"Bakı"nın Avropa Liqasının II təsnifat mərhələsinin cavab oyunları çərçivəsində Çernoqoriyada "Buduçnost"la keçirəcəyi qarşılaşma boş tribunalar önündə baş tuta bilər. Apasport.az saytının məlumatına görə, buna azarkeşlərin görüşü boykot etməsidir.
   Çernoqoriyanın ən böyük fanklubu "Varvari Podqoritsa" bütün azarkeşləri boykot etməyə çağırıb. Matçı izləməkdən imtina edən təşkilat bununla bağlı müraciət yayıb: "Bizə belə klub prezidenti, belə rəhbərlik lazım deyil. Komandamızı sevən, ona kömək edən prezidenti iş başında görmək istəyirik.
   Yoxsa ki, ötən mövsümün sonlarında başladığımız boykot hələ də davam edir. Dəyişikliklər baş verməsə bu hələ uzun müddət davam edəcək. Bəlkə də bir neçə yüz adam tribunalarda olacaq. Lakin onlar indiki rəhbərliyin yaxınlarıdır. "Buduçnost"u ürəkdən sevənlərin heç biri arenada olmayacaq".
   Qeyd edək ki, "Buduçnost" - "Bakı" oyunu bu gün keçiriləcək.

Türkiyənin "Fənərbaxça" futbol klubu fransız sağ cinah yarımmüdafiəçisi İssiar Dianın transferini gerçəkləşdirib.
   Lent.az-ın Türkiyənin "Vatan" qəzetinə istinadən verdiyi məlumata görə, Fransanın "Nancy" klubundan transfer edilən İssiar Dia ilə 4 illik müqavilə bağlandığı bildirilir.
   "Fənərbaxça" klubunun rəsmisi Murat Özaydınlı deyib ki, İssiar Dia həftənin sonunda komandaya qatılacaq. "Fənərbaxça" klubunun baş məşqçisi Aykut Kocaman isə bildirib ki, 23 yaşlı İssiar Dia sürəti və driblinqləri ilə fərqlənən bir oyunçudur, bu mövsüm komandasının 8 qolunu vurub.

Madrid "Real"ı həftəsonuna qədər Maykon Duqlasın keçidi ilə bağlı məsələni yekunlaşdırmaq niyyətindədir. Fanat.az xəbər verir ki, "Kral Klubu" braziliyalı müdafiəçiyə görə sonuncu dəfə "İnter"ə müraciət edib.
   Maykonun transferi üçün 22 milyon avro təklif edən "Real" rəhbərliyi rədd cavabı alacağı təqdirdə, bu transferdən vaz keçəcəyini bəyan edib və "İnter"in düşünmək üçün həftəsonuna qədər vaxtı var.
   Maraqlıdır ki, bir müddət əvvəl "Real" Maykon üçün daha böyük məbləğ - 25 milyon avro təklif etmişdi. Lakin "İnter"in prezidenti Massimo Moratti futbolçunu 30 milyon avro qarşılığında buraxacaqlarını demişdi.
   Qeyd edək ki, Maykonun özü "Real"a keçmək və yenidən Joze Maurinyonun rəhbərliyi altında çıxış etmək istəyir.

İspaniya futbolunun əfsanəsi Raul Qonsales karyerasını İngiltərə Premyer Liqasında davam etdirmək istəyir. Raul böyük ehtimalla "Tottenhem" klubu ilə razılıq əldə edəcək.
   İspaniyalı futbolçu ilə "Nyukasl" klubu maraqlansa da "Tottenhem"in bu mövsüm Çempionlar Liqasında mübarizə aparması Raulun ikincilər üzərində seçim etməsinə səbəb olub. "Tottenhem" klubunun baş məşqçisi Hari Rednapp da Raulu komandasında görmək arzusundadır.
   Xatırladaq ki, 33 yaşlı Raul Qonsales "Real" klubunun tarixi ərzində ən məhsuldar futbolçu sayılır. Futbolçu "Kral klubu"nun heyətində 722 matçda meydana çıxaraq 311 qol vurub.
   

Daha bir Azərbaycan klubu fəaliyyətini dayandırıb. Neftçalanı təmsil edən "Anşad Petrol" klubunun fəaliyyətinə son qoyulub. Ötən mövsümün sonuna qədər I divizionda çıxış edən komanda artıq fəaliyyət göstərmir.
   Klub rəhbərliyi artıq komandanın I divizionda çıxış etməyəcəyi barədə Peşəkar Futbol Liqasına məlumat verib. Ötən mövsümün ortalarına qədər "Anşad Petrol"a eyniadlı neft şirkəti sponsorluq edirdi. Daha sonra bu şirkət ləğv olunduğundan komanda bir müddət sponsorsuz qaldı və bir neçə oyunu təxirə salındı.
   İkinci dövrənin sonlarında isə "Anşad Petrol" SOCAR-ın (Azərbaycan Respublikası Dövlət Neft Şirkəti) sponsorluğu altında meydana çıxdı. Artıq SOCAR da Neftçala klubunu maliyyələşdirmədiyindən, komanda fəaliyyətini dayandırmalı olub.
   

Malayziyada yaşayan Noa Qaqat adlı molla bu ölkənin müsəlman əhalisini "Mançester Yunayted"in formasını geyinməməyə çağırıb. Mollanın sözlərinə görə, buna səbəb geyimlərin üzərində klubun rəmzi olan şeytanın təsvirinin əks olunmasıdır. "Bu bizim inancımıza ziddir. Müsəlmanlar üzərində şeytan təsviri olan geyim geyinməməlidir. "Mançester Yunayted"in futbol geyimləri hədiyyə olunsa belə, müsəlmanlar onu qəbul etməkdən imtina etməlidir", - deyə Noa Qaqat bildirib.
   Xatırladaq ki, İngiltərənin "Mançester Yunayted" klubunun Malayziyada çoxlu sayda azarkeş ordusu var.

İngiltərənin "Çelsi" klubunun qolkiperi Petr Çex məşq prosesi zamanı zədələnib. Qapıçının İngiltərə Premyer Liqasının açılış qarşılaşmasında forma geyinə bilməyəcəyi dəqiqləşib. Çexin sağ ayağından zədə aldığı bildirilir.
   28 yaşlı çexiyalı qapıçının Premyer Liqanın ikinci turunda "Mançester Yunayted"ə qarşı vacib oyunda da meydanda olmayacağı deyilir.
   Xatırladaq ki, Petr Çex bir müddət əvvəl başından aldığı zədədən sonra bütün matçlara xüsusi qoruyucu ilə çıxır.
   

Futbol üzrə Türkiyə Superliqasında 2010-2011-ci il mövsümünün püşkü atılıb.
   Milli.Az xəbər portalı CNN Türk-ə istinadən xəbər verir ki, mövsümün ilk derbisi 5-ci turda "Fənərbağça" və "Beşiktaş" klubları arasında olacaq. "Qalatasaray" klubu 9-cu turda "Fənərbağça" ilə, 14-cü turda isə "Beşiktaş"la qarşılaşacaq. Çempionatın 2-ci turunda "Trabzonspor" və "Fənərbağça", 7-ci həftədə "Trabzonspor" və "Beşiktaş", 11-ci turda isə "Trabzonspor" və "Qalatasaray" klubları qarşı-qarşıya gələcək.
   2010-2011-ci il mövsümü avqustun 15-də başlayacaq və birinci dövrəyə dekabrın 19-da yekun vurulacaq. İkinci dövrənin oyunları gələn il yanvarın 23-dən mayın 22-dək davam edəcək.
   

İtaliyanın baş naziri Silvio Berluskoni sahibi olduğu "Milan" klubuna 1 milyard avro xərcləyib.
   Milli.Az xəbər portalının İtaliya mətbuatına istinadən verdiyi məlumata görə, bunu Berluskoninin özü son zamanlar komandaya az pul qoyulduğu üçün "Milan"ın uğursuz çıxış etməsi haqda tənqidlərə cavabında bildirib: "İtaliyada heç bir ailə futbola bizdən çox pul xərcləməyib. 25 ildə mən "Milan"a 1 milyard avro xərcləmişəm".
   

İngiltərənin "Çelsi" klubu 18 yaşlı braziliyalı futbolçu Neymar Da Silvanı heyətinə qatmaq əzmindədir. London klubu futbolçu üçün "Santos" klubuna 17 milyon funt sterlinq ödəməyə hazır olduğunu bildirib.
   Da Silvanın klubu isə ən azı 20 milyon tələb edir. Braziliya mətbuatı Neymar Da Silvanı "gələcəyin Pelesi" olaraq dəyərləndirir.
   Xatırladaq ki, Da Silva ötən mövsüm Braziliya çempionatında meydana çıxdığı 33 matçda 32 qola imza atıb.