Son dövrlər Dağlıq Qarabağda müharibənin başlayacağına dair Ermənistanda səslənən fikirlər durmadan artır. Ekspertlər isə bunun təsadüf olmadığını və baş verənlərin arxasında ciddi məqamların dayandığını bildirir. İlk növbədə diqqət ona çəkilir ki, ermənilər müharibənin Azərbaycan tərəfindən başlanacağını xüsusi qabardır və bunu beynəlxalq ictimaiyyətin diqqətinə çatdırmağa cəhd edirlər.

   Məsələn, Ermənistanın Milli və Strateji Tədqiqatlar Mərkəzinin direktoru Riçard Kirakosyan bildirib ki, həqiqətən Dağlıq Qarabağda hərbi əməliyyatların bərpası ehtimalı son dərəcə yüksəkdir: "Ermənistan hadisələrin gözlənilməz istiqamətdə inkişaf edə biləcəyinə hazır olmalıdır. Sərhəddə daha bir kiçik insident hərbi əməliyyatların bərpasına və vəziyyətin nəzarətdən çıxmasına səbəb ola bilər. Azərbaycan Ermənistana müharibə elan edə bilər. Ermənistan buna hazır olmalıdır".

   Ermənistan müxalifətinin rəhbəri Levon Ter-Petrosyan bildirib ki, Dağlıq Qarabağ münaqişəsilə bağlı prosesdə hələ də müharibə təhlükəsi var və xalqı aldatmaq lazım deyil: "Dağlıq Qarabağda müharibə ehtimalı hələ də aktualdır. Bunu həm Azərbaycan, həm də Ermənistan rəhbərləri də anlayır". Onun sözlərinə görə, son diplomatik səylər münaqişənin həllinə yönəlib. Lakin müharibə təhlükəsi hələ də var və xalqı aldatmaq lazım deyil.

   Vaxtilə Qarabağ müharibəsində iştirak etmiş separatçıların komandiri olmuş Arkadi Karapetyan da bildirib ki, Azərbaycanla müharibə qaçılmazdır və bu, yalnız zaman məsələsidir: "İstənilən an müharibəyə hazır olmalıyıq".

   Ekspertlər qeyd edir ki, ermənilərin müharibə təhlükəsini qabartması və məsuliyyəti Azərbaycanın üzərinə qoyması əslində diqqəti yenilənmiş "Madrid prinsipləri"ndən yayındırmağa yönəlib. Çünki yenilənmiş "Madrid prinsipləri"ilə bağlı Bakı konkret mövqe ortaya qoyub, Ermənistan isə buna münasibət bildirmək istəmir. Bu fonda bəzi versiyalara görə, beynəlxalq təşkilatların Qarabağ münaqişəsi məsələsində getdikcə daha obyektiv mövqe tutması Ermənistanın məlum prinsiplərlə manipulyasiya imkanlarını xeyli azaldır. Rusiya, ABŞ və Fransa prezidentlərinin ötən ay Kanadanın Toronto şəhərində qəbul etdiyi birgə bəyanat Azərbaycanın Dağlıq Qarabağa dair siyasətinin dəstəkləndiyi anlamına gəlməyə imkan verir. Çünki rəsmi Bakının mövqeyi həmsədr ölkə başçılarının bəyanatında nəzərə alınır. Elə vasitəçilər də regiona səfəri zamanı həm prezidentlərin bəyanatından irəli gələn məsələlər, həm də son günlər atəşkəs rejiminin pozulmasının yarada biləcəyi problemlərə ciddi şəkildə toxundular.

   Hələlik Ermənistan tərəfinin addımları Dağlıq Qarabağa dair nizamlanma formulunun tam işə düşməsinə imkan vermir. Bununla belə son hadisələr, xüsusən də Toronto bəyanatı Ermənistan üçün ciddi xəbərdarlıq sayılmalıdır. Sənəddə Azərbaycanın ərazi bütövlüyünün tanınması faktı açıq ortadadır və İrəvan bu faktı təhrif etmək iqtidarında deyil. İndi isə, qeyd olunduğu kimi, ermənilər müharibə təhlükəsini qabartmaqla diqqəti yenilənmiş "Madrid prinsipləri"ndən yayındırmağa çalışır. Lakin erməni tərəfi üçün çətinlik yaradan bir amil də odur ki, onlar son zamanlar apardıqları təbliğat kampaniyası ilə Azərbaycanın hərbi çağırışlarının beynəlxalq səviyyədə pislənməsinə nail ola bilmədilər. Bu isə o deməkdir ki, hədəfin yayındırılması taktikası bu dəfə iflasa uğradı. Beynəlxalq təşkilatların nümayəndələri də cəbhədə atəşkəs rejiminin pozulmasına Sarkisyan iqtidarının gözlədiyi reaksiyanı vermədilər. Problemin ATƏT səviyyəsində müzakirəsi isə qarşı tərəfə heç nə vəd etmir. ATƏT-in hazırkı sədri, Qazaxıstanın xarici işlər naziri Kanat Saudabayev regional proseslərin münaqişənin tezliklə həllini tələb etdiyini və bu məsələnin tənzimlənməsinə maksimum yardımçı olacağını bir daha diqqətə çatdırdı.

   Görünür, beynəlxalq birlik diplomatik davranış qaydalarında ciddi korrektələr edir və Dağlıq Qarabağ kimi münaqişələrin həllində ədalətsiz mövqenin Cənubi Qafqazda tam sabitliyin yaranmasına imkan vermədiyini anlayır.