiallardan çıxarışlar dərc edib. Bu materiallar ABŞ-ın "New York Times", Böyük Britaniyanın "Qardian", Almaniyanın "Der Spigel" qəzetlərində nəşr olunub. Bu, Amerika tarixində ən qlobal informasiya sızıntısı hesab olunur.
   Maraqlıdır ki, məxfi sənədlər ABŞ prezidenti Barak Obamanın Əfqanıstan strategiyasının uğursuz olduğuna yönəlik tənqidlərin artdığı bir dönəmdə ortaya çıxır.
   Ağ Ev artıq rəsmi açıqlama yayıb və sənədlərin 2004-2009-cu illərə aid olduğu bildirilib. Ağ Ev "WikiLeaks" tərəfindən sənədlərin yayımlanmasına da sərt reaksiya verib. Barak Obama administrasiyası məxfi məlumatların dərci barədə qərar qəbul etdiyinə görə sayt rəhbərliyini kəskin tənqid edib.
   Bildirilir ki, sözügedən materiallar Əfqanıstanda amerikalıların həyatını təhlükə altına qoya və ABŞ-ın Əfqanıstana dair yeni strategiya planına ciddi zərbə vura bilər.
   Açıqlamada qeyd olunur ki, ABŞ-ın dövlət qurumlarını risqə atan və milli maraqları təhdid edən bu sənədlərin mətbuata ötürülməsi şəxslər və qurumlar tərəfindən qınanmalıdır. ABŞ hökuməti "WikiLieaks"ı da bu sənədlərlə bağlı Ağ Evlə məsləhətləşməməsini də tənqid edib.
   "WikiLeaks" məxfi məlumatları hansı mənbədən aldığını açıqlamır.
   Əfqanıstan müharibəsi barədə məxfi məlumatlar Amerika hərbçilərinin Əfqanıstandakı hərbi əməliyyatları barədə əsl həqiqətləri üzə çıxarıb.
   Materiallarda, əsasən, Amerika hərbçilərinin "Taliban" liderlərinə qarşı əməliyyatlarından, mülki əfqanların ölümü ilə bağlı indiyədək gizli saxlanan əməliyyatlardan söz açılır.
   Qəzetlər bu hadisəni məlumatların sızdırılması adlandırır. "WikiLeaks" istifadəçiləri qeyd edir ki, Əfqanıstan müharibəsində məxfi xidmət idarələrinin fəaliyyətinə dair 90 min hesabat və məlumat əldə ediblər.
   "Sənədlər Əfqanıstanın münaqişə zonasında vəziyyətə dair brifinqlərin hazırlanması və yeni əməliyyat planlarının təşkil olunması üçün Pentaqon və hərbçilər tərəfindən istifadə olunub" - deyə onlar bildirib.
   Hesabatlar 6 illik hərbi əməliyyatlar gedişində hazırlanıb. Bu müddət ərzində mindən artıq amerikalı və 300 ingilis əsgəri həlak olub.
   Məxfi materiallardan məlum olur ki, koalisiya gücləri Əfqanıstan müharibəsini uduzub. NATO hərbçiləri yüzlərlə dinc sakini qətlə yetirib, taliblər isə koalisiya qüvvələrinə qarşı hücumları intensivləşdirib. Lakin bu məlumatlar uzun müddət KİV-dən gizlədilib.
   Bu sənədlər əfqan münaqişəsilə bağlı açıqlanmamış hallara aiddir və burada "Taliban"a yardım etdiyi üçün Pakistan və İran günahlandırılır.
   Məxfi sənədlərdə "Taliban" liderlərini öldürmək və ya ələ keçirmək üçün xüsusi təyinatlılardan təşkil olunan "qara" birliklərdən, "Taliban"ın təyyarə və vertolyotları vurmaq üçün raketlərə sahib olmasından, Əfqanıstanda hədəfi məhv etməyə qadir "Reaper" pilotsuz aparatlarından istifadə edilməsindən, "Taliban"ın yol kənarına döşədiyi bomba tələlərindən bəhs olunur.
   Sənədlərdən birində yaraqlılarla Pakistanın sabiq kəşfiyyat rəisi, general Həmid Gül arasında iddia edilən görüş təsvir edilib.
   General Gül isə BBC-yə deyib ki, bu hesabat əsl uydurmadır. Rəsmi Vaşinqton Əfqanıstandakı müharibə ilə bağlı on minlərlə məxfi sənədin dərc edilməsini pisləyib. ABŞ bildirib ki, bu, NATO və əfqan əsgərlərini təhlükə ilə üz-üzə qoyaraq, milli təhlükəsizliyi hədə altına alır.
   

BP-nin icraçı direktoru Toni Heyvardın 24 saat ərzində istefa verəcəyi gözlənir. Hazırda onun vəzifəsini tərk etməsinin şərtləri şirkət rəhbərliyində müzakirə olunur. Toni Heyvard Meksika körfəzində neft axıntısına görə ciddi təzyiqlərə məruz qalmışdı. BP-nin tənqidlərə cavab olaraq yaydığı rəsmi bəyanatında bildirilirdi ki, şirkətin idarə heyəti və yüksək vəzifəli şəxsləri onu dəstəkləyir.
   BP-nin biznes redaktoru Robert Peston deyir ki, böyük ehtimalla, Heyvardı onun amerikalı həmkarı Bob Dadli əvəz edəcək. O, hazırda neftdən çirklənmiş ərazinin təmizlənmə əməliyyatlarına cavabdehdir.
   BP prezidentin istefasına hazırlaşdığı bir vaxtda digər tərəfdən fəlakətin xərclərini dəqiqləşdirir. Şirkətin təmizləmə işlərinə, bütün təzminat iddialarına və cərimələrə 30 milyard dollar ayıracağı gözlənir. Bu da böyük şirkət üçün bir rübdə böyük itki deməkdir. Bu gün BP-nin ikinci rüb üzrə maliyyə nəticələri elan olunmalıdır.
   Artıq şirkət indiyə qədər özünün bazar dəyərinin 40 faizini itirib. Qəzanın aradan qaldırılmasına nəzarət edən ABŞ hökuməti rəsmisi bildirib ki, quyunun tam basdırılması işinə bir qədər sonra başlanacaq. Çünki buna hazırlıq işləri hələ davam edir.
   Sahil mühafizə xidmətinin istefada olan admiralı Ted Alen deyib ki, boru kəmərinin yalnız calamaq işi qalıb ki, bu həftə ərzində bu iş görüləcək. Avqustun ilk həftəsindən quyunun tam ləğvi əməliyyatı başlanacaq. Quyunun ağzına yerləşdirilmiş müvəqqəti qapaq, bir həftədən çoxdur ki, neft axıntısının qarşısını alıb.
   Toni Heyvard 28 il BP-də işləyib. O, 2007-ci ildə şirkətin icraçı direktoru vəzifəsinə təyin olunanda jurnalistlərə bildirmişdi ki, əsas diqqətini təhlükəsizlik və etimad məsələlərinə yönəldəcək. Lakin aprelin 20-də baş verən və 11 işçinin ölümünə və ABŞ tarixində ən böyük neft çirklənməsinə səbəb olan qəza Heyvardın vəzifəsinin öhdəsindən layiqincə gəldiyini şübhə altına aldı.
   Çoxları deyir ki, sırf piar nöqteyi-nəzərindən Bob Dadlinin bir üstünlüyü var ki, o amerikalıdır, Amerika ləhcəsində danışır. Bob Dadli Missisipidə boya-başa çatıb. BP-nin məlumatlarına görə, körfəz regionu ilə sıx bağlı olan bir şəxsdir. O, BP-yə 1999-cu ildə BP-nin AMOKO ilə birləşməsindən sonra gəlib. Ötən ildən rəhbər heyətə yüksəlib.

Türkiyə hüquq-mühafizə orqanlarının türk ordu generallarına qarşı "Balyoz planı" (Gürz əməliyyatı) adı altında dövlət çevrilişi ittihamı davam edir.
   Ərdoğan hökuməti hakimiyyətə gəldikdən sonra ilk hücumlar orduya başladı və buna əsas verən Güner Tuncay adlı bir şəxsin ifadələri oldu. Maraqlısı budur ki, həmin şəxs müstəntiqlərə ifadə verdikdən sonra "təhlükəsizliyini təmin etmək" adı ilə hansı yollarlasa Kanadaya gedib və bir adamın ifadəsi, əslində Türkiyədə nüfuz sahibi olan 10-larla generalın həbsinə səbəb olub.
   Məhkəmə qarşısına çıxarılmağa hazırlaşdırılan 104 nəfərdən 32-si generaldır. Bu generalların sırasında Çətin Doğan, Engen Sayın kimi məşhur generallar, dəniz və hərbi hava qüvvələri komandanları da var. Son olaraq müstəntiqə ifadə verərək sərbəst buraxılan bir qrup istefada olan generallar barəsində son günlərdə yenidən həbs qərarı çıxarılıb. Bundan əlavə, bu hərbçilər arasında hazırda hərbi xidmətini yerinə yetirməkdə olan yüksək rütbəli zabitlər də az deyil.
   Hadisəni şərh edən ekspertlər bu məsələnin heç də generalların hər hansı dövlət çevrilişi edəcəyilə bağlamır. Onların fikrincə, bu həbslərlə Ərdoğan hökuməti Türkiyə cəmiyyətində böyük ictimai təsirə malik ordunun cəmiyyətə təsirini azaltmaq, generalları həbsə almaqla ordunun siyasi həyata təsirini aradan qaldırmaq istəyir. Ərdoğan hökuməti 1980-ci ildə ordunun Türkiyəni vətəndaş müharibəsi astanasından xilas etməsinə xidmət edən və həmin ilin sentyabrında dövlət çevrilişilə tamamlanan "12 eylül" hadisələrinin 30 illiyini qeyd etməyə hazırlaşır. Yenə də ekspertlərə görə, Ərdoğan hökuməti heç də bu hadisələrin ildönümünü qeyd etmək yox, bundan istifadə edərək, orduya qarşı qarayaxma kampaniyası aparmaq istəyir.
   
   

ABŞ Mərkəzi Kəşfiyyat İdarəsinin (MKİ) sabiq rəhbəri Maykl Hayden hesab edir ki, İrana qarşı müharibə qaçılmazdır.
   Milli.Az xəbər portalının məlumatına görə, o bu fikri CNN telekanalına müsahibəsində səsləndirib: "İranın nüvə obyektlərinə hücum ehtimalı indi daha yüksəkdir. Artıq İrana qarşı bu addımın atılması qaçılmazdır". MKİ-nin keçmiş rəhbəri bildirib ki, "İranın nüvə proqramını dayandırmaması ABŞ-a başqa yol saxlamır". Onun fikrincə, önləyici tədbirlər görülməsə, İran nüvə proqramını kütləvi qırğın silahının istehsalına imkan verəcək dərəcəyə çatdıracaq.