Azərbaycan Beynəlxalq Bankı (ABB) səhmdarlarının iyulun 20-də keçiriləcək ümumi iclasında bankın idarə olunmasında və fəaliyyətindəki ciddi nöqsanlar müzakirə predmeti olacaq. Bankın İdarə Heyətinin sədri Cahangir Hacıyevin vəzifəsindən azad ediləcəyi istisna olunmur. Bu barədə "Turan"a bank dairələrindəki mənbə bildirib.

   Ötən il dövlət başçısı Maliyyə Nazirliyinə kredit təşkilatlarında dövlətin maraqlarını təmsil etmək səlahiyyətlərini verib. Bundan sonra Maliyyə Nazirliyi ABB-də miqyaslı yoxlama aparıb.

   "Bankın əsas fəaliyyətilə bağlı olmayan məqsədlərə hədsiz vəsaitin sərf olunduğu aşkar edilib ki, bu da təşkilatın maddi durumuna ziyan vurub" - mənbə qeyd edib. Lakin ABB-nin mətbuat xidmətindən "Turan"a bildirilib ki, qarşıdakı toplantı və müzakirə olunacaq məsələlər barədə məlumatları yoxdur.

   Son illər Cahangir Hacıyevin və İdarə Heyətinin digər üzvlərinin adları bankın səhmlərinin qanunsuz alınması ilə bağlı qalmaqallarda hallanır. Bundan əlavə, səhmdarlar ABB rəhbərliyini bankın idarə olunması ilə bağlı hüquqlarının pozulmasında ittiham edir. Öz tarixində ilk dəfə olaraq üç hesabat dövründə ardıcıl olaraq bankın dividend verməməsi də səhmdarların narazılığına səbəb olub.

   Səhmdarların növbəti iclasının gündəliyinə C.Hacıyevin istefa məsələsinin daxil ediməsinə səhmdarlardan biri - Şahin Əlizadə təşəbbüs göstərib. Bu barədə həm bankın rəhbərliyinə, həm də Maliyyə Nazirliyinə məlumat verilib. Hazırda ABB-nin üç əsas rəhbər orqanından ikisinə Maliyyə Nazirliyinin nümayəndələri rəhbərlik edir: nazir müavini Azər Bayramov Müşahidə Şurasının sədridir, nazirliyin şöbə rəisi Ziyəddin Allahverdiyev isə bankın Auditor Komitəsinə rəhbərlik edir.

   Bundan əlavə, səhmdarların ümumi yığıncağında istənilən mühüm məsələyə dair qərarın qəbulunda həlledici söz bankın 50,2% səhminə sahib olan dövlətə məxsusdur. Ölkənin ali rəhbərliyinin sanksiyası olarsa, dövlətin ABB-də ciddi təmsilçiliyi prosedur problemlər olmadan bank menecmentinin dəyişdirilməsinin həyata keçirilməsinə imkan verir.

   ABB Azərbaycanın bank bazarında əvəzsiz liderdir. Bu il aprelin 1-nə olan məlumata görə, ümumi bank aktivlərinin 43,7%-i (5 mlrd. 257 mln. manat), kreditlərin 49,23%-i (3mlrd. 941mln.manat), depozitlərin 24,8%-i (1mlrd. 985 mln. manat), bütün bank sisteminin ümumi kapitalının 26,88%-i (472,5 mln. manat)ona məxsus olub.